“Hi Lava Ku N’wi Hlamula Hi Ku, ‘Ina!’”

HOFISI ya rhavi ya Timbhoni ta Yehovha eNigeria ya ha ku kuma papila, leri xiphemu xin’wana xa rona a xi ri ni marito lama landzelaka:

“Jaha ra hina Anderson, ri love loko ri ri ni malembe ya 14 hi vukhale. Loko a nga si lova, a a khathalela tihuku timbirhi. A a lava ku ti xavisa kutani mali ya kona a yi rhumela ehofisini ya rhavi tanihi munyikelo wa ntirho wo chumayela wa misava hinkwayo. Kambe u love a nga si ti xavisa.

“Hina vatswari va yena tanihi leswi a hi ku tiva ku navela ka yena, hi khathalele tihuku leti kutani hi ti xavisa. Kutani hi mi rhumelela mali ya kona tanihi munyikelo wa Anderson. Hikwalaho ka xitshembiso xa Yehovha, ha tiyiseka leswaku ku nga ri khale ngopfu hi ta tlhela hi vona Anderson. Hi lava ku n’wi hlamula hi ku, ‘Ina!’ loko a hi vutisa loko hi ku hetisisile ku navela ka mbilu ya yena. Hakunene, hi wu langutele hi mahlo ngati nkarhi lowu hi nga ta vona Anderson ku katsa ni ‘papa lerikulu swinene ra timbhoni’ leri nga ta pfuxiwa eku feni.”—Vaheveru 12:1; Yohane 5:28, 29.

Hilaha swi kombisiweke hakona epapileni leri nga laha henhla, ntshembo wa ku pfuxiwa ka vafi, hi wona lowu tiyisaka Vakreste va ntiyiso. Mindyangu ya timiliyoni ku katsa ni ndyangu wa ka va Anderson yi ta va ni ntsako lowukulu loko yi amukela varhandziwa va yona lava dlayiweke hi nala lonkulu ku nga rifu!—1 Vakorinto 15:24-26.

Rito ra Xikwembu ri tamele ntshembo lowu chavelelaka wa ku pfuxiwa ka vafi, tanihi xin’wana xa swilo swo tsakisa leswi nga ta endleka ku nga ri khale emisaveni leyintshwa yo lulama ehansi ka Mfumo wa Xikwembu. (2 Petro 3:13) Loko Bibele yi vulavula hi leswi Xikwembu xi nga ta swi endlela vanhu hi nkarhi wolowo, yi ri: “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:4.