Xana Wa Swi Lava Ku Va Ni Vanghana Lavanene?

VANHU vo tala va lava ku va ni vanghana lavanene. Ku kota ku byela vanghana va wena va xiviri mintokoto ya wena swa tsakisa. Kambe u nga va kuma njhani vanghana va xiviri? Kwalomu ka malembe ya 2 000 lama hundzeke, Yesu u kombise leswaku xilotlelo xo kuma vanghana i ku va ni rirhandzu ro pfumala vutianakanyi. U dyondzisile: “Leswi mi lavaka vanhu va swi endla eka n’wina, swi endleni eka vona hilaha ku fanaka.” (Luka 6:31) Marito wolawo lawa hakanyingi ma vuriwaka Nawu-nsinya, ma kombisa leswaku u fanele u va munhu wo pfumala vutianakanyi ni loyi a hananaka leswaku u va ni vanghana. Entiyisweni, loko u lava ku va ni vanghana, u fanele u va ni xinghana. Njhani?

Vunghana lebyikulu a swi koteki ku byi hlakulela hi ku hatlisa. Phela, vanghana a hi vanhu lava u nga lo va tolovela ntsena. I vanhu lava u va phofulelaka ta le mbilwini. Ku aka vuxaka lebyi tiyeke ni ku byi hlakulela swi lava ku tikarhata. Vunghana hakanyingi byi lava leswaku u rhangisa swilaveko swa vanghana va wena eka swa wena. Vanghana a va vi swin’we hi minkarhi leyi tsakisaka ntsena kambe ni le minkarhini ya maxangu.

U kombisa vunghana bya ntiyiso, ngopfu-ngopfu loko u kombisa ku twelana ni munhu u tlhela u n’wi pfuna hi tindlela tin’wana loko swi laveka. Swivuriso 17:17 yi ri: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.” Entiyisweni, vunghana bya ntiyiso byi nga tiya ngopfu ku tlula vunghana bya swirho swa ndyangu. Swivuriso 18:24 yi ri: “Ku ni vanakulobye lava tshamaka va lunghekele ku tshovelelana, kambe ku ni munghana la namarhelaka ku tlula makwavo.” Xana u nga swi tsakela ku tiva leswi engetelekeke malunghana ni ku hlakulela vunghana byo tano bya ntiyiso? Xana u nga swi tsakela ku va un’wana wa vanhu lava tiviwaka tanihi lava rhandzanaka? (Yohane 13:35) Loko swi ri tano, Timbhoni ta Yehovha ta le ndhawini ya ka n’wina ti ta tsakela ku ku komba leswaku u nga va kuma njhani vanghana va ntiyiso.