Khisimusi—Xana Yi Voyamele Kwihi?

KHUME ra malembe lama hundzeke hi n’hweti ya December, magazini wa U.S.News & World Report exifunengetweni xa wona a wu ri ni xihloko lexi nge, “Ku Lavisisiwa Ka Khisimusi.” Xihloko lexi a xi dzike emhakeni ya loko Khisimusi se yi “tengile lerova yi nga ha tlangeriwi hi xikongomelo xo kurisa mabindzu.” Xana sweswo swi karhi swa endleka hakunene?

Xihloko xexo xi hi nyike swivangelo leswi endlaka leswaku hi nga swi languteli sweswo. Xi te: “A ku na xiviko lexi kombisaka leswaku siku ra ku velekiwa ka Kreste ri tshame ri tlangeriwa ximfumo enkarhini wun’wana wa le mahlweni ka lembe-xidzana ra vumune, ku nga nkarhi lowu Constantine . . . a veke hosi ya le Rhoma ha wona.” Hi ndlela yo karhi, xexo i xikombiso “xa leswaku a nga kona loyi a a swi tiva kahle leswaku Yesu u velekiwe rini.” Xihloko lexi xi pfumerile leswaku “tievhangheli a ti ri vuli lembe leri a velekiweke ha rona, hi nga ha vuli n’hweti kumbe siku ra kona.” Hi ku ya hi n’wamatimu wa le Yunivhesiti ya le Texas, “entiyisweni Vakreste vo sungula a va nga ri na mhaka na ku tlangela siku ra ku velekiwa ka Yesu.”

Ehansi ka xihlokwana lexi nge, “Mhaka ya ku Mbambela,” xihloko lexi xi kambisise “ndlela leyi kereke yi hlawuleke December 25 ha yona.” Xi te: “Vo tala va pfumela leswaku holideyi leyi yi kunguhatiwe hi mano leswaku ku hundzuriwa Saturnalia ni minkhuvo yin’wana ya vuhedeni yi va ya ‘Vukreste.’” “Hi ku endla leswaku Khisimusi yi va eku heleni ka December, ku nga nkarhi lowu vanhu se a va tolovele ku titsakisa ha wona, varhangeri va tikereke va tiyisekise leswaku siku ra ku velekiwa ka Muponisi ri tlangeriwa hi vanhu vo tala.” Exikarhi ka lembe-xidzana ra vu-19, moya wa ku xava ni ku nyikana tinyiko wu tinyike matimba. “Mukhuva lowuntshwa wa ku nyikana tinyiko hi Khisimusi wu hatle wu nghenisa mali yo tala emabindzwini, kutani vaxavisi ni vanavetisi va sungule ku wonga vanhu leswaku va ngheniwa hi moya wa ku xava swilo hi nguva yoleyo.”

Hikwalaho, Khisimusi a yi fanelanga nikatsongo yi hlanganisiwa ni Vukreste bya ntiyiso. Hambileswi Khisimusi ya manguva lawa yi “rhangisaka swinene ta mabindzu,” ntiyiso hileswaku Vakreste va ntiyiso a va si tshama va tiyimisela ku tlangela siku ra ku velekiwa ka Yesu. Ematshan’weni ya sweswo, Bibele yi kandziyisa nkutsulo lowu Kreste a wu nyikeleke hikwalaho ka rifu rakwe ni ku pfuxeriwa etilweni. (Matewu 20:28) Sweswo swi ta tshama swi ri swa nkoka swinene sweswi ni le nkarhini lowu taka.