Xana Wa Wu Tirhisa Nkarhi Lowu U Wu Kumaka Leswaku U Vulavula Hi Ripfumelo Ra Wena?
“XANA ntiyiso wa xiviri wu kona?” Leyi a yi ri nhloko-mhaka ya mphikizano wa ku tsala xitsalwana etikweni ra le Poland. Xitsalwana lexi a xi ri ni swiletelo leswi nge: “A hi wu lavi ntiyiso wa xiviri. Ku hava loyi a wu lavaka. Kahle-kahle a wu kona ntiyiso wa xiviri.” Agata loyi a nga ni malembe ya 15 hi vukhale la nghenaka xikolo xa le henhla naswona a nga Mbhoni ya Yehovha, u tirhise nkarhi wolowo leswaku a hlamusela van’wana hi tidyondzo ta yena ta vukhongeri.
Leswaku a kota ku lunghiselela xitsalwana lexi, Agata u khongelele nkongomiso wa Yehovha, kutani a sungula ku lava rungula leri vulavulaka hi nhloko-mhaka yoleyo. U kume rungula leri yelanaka na yona eka Xihondzo xo Rindza xa July 1, 1995. U tshahe xivutiso lexi Pontiyo Pilato a xi vutiseke Yesu, a ku: “Ntiyiso i yini?” (Yohane 18:38) U vule leswaku xivutiso xexo, a xi kombisa leswaku wa delela, a swi fana niloko a vungunya a ku: ‘Ntiyiso i yini? A wu kona nchumu lowu va nge i ntiyiso!’ Agata u tsale a ku: “Xivutiso lexi Pilato a xi vutiseke xi ndzi tsundzuxa swiletelo swa xitsalwana lexi.”
Hiloko a hlamusela leswaku swi tise ku yini ku va vanhu va pfumela mhaka ya leswaku leswi munhu a swi tekaka swi ri ntiyiso eka yena swi nga ha va swi nga ri ntiyiso eka un’wana nileswaku havumbirhi bya vona va nga ha va va “tiyisile.” U vutise xivutiso lexi nge, “I mani exikarhi ka hina la nga kanyaka mbilu a khandziya xihaha-mpfhuka loko a hi nga yi tshembi hi ku helela milawu leyi kongomisaka swihaha-mpfhuka?” Kutani u kombetele eBibeleni a ku: “Hi tshemba Rito ra Xikwembu hileswi ku nga ni vumbhoni lebyi tiyeke bya leswaku ri sekeriwe etimhakeni leti nga ntiyiso.” U vule leswaku wa tiyiseka leswaku lava lavaka ntiyiso wa xiviri hi mbilu hinkwayo va ta lehisa mbilu kukondza va wu kuma.
Agata u wine diploma yo hlawuleka naswona u kote ku chumayela emahlweni ka tlilasi hinkwayo. Swichudeni-kulobye swo hlayanyana swi pfumele ku dyondza Bibele na yena. Agata wa tsaka leswi a tirhiseke nkarhi lowu leswaku a byela vanhu van’wana vo tala hi tidyondzo ta vukhongeri bya yena. Ina, ku tshama u lunghekele ku vulavula hi tidyondzo ta vukhongeri bya wena swi nga va ni vuyelo lebyinene. Xana hi yihi minkarhi leyi u yi tirhisaka ku vulavula hi tidyondzo ta vukhongeri bya wena?