Xana Yesu A A Ri Na Yona Bibele?

DOO, Yesu a a nga ri na yona Bibele. Hikwalaho ka yini? Hikuva hi nkarhi wa Yesu a ku ri hava Bibele leyi heleleke yo fana ni leyi hi nga na yona namuntlha. Hambiswiritano, emasinagogeni a ku ri ni matsalwa-nsongwa lawa endzhaku ma veke xiphemu xa Bibele leyi hi nga na yona namuntlha. Loko Yesu a ri esinagogeni ya le Nazareta, u hlaye eka buku-nsongwa ya Esaya. (Luka 4:16, 17) Muapostola Pawulo u twe ‘Nawu ni marito ya Vaprofeta swi hlayiwa erivaleni’ eAntiyoka ya le Pisidiya. (Mintirho 13:14, 15) Naswona mudyondzisiwa Yakobo u vule leswaku matsalwa ya Muxe a ma “hlayeriwa ehenhla emasinagogeni hi savata yin’wana ni yin’wana.”—Mintirho 15:21.

Xana munhu un’wana ni un’wana a a ri na tona tibuku-nsongwa ta Matsalwa yo Kwetsima hi lembe-xidzana ro sungula? Swi le rivaleni leswaku mutsheniwa wa Muetiyopiya wa le hubyeni ya Hosi ya Xisati Kandake a a ri na tona, hikuva loko mudyondzisiwa Filipi a hlangana na yena egondzweni leri yaka eGaza a a “tshame ekalichini ya yena, a hlayela ehenhla marito ya muprofeta Esaya.” (Mintirho 8:26-30) Muapostola Pawulo u kombele Timotiya leswaku a ta ni “tibuku-nsongwa, ngopfu-ngopfu leta madzovo.” (2 Timotiya 4:13) Hambileswi Pawulo a nga vulangiki leswaku hi tihi tibuku-nsongwa ta kona, swi le rivaleni leswaku tibuku-nsongwa teto a ti ri swiphemu swa Matsalwa ya Xiheveru.

Hi ku ya hi Alan Millard, profesa wa tindzimi ta Vayuda, swi nga endleka leswaku eka Vayuda, vanhu lava a va ri ni tibuku-nsongwa ta Matsalwa, a ku ri “vavanuna lava fuweke ePalestina, ni hinkwavo lava a va tivula leswaku va dyondzekile swin’we ni Vafarisi van’wana ni vadyondzisi vo fana na Nikodema.” Xivangelo xin’wana xa sweswo hileswi a ti durha. Millard u pimanyeta leswaku “kopi [ya buku-nsongwa] ya Esaya a yi xaviwa hi tidenari ta tsevu ku ya eka ta khume” naswona u vula leswaku Bibele leyi heleleke ya Xiheveru “a yi va tibuku-nsongwa ta 15 ku ya eka ta 20” kumbe yi koxa mali leyi ringanaka muholo wa kwalomu ka tin’hweti ta tsevu.

Bibele a yi hi byeli loko Yesu kumbe vadyondzisiwa va yena a va ri na tona tikopi ta vona vini ta tibuku-nsongwa ta Bibele. Hambiswiritano, swi le rivaleni leswaku Yesu a a ma tiva kahle Matsalwa, a a swi kota ku kombetela eka wona kumbe ku ma tsundzuka hi nhloko. (Matewu 4:4, 7, 10; 19:4, 5) Xana leswi a swi fanelanga swi hi susumetela leswaku hi yi tiva kahle Bibele tanihi leswi hakanyingi yi nga durhiki naswona yi kumekaka hi ku olova namuntlha?