Xana Hi Fanele Hi Ri Tsundzuka Njhani Rifu Ra Yesu?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Xana rifu ra Yesu ri fanele ri tsundzukiwa njhani?

Yesu u byele valandzeri vakwe leswaku va tsundzuka rifu rakwe hi ku tirhisa swakudya swo fanekisela, ku nga xinkwa ni vhinyo. Xinkwa xi yimela miri wa Yesu naswona vhinyo yi yimela ngati yakwe.—Hlaya Luka 22:19, 20.

Xinkwa lexi Yesu a xi tirhiseke a xi nga ri na comela. Hakanyingi eBibeleni comela xi fanekisela xidyoho. Kutani xinkwa xi fanekisela miri wa Yesu lowu hetisekeke. U nyikele hi miri wakwe tanihi xitlhavelo, lowu heriseke switlhavelo swa swiharhi leswi a swi tirhisiwa ehansi ka Nawu wa Muxe. (Vaheveru 10:5, 9, 10) Vhinyo yi fanekisela ngati ya risima ya Yesu leyi halatiweke tanihi xitlhavelo xa swidyoho swa hina.—Hlaya 1 Petro 1:19; 2:24; 3:18.

2. Xana hi fanele hi ri tsundzuka rini rifu ra Yesu?

Rifu ra Yesu ri humelele hi Paseka ya Nisani 14. Siku ra Vayuda ri sungula endzhaku ka ku pela ka dyambu. Hi madyambu ya le mahlweni ka rifu rakwe, Yesu u dye swakudya swa Paseka ni vaapostola vakwe, kutani a simeka nawu lowuntshwa wo tsundzuka rifu rakwe.—Hlaya Luka 22:14, 15.

Namuntlha, vanhu va Xikwembu va tsundzuka leswi Xikwembu xi va nyikeke swona hi ku tirhisa Yesu leswaku xi ntshunxa misava hinkwayo eka xidyoho ni rifu. (Eksoda 12:5-7, 13, 17) Tanihi leswi Paseka a yi tlangeriwa kan’we hi lembe, hilaha ku fanaka Xitsundzuxo xa rifu ra Yesu xi tlangeriwa kan’we hi lembe endzhaku ka ku pela ka dyambu hi Nisani 14 hi ku ya hi khalendara ya tin’hweti ta Bibele.—Hlaya Yohane 1:29.

3. Xana i vamani lava faneleke va dya xinkwa ni ku nwa vhinyo?

Loko Yesu a nyika valandzeri vakwe vhinyo, u te: “Xinwelo lexi xi vula ntwanano lowuntshwa.” (1 Vakorinto 11:25) Ntwanano lowuntshwa wu sive ntwanano wa Nawu wa Muxe, lowu eka wona Xikwembu xi tshembiseke Vaisrayele leswaku loko va wu yingisa, a va ta va vanhu va xona. (Eksoda 19:5, 6) Hambiswiritano, Vaisrayele a va ri yingisanga rito ra Xikwembu. Kutani Yehovha u va nyike ntwanano lowuntshwa.—Hlaya Yeremiya 31:31.

Hi ku tirhisa ntwanano lowuntshwa, Yehovha u endle leswaku vanhu vo tala va kuma mikateko hi ku tirhisa vanhu vatsongo. Vanhu lava nga eka ntwanano a va talanga, i 144 000. Hikwalaho ka vona, timiliyoni to huma eka matiko hinkwawo ti ta katekisiwa hi vutomi lebyi nga heriki emisaveni leyi nga paradeyisi. Van’wana lava nga eka ntwanano lowu lowuntshwa va tirhela Yehovha laha misaveni namuntlha. Hi vona ntsena lava dyaka xinkwa ni ku nwa vhinyo hikuva xinwelo “xi vula ntwanano lowuntshwa.”—Hlaya Luka 12:32; Nhlavutelo 14:1, 3.

4. Xana Xitsundzuxo xi hi vuyerisa njhani?

Xitsundzuxo xa rifu ra Yesu xa lembe ni lembe xi endla leswaku hi ri tlangela swinene rirhandzu ra Yehovha lerikulu. U rhumele N’wana wakwe leswaku a ta fela swidyoho swa hina. Kutani loko hi va kona eXitsundzuxweni, hi fanele hi anakanyisisa hileswi rifu ra Yesu ri vulaka swona eka hina. Hi fanele hi kambisisa ndlela leyi hi nga kombisaka ha yona leswaku ha swi tlangela leswi Yehovha na Yesu va hi endleleke swona.—Hlaya Yohane 3:16; 2 Vakorinto 5:14, 15.

Leswaku u kuma rungula leri engetelekeke, vona matluka 206-208 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.