“Hlayisa Mbilu Ya Wena!”
Ntsombano Wa Muganga Wa Timbhoni Ta Yehovha
NHLOKO-MHAKA YA RAVUNTLHANU
“Loko Ku Ri Yehovha, U Vona Leswi Mbilu Yi Nga Swona”—1 SAMUWELE 16:7.
NHLOKO-MHAKA YA MUGQIVELA
“Nomu Wu Vulavula Leswi Mbilu Yi Taleke Swona”—MATEWU 12:34.
NHLOKO-MHAKA YA SONTO
“Tirhela Yehovha Hi Mbilu Leyi Heleleke”—1 TIKRONIKA 28:9.
Bibele yi vulavula hi mbilu kwalomu ka minkarhi ya gidi. Eka swiendlakalo swo tala, Matsalwa a ma vulavuli hi mbilu ya xiviri ya munhu, kambe ma vulavula hi mbilu yo fanekisela. Xana i yini mbilu yo fanekisela? Xiga lexi xi nga ha kombetela eka leswi hi nga xiswona endzeni, ku nga leswi hi swi ehleketaka, ndlela leyi hi titwaka ha yona ni leswi hi swi navelaka.
Hikwalaho ka yini hi fanele hi hlayisa mbilu ya hina yo fanekisela? Xikwembu xi huhutele Hosi Solomoni ku tsala a ku: “Hlayisa mbilu ya wena ku tlula hinkwaswo leswi swi faneleke swi hlayisiwa, hikuva swihlovo swa vutomi swi le ka yona.” (Swivuriso 4:23) Vutomi bya hina bya sweswi ni bya nkarhi lowu taka byi titshege hi xiyimo xa mbilu ya hina yo fanekisela. Hikwalaho ka yini? Hikuva Xikwembu xi vona leswi nga endzeni ka mbilu ya hina. (1 Samuwele 16:7) I munhu loyi hi nga yena endzeni, “munhu la nge xihundleni wa mbilu” loyi a kombisaka ndlela leyi Xikwembu xi hi tekaka ha yona.—1 Petro 3:4.
Hi nga yi hlayisa njhani mbilu ya hina? Nhlamulo ya xivutiso lexi yi ta hlamuseriwa hi vuenti emintsombanweni leyi Timbhoni ta Yehovha ti nga ta yi khoma emisaveni hinkwayo ku sukela hi n’hweti leyi. Wa rhambiwa hi mandla mambirhi leswaku u va kona eka masiku hinkwawo manharhu ya ntsombano lowu.a Leswi u nga ta swi dyondza swi ta ku pfuna leswaku u hanya hi ndlela leyi tsakisaka mbilu ya Yehovha Xikwembu.—Swivuriso 27:11.
[Nhlamuselo ya le hansi]
a Leswaku u kuma rungula ra ntsombano lowu nga ta khomiwa ekusuhi ni laha u tshamaka kona, hi kombela u tirhisa Web site ya www.jw.org. Nakambe u nga ha tihlanganisa ni Timbhoni ta Yehovha ta le ndhawini ya ka n’wina kumbe u tsalela vakandziyisi va magazini lowu.
[Laha Xifaniso Xi Humaka Kona eka tluka 32]
Photo on right: Aus dem Fundus der MÜNCHNER OLYMPIAPARK GMBH, München