Ha Yini Xikwembu Xi Pfumelela Vanhu Lava Nga Ni Matimba Va Tshikilela Lava Nga Riki Na Matimba?

Marungula lama nga eBibeleni ya vulavula hi ku tshikileriwa ka vanhu lava nga riki na matimba hi vanhu lava nga ni matimba. Munhu un’wana loyi a tshikileriweke i Naboti.a Akabu, loyi a veke hosi ya Israyele emalembeni ya 1 000 lama hundzeke, u pfumelele nsati wakwe Yezabele leswaku a dlaya Naboti ni vana vakwe leswaku hosi yi ta teka nsimu yakwe ya vhinya. (1 Tihosi 21:1-16; 2 Tihosi 9:26) Ha yini Xikwembu xi pfumelele ku tirhisiwa ko tano ka matimba hi ndlela yo biha?

A hi buleni hi xivangelo xin’we xa nkoka: Xikwembu a xi hembi. (Tito 1:2) Xana sweswo swi fambisana njhani ni swiendlo swo homboloka swa ku tshikilela? Eku sunguleni, Xikwembu xi lemukise vanhu leswaku loko va xi xandzukela a va ta fa hikwalaho ka sweswo. Marito ya Xikwembu ma hetisekile, vanhu va hambete va fa ku sukela eka ku xandzuka loku veke kona entangeni wa Edeni. Entiyisweni, rifu ra munhu wo sungula, ri ve kona hikwalaho ka ku tshikilela—loko Kayini a dlaya makwavo wakwe Avele.—Genesa 2:16, 17; 4:8.

Malunghana ni matimu ya vanhu, Rito ra Xikwembu ri ri: ‘Munhu u fuma munhu ku n’wi endla swo biha.’ (Eklesiasta 8:9) Xana marito wolawo ma tikombise ma ri ntiyiso? Yehovha u lemukise tiko ra Israyele, ku nga vanhu vakwe, leswaku tihosi ta vona a ti ta va tshikilela, ti endla leswaku va kombela mpfuno eka Xikwembu. (1 Samuwele 8:11-18) Hambi ku ri Solomoni Hosi yo tlhariha u tshikilele vanhu vakwe hi ku va hakerisa xibalo. (1 Tihosi 11:43; 12:3, 4) Tihosi to homboloka, to tanihi Akabu, ti tshikilele no tlurisa. Xiya: Loko Xikwembu a xi lo sivela swiendlo sweswo hinkwaswo swo tshikilela, xana entiyisweni a xi ta va xi nga endlanga leswaku marito ya xona ma hundzuka mavunwa?

Tsundzuka leswaku Sathana u vule leswaku vanhu va tirhela Xikwembu ntsena hikwalaho ka swivangelo swa vutianakanyi. (Yobo 1:9, 10; 2:4) Loko Xikwembu a xi lo sirhelela malandza ya xona hinkwawo eka mixaka hinkwayo ya ku tshikilela, xana sweswo a swi nga ta seketela marito lama vuriweke hi Sathana? Nakambe loko Xikwembu a xi lo sirhelela vanhu eka mixaka hinkwayo ya ku tshikilela, xana a ku nga ta va ku ri xona muhembi lonkulu? Loko a xi lo va sirhelela, vanhu vo tala a va ta gimeta hileswaku va nga swi kota ku tifuma hi ndlela leyi humelelaka handle ko pfuniwa hi Xikwembu. Kambe Rito ra Xikwembu ri vula leswi hambaneke—munhu a nga swi koti nikatsongo ku tifuma. (Yeremiya 10:23) Hi lava leswaku Mfumo wa Xikwembu wu ta; hi kona laha ku tshikileriwa ku nga ta hela.

Xana sweswo swi vula leswaku Xikwembu a xi endli nchumu hi ku tshikileriwa ka vanhu? Doo! Xiya swilo swimbirhi leswi xi swi endlaka: Xo sungula, xi paluxa leswaku ku tshikileriwa i yini. Hi xikombiso, Rito ra xona ri paluxa rhengu rin’wana ni rin’wana leri Yezabele a ri endleleke Naboti. Bibele yi ya emahlweni yi paluxa leswaku swiendlo sweswo swo biha swi hlohloteriwa hi mufumi wa matimba loyi a ti fihlaka leswi a nga swona. (Yohane 14:30; 2 Vakorinto 11:14) Bibele yi n’wi paluxa tanihi Sathana Diyavulosi. Hi ku paluxa vuhomboloki ni ku tshikileriwa swin’we ni loyi a swi vangaka, Xikwembu xi hi pfuna leswaku hi papalata vuhomboloki. Xisweswo xi hi sirhelela eka vumundzuku bya hina bya hilaha ku nga heriki.

Xa vumbirhi, Xikwembu xi nyikela ntshembo lowu tiyeke wo herisa ku tshikileriwa. Ndlela leyi xi paluxeke, xi avanyiseke ni ku xupula Akabu na Yezabele—ni vanhu vo tala lava fanaka na vona ha yona—swi hi endla hi tshemba switshembiso swa xona swa leswaku siku rin’wana xi ta xupula vanhu hinkwavo lava endlaka swilo swo biha. (Pisalema 52:1-5) Nakambe Xikwembu xi nyikela ntshembo lowu tiyeke wa leswaku ku nga ri khale xi ta herisa vuhomboloki eka vanhu lava xi rhandzaka.b Xisweswo Naboti wo tshembeka u ta vona nkarhi lowu eka wona yena ni vana vakwe va nga ta hanya hilaha ku nga heriki emisaveni leyi nga paradeyisi leyi ku nga riki na vuhomboloki.—Pisalema 37:34.