TINHLAMULO TA SWIVUTISO SWA BIBELE
Xana vukhongeri hinkwabyo byi xixima Xikwembu?
Loko u yingisele mahungu ya misava u nga va u swi xiyile leswaku minkarhi yin’wana vukhongeri byi tirhisiwa eka swikongomelo swo biha. A hi vukhongeri hinkwabyo lebyi amukelekaka eka Xikwembu xa ntiyiso. (Matewu 7:15) Vanhu vo tala va xisiwile.—Hlaya 1 Yohane 5:19.
Hambiswiritano, Xikwembu xa va vona vanhu lava rhandzaka leswinene ni leswi nga ntiyiso. (Yohane 4:23) Xikwembu xi rhamba vanhu vo tano leswaku va dyondza ntiyiso lowu humaka eRitweni ra xona ku nga Bibele.—Hlaya 1 Timotiya 2:3-5.
U nga byi vona njhani vukhongeri bya ntiyiso?
Yehovha Xikwembu u hlanganisa vanhu lava humaka eka vukhongeri byo hambana-hambana a va dyondzisa ntiyiso ni ku va va rhandzana. (Mikiya 4:2, 3) U nga vona vukhongeri bya ntiyiso hi ndlela leyi vanhu va kona va rhandzanaka ha yona.—Hlaya Yohane 13:35.
Yehovha Xikwembu u hlanganisa vanhu va tinxaka to hambana-hambana hi vugandzeri bya ntiyiso.—Pisalema 133:1
Vagandzeri va ntiyiso ripfumelo ra vona ni ndlela leyi va hanyaka ha yona, yi sekeriweke eBibeleni. (2 Timotiya 3:16) Nakambe va xixima vito ra Xikwembu. (Pisalema 83:18) Va tlhela va tshemba leswaku Mfumo wa Xikwembu hi wona ntsena lowu nga ta herisa swiphipo swa vanhu. (Daniyele 2:44) Va tekelela Yesu hi ku endla leswaku “ku voninga” ka vona ku vonakala naswona va endla leswinene eka vaakelani va vona. (Matewu 5:16) Vakreste va ntiyiso va nga voniwa hi ku endzela emakaya ya vanhu leswaku va va byela mahungu lamanene ya Mfumo wa Xikwembu.—Hlaya Matewu 24:14; Mintirho 5:42; 20:20.