Xana Ku Ni Tintsumi To Biha?

Ina, ti kona. Ti huma kwihi? Tsundzuka leswaku Xikwembu xi vumbe tintsumi ti ri ni ntshunxeko wo tihlawulela. Endzhaku ka loko Adamu na Evha va vumbiwile, xivumbiwa xin’wana xa moya lexi hetisekeke xi wu tirhise hi ndlela yo biha ntshunxeko wa xona wo tihlawulela ivi xi vanga ku xandzuka emisaveni. Xi swi kotile ku endla leswaku Adamu na Evha va xandzukela Xikwembu. (Genesa 3:1-7; Nhlavutelo 12:9) Bibele a yi hi byeli leswaku vito ra xivumbiwa lexi xa moya a ku ri mani nileswaku a wu ri wihi ntirho wa xona etilweni loko xi nga si xandzuka. Kambe endzhaku ka loko xi xandzukile, Bibele yi hi byela leswaku xivumbiwa lexi xi sungule ku tiviwa hi vito ra Sathana, leri vulaka “Mukaneti,” na Diyavulosi leri vulaka “Mulumbeti.”—Matewu 4:8-11.

Lexi twisaka ku vava, ku tlhele ku va ni tintsumi tin’wana leti xandzukeleke Xikwembu. Enkarhini wa Nowa, tintsumi leti hi nga byeriwiki nhlayo ya tona ti “[fularhele] vutshamo bya tona lebyi faneleke” endyangwini wa Xikwembu wa le tilweni. Ti te emisaveni kutani ti ti endla vanhu leswaku ti kota ku tikhoma hi ndlela yo biha xisweswo ti endla leswi a ti nga vumberiwanga swona.—Yudha 6; Genesa 6:1-4; 1 Petro 3:19, 20.

Xana ku endleke yini hi tintsumi teto? Loko Xikwembu xi tisa ndhambi leswaku xi basisa misava, ti tlhelele eka mimiri ya tona ya moya kutani ti tlhelela exivandleni xa moya. Hambiswiritano, Xikwembu a xi ti pfumelelanga tintsumi teto to homboloka leswaku ti tlhelela eka “xiyimo xa tona xo sungula.” Ku ri na sweswo xi ti khotse eka “munyama lowukulu,” lowu tiviwaka tanihi Thatharasi. (Yudha 6; 2 Petro 2:4) Tintsumi leti ti hlawule ku lawuriwa hi Sathana Diyavulosi “mufumi wa madimona,” loyi a “[tihundzulaka] ntsumi ya ku vonakala.”—Matewu 12:24; 2 Vakorinto 11:14.

Bibele yi dyondzisa leswaku Mfumo wa Xikwembu ku nga mfumo wa le tilweni wu simekiwe hi 1914.a Endzhaku ka xiendlakalo xexo xa nkoka, Sathana ni madimona ya yena va hlongoriwile etilweni kutani va lahleriwa emisaveni. Vubihi ni mahanyelo yo biha leswi nga tala laha misaveni, swi kombisa leswaku misava leyi yi lawuriwa hi Sathana loyi a hlundzukeke.—Nhlavutelo 12:9-12.

Hambiswiritano, ku andza loku ka matikhomelo yo biha ni madzolonga lama tsemaka nhlana swi tiyisekisa leswaku makumu ya mfumo wa Sathana ma le kusuhi. Ku nga ri khale, swivumbiwa leswi swa moya leswi tshikileleka vanhu swi ta tekeriwa goza. Endzhaku ka loko Mfumo wa Xikwembu wu ta va wu fume misava leyi nga paradeyisi ku ringana malembe ya 1 000, swivumbiwa leswi swa moya swo homboloka swi ta nyikiwa nkarhi wo ringa vanhu. Endzhaku ka sweswo swi ta lovisiwa.—Matewu 25:41; Nhlavutelo 20:1-3, 7-10.