Hinkwerhu Hi Fanele Ku Dyondza
1 A ku ri ni vadyondzisiwa va yena loko Yesu a khongela eka Yehova, a ku: “Vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” (Yoh. 17:3) Ina, vadyondzisiwa va Kriste hinkwavo, kun’we ni vanhu lava ha ku tsakelaka va fanele va amukela vutivi byo tano. Hi nga endla leswi hi dyondzo ya munhu hi xiyexe ni ya ndyangu, ni ku va kona eminhlanganweni ya bandlha. Xana wa xi namarhela xiyimiso lexi tiyeke xa dyondzo ya munhu hi xiyexe ya nkarhi na nkarhi?
2 Vanhu lava va ha ku tsakelaka va pfuniwa swinene hi ku va ni dyondzo ya munhu hi xiyexe ya le kaya ya Bibele. Hambi swi ri tano, leswaku va kula emoyeni, va fanele ku hambeta va amukela vutivi ivi va tirhisa leswi va swi dyondzaka. (Vahev. 5:13, 14) Xana wa swi endla sweswo ke?
3 Malandza lamantsongo ya Yehova ma le xiyin’weni lexinene xo amukela vutivi. Mianakanyo ya vona yi gingiritekela ku tswonga mimpimo leyikulu ya rungula, naswona hakanyingi yi navela ku tiva swivangelo leswi ha swona swilo swi nga hi ndlela yo karhi. Yehova u hi vumbe hi ri ni ku navela loku. Tirhisa nkarhi wa wena ku amukela vutivi bya moya hi vutlhari. Endla hi laha muapostola Pawulo a vuleke ha kona ivi u ‘xava nkarhi lowu ku pfulekeleke’ wa dyondzo yo tano ya munhu hi xiyexe leyi fuwisaka ni ku tiyisa ripfumelo.—Vakol. 4:5.
LAYIBURARI YA MUNHU HI XIYEXE
4 Xana u na yona layiburari ya munhu hi xiyexe kumbe ya ndyangu? Xana yi na tona tivholumo ta Awake! na The Watchtower kumbe minkandziyiso ya timagazini leti leyi u yi hlengeleteke kun’we eka ti-binder, tivholumo ta Insight, ni tibuku leti hi ti tirhisaka eka Dyondzo ya Buku ya Bandlha ni le minhlanganweni ya le Holweni ya Mfumo? Xana u na yona Watch Tower Publications Index 1930-1985 ni tibuku ta khale ta Sosayiti leti kumekaka?
5 U ta kuma rungula ra ntikelo eka tibuku ta khale. Xana u hlayile kumbe ku dyondza xibukwana lexi nge Jehovah’s Witnesses and the Question of Blood? 1975 Yearbook of Jehovah’s Witnesses yi nyikela matimu ya vanhu va Yehova ku sukela enkarhini wa Makwerhu Russell ku ta fika enkarhini wa hina naswona yi hlamula swo tala swa swivutiso leswi vutisiweke malunghana ni Timbhoni ta Yehova.
6 Ku na xilaveko xa dyondzo ya munhu ha un’we-un’we ni ya ndyangu leswaku hi va lava tiyeke emoyeni ni ku tihlomisela khwatsi ntirho wa nsimu. Xana u endlisa ku yini emhakeni leyi? Xana wa yi lunghiselela minhlangano ya bandlha? Xana wa byi lunghiselela vutirheli bya nsimu hi matshalatshala yo va la humelelaka hi laha swi kotekaka ha kona? Xana u yi hlayile hinkwayo kopi ya wena ya Reasoning From the Scriptures? Xana wa yi tirhisa entirhweni wa nsimu?
7 Tirhisa Watch Tower Publications Index 1930-1985 leswaku u kuma tinhlamulo ta swivutiso swa wena n’wini ni leswi u vutisiwaka swona hi vanhu lava u hlanganaka na vona entirhweni wa nsimu. Vakulu va ta kuma Index leyi yi ri xitirho xa nkoka swinene xo xi tirhisa eku hlawuleni ka rungula leri khutazaka ni leri faneleke eka lava va taka eka vona va lava mpfuno wa moya.
8 Xana bandlha ra ka n’wina ri na layiburari leyi kokaka mahlo leyi nga tirhisiwaka hi vahuweleri lava navelaka ku endla ndzavisiso kumbe dyondzo? Loko swi nga ri tano, hi khutaza vakulu ku yi sungula hi ku hatlisa hi laha swi nga kotekaka ha kona eka xikolo xa vumbirhi kumbe exivandleni xin’wana lexi faneleke lexi nga eholweni. Layiburari yi ta va nsusumeto lowu engetelekeke eka hinkwavo lava navelaka ku kambisisa tibuku ta Sosayiti.
9 Timotiya wa Vumbirhi 2:15 ya laya: “Endla hi matimba ku vonaka u ri la nkhensekaka emahlweni ka Xikwembu, u nga ri na tingana hi ntirho wa wena, u dyondzisa Rito ra ntiyiso hi ndlela leyinene.” Leswaku hi endla leswi, hinkwerhu hi fanele ku dyondza ni ku tirhisa leswi hi swi dyondzaka.