Sal Xana U Ta Va Mudzunisi Wa Yehova Hi December Leyi?
1 Khale ka khaleni, Hosi Davhida u tsale marito lama landzelaka ya ku dzunisa Hosi ya yena ya le tilweni, Yehova Xikwembu: “Ndzi ta ku kurisa, Xikwembu xa mina, Hosi yanga! Ndzi ta vonga vito ra wena hi minkarhi leyi nga yiki helo. Ndzi ta ku vonga hi masiku hinkwawo, ndzi dzunisa vito ra wena hi minkarhi leyi nga heriki.” (Ps. 145:1, 2) Davhida u ve ni vunghana lebyi hlamarisaka na Yehova naswona leswi swi n’wi vangele ku vulavula hi ntsako hi Yehova. Ku fana na Davhida wa khale, xana na hina a hi na swona swivangelo swo huwelela hi ku tsaka, hi dzunisa Yehova hikwalaho ka hinkwaswo leswi a hi endleleke swona?
2 N’hweti ya December yi ta hi nyika minkarhi yo tala ya ku dzunisa Yehova. Hi nga endla leswi hi ku hlanganyela entirhweni wo chumayela, loko hi khoma Mintsombano ya hina ya Muganga ya “Ririmi Leri Tengeke” ni loko hi ri eku wiseni. Hambi loko misava yi humesa swihinga hinkwako, hina tanihi vanhu va Yehova a hi fanelanga ku rivala leswaku hi nyiketele vutomi bya hina eka Yehova. Hi fanele ku ya emahlweni hi dzunisa Yehova. (Ps. 145:7, 10, 21) Leswaku hi ta va vadzunisi vo tshembeka va Yehova hi December, hi fanele ku tsundzuka tinhla ti nga ri tingani.
3 Lunghiselelani ku hlanganyela hi xitalo entirhweni wa nsimu tanihi ndyangu hi December. Loko u kunguhata ku ya eku wiseni, hi kombela u yisa xiviko xa wena xa ntirho wa nsimu u nga si suka, ngopfu-ngopfu loko u ta va u nga si vuya emahlweni ka January 3, 1991. Hambi leswi December ku faneleke ku va n’hweti ya hina leyikulu entirhweni wa nsimu, hi leswi vo tala va nga eku wiseni, leswi a swi tano, hikuva vamakwerhu vo tala va rivala hi ku olova ku vika. Xana hi nga endla matshalatshala lamakulu lembe leri ku pfuna muhuweleri un’wana ni un’wana ku hlanganyela eku dzuniseni ka Yehova ensin’wini ni ku vika hi nkarhi? Hi khutaza vafambisi va dyondzo ya buku ku pfuna un’wana ni un’wana emintlaweni ya vona, hambi wa ya eku wiseni kumbe a nga yi, leswaku a yisa xiviko xa December.
KU NYIKELA BUKU LEYI NGE TIMHAKA TA BIBELE
4 Hi n’hweti ya December hi ta va hi nyikela Buku Yanga Ya Timhaka Ta Bibele hi munyikelo wa R7,50. Ngopfu-ngopfu hi lava ku khutaza vahuweleri lava nghenaka xikolo ku endla matshalatshala ya nkoka yo hlanganyela eku hangalaseni ka buku leyi. Swi ta lava xivindzi leswaku u endla leswi, kambe Yehova u ta ku nyika matimba lama lavekaka. Xiya minkarhi yo endla leswaku vana ni vanhu lavakulu va tolovelana na Buku Yanga Ya Timhaka Ta Bibele.
5 U nga ri sungula njhani bulo hi ku tirhisa buku? U nga ha ku: “Xana u anakanya leswaku misava yi ta kala yi va ndhawu ya ku tsakisa ni ku rhula yo tshama eka yona?” Pfula eka mhaka 71 kutani u hlamusela tinhla leti humaka eka Esaya 11:6-9 kumbe Nhlavutelo 21:3, 4. Kumbe u nga ha vutisa xivutiso lexi: “Xana u swi kuma swi nonon’hwa ku hlamusela Bibele eka vana va wena? Loko swi ri tano, buku leyi yi nga ku pfuna. Yima ndzi ku komba ndlela leyi yi nga ku pfunaka ha yona ku hlamusela nhlamuselo ya Xikhongelo xa Hosi.” Pfuxeta tinhla ta mhaka 91.
6 U nga ha hlangana ni lava ana se va nga na yona buku ya Timhaka Ta Bibele. Ha yini u nga tinyiketeli ku yi hlaya na vona tanihi ndyangu? U nga ha lava ku va nyika tibuku tin’wana leti faneleke ta Bibele. Xana u anakanye hi ku nyikela buku ya Timhaka Ta Bibele evanhwini exitarateni? Vo tala va endle tano naswona van’wana va ve ni vuyelo lebyinene. Loko u ya eka holideyi, ha yini u nga teki tikopi tintsongo kutani u ti nyikela endleleni eswiticini swa petiroli, ni kun’wana? Tsundzuka ku teka tikopi ta tindzimi leti vulavuriwaka hi vanhu va kwalaho.
7 Xana u ta va exikarhi ka magidi lawa ma nga ta dzunisa Yehova hi ku tshembeka hi December? Kunguhatani sweswi ku endla tano tanihi ndyangu ku tiyisekisa leswaku nakambe mi ta ‘humesa magandzelo ya ku dzunisa eka Xikwembu, ku nga, mihandzu ya milomu leyi twarisaka vito ra xona.’—Vahev. 13:15.