Ku Hetisisa Vutirheli Bya Hina Bya Mfumo Ensin’wini

1 Ku rhandza Yehova ni muakelani ku hi susumetela ku chumayela mahungu lamanene ya Mfumo. Hi ku tamela ntiyiso hi vutlhari, hi nga hlula ‘ku anakanyisisa ni nchumu wun’wana ni wun’wana lowu tikurisaka lowu tlakusiwaka ehenhleni ka vutivi bya Xikwembu.’ (2 Vakor. 10:5) Watch Tower Publications Index yi lunghiseleriwe ku hi pfuna emhakeni leyi.

2 Nhloko-mhaka-nkulu ya tinhlamuselo ta ntirho wa hina wa ku chumayela ensin’wini hi leyi nge “Field Ministry.” Mhaka yin’wana ni yin’wana ya hlanganisiwa kwalaho, ku katsa ni langutelo ra hina hi xiyexe, swingheniso, ku hlula minsivelo, swingheniso swa tibuku ha yin’we-yin’we, maendzo yo vuyela ni tidyondzo ta Bibele. Xana u tsakela ku hlamusela yinhla hi mintokoto yi nga ri yingani leyinene? U nga ha kuma leswi u swi lavaka ehansi ka nhloko-mhaka-nkulu leyi nge “Experiences.” Loko u swi kuma swi nonon’hwa ku tirhisa Watch Tower Publications Index ya Xinghezi, u ta kuma tinhlamuselo leti fanaka leti pfunaka eka xikombo xa tinhloko-mhaka xa lembe na lembe endzhaku ka Xihondzo xo Rindza xa December 15.

3 Xana un’wana u vule leswaku Bibele ya tikaneta, kumbexana a tshaha tindzimana leti kongomeke leti tikombaka ti nga twanani? Ehansi ka “Bible Authenticity,” swihlokwana leswi nge “contradictions” na “harmony” swi nyika tinhlamuselo hi mabulo lama tolovelekeke ya ku kaneta loku. Ehansi ka xihlokwana lexi nge “scriptures harmonized,” u ta kuma nxaxamelo lowu engetelekeke wa tindzimana ha yin’we-yin’we leti ti tikombaka ti kanetana ni tinhlamuselo leti ti ti hlamuselaka kahle.

4 Eka tindhawu tin’wana, hi fanele ku hlula minjhekanjhekisano ehenhleni ka tidyondzo ta mavunwa ta xisekelo ta Vujagana, tanihi Vunharhu-un’we, ndzilo wa tihele ni ku nga fi ka moya-xiviri. Ku na tinhloko-mhaka-nkulu ta xin’wana ni xin’wana xa leswi. Ehansi ka “Trinity” na “Immortality of the Soul,” u ta kuma xihlokwana lexi nge “scriptures misapplied to support.” Lexi xi ta ku yisa eka mabulo lama hlamuselaka tindzimana ha yin’we-yin’we. Nhlamuselo leyi fanaka ya kumeka ehansi ka “Hell,” ni xihlokwana xa yona lexi nge “scriptures misinterpreted.”

5 Xana u navela ku sungula dyondzo ya Bibele? Kumbe u na leyi yi tikombaka yi nga endli nhluvuko? Ehansi ka nhloko-mhaka leyi nge “Bible Studies” ku na swihlokwana leswi nge “starting,” “assisting—” na “teaching,” xin’wana ni xin’wana xi na tinhlamuselo ta ku ku pfuna leswaku u kuma ni ku fambisa tidyondzo ta Bibele leti endlaka nhluvuko. Ku ku pfuna leswaku u tiva nkarhi lowu swi nga ha vaka swinene ku tshika dyondzo, xiya swihlokwana leswi nge “terminating unfruitful” na “discontinuing.”

6 Xana u navela ku fikelela malunghelo lama engetelekeke evutirhelini bya nsimu? Tinhloko-mhaka leti nge “Full-Time Ministry,” “Auxiliary Pioneers,” “Pioneers,” “Missionaries” na “Serving Where Need Is Greater” ti ku yisa eka mhaka leyi twisisekaka ya ndlela leyi hi nga fikelelaka tipakani to tano ha yona ni le ka mintokoto leyi tsakisaka leyi tsakeriweke hi lava se va endleke tano.

7 Ku hetisisa vutirheli bya hina bya Mfumo ensin’wini swi tisa ku aneriseka lokukulu. (Yoh. 4:34) Watch Tower Publications Index yi nga ku pfuna loko u ri karhi u hlanganyela entirhweni lowu wo tsakisa.