Minhlangano Ya Ntirho Ya September

XIYA: Vutirheli Bya Hina Bya Mfumo byi ta kombisa xiyimiso xa Nhlangano wa Ntirho wa vhiki rin’wana ni rin’wana etin’hwetini ta ntsombano. Mabandlha ma nga ha ololoxa hi laha swi lavekaka ha kona ku pfumelela ku va kona entsombanweni wa muganga kutani ku va ni mpfuxeto wa 30 wa timinete wa tinhla-nkulu ta nongonoko eka Nhlangano wa Ntirho wa vhiki leri landzelaka. Mpfuxeto wa siku na siku wu nga ha averiwa vamakwerhu vambirhi kumbe vanharhu lava fanelekaka ka ha ri na nkarhi lava nga ta swi kota ku nyikela nyingiso eka tinhla-nkulu. Mpfuxeto lowu wu lunghiseleriweke kahle wu ta pfuna vamakwerhu ku tsundzuka tinhla-nkulu ku ti tirhisa hi voxe ni ku ti tirhisa ensin’wini. Tinhlamuselo leti humaka eka vayingiseri ni mintokoto leyi hlamuseriwaka swi fanele swi koma ni ku ba nhloko ya mhaka.

Vhiki Leri Sungulaka Hi September 2

Risimu 17

10 min: Switiviso swa bandlha ni Switiviso leswi hlawuriweke leswi humaka eka Vutirheli Bya Hina Bya Mfumo. Kandziyisa tinhla to vulavurisana leti humaka eka minkandziyiso ya sweswinyana ya timagazini.

20 min: “Ku Twarisa Mahungu Lamanene—Hi Ku Sungula Tidyondzo Hi Ku Vula Hi Ku Kongoma.” Ku hlanganisa hi swivutiso ni tinhlamulo. Endzhaku ko kambisisa tindzimana 3 na 4, kombisa ku vula loku kongomeke hi ku tirhisa buku leyi nge Hanya Hi Masiku ni xiphephana lexi nge Vutomi eMisaveni Leyintshwa Ya Ku Rhula. Ku byela vanhu hi ku kongoma swi ta ku pfuna ku vona mpimo wa ku tsakela ka vini va miti. Kandziyisa xilaveko xo tlhelela eka ku tsakela hinkwako ku nga khathariseki leswaku buku yi siyiwile eku sunguleni kumbe e-e. Khutaza hinkwavo ku ringeta ku sungula tidyondzo ta Bibele hi ku byela vanhu hi ku kongoma entirhweni wa nsimu mahelo-vhiki lawa.

15 min: Bokisi Ra Swivutiso, “Vutirheli Bya Hina Bya Mfumo Byi Kuma Xivumbeko Lexintshwa” na Marungula Ya Swa Mfumo. Nyikela xiviko xa nhluvuko lowu endliweke eku tirhiweni ka nsimu leyi nga aviwangiki ni ku bula hi makungu ya nkarhi lowu taka yo tirha nsimu. Khutaza hinkwavo ku seketela tsima leri hi xitalo. Khutaza ku hlanganyela entirhweni wa nsimu mahelo-vhiki lawa.

Risimu 157 na xikhongelo xo pfala.

Vhiki Leri Sungulaka Hi September 9

Risimu 214

10 min: Switiviso swa bandlha. Pfuxeta tinhla eka timagazini leti nga ta tirhisiwa entirhweni wa nsimu mahelo-vhiki lawa. Kombisa xikombiso xin’we kumbe swimbirhi swo ti nyikela loko nkarhi wu pfumela.

20 min: Veka Tipakani Ta Munhu Hi Xiyexe Ta Lembe Lerintshwa Ra Ntirho. Mulanguteri wa ntirho u pfuxeta ntirho wa bandlha wa lembe ra ntirho leri hundzeke. Hi rirhandzu, bumabumela laha nhluvuko wu xiyiwaka kona. Kombisa tindhawu leti lavaka nyingiso lowu engetelekeke kwalaho eka lembe lerintshwa ra ntirho, ivi u nyikela swiringanyeto leswi tirhaka. I yini leswi endliweke ku pfuna vadyondzisiwa lavantshwa leswaku va va vahuweleri va nkarhi hinkwawo? Pfuxeta papila leri humaka eka Sosayiti ra June 10, 1991, leri yaka eka tihuvo ta vakulu ivi u kandziyisa ku tshika ku nga hlanganyeli nkarhi na nkarhi. Tsundzuka, pakani ya hina ensin’wini hinkwayo ya ha ta va ya leswaku muhuweleri un’wana ni un’wana a va kona nkarhi hinkwawo ensin’wini n’hweti yin’wana ni yin’wana ni ku pfuna vadyondzisiwa lavantshwa lava fanelekelaka ku nghenela vutirheli. Tirhisa Index ku kuma mhaka leyi lavekaka ni ndlela yo tirhisa switsundzuxo leswi nyikeriweke. Lava tiyiselaka entirhweni wo tshembeka va khutaza van’wana. (Vahev. 6:10) Vulavurisana ni vahuweleri kumbe maphayona mambirhi lava endleke nhluvuko lowunene elembeni leri hundzeke ra ntirho. I tipakani tihi leti va ti vekeleke 1992? Nakambe, vulavurisana ni muhuweleri kumbe phayona leri tirheke hi ku tshembeka malembe yo tala, a boxa ku nonon’hweriwa loku a langutaneke na kona ni ndlela leyi leswi a swi hluleke ha yona hi mpfuno lowu humaka eka Yehova ni nhlengeletano ya yena. Khutaza hinkwavo ku veka tipakani ta nkoka ku antswisa vutirheli bya vona elembeni ra ntirho ra 1992.

15 min: “Ku Byarha Vutihlamuleri Bya Hina Byo Endlela Van’wana Leswinene.” Mhaka ya swivutiso ni tinhlamulo. Loko mi kambisisa ndzimana 4, kombisa ndlela leyi nkulu eHolweni ya Mfumo a nga nyikaka xibumabumelo ha yona eka muhuweleri hikwalaho ka xikombiso xa yena xo tshembeka emalembeni yo tala. Xivutiso xi nga ha endliwa xa leswaku ku nga endliwa yini ku pfuna. Hambi swi ri tano, xibumabumelo xi fanele xi kandziyisiwa.

Risimu 94 na xikhongelo xo pfala.

Vhiki Leri Sungulaka Hi September 16

Risimu 44

10 min: Switiviso swa bandlha ni xiviko xa timali. Hlaya swibumabumelo swa munyikelo wa Sosayiti ivi u kombisa ku tlangela hi nseketelo wa timali wa vahuweleri wa mintirho ya Sosayiti swin’we ni ya bandlha.

20 min: “Lunghiselelo Ra Dyondzo Ya Buku Ya Bandlha—Xiyenge 3.” Vafambisi vambirhi va Dyondzo Ya Buku Ya Bandlha va bula hi mhaka, va yi endla yi tirha kwalaho. Kandziyisa ku pfuneka loku vaka kona loko vahuweleri va fambisana ni malunghiselelo ya ntirho. Boxa xilaveko xo xixima makaya lama tirhisiwaka loko hi hlanganela ntirho wa nsimu, ivi u bumabumela lava pfulaka makaya ya vona hi malwandla. (kmTS 3/86 tl. 3) Tanihi leswi tindhawu tin’wana ti lavekaka nkarhi na nkarhi, un’wana ni un’wana la tsakelaka ku pfula kaya ra yena a nga tivisa mulanguteri la ungamelaka kumbe mulanguteri wa ntirho. Hlanganisa tinhla leti humaka eka bulo ra vhiki leri nga hundza mayelana ni ku veka tipakani ta ntirho. Mulanguteri wa ntirho a nga pfuna ni ku khutaza vahuweleri ku fikelela tipakani evutirhelini.

15 min: “Vantshwa—Xana Mi Ta Hlula Eka Ndzingo Wa Vutshembeki Bya Vukriste?” Nkulumo leyi sekeriweke eka Xihondzo xo Rindza xa June 15, 1991. Kandziyisa khombo ra ku hanya vutomi byimbirhi.

Risimu 171 na xikhongelo xo pfala.

Vhiki Leri Sungulaka Hi September 23

Risimu 187

10 min: Switiviso swa bandlha. Kandziyisa yinhla yin’we kumbe timbirhi leti humaka eka timagazini ta sweswinyana. Khutaza vahuweleri ku hlanganyela entirhweni wa nsimu mahelo-vhiki lawa.

20 min: “Tinyiketele eVutirhelini Bya Nsimu—Xiyenge 3.” Bulo ra swivutiso ni tinhlamulo. Eka ndzimana 4, vana ni muhuweleri la nga ni ntokoto a kombisa ndlela yo pfuna munhu lontshwa loko a ri ensin’wini. Kombisa nongonoko wo titoloveta ni munhu lontshwa loyi a tirhisaka swiringanyeto swa muhuweleri la nga ni ntokoto ku hlula minkaneto leyi nga kona.

15 min: Matsalana u pfuxeta ni bandlha swiletelo leswi nga eka How to Handle Subscriptions Properly (S-AB-11) lexi pfuxetiweke lexi rhumeriweke mabandlha hinkwawo. Mi nga si endla xiphemu lexi tiyiseka leswaku swiletelo leswi swi vekiwa eka bodo ya switiviso. Kandziyisa tinhla ta nkoka leti humaka eka papila ra Sosayiti ra May 15, 1991, ngopfu-ngopfu nkoka wa ku tata swilipi swa swikhokhelo kahle ni ku tamela swilipi swa Undeliverable Subscription Follow-Up (M-210) hi xihatla. Kandziyisa xilaveko xo rhumela swikhokhelo eka Sosayiti vhiki na vhiki, hambi loko ku kumiwe xikhokhelo xin’we ntsena.

Risimu 70 na xikhongelo xo pfala.