Bokisi Ra Swivutiso

◼ I yini leswi faneleke ku tsundzukiwa loko hi nyikela vumbhoni hi riqingho kumbe hi ku tsala mapapila?

Hi rhandza ku chumayela mahungu lamanene evanhwini hi langutanile, kambe swiyimo swi nga ha endla leswaku ku nyikela vumbhoni hi riqingho kumbe ku tsala mapapila ku va ndlela leyi faneleke. Vahuweleri lava tshamaka emakaya ya vona nkarhinyana kumbe nkarhi hinkwawo hikwalaho ka mavabyi kumbe lava lamaleke emirini va nga ha tirhisa tindlela leti to nyikela vumbhoni. Va nga ha humelela hi ku vulavurisana ni vaaka-ndhawu laha munhu a nga pfumeleriwiki ku nghena handle ko rhambiwa ka ha ri emahlweni.

Rito lerinene ni leri tsakisaka ra laveka eku nyikeleni ka vumbhoni loku humelelaka hi riqingho. Papalata ku ba riqingho ka ha ri mixo swinene, ni vusiku kumbe hi minkarhi ya swakudya. U nga tshiki riqingho ri rila minkarhi yo tala. Endla n’wini wa muti a swi vona leswaku wa n’wi tsakela hi wexe hi ku n’wi nghenisa ebulwini. Tirhisa vito ni xivongo xa wena exinghenisweni xa wena, xisweswo u munhuhata riqingho. Tirhisa vito ra n’wini wa muti ebulwini hinkwaro.

U nga si tsala mapapila ma ya eka vanhu lava tsakelaka kumbe van’wana lava a va nga ri kona ekaya loko u endza, vona Dyondzo 17 ya School Guidebook. Tiyiseka leswaku u katsa vito ni adirese ya wena. Minkarhi yo tala loko vahuweleri va nga endli tano, mapapila lawa ma tlheriseriwa eka Sosayiti. Loko u rhumela timagazini hi poso vito ra wena ni adirese swi fanele na swona swi humelela ephepheni. Hi ntolovelo vanhu a va swi tsakeli ku amukela mapapila lama nga tsariwangiki mavito. Nkarhi hinkwawo tsala papila ro koma ni ra xinghana onge hi loko u vulavula ni munhu yoloye mi langutanile.