Petani Tinkoka Ta N’wina Mi Phasa
1 Hinkwerhu ka hina hi khutaziwile hi nxaxamelo lowu nge “Ku Tirha Tanihi Vaphasi Va Vanhu,” eMintsombanweni ya hina ya sweswinyana ya “Varhandzi Va Ntshunxeko.” Nxaxamelo lowu wa swiyenge swinharhu hi Sonto ni mixo wu hi pfune ku va ni langutelo lerintshwa entirhweni wa hina wo chumayela mahungu lamanene ni ku endla vadyondzisiwa hi ku tekelela Yesu, Hosi ya hina.—Mat. 24:14; 28:19, 20.
2 Endzhaku ko phasa hi hlori, Yesu u byele Petro a ku: “U nga chavi, ku sukela sweswi u ta va la phasaka vanhu.” (Luka 5:10) Xisweswo Yesu u fanise vanhu ni tinhlampfi, naswona u rhambe vaphasi va tinhlampfi lava titsongahataka leswaku va tshika ntirho wa vona wo tihanyisa va nghenela ku phasa kun’wana ka xiyimo xa le henhla—ku phasa vanhu.
3 Hinkwaswo leswi swi vula yini eka hina hi hexe? Loko Petro, Andriya, Yakobo na Yohane va rhamberiwe ku va vaphasi va vanhu, tsalwa ri ri: “Va siya hinkwaswo va n’wi landza.” (Luka 5:11) Mawaku xikombiso lexinene swonghasi! Xana hi nga hlakulela moya lowu fanaka wa ku tinyiketela, ku lunghekela ku tirhela Yehova hi ndlela leyi fanaka ku nga khathariseki leswi lavekaka?
4 Kambe, ku vuriwa yini loko nsimu ya ka n’wina yi tikomba yi nga humesi mihandzu enkarhini wa sweswi? U nga heli mbilu. Tsundzuka, Yesu u tate tinkoka ta vadyondzisiwa endzhaku ka loko va hete vusiku hinkwabyo va nga phasi nchumu. Sweswo swi nga ha endleka hi ndlela ya moya. Vamakwerhu vo tala va xinuna ni va xisati va swi rhandza ku ya eka tinsimu ni madoroba man’wana leswaku va kurisa vutirheli bya vona. Leswi swi nga ha ringanisiwa ni vaphasi va tinhlampfi lava kumaka mati ya le ka vona ma nga ri na tinhlampfi, kutani va ya kun’wana.—Luka 5:4-10.
5 Emabandlheni yo tala ya le madorobeni ku ni tihuvo letikulu ta vakulu, malandza ya vutirheli ni vamakwerhu van’wana lava fanelekaka. Xana u tshame u anakanyisisa hi ku ya etindhawini laha ku nga ni xilaveko lexikulu xa vaphasi va vanhu? Xana u nga endla leswi engetelekeke leswaku u aka mabandlha lamatsongo ni ku pfuna ku hlanganisa tinsimu letikulu, leti nga tirhiwiki? Kutani, hi kombela hi xikhongelo u xiyisisa nxaxamelo lowu landzelaka wa mabandlha ni tindhawu laha mimpfuno ya wena tanihi muphasi wa tinhlampfi wa moya yi lavekaka kona hi ku hatlisa.
Nsimu Ya Xitsonga:
Dzumeri (en’walungwini wa Tzaneen): Nsimu leyikulu leyi nga ni vahuweleri va nhungu naswona a ku na makwerhu wa xinuna wo rhangela. Ku laveka vakulu kumbe malandza ya vutirheli lava nga ni mindyangu leyi tiyeke.
Giyani: Nsimu leyikulu, leyi humesaka mihandzu. Ku ni bandlha leritsongo ra 32 wa vahuweleri na 3 wa vakulu. A va swi koti ku hlanganisa nsimu leyi nga ni vaaki lava ringanyetiwaka eka 25 000. Ku laveka maphayona ni mindyangu leyi tiyeke.
Mahlathi: Ntlawa lowu nga woxe wa ntlhanu wa vahuweleri wu ni nsimu leyikulu. Nsimu leyi yi humesa mihandzu kutani ku laveka maphayona, vakulu ni malandza ya vutirheli.
Mbhokota (kusuhi na Louis Trichardt): Bandlha leritsongo ra vahuweleri va 24, a ku na makwerhu wa xinuna wo rhangela. Ku laveka vakulu ni malandza ya vutirheli.
Nsimu Ya Xivenda:
Fefe (kusuhi na Mudale): Ku laveka vakulu kumbe malandza ya vutirheli leswaku va rhangela. Ku ni vahuweleri va ntlhanu ntsena entlaweni lowu naswona nsimu leyi yi lava ku nyikiwa vumbhoni lebyinene.
Folovhodwe: Ku ni nkombo wa vahuweleri ntsena endhawini leyi. Ku laveka maphayona leswaku ma khathalela vanhu lava tsakelaka.
Makhushu (kusuhi na Messina): Ku ni vamakwerhu vanharhu va xisati ntsena endhawini leyi, a va swi koti ku hlanganisa nsimu ya vona leyikulu. Ku laveka ndyangu lowu tiyeke kumbe mpatswa lowu nga maphayona.
Nsimu Ya Xizulu:
Braneamburg (kusuhi na Badplaas): Ntlawa lowutsongo lowu nga woxe wa vahuweleri lava nga hansi ka nhungu. Ku ni ku tsakela lokunene endhawini leyi. Ku laveka maphayona.
Carolina: Vumoya bya bandlha leri leritsongo ra vahuweleri va 15 i byinene. Ku laveka vakulu kumbe malandza ya vutirheli lava nga ni mindyangu leyi tiyeke.
Daggakraal (kusuhi na Vlakpoort): Ku laveka vakulu ni malandza ya vutirheli kumbe maphayona. Ku ni vahuweleri va khume lava pfumalaka vurhangeri. Nakambe va lava mpfuno wa ku hlela ni ku fambisa minhlangano ya bandlha.
Ntlawa Lowu Nga Woxe Wa Le Violetbank (kusuhi na Shatale): I ntlawa lowu kulaka hi ku hatlisa wa vahuweleri va 21. Malembe mambirhi lama hundzeke a a ku ri ni vahuweleri va nkombo ntsena. Ku laveka vakulu ni malandza ya vutirheli kun’we ni maphayona ya nkarhi hinkwawo.
Vahuweleri Lava Nga Voxe Va Le Emganduzweni (exifundzeni xa White River): Ntlawa wa vahuweleri va 11. Ku ni xilaveko xa vakulu ni malandza ya vutirheli leswaku va fambisa minhlangano ni ku rhangela.
Vahuweleri Lava Nga Voxe Va Le Madras (kusuhi na Marite, eBushbuckridge): Lowu i ntlawa wa vahuweleri va 12 na 5 wa maphayona ya nkarhi hinkwawo. Ku laveka vakulu ni malandza ya vutirheli leswaku va rhangela.
Vahuweleri Lava Nga Voxe Va Le Ronaldsey (exifundzeni xa Ximhungwe): Ntlawa wa vahuweleri va 15 ni phayona rin’we ra nkarhi hinkwawo. Ku laveka maphayona ya nkarhi hinkwawo lama engetelekeke kun’we ni vakulu ni malandza ya vutirheli.
Zwaartkopje Na Langkloof (kusuhi na Ekangala): Leyi i nsimu leyi nga aviwangiki leyi nga ni vanhu vo tala lava kombisaka ku tsakela lokukulu. Yi ni vaaki vo tala. Ku laveka maphayona leswaku ma khathalela ku tsakela loku.
6 Lava lunghekeleke ku tinyiketela leswaku va tirha laha xilaveko xi nga xikulu kona va nga tiyiseka leswaku Yehova u ta va katekisa. “Kutani Petro a ku ka Yesu: ‘Waswivo, hina hi tshikile hinkwaswo, hi ku landza.’ Yesu a ku: ‘Ndzi tiyisile ndzi ri ka n’wina: Un’wana ni un’wana la tshikeke muti wa yena, kumbe makwavo wa xinuna kumbe wa xisati . . . hikwalaho ka mina ni hikwalaho ka Evhangeli, ú ta nyikiwa swilo leswi ka dzana eminkarhini ya sweswi, . . . kutani eminkarhini leyi taka, ú ta nyikiwa vutomi lebyi nga heriki.’”—Marka 10:28-30.