“A Hi Yeni Ndlwini Ya Yehova”
1 Davhida u angule hi mapfundza eka xirhambo lexi nge: “A hi yeni ndlwini ya Yehova.” (Ps. 122:1) ‘Yindlu’ ya Yehovha, leyi yimeriwaka hi tempele, a yi ri ndhawu leyi ku hlengeletanaka lava a va navela ku gandzela Xikwembu xa ntiyiso. A ku ri vukwetsimelo lebyi nga ni nsirhelelo ni ku rhula. Namuntlha, vandlha ra misava hinkwayo ra Vukreste i ‘yindlu’ ya Xikwembu, “mhandze leyikulu ni xiseketelo xa leswi nga ntiyiso.” (1 Tim. 3:15) Malunghiselelo hinkwawo ya ku pona ma endliwa ma kumeka hi ndlela leyi. Hikwalaho ka sweswo, “matiko hikwawo ma ta talela kona” loko ma lava ku kuma mikateko leyi tshembisiweke ehansi ka vulawuri bya Mfumo wa Xikwembu.—Esa. 2:2.
2 ‘Yindlu’ leyi yi hlanganisa mavandlha yo tlula 69 000 ematikweni ya 229. Tinyangwa ta Tiholo ta Mfumo ti pfulekile emisaveni hinkwayo, leti nga ni vatirhi lava gingiritekaka vo tlula mune wa timiliyoni lava endlaka xirhambo lexi nge: “Tana! . . . ni loyi a swi navelaka a a nwe mati ya vutomi a nga hakeli.” (Nhlav. 22:17) Vo tala va ri twile rungula leri naswona va angule kahle. Van’wana ri va khumbile kambe a va si ta endlwini ya Yehovha hi ku hlanganyela ni vandlha ra Vukreste. Volavo va ni ‘xilaveko xa moya’ lexi xi nga enerisiwaka hi malunghiselelo lama kumekaka evandlheni ntsena. (Mt. 5:3) Hi hanya eminkarhini yo nonon’hwa, ni makumu ya mafambiselo lawa ma tshinela hi ku hatlisa. Langutelo ra ku nga tsakeli kumbe ku kokela endzhaku ri nga vanga ku hlwela loku nga ni khombo. I swa xihatla leswaku vanhu va ‘tshinela kusuhi ni Xikwembu’ hi ku tshinela enhlengeletanweni ya xona. (Yak. 4:8) Xana hi nga va pfunisa ku yini?
3 Yisa Ku Tsakela eNhlengeletanweni: Loko hi sungula ku hlangana ni vanhu lava tsakelaka, hi fanele hi yisa ku tsakela ka vona enhlengeletanweni. Hambi loko hina hi swi kota ku tikumela matsalwa ni ku hlamusela tidyondzo ta nkoka, a hi hina swihlovo swa vutivi byolebyo. Hinkwaswo leswi hi nga swi dyondza swi huma enhlengeletanweni, swi tisiwa hi ntlawa wa nandza la phamelaka “swakudya hi nkarhi wa kona.” (Mt. 24:45-47) Ku sukela eku sunguleni, lavantshwa va fanele va lemuka leswaku vugandzeri byo tenga a byi katsi vandlha ra ka vona ntsena; ku ni vandla ra vanhu lava hleriweke, va mfumo wa le tilweni, va misava hinkwayo lava tirhaka ehansi ka vukongomisi bya Yehovha.
4 Nkongomiso lowu hi wu kumaka, wu huma eka Yehovha, la tshembiseke leswaku u ta hi letela, a hi dyondzisa. (Ps. 32:8; Esa. 54:13) Ndzetelo lowu ngopfu-ngopfu wu haxiwa hi tibuku ta hina. Loko hi pfuna lava tsakelaka leswaku va languta tibuku ti ri ta nkoka, va ti languta tanihi xihlovo xa vuleteri lebyi ponisaka vutomi, va ta hlaya ni ku tirhisa rungula ra tona ematshan’weni yo hatla va ti lahla. Nkarhi hinkwawo hi fanele hi fambisa ni ku tirhisa tibuku leti hi ndlela leyi kombisaka ku ti xixima. Leswi swi dyondzisa lavantshwa leswaku va tlangela nhlengeletano ni ku tshembela eka malunghiselelo ya yona.
5 Tivisa lava tsakelaka leswaku ku ni ndhawu yo hlanganela eka yona emugangeni wo karhi, laha vuleteri byi nyikeriwaka kona nkarhi na nkarhi. Va nyike adirese ya Holo ya Mfumo ni nkarhi wa minhlangano. Hlamusela ku hambana loku nga kona exikarhi ka minhlangano ya vukhongeri leyi va nga ha vaka va hlanganyele ka yona eku sunguleni. Un’wana ni un’wana wa amukeleka; a ku na minhlengo kumbe ku sindzisiwa ku humesa mali. Hambi leswi minongonoko yi fambisiwaka hi vatirheli lava vekiweke, un’wana ni un’wana wa swi kota ku hlanganyela hi ku hlamula ni ku va ni xiphemu eka swiyenge swa nongonoko. Mindyangu ya amukeleka; vana va nghena eka mabulo ya hina ya Bibele. Vatirheli va hina a va ambali tinguvu to hlawuleka. Holo ya Mfumo yi khavisiwe khwatsi naswona a yi na wona makhandlhele, kumbe swifaniso. Lava vaka kona hakanyingi i vaaki va ndhawu yoleyo.
6 Hamba U Yisa Ku Tsakela Eka Tidyondzo Ta Bibele: Xikongomelo-nkulu xa dyondzo ya Bibele i ku dyondzisa ntiyiso wa Rito ra Xikwembu. Nakambe xi fanele xi pfuna xichudeni ku twisisa nhlengeletano ya Yehovha ni ku n’wi endla a vona xilaveko xa nkoka xa leswaku a va xiphemu xa yona. Ntirho lowukulu lowu endliweke hi Yesu ni vadyondzisiwa vakwe eka lembe xidzana ro sungula a wu tsakisa vanhu va timbilu letinene naswona wu va hlengeletele ntirho ehansi ka huvo leyi fumaka. Eka miganga leyi a va angula kahle, a ku vumbiwa mavandlha leswaku va hamba va leteriwa ni ku dyondzisiwa. Lava a va hlanganyela, a va tiyisiwa emoyeni, va pfuniwa ku tiyisela emaxangwini. (Hev. 10:24, 25; 1 Pet. 5:8-10) Esikwini ra hina, xikongomelo xa Yehovha i ku “hlengeleta hikwaŝo e ka Kriste.” (Ef. 1:9, 10, BX) Hikwalaho ka sweswo, hi ni “nhlengeletano ya vamakwe[rhu]” ya misava hinkwayo.—1 Pet. 2:17.
7 Dyondzo ya Bibele ya vhiki na vhiki yi fanele yi katsa ndzetelo lowu nga ta pfuna swichudeni swi tlangela nhlengeletano ni ku tirhisa malunghiselelo ya ku ponisiwa. Vhiki rin’wana ni rin’wana tinyike xinkarhana u rungula kumbe u hlamusela swo karhi mayelana ni nhlengeletano ni matirhelo ya yona. U nga kuma tinhla leti pfunaka to vulavurisana eka Xihondzo xo Rindza xa November 1, 1984. Tibroxara leti nge Timbhoni Ta Yehovha Eka Lembe Xidzana Ra Vumakumembirhi na Timbhoni Ta Yehovha—Ti Endla Ku Rhandza Ka Xikwembu Hi Vun’we eMisaveni Hinkwayo ti hlamusela swiphemu-nkulu swa nhlengeletano ni ndlela leyi swi nga hi pfunaka ha yona. Ku hlela leswaku swichudeni swa Bibele swi vona vhidiyo leyi nge Jehovah’s Witnesses—The Organization Behind the Name swi ta endla leswaku va tivonela leswi yi swi endlaka. Swiviko ni mintokoto leyi hlawuriweke leyi humaka eka Yearbook swi nga komba ku humelela ka ntirho ematikweni man’wana ni le ka tinxaka tin’wana. Tibuku tin’wana ti nga ha tirhisiwa na tona. Endzhaku ka nkarhi, hamba u hlamusela swilo swo tanihi xivangelo xa ku famba ka hina hi yindlu na yindlu, xikongomelo xa minhlangano ya hina, ndlela leyi hi hakelelaka ntirho wa hina ha yona ni vukulu bya ntirho wa hina emisaveni hinkwayo.
8 Ku tolovelana ni Timbhoni tin’wana swi nga va phyuphyisa lavantshwa, swi nga kurisa mavonelo ya vona hi vandlha. Leswaku u endla sweswo, rhamba vahuweleri van’wana leswaku va va kona loko u fambisa dyondzo nkarhi na nkarhi. Un’wana wa le vandlheni la nga ni ntokoto lowu fanaka kumbe ku tsakela loku fanaka a nga ha hundzulanyana langutelo ra xichudeni xa wena. Kumbexana nkulu a nga famba na wena leswaku a n’wi tolovela. Ku hlela leswaku mulanguteri wa xifundzha ni nsati wakwe va endzela dyondzo, ku nga va nkateko hakunene. Loko ku ri ni Timbhoni leti tshamaka ekusuhi, ku va toloveta na xichudeni xa Bibele ku nga nyika xikhutazo xin’wana leswaku xichudeni xi va kona eminhlanganweni ya vandlha.
9 Khutaza Lavantshwa Leswaku Va Ta eMinhlanganweni: Lavantshwa va fanele va swi vona leswaku i swa nkoka hi ndlela yihi ku va kona eminhlanganweni. Ringeta ku engetela ku tsakela ka vona. Va kombe swihloko leswi nga ta dyondziwa eka Dyondzo ya Xihondzo xo Rindza. Boxa swihloko swa tinkulumo ta le rivaleni leti tlhandlamaka. Rungula tinhla-nkulu ta mhaka leyi nga ta hlanganisiwa eka Xikolo xa Vutirheli bya le Tilweni ni le ka Dyondzo ya Buku ya Vandlha. Phofula ndlela leyi u titwaka ha yona hi leswi u swi dyondzaka eka minhlangano leyi ni lexi xi ku endlaka u vona swi fanela leswaku u va kona. Loko u swi kota, lunghiselela xo famba ha xona. Ku ba riqingho mi nga si ya eminhlanganweni ku nga ha n’wi tiyisa leswaku a ta.
10 Loko xichudeni xa Bibele xi ta eminhlanganweni xi endle xi titwa xi ri ekaya. N’wi tivise van’wana, ku katsa ni vakulu. Loko a ta eka nkulumo ya le rivaleni, n’wi hlanganise ni xivulavuri. Famba-famba na yena u n’wi komba Holo ya Mfumo. N’wi hlamusele xikongomelo xa matafula ya tibuku ni timagazini, mabokisi ya minyikelo, layiburari ni ndzimana ya lembe. N’wi byele leswaku holo a hi ndhawu ya vugandzeri ntsena, kambe xin’wana, i xivandla lexi ntirho wo chumayela wa vandlha wu hleriwaka eka xona.
11 Hlamusela ndlela leyi minhlangano ya hina yi fambisiwaka ha yona. Komba xichudeni tibuku leti hi ti tirhisaka. N’wi kombe leswaku Bibele hi yona buku leyikulu ya hina. Un’wana ni un’wana a nga hlanganyela, hambi ku ri vana lavatsongo. Hlamusela leswaku vuyimbeleri hinkwabyo ni marito lama nga eka tinsimu ma endliwe hi Timbhoni ta Yehovha leswaku hi ma tirhisa evugandzerini bya hina. N’wi tivise hi swiyimo swo hambana-hambana swa lava nga kona. Seketela moya wa xinghana ni malwandla. Ku tsakela loku lokunene, ka ntiyiso ku nga ha va yinhla yin’wana leyikulu yo endla leswaku xichudeni xi tlhela xi vuya.
12 Lexi Endlaka Van’wana Va Kokela Endzhaku: Hakanyingi, hambi u endla yini na yini, van’wana va kanakana ku tshinela enhlengeletanweni. U nga lan’wi hi ku hatlisa. Ringeta ku twisisa xiyimo xa vona. Ku fikela sweswi, kumbexana a va si xi vona xilaveko xo hlanganyela eka mintirho ya vukhongeri, handle ka loko ku ri swiendlakalo swo hlawuleka. Swirho swa ndyangu kumbe vanghana lavakulu va nga ha va tshikilela. Va nga ha chavisiwa hi vaakelani lava vulaka marito yo tlhava. Ina, va nga tlhela va hingakanyiwa hi swin’wana leswi fambisanaka ni swilo swa vutomi kumbe swa mintlango. Va nga ha swi languta tanihi swihinga leswikulu; u fanele u va pfuna leswaku va languta swilo hi ndlela leyi faneleke kutani va “hlawula leswi nga swinene ku tlula swin’wana.”—Flp. 1:10.
13 Va nyike swivangelo swa Matsalwa leswaku va phikelela. Kandziyisa leswaku hinkwerhu hi lava xikhutazo hi ku hatlisa, ni ku akiwa emoyeni loku hi ku kumaka hi ku hlangana ka hina swin’we. (Rhom. 1:11, 12) Yesu u swi veke erivaleni leswaku ku kanetiwa endyangwini a hi xona xivangelo lexi twalaka xo kokela endzhaku. (Mt. 10:34-39) Pawulo u hi khongotele leswaku hi nga vi na tingana ku tivula erivaleni leswaku hi vadyondzisiwa va Yesu. (2 Tim. 1:8, 12-14) Ku hlongorisa swilo swa hina vini ni swilo leswi kavanyetaka swi fanele ku lawuriwa; handle ka sweswo swi nga hundzuka ntlhamu. (Lk. 21:34-36) Lava lulameriwaka hi mikateko ya Yehovha va fanele ku tinyiketela, va nga tshuki va pfumala ku tsakela. (Kol. 3:23, 24) Ku endla leswaku va twisisa misinya yo tano ya milawu ya Bibele swi nga va pfulela ndlela ya leswaku va endla nhluvuko emoyeni.
14 Tinyangwa Ti Pfulekile: Yindlu ya Yehovha ya vugandzeri bya ntiyiso yi tlakukile ku tlula letin’wana hinkwato. Xirhambo lexi xi twarisiwa ematikweni ya 229 emisaveni hinkwayo: “Tanani, hi ta tlhandlukela nṭhav̌eni ya Yehova, . . . [u] ta hi dyonḍisa tindlela ta [ye]na, kutani hi ta famba e mitileni ya [ye]na.” (Esa. 2:3) Ku angula lokunene ka lavantshwa ku nga ponisa vutomi bya vona. Ku yisa ku tsakela ka vona enhlengeletanweni ya Yehovha i yin’wana ya tindlela letinene ta ku va pfuna.