Bokisi Ra Swivutiso

◼ Xana ntsako wu nga kombisiwa njhani hi lava yaka exivandleni xa nkhuvulo?

Nkhuvulo i nkarhi wa ntsako. Swa hi tsakisa ku vona lavantshwa va yima etlhelweni ra Yehovha, va kombisa ripfumelo ra vona erivaleni. (Ps. 40:⁠8) Yesu u te leswi swi vanga ntsako lowukulu ematilweni. (Lk. 15:​10) Swirho swa ndyangu ni vahuweleri lava a va dyondza ni lava khuvuriwaka, va tsaka ngopfu loko va vona lavantshwa va teka goza ra vona ra nkoka. Kambe ntsako wolowo wu nga kombisiwa hi ndlela yihi leyi faneleke?

Nkhuvulo wa Yesu wu veke xikombiso xa minkhuvulo ya Vakreste namuntlha. A a swi vona leswaku i goza lerikulu ni leri tiyeke leri a a ta ri teka. A a ri karhi a khongela loko a khuvuriwa. (Lk. 3:​21, 22) A a swi tiva leswaku nkhuvulo i nkarhi wa ku anakanyisisa ni ku ehleketa hi vuenti. Vadyondzisiwa na vona va xiye nkoka wa nkhuvulo. Endzhaku ka ku chuluriwa ka moya lowo kwetsima hi siku ra Pentekosta ya 33 C.E., ku khuvuriwe vanhu va kwalomu ka 3 000. Xana vadyondzisiwa lava voneke xiendlakalo xexo va endlise ku yini? “A va chivirikela ku dyondzisiwa hi vaapostola, ni ku hlengeletana, ni ku phema xinkwa, ni ku khongela.” (Mint. 2:​41, 42) Vadyondzisiwa a va languta swilo swa moya naswona a va amukelana hi malwandla.

Tinhlengeletano ta Vukreste manguva lawa ti va ni yinhla-nkulu ya nkhuvulo. Swi fanerile hakunene ku kombisa ntsako wa hina hi ku phokotela ni ku bumabumela loko hi vona vanhu va yima etlhelweni ra Yehovha. Hi hala tlhelo, ku phokotela ku tlurisa mpimo, ku ba makhwela, ku tlakusa mavoko ni ku vitana mavito swi ta va swi nga fanelanga. Ku tikhoma ko tano ku kombisa ku ka u nga tlangeli nkoka ni ku hlawuleka ka xikombiso lexi xa ripfumelo. Naswona lowu a hi nkarhi wa ku tsakisana hi ku hanana swiluva kumbe tinyiko tin’wana eka lava khuvuriwaka loko va huma ematini. Nkhuvulo wu fungha masungulo ya mpfhuka wa Vukreste wa ku pona. Hi nga tsaka ni ku khutaza lava khuvuriwaka hi ku va pfuna va tlangela vuxaka lebyikulu na Yehovha lebyi nkhuvulo wu va pfulelaka byona.

Xivandla xa nkhuvulo a hi ndhawu ya ku vula marito yo hlekisa, ku tlanga, ku hlambela kumbe ku tikhoma kun’wana loku ku nga fambisaniki ni ku xiximeka ka xiendlakalo lexi. Ntsako wa hina wu fanele ku kombisiwa hi xichavo. Ku hleleka ni xichavo xa hina swi engetela ntsako wa vanhu hinkwavo lava nga kona.