Switiviso

◼ Buku leyi nga ta fambisiwa hi January: Buku yin’wana ni yin’wana ya khale ya matluka ya 192 leyi humesiweke emahlweni ka 1980 leyi nga kona exitokweni xa vandlha hi munyikelo wa R1,00. Mavandlha ma nga ha oda buku leyi landzelaka ya nyiko yo hlawuleka eka Sosayiti: Ntiyiso Lowu Yisaka eVuton’wini Lebyi Nga Heriki. Mavandlha ma nga kombela ku hunguteriwa nxavo eka tibuku leti tekiweke hi vahuweleri ni maphayona. Hi nkarhi wa tsima ntsena, nxavo wa maphayona ya nkarhi hinkwawo ni yo hlawuleka i 60 wa tisente. Eka vahuweleri va vandlha ni maphayona ya nkarhinyana, nxavo wa kona i R1,00. February: U Nga Hanya Hi Masiku aParadeyisini eMisaveni hi munyikelo wa R9,00. Tibuku ta mpimo lowutsongo i R4,50. March: Swivutiso Leswi Vantshwa Va Swi Vutisaka​—⁠Tinhlamulo Leti Tirhaka hi munyikelo wa R4,50. April na May: Xikhokhelo xa Xihondzo xo Rindza lexi humaka kambirhi hi n’hweti hi munyikelo wa R19,00. Xikhokhelo xa lembe eka minkandziyiso leyi humaka kan’we hi n’hweti ni xikhokhelo xa tin’hweti ta tsevu eka minkandziyiso leyi humaka kambirhi hi n’hweti i R9,50.

◼ Mavandlha ma fanele ma endla malunghiselelo lamanene ya Xitsundzuxo lexi nga ta tlangeriwa nan’waka hi Mugqivela, March 26, endzhaku ka ku pela ka dyambu. Hambi loko hi rhandza leswaku vandlha rin’wana ni rin’wana ri khoma Xitsundzuxo xa rona n’wini, leswi a swi nge koteki minkarhi yin’wana. Laha hi ntolovelo mavandlha yo hlayanyana ma tirhisaka Holo ya Mfumo yin’we, swi nga va swinene leswaku vandlha rin’we kumbe yo tala ma kuma ndhawu yin’wana leyi ma nga ta yi tirhisa madyambu wolawo. Xitsundzuxo a xi fanelanga xi sungula ni vusiku ngopfu lerova vanhu lava ha ku tsakelaka va tsandzeka ku va kona. Tlhandla-kambirhi, minhlangano a yi fanelanga yi tlhandlamana ekusuhi swinene lerova ku nga vi na nkarhi wo pfuxela vaendzi, wo hlela leswaku van’wana va ya emahlweni va pfuniwa kumbe nkarhi wo khutazana eka lava va nga kona. Endzhaku ko ehleketisisa hi swiyimo leswi hinkwaswo hi vuenti, vakulu va ta vona leswaku hi wahi malunghiselelo lawa ma nga ta pfuna swinene eka hinkwavo lava va nga ta va va tile eXitsundzuxweni leswaku va pfuneka hi xitalo eka xiendlakalo lexi.

◼ Ku sukela hi February, naswona ku nga si hundza March 6, nkulumo leyintshwa ya valanguteri va swifundzha yi ta va leyi nge “Ku Konya Ka Swivumbiwa Leswi Nga Vanhu​—⁠Xana Ku Ta Hela Rini?”

◼ Nkulumo yo hlawuleka ya nguva ya Xitsundzuxo ya 1994 yi ta nyikeriwa emisaveni hinkwayo hi Sonto, April 10. Xihloko xa nkulumo xi ta va lexi nge, “Xana Vukhongeri Byi Heta Vanhu Matimba?” Phepha ra nkulumo ri ta rhumeriwa. Mavandlha lawa ma nga ta va ma ri na mulanguteri wa xifundzha, nhlengeletano ya xifundzha kumbe nhlengeletano ya siku ro hlawuleka, ma ta va ni nkulumo yo hlawuleka hi vhiki leri landzelaka. A ku fanelanga ku va ni vandlha leri nga ta va ni nkulumo yo hlawuleka emahlweni ka April 10.

◼ April 9, 1994, ri hlawuriwe ku va Siku ro hlawuleka ra Timagazini. Emalembeni ya mune lama hundzeke, magidi ya vamakwerhu va tsakele ku hlanganyela emintirhweni ya Siku ro hlawuleka ra Timagazini. Hikwalaho ka yini u nga sunguli ku hlela ka ha ri sweswi leswaku u ta hlanganyela hi xitalo eka ntirho lowu wo hlawuleka? Mavandlha ma khutaziwa ku rhumela swikombelo swo hlawuleka swa timagazini hi ku hatlisa hi laha swi kotekaka ha kona.

◼ HI KOMBELA U XIYA: Loko u bela Sosayiti riqingho, hi kombela u tsundzuka leswi: (1) Loko ku nga ri mhaka ya xihatla kumbe swiyimo swin’wana swa xihatla, hi kombela leswaku u bela swirho swa ndyangu wa Bethele riqingho endzhaku ka tiawara ta ntirho tanihi leswi tilayini ta hina ta riqingho ti tirhaka ngopfu ni nhlikanhi. (2) Loko u ba riqingho mayelana ni xiphiqo kumbe xivutiso, hi kombela u swi veka erivaleni leswaku u ba riqingho u ri kwihi ni mhaka leyi u lavaka ku vulavula ha yona. A swi amukeleki leswaku vamakwerhu, ku katsa ni vakulu, va kombela munhu wo karhi hi vito tanihi leswi a nga ha vaka a averiwe ku ya tirha eka ndzawulo yin’wana kumbe a nga ha va a nga ri kona leswaku a mi pfuna. Makwerhu la amukelaka tiqingho u ta swi kota ku ku nghenisa eka ndzawulo leyi faneleke. Hi kombela leswaku u ringeta ku komisa riqingho ra wena hi laha u nga kotaka ha kona, leswaku ku nga tlangisiwi nkarhi wa nkoka. (3) Loko u ri na xiphiqo xa wena n’wini lexi u lavaka ku xi vula, hi kombela u vulavula ni vakulu va vandlha ku sungula, u nga si bela Sosayiti riqingho. Vakulu va le ka xiyimo lexinene xo ku pfuna eka swivutiso ni swiphiqo swa wena. Handle ka loko ku ri mhaka ya xihatla, hi khutaza vamakwerhu HINKWAVO, ku katsa ni vakulu, leswaku va tsala papila leri hlamuselaka xiphiqo. Hi ta tsaka ku kambela mhaka yoleyo hi ku hatlisa. (Hi kombela u languta Bokisi Ra Swivutiso eka Vutirheli Bya Hina Bya Mfumo bya December 1992, tluka 5.)

◼ Tibuku Letintshwa Leti Kumekaka:

Xigriki: New World Translation of the Christian Greek Scriptures (vandlha ni vanhu: R4,50; maphayona: R3,00). Xinghezi: Watch Tower Publications Index 1991-1992 (vandlha ni vanhu: R2,50; maphayona: R1,50). Xiputukezi: Tivholumo ta Xihondzo xo Rindza leti kandziyisiweke nakambe ku sukela hi 1974-77 (vandlha, vanhu ni maphayona: R18,00). Xivenda: Tidyondzo To Sungula Ta Bibele. Lexi i xibukwana lexi nga ni matluka ya 64 lexi nga ni swivutiso swa nkhuvulo leswi humaka ebukwini leyi nge Vutirheli Bya Hina. Xi fanele xi nyikiwa vahuweleri lava khuvuriweke ni lava nga khuvuriwangiki ntsena. (Vandlha, vanhu ni maphayona: 45 wa tisente).