Xana U Tirhisa Xihondzo xo Rindza Ni Xalamuka! Hi Ku Helela?
1 “Nkarhi na nkarhi ndzi hlamarisiwa hi ku kuma swihloko leswinene ni leswi tsakisaka swinene—vunyingi bya swona a swi vulavuli hi vukhongeri—hi nxavo wa le hansi swonghasi. Hambi leswi ndzi nga ni nkarhi wutsongo, hakanyingi ni madyambu a ndzi tshama ekamareni ra mina ndzi hlaya timagazini ta n’wina hi rivoni. Ndzi ba mandla ndzi vuyelela hikwalaho ka matshalatshala ya n’wina.” Marito lawa yo tlangela timagazini ta hina leti nga enkarhini a ma huma eka dokodela wa le Jarimani Vupela-dyambu. Hi nga ha tivutisa: Xana timagazini ta Xihondzo xo Rindza ni Xalamuka! ndzi ti tlangela ku fikela kwihi? Xana ndzi endla yini leswaku ti fika emakaya ya vanhu va le nsin’wini ya ka hina?
2 Ku nga ri khale hi dyondze xihloko lexi nge “Xihondzo xo Rindza Ni Xalamuka!—Timagazini Leti Nga Enkarhini Leti Nga Ni Ntiyiso” eka Xihondzo xo Rindza xa January 1, 1994. Se ku hundze kwalomu ka tin’hweti tinharhu hi xi hlayile. Xana u swi tirhisile swiringanyeto leswinene leswi nyikeriweke, xisweswo u engetela timagazini leti u ti hangalasaka? Nkandziyiso wa timagazini erhavini wu kombisa leswaku ku hangalasiwa ka timagazini ku hungutekile swinene emalembeni ma nga ri mangani lama hundzeke. Hi avhareji, vahuweleri va fambisa 4 wa timagazini hi n’hweti, maphayona ya nkarhinyana ma fambisa 15, kasi maphayona ya nkarhi hinkwawo ma fambisa kwalomu ka 18.
3 Emavandlheni man’wana vahuweleri, ku katsa ni vantshwa vo tala, va hlanganyela entirhweni wo fambisa timagazini hi Ravunharhu ni madyambu. Etindhawini tin’wana va humelela swinene hi Ravuntlhanu ni ndzhenga tanihi leswi vahuweleri lava nghenaka xikolo va tshunxekeke leswaku va kota ku endla ntirho lowu. Tanihi leswi vamakwerhu vo tala va kumaka mahelo-vhiki ma fanerile leswaku va hlanganyela entirhweni wa timagazini, ku nyikeriwe xikhutazo xo hlawula Migqivela yo endla ntirho lowu. Fambisa timagazini hi yindlu na yindlu, eswitarateni, eswitolo, ni le mintileni ya timagazini. Hinkwerhu hi khutaziwa leswaku hi hlanganyela hi xitalo eku hangalaseni ka timagazini ta hina hi yindlu na yindlu, tanihi leswi swi pfulaka ndlela ya maendzo yo vuyelo ni tidyondzo ta Bibele.
4 Vakulu evandlheni ra ka n’wina va ta mi tivisa malunghiselelo lama endliweke ya ku nyikela vumbhoni hi timagazini, loko va nga si swi endla sweswo. Vakulu ni malandza ya vutirheli va fanele va rhangela eku nyikeleni ka vumbhoni hi timagazini. Xana u ta ma seketela hi xitalo malunghiselelo lawa? Ku vuriwa yini hi n’wina vantshwa evandlheni? Nkarhi hinkwawo ntirho wa timagazini wu hlawulekile swinene eka vahuweleri lavantshwa. Xana hi nga ku engetela njhani ku hlanganyela ka hina eku hangalaseni ka timagazini?
5 Xihondzo xo Rindza xi xaxamete magoza ya mune. (1) Ku ngheniwa hi timagazini engatini, (2) olovisa rungula ra wena, (3) pfumelelana ni swiyimo, ni ku (4) tivekela pakani ya munhu hi xiyexe. Xana magoza lawa u ma twisisa kahle? Xana u sungurile ku ma tirhisa, xisweswo u vona ku antswa eka timagazini leti u ti hangalasaka?
6 Yehovha u rhandza leswaku “vanhu hinkwavo va ponisiwa, va fika laha va kotaka ku tiva leswi swi nga ntiyiso.” (1 Tim. 2:4) Timagazini ta hina ti pfuna vanhu leswaku va hanya vutomi lebyi eneriseka emafambiselweni lawa ya swilo lama faka, ti nyika ntshembo wa nkarhi lowu taka, ti tlhela ti kombisa ndlela yo kuma vutomi lebyi nga heriki. Hi ni lunghelo lerikulu swonghasi ro tirhisa timagazini leti ti nga ni ntiyiso leswaku hi pfuna vanhu va timbilu letinene leswaku va kuma ndlela leyi yisaka evuton’wini lebyi nga heriki.