Xana Ndzi Nga Ya Pfuna eBethele?

¹ Loko u ri makwerhu la nga tekangiki, xana u tshame u ehleketa hi ku endla leswaku nhlengeletano ya Yehovha yi pfuneka hi vuswikoti bya wena? Xana u nga ya pfuna eBethele naswona u pfuna eku eneteni ka xilaveko xa xihatla xa vatirhi lava engetelekeke? Hikwalaho ka ku engeteleka lokukulu laha Bethele, ku ni swilaveko leswikulu eka Tindzawulo to hambana-hambana ta Vuhlayisi. Sweswi hi ni michini ni switirho leswi engetelekeke leswi hi faneleke hi swi hlayisa ku tlula rini na rini eku sunguleni. Ku tlhandlekela eka guxeta leyi yi nga le kusuhi ni ku hela, hi kunguhata ku aka miako mimbirhi leyi engetelekeke yo tshama eka yona, hi engetela swithezi swimbirhi ehenhla ka muako wa Hofisi ni ku kurisa Fektri ya hina emalembeni ya mune lama landzelaka. Xisweswo hi lava vatirhi lava engetelekeke lava nga ta hlayisa miako ni switirho swa hina.

² Ngopfu-ngopfu ku laveka vativi va gezi lava swi dyondzeleke, tiplambara, valunghisi va michini ni lava kotaka ku yi endla, mulunghisi wa mimovha ya petirolo ni ya dizele, vativi va swigwitsirisi, vativi va HVAC, vachayeri lava nga na Khodi 14, vavatli va tikhabodo, vaongori, vadokodela va meno lava nga pfunaka, valunghisi va rivala (landscape designers) ni vasaseli va le ndzeni. Hi lava ngopfu vamakwerhu lava nga le xikarhi ka malembe ya 19 na 35, kambe loko makwerhu la tekeke a ri ni vutshila, yena ni nsati wakwe va nga ha rhumela swikombelo. Lava va endlaka swikombelo va fanele va ri ni lembe se va khuvuriwile, va ri ni xiyimo lexinene ni vandlha naswona va hanye kahle. Loko u fikelela swilaveko swa ntirho wa le Bethele naswona u lava ku hlanganyela eku kurisiweni loku ku tsakisaka, kutani ha ku khutaza leswaku u endla xikombelo sweswi.​—⁠Ringanisa Marka 1:⁠41.

³ Loko u lava ku endla xikombelo, kuma fomo ya le Bethele hi ku tsalela Sosayiti hi ku hatlisa. Loko u tate fomo yoleyo yi hundzisele eka Komiti ya Ntirho ya Vandlha leswaku yi kamberiwa. Hi khutaza vamakwerhu hinkwavo lava nga tekangiki leswaku va anakanyisisa hi vuenti hi mhaka ya ku ta pfuna eBethele. Ina, onge Yehovha a nga katekisa xiboho xa wena hi ndlela leyi fuweke loko u xi pfumela xivutiso lexi nge, Xana Ndzi Nga Ya Pfuna eBethele?