Switiviso
◼ Tibuku leti nga ta tirhisiwa hi January: Buku yihi na yihi ya matluka ya 192 leyi humesiweke emahlweni ka 1980 leyi vandlha ri nga na yona exitokweni hi munyikelo wa R1,00. Mavandlha ma nga ha kombela ku hunguteriwa nxavo eka Sosayiti. Nxavo wa vahuweleri i R1,00 kasi wa maphayona i 60 wa tisente. Mavandlha ma nga ha oda buku leyi landzelaka ya nyiko yo hlawuleka eka Sosayiti: Xana Vutomi Lebyi Byo Va Na Sweswi Ntsena? February: U Nga Hanya Hi Masiku aParadeyisini eMisaveni hi munyikelo wa R10,50. Tibuku ta mpimo lowutsongo i R5,30. March: Nhlavutelo—Ku Chaputa Ka Yona Loku Hlamarisaka Ku Tshinele! hi munyikelo wa R10,50. April na May: Xikhokhelo xa Xihondzo xo Rindza hi munyikelo wa R30,00 swa minkandziyiso leyi humaka kambirhi hi n’hweti. Xikhokhelo xa lembe rin’we xa minkandziyiso leyi humaka kan’we hi n’hweti kumbe xikhokhelo xa tin’hweti ta tsevu xa minkandziyiso leyi humaka kambirhi hi n’hweti i R15,00. Swikhokhelo swa ntlawa i R19,00 ni R9,50 hi ku hambana ka swona.
◼ Mavandlha ma fanele ku endla malunghiselelo lama faneleke leswaku ma tlangela Xitsundzuxo xa nan’waka hi Ravuntlhanu, April 14, endzhaku ka ku pela ka dyambu. Hambi leswi ku naveriwaka leswaku vandlha rin’wana ni rin’wana ri endla nkhuvo wa rona wa Xitsundzuxo, leswi a swi nge koteki minkarhi hinkwayo. Loko nhlayo ya mavandlha yi tirhisa Holo yin’we ya Mfumo, kumbexana vandlha rin’we kumbe ku tlula ri nga kombela ku tirhisa muako wun’wana madyambu wolawo. Xitsundzuxo a xi fanelanga xi hlwela ku sungula lerova vanhu lavantshwa lava ha ku tsakelaka va kuma swi va nonon’hwela ku va kona. Ku tlula kwalaho, nkarhi lowu vekiweke a wu fanelanga wu tshinelelana ngopfu lerova ku pfumaleka ni nkarhi wo xeweta vaendzi emahlweni ni le ndzhaku ka nkhuvo, ni wo endla malunghiselelo yo pfuna van’wana hi laha ku engetelekeke hi tlhelo ra moya kumbe ku bula hi timhaka leti khutazaka. Endzhaku ka ku kambisisa timhaka hinkwato hi vukheta, vakulu va fanele ku endla xiboho xa leswaku i malunghiselelo wahi lama nga ta pfuna lava nga ta va kona eXitsundzuxweni leswaku va vuyeriwa hi xitalo eka xiendlakalo lexi.
◼ Hi Sonto, April 23, 1995, nkulumo yo hlawuleka ya le rivaleni yi ta nyikeriwa emavandlheni hinkwawo. Xihloko xa yona xi ta va lexi nge “Makumu Ya Vukhongeri Bya Mavunwa Ma Tshinele.” Tiyisekani leswaku mi rhamba hinkwavo lava nga ta va kona eXitsundzuxweni nan’waka. Matshalatshala yo hlawuleka ma ta endliwa leswaku ku pfuniwa timiliyoni ta swichudeni leswi fambiseriwaka tidyondzo ta Bibele. Endzhaku ka nkulumo ya siku lero ku ta va ni xitiviso lexi nga ta nyanyula vona kun’we ni vamakwerhu leswaku va langutela ku hlanganyela eku hangalasiweni ka xiphephana xo hlawuleka. Hi nkarhi lowu fanaka, yi ta kombisa swiphiqo leswi vanhu va langutanaka na swona ni xilaveko xo teka goza hi xihatla hi ku pfumelelana ni Rito ra Xikwembu.
◼ Ku sukela hi February, kumbe hi March 5, nkulumo leyintshwa ya le rivaleni ya valanguteri va xifundzha yi ta ku “Dyondzo Ya Xikwembu Ya Hlula eMisaveni Hinkwayo.” Leyi yi ta va nkulumo ya tislaydi leyi hlamuselaka Mintsombano yo hlawuleka ya matiko hinkwawo ya “Dyondzo Ya Xikwembu” leyi khomiweke hi malembe ya ntirho ya 1993 na 1994. Etindhawini leti tislaydi ti nga ta fika endzhaku ka nkarhi, valanguteri va xifundzha va ta nyikela nkulumo leyi nge “Tshemba Xikwembu Xa Ku Chavelela Hinkwako” kutani va hambeta na yona ku kondza tislaydi ti kumeka. Loko mavandlha hinkwawo ma ve na yona nkulumo ya tislaydi, valanguteri va xifundzha va ta ya emahlweni va nyikela nkulumo leyi nge “Tshemba Xikwembu Xa Ku Chavelela Hinkwako” ku kondza ku hleriwa nkulumo leyintshwa ya mulanguteri wa xifundzha eku sunguleni ka 1996.
◼ ENhlanganweni wa Ntirho wa vhiki ra January 9, vahuweleri hinkwavo lava khuvuriweke lava nga ta va kona va ta nyikiwa kopi ya munhu hi xiyexe ya khadi ra Advance Medical Directive/Release ni ti-Identity Card ta vana.
◼ April 1, 1995 ri ta va Siku ra hina ro hlawuleka ra Timagazini ra lembe na lembe. Enkarhini lowu hundzeke vo tala va tsakele ku hlanganyela emintirhweni ya Siku ro hlawuleka ra Timagazini. Ha yini u nga sunguli ku lunghiselela ka ha ri sweswi leswaku u ta hlanganyela hi xitalo lembe leri? Mavandlha ma fanele ku tisa tiodara to hlawuleka ta timagazini hi xihatla.