Bethele Yi Lava Nseketelo Wa Wena Lowu Hambetaka
1 Lembe a ku ri 1910. Makwerhu Russell u lerise Will Johnston leswaku a pfula hofisi ya rhavi leyi ngo va na munhu un’we eSchool Lane, le Durban. A ri na xikamarana xin’we ntsena, Makwerhu Johnston a a lawula hinkwako edzongeni ni le Afrika xikarhi. Hi 1923 rhavi ri rhurhiseriwe eCape Town laha vamakwerhu va nga ri vangani a va tirhela ekamareni rin’we lerikulu. Malembe ya khume endzhakunyana hofisi ya rhavi yi rhurhiseriwe emuakweni lowukulu, kambe Kaya ra Bethele a ri nga si va kona. Hi laha Makwerhu Knorr a tsaleke ha kona endzhakunyana: “Vatirhi a [va] swi koti ku tiphina hi vutomi bya ndyangu swin’we tanihi le marhavini man’wana.”
2 Kambe “siku ra timhaka le’tiṭongo” a ri nga fanelanga ri tsan’wiwa. (Zak. 4:10) Namuntlha ndyangu wa hina wa Bethele kwala Afrika Dzonga wu tele hi vanhu vo tlula 800! Kutani ke, hambi leswi ku nga ni ndyangu lowu lowukulu wa vatirhi vo tirhandzela, ka ha tama ku ri na xilaveko lexikulu xa vatirhi vo tirhandzela lava engetelekeke. U nga ha tivutisa, “Ha yini ku ri na xilaveko lexi lexikulu?”
3 Yehovha U Hatlisisa Ntirho: Hi ku olova, xilaveko lexi xi va kona hikuva Yehovha u hetisise xitshembiso xa yena xo hatlisisa ntirho wa Mfumo emasikwini lawa ya makumu. (Esa. 60:22) Sweswo swi tano, ku nga ri eAfrika Dzonga ntsena kambe ni le matikweni man’wana. Hikwalaho, ku laveka miako leyikulu ya rhavi ematikweni yo hlaya yo fana na Mozambhiki, Mauritius, Madagascar, Kenya, Zimbabwe, Zaire, kavula, ni kwala Afrika Dzonga. Malawi na rona ri ta sungula ku aka miako ya rhavi lerintshwa ku nga ri khale. Tlhandla-kambirhi, ku fanele ku akiwa na tiholo to tala ta tinhlengeletano ematikweni yo hlaya lama nga laha henhla na le xihlaleni xa Reunion. Leswi hinkwaswo swi katsa Tiholo ta Mfumo leti nga eku akiweni hinkwako. Ina, hakunene Yehovha u hatlisisa ntirho. Naswona rhavi ra hina ra katseka swinene eku ndlandlamuxeni ka marhavi lama vuriweke laha henhla.
4 Malunghana ni ku andza loku exiphen’wini lexi xa misava, Huvo leyi Fumaka yi hi kombele leswaku hi va rhavi leri phakelaka miako hinkwayo leyi akiwaka ematikweni lawa se ma boxiweke. Xivangelo xa kona hi leswaku switirho swo aka ni swin’wana hakanyingi a swi kumeki ematikweni lawa. Nhundzu yo tala yo aka miako leyi yi kumeka kwala Afrika Dzonga ntsena. Hikwalaho, hi boheke ku endla tindzawulo letikulu leswaku ti khathalela ndzhwalo lowu engetelekeke wa ntirho. Xo sungula, ku fanele ku ringanisiwa minxavo ya nhundzu kutani yi xaviwa. Nhundzu leyi tisiwaka yi fanele yi kamberiwa kutani yi hlayisiwa ku kondza hi va na mpfumelelo wo yi rhumela. Xo hetelela, nhundzu leyi nga ta rhumeriwa yi vekiwa ndhawu yin’we, yi tsariwa ivi yi rhumeriwa emarhavini man’wana. Ku tala ka ntirho nakambe ku endle leswaku ku ndlandlamuxiwa Ndzawulo ya hina ya Tilori to rhumela nhundzu. Sweswi hi na tilori letikulu ta ntlhanu to rhumela nhundzu leyo tala yo aka ha yona emarhavini, kumbe ku yi yisa emahlalukweni laha yi nga ta rhumeriwa hi xikepe.
5 Nakambe hi endla swilo swo tala leswi lavekaka emiakweni leyi ya ha akiwaka. Hi xikombiso, hi endla mafasitere ni tinyangwa ta aluminiyamu, tikhabodo ta pulanga, kun’we ni tiphayiphi ta nsimbi. Hi laha mi swi tivaka ha kona, lowu i ntirho lowukulu naswona hi tshama hi khomekile. Hambi swi ri tano, hi swi teka ku ri lunghelo ku phakela marhavi laman’wana hi nhundzu yo aka.
6 Tlhandla-kambirhi, Huvo leyi Fumaka yi lunghiselele rhavi ra hina leswaku ri gandlisela marhavi yo tala lama nga ekusuhi timagazini. Sweswi hi gandlisa minkandziyiso ya 32 ya Xihondzo xo Rindza ni minkandziyiso ya 18 ya Xalamuka! n’hweti na n’hweti. Ku sukela hi January 1996, hi ta gandlisa minkandziyiso ya 34 ya Xihondzo xo Rindza n’hweti na n’hweti. Nakambe kwala dzongeni wa Afrika hi gandlisa tibroxara hi tindzimi to tala, kun’we ni tifomo leti laviwaka hi marhavi yo hambana-hambana.
7 Rhavi Ra Hina A Ri Yimayimangi!: Ku tlhela ku va na ntirho wo aka rhavi ra hina. April 6 a ku ri siku ra ntsako endyangwini wa Bethele loko muako lowuntshwa wo tshama eka wona wa (Vu-7) wu sungule ku tirha. Kambe wu lo pfunanyana leswaku ku hunguteka ku manyana. Kutani, mi nge hi mi byela swin’wana leswi swa ha lavaka ku akiwa.
8 Ntirho wo hlanganisa Muako wo tshama eka wona wa vu-7 na wa vu-8 wu sungurile. Eku heleni ka lembe hi navela ku sungula ku aka Muako wo tshama eka wona wa vu-8 lowu nga ta va na tikamara ta 64 kun’we ni miako yin’wana. Hi nkarhi lowu fanaka se hi sungule ku ndlandlamuxa muako wa tihofisi leswaku wu ta va na tihofisi tin’wana leti engetelekeke ta 77. Tlhandla-kambirhi, eku sunguleni ka 1996 hi navela ku sungula ntirho wo ndlandlamuxa kamara ro dyela ni ndhawu yo hlantswela swiambalo. Hi langutele ku va na kamara ro dyela leri ri nga ta tshamisa vanhu va gidi. A swi heleli kwalaho! Hi laha se mi swi xiyeke ha kona loko mi valange Bethele sweswinyana, a ha ha ri na ndhawu evugandliselweni. Hikwalaho ka sweswo, se hi sungule vumpfampfarhuti bya tipulani ta ku andza loku nga ta va kona.
9 Eka leswi se swi vuriweke, mi nga kota ku swi vona kahle leswaku ha ha yimeriwe hi ntirho wo tala. Xivutiso lexi hi lavaka leswaku u xi xiya hi lexi: Xana u nga hi pfuna? Hi kombela ku ku andlalela tindlela leti u nga pfunaka ha tona ku khathalela ku andza loku Yehovha a ku endlaka enkarhini lowu.
10 “Vanhu Va Wena Va Ta Tinyiketela Hi Ku Tirhandzela”: Ina eka Pisalema 110:3 Yehovha u tshembise leswaku “vanhu va [yena] va ta tinyiketela hi ku tirhandzela siku a hlengeletaka nyimpi ya [yena].” (NW) Xana sweswo a hi swona leswi hi vonaka vanhu va Yehovha va ri eku swi endleni? Hinkwako va tinyikela hi ku swi rhandza etimhakeni ta Mfumo, va chumayela mahungu lamanene ya Mfumo hi ku hiseka. Ku engetela kwalaho, van’wana va swi kota ku tirha emakaya ya Bethele kumbe va tirha ku aka. Ndzimana leyi yi ya emahlweni yi vula leswaku lavantshwa va ta kotisa “mbera” leyi phyuphyisaka entirhweni lowu lowukulu. Kunene va tano. Sweswi laha Bethele hi na madzana ya majaha lama tinyikeleke hi ku swi rhandza eswiphen’wini swo hambana-hambana swa ntirho wa Yehovha—vuhundzuluxeri, vugandlisi, ku sweka, ku aka ni mintirho yin’wana yo tala. I xihlovo lexi phyuphyisaka naswona hi wu tlangela ngopfu ntirho wa vona. Xana ya ha ri kona majaha man’wana lama nga tiendlaka ma kumeka entirhweni wa Yehovha?
11 Tanihi jaha u nga ha vutisa: ‘Xana swi njhani ku tirha eBethele? Xana ndzi nga swi kota ku faneleka?’ Leswaku hi hlamula swivutiso leswi ni swin’wana, mi nge hi mi byela leswi Bethele yi nga swona ni leswi mi nga swi langutelaka loko mi tela ku ta hi pfuna.
12 Siku Rin’we ‘Endlwini Ya Xikwembu’: Vito leri nge Bethele (“Yindlu ya Xikwembu”) ra fanela swinene hikuva un’wana ni un’wana la tshamaka eBethele i nandza wa Yehovha la tinyiketeleke. Moya lowu nga eBethele wu lawuriwa hi Xikwembu. Hi sungula siku ra hina hi vugandzeri bya ni mixo bya timinete ta 15, laha hi yingiselaka bulo leri akaka ra ndzimana ya siku ivi hi hlanganyela exikhongelweni lexi sukaka embilwini. Hi kuma leswaku ku anakanya hi Yehovha ni vugandzeri bya yena hi yona ndlela yo antswa swinene yo sungula siku.
13 Hi na malunghiselelo man’wana yo tala ya moya lama rhandzekaka eka hina. Hi xikombiso, hi tiphina hi dyondzo ya hina ya ndyangu hi laha ku heleleke—Dyondzo yo hlawuleka ya Xihondzo xo Rindza ya madyambu man’wana na man’wana hi Musumbhunuku. Tinhlamulo leti lunghiseleriweke kahle hi vakulu ni malandza ya vutirheli ta phyuphyisa naswona ta tsakisa hi tlhelo ra moya. Hi laha ku fanaka, leswi swi hi nyika tinhla letinene ngopfu leti hi nga tiavelaka vamakwerhu emavandlheni lawa hi averiweke eka wona hi Sonto leyi landzelaka. Nkarhi na nkarhi hi tiphina hi nkulumo yo hlawuleka leyi lunghiseleriweke hi Huvo leyi Fumaka ya swirho swa mindyangu ya Bethele ntsena emisaveni hinkwayo.
14 Xihlovo xin’wana xa ntsako ni ku phyuphya i ku hlanganyela ka hina entirhweni wa nsimu ni mavandlha lawa hi averiweke eka wona. Vo tala va hina a a va ri maphayona va nga si ta eBethele, kutani hi tsakela ku hlanganyela hi tindlela hinkwato entirhweni wa nsimu ni madyambu exikarhi ka vhiki na hi mahelo-vhiki. Mhaka leyi ya ntirho wa hina lowo kwetsima yi hi pfuna ku tshama hi tsundzuka nkoka wa ntirho lowu hi wu endlaka eBethele.
15 Nkarhi hinkwawo hi va na vaendzi lava humaka emarhavini man’wana, kumbe lava humaka eBrooklyn, lava hi rungulelaka mintokoto leyi tsakisaka ni swiviko swa misava hinkwayo. Hi xikombiso, sweswinyana hi tiphine hi xiviko lexi khutazaka xa ku kula ka ntirho eMalawi. Ha tiyiseka leswaku u ta pfumela leswaku hikwalaho ka malunghiselelo lawa ya moya lama nga ringanisiwiki na nchumu, ku hava ndhawu yin’wana yo antswa leyi jaha ri nga kulaka emoyeni eka yona.—1 Tim. 4:15.
16 Ku engetela eka swilo swa moya, vamakwerhu va dyondzisiwa mikhuva leyinene yo tirha. Nkarhi hinkwawo hi letela vamakwerhu mintirho yo tala leyi pfunaka leyi nga ta va pfuna evuton’wini bya vona hinkwabyo. Hi xikombiso, hi na nongonoko wo hlawuleka wo letela vamakwerhu lavantshwa entirhweni wo aka leswaku va faneleka emintirhweni yo hambana-hambana yo tanihi ku penda kumbe vuplambara. Malandza man’wana ya Matiko Hinkwawo lawa hi nga na wona ya dyondzise vo tala va majaha ya hina leswaku va va na vutshila emintirhweni yo tala.
17 Hambi swi ri tano, vutomi bya le Bethele a byi vuli ‘ku tshamela ku tirha ku nga tlangiwi.’ Sosayiti yi endle lunghiselelo leri rhandzekaka swinene ra vuhungasi lebyi tengeke ni vutiolori. Naswona vamakwerhu va hina lavantshwa eBethele va dyondza ku ringanisela—hambi leswi va rhangisaka timhaka ta Mfumo, va yi tiva ndlela yo titsakisa hi ndlela leyi tengeke. Twana leswi van’wana va vona va swi vulaka:
18 “Swi ve leswi khutazaka hakunene loko xirho xin’wana ni xin’wana xa Komiti ya Rhavi xi amukela un’wana ni un’wana wa hina eBethele,” ku tsundzuka un’wana wa swirho swa hina leswintshwa la humaka eCape Town. “Un’wana wa swirho swa Komiti ya Rhavi u tsundzuka loko a vona swifaniso leswi nga eka swikombelo swa hina, kutani a ku: ‘Sweswi i lunghelo ro mi vona hi nyama.’ U hi endle hi titwa hi ri ekaya ni ku hi khutaza hi rirhandzu leswaku hi endla Bethele yi va ntirho-vutomi wa hina. Ndzi titwe ndzi tsake ngopfu endzhaku ko twa sweswo!”
19 Makwerhu un’wana wa Muputukezi loko a hlamusela u ri: “Ku ta eBethele i xiendlo xa vutlhari swinene lexi ndzi xi endleke evuton’wini bya mina—kavula, ndzi nga hlayi ku khuvuriwa. Ndzi nga si fika a ndzi chuhile naswona ndzi nga tiyiseki hi leswi ndzi nga ta swi langutela. Kambe sweswi ndza kula emoyeni. Nakambe ku ve lunghelo lerikulu ku hlangana ni vanhu lava humaka ematikweni yo hambana ni mindhavuko yo hambana, ni ku twa swiviko ni mintokoto. Nakambe ndzi wu tirhisa ku antswa nkarhi wa mina ku tlula eku sunguleni. Ndzi tsakela swinene ku tirhisa tindhawu to oxa nyama, ndzi wisa esoneni, kumbe ndzi tirhisa layiburari leyinene ngopfu.”
20 Makwerhu la tshameke eBethele malembe ya tsevu wa hlamusela: “Van’wana va hina va rhandza ku hetelela vhiki ra vona ro gingiritekela ku tirhela Yehovha hi ku famba-famba exindledyanini entshaveni leyi nga endzhaku ka muako wa Bethele, kumbe va hlambela edan’wini ro hlambela.”
21 “Vanhu hi vona va endlaka leswi Bethele yi nga xiswona eka mina. Ndzi rhandza ku va xiphemu xa ntlawa lowu tsakeke wa vanhu lava hinkwavo ka vona va tirhelaka Xikwembu xin’we naswona hinkwavo va tirha swin’we hi xikongomelo xin’we. Hambi leswi hi nga na xiyimiso lexi hatlisaka xa ntirho, ha rhandzana naswona ha khathalelana tanihi vanghana naswona tanihi ndyangu,” ku vule makwerhu wa xinuna wa malembe ya 27 hi vukhale.
22 Ina, lunghelo leri hlamarisaka leri hi ri tsakelaka eBethele i vunghana bya hina bya swa le tilweni. Hi tiphina hi vunghana ni vamakwerhu va xinuna ni va xisati lava tinyiketeleke, siku hinkwaro. Mawaku ntsako lowu hi nga na wona leswi hi nga bohekiki ku hamba hi hlangana ni vanhu va misava, hi laha vo tala va n’wina va bohekaka ku hlangana na vona minkarhi yo tala. Ha yi twisisa mhaka leyi ha yona vo tala va n’wina mi phofuleke ku navela ku tirha endhawini yo fana ni leyi hi tirhaka eka yona laha Bethele siku na siku. Handle ko kanakana, xiyimo xa Bethele ya hina xi hoxa xandla eka ku kula loku yaka emahlweni hi tlhelo ra moya.
23 Hambi swi ri tano, sweswi ku tlakuka xivutiso lexi nge: Ku vuriwa yini hi ku ta ka vamakwerhu lavantshwa va xisati eBethele? Enkarhini wa sweswi hi na vamakwerhu va xisati vo hlayanyana naswona hi wu tlangela swinene ntirho lowu va wu endlaka. Hambi swi ri tano, leswi ntirho wo tala wu tikaka swinene, a hi nge swi koti ku tirhisa vamakwerhu vo tala va xisati sweswi. Ematshan’wini ya sweswo, hi kombela vamakwerhu va hina va xisati lavantshwa leswaku va pfala ndhawu hi ku phayona laha nhlayo yo tala ya vamakwerhu lavantshwa va xinuna va sukeke eka yona va ta eBethele.
24 Ku Laveka Vatirhi Lava Nga Ni Vutshila: Ku engetela eka majaha lawa hi ma letelaka, hi lava vamakwerhu vo tala lava nga ni vutshila leswaku va hi pfuna. Leswi swi tirha eka tindzawulo to hambana-hambana eBethele—ekaya, evugandliselweni naswona ngopfu-ngopfu eku akeni. Nakambe hi lava vamakwerhu vo tala lavakulu va xinuna—vakulu ni malandza ya vutirheli—lava fanelekaka ku rhangela eka vuvatli, ku veka xitina, ku hlanganisa tinsimbi ni ku pfuna ku dyondzisa majaha. Lembe leri nga hundza vamakwerhu vo tano lava nga tshamiki eBethele va ve mpfuno swinene eku akeni. Van’wana va vona va nyikele mintirho ya vona nkarhi hinkwawo naswona sweswi i xiphemu xa vatirhi va nkarhi hinkwawo. Van’wana lava nga ni vutihlamuleri bya ndyangu va swi kotile ku hi pfuna vhiki kumbe mavhiki mambirhi kumbe hambi ku ri ku ringana n’hweti. Vatshila va va munyikelo wa nkoka entirhweni wo aka. Hikwalaho hi rhamba hinkwavo lava nga ni vutshila bya mintirho yihi na yihi leyi fambisanaka ni ku aka leswaku va vona loko va nga tinyikela hi ku swi rhandza ku ringana vhiki kumbe mavhiki mambirhi kumbe ku tlula. Ha yini u nga endli xiboho sweswi leswaku u nga swi kota rini ku ta u ta hi pfuna?
25 Lava va tiendlaka va kumeka va boheka ku tiphina hi nkarhi lowu phyuphyisaka hi tlhelo ra moya laha Bethele. Makwerhu un’wana la humaka eEastern Cape, wa hlamusela: “Ndzi tirhe laha ku ringana n’hweti naswona ndzi dyondze swo tala. Ku nga ri ntsena mayelana ni ntirho kambe ni mahanyelo, ku namarhela swinene misinya ya nawu lowo lulama, ku hleleka ni ku endla nhluvuko wa moya. Leswi swi ndzi tsakisile swinene!” Makwerhu lontshwa la humaka eDurban u te: “Hambi leswi ndzi nga ekule ni le kaya hi kwalomu ka tikhilomitara ta 600, n’wina vamakwerhu va xinuna ni va xisati mi endle kaya leri ri va kaya leri nga le kule ni kaya ra mina.” Mpatswa wun’wana wo huma eU.S.A. wu tsarile: “Khadi leri a ri nge phofuli ku titwa ka hina ka ntiyiso. Hi titwe hi katekile hakunene ku va hi kotile ku tirha emuakweni, ku vona matimba ya moya wa Yehovha ma ri eku tirheni, ku vona rirhandzu ni vun’we. Mayana nkateko lowu nga wona ku va xiphemu xa nhlengeletano ya Yehovha!” Mpatswa wun’wana wu swi veka hi ndlela leyi: “I ku nandziha ka Paradeyisi!”
26 Hikwalaho, ha mi rhamba hinkwenu lava fanelekaka leswaku mi ta mi ta hlanganyela na hina entsakweni wa ku ndlandlamuxa ka Mfumo. Hi langutele leswaku ntirho wa hina wo aka wa ha ta ya emahlweni malembe yan’wana ya mune. Kambe sweswi, loko mi ri karhi mi anakanyisisa swinene hi mhaka leyi, mi nga ha tivutisa:
27 Xana I Vamani Lava Fanelekaka?: Makwerhu un’wana ni un’wana la tinyiketeleke, la khuvuriweke a nga endla xikombelo xa ntirho wa nkarhi hinkwawo wa Bethele loko malembe ya yena ma ri exikarhi ka 19 na 35, kumbe eku akeni loko malembe ya yena ya ri exikarhi ka 19 na 55. Ku tlula kwalaho, u fanele a hanye kahle emirini, naswona a tiyile emoyeni. Loko u swi kota ku tinyikela hi ku swi rhandza esikwini leri Yehovha a hatlisisaka ntirho, hi kombela u tsala u kombela fomo ya xikombelo. Hlamusela kahle xiphemu lexi u lavaka ku ya tirha eka xona: Ntirho wa Bethele kumbe wo aka. Entiyisweni, hi ndyangu wun’we wa Bethele lowu tsakeke. Kutani u nga ha endla xiboho xo endla xikombelo xa ntirho wa Bethele ni xa ntirho wo Aka, kutani u pfumelela Sosayiti ku va yi ku avela laha u nga ta laveka kona swinene.
28 Hambi swi ri tano, endzhaku ko anakanyisisa kahle, u nga ha kuma leswaku a wu swi koti ku endla xikombelo xo ta eBethele enkarhini wa sweswi. Loko swi ri tano, xana yi nga va yi ri kona ndlela yin’wana leyi u nga pfunaka ha yona ku khathalela ku andza lokukulu loku Yehovha a ku endlaka sweswi edzongeni wa Afrika? Ina, swo tala swi hi laha hi nga ta swi hlamusela.
29 Nseketelo Wa Mahelo-vhiki Wa Mavandlha Ya Le Kusuhi: Leswaku hi fambisana na xiyimiso xa hina xa ntirho hi tirha eku akeni hi Mugqivela wun’wana ni wun’wana wa vumbirhi. Hikwalaho, hi titshege swinene hi nseketelo wa mavandlha ya le kusuhi hi mahelo-vhiki. Hi wu tsundzuka hi ri karhi hi tlangela nseketelo wa n’wina wa nkoka wa mahelo-vhiki eka muako lowu hundzeke. A ku ri mpfuno lowukulu ku endla ntirho wo tala lowu nga exiyimisweni. Emuakweni wa sweswi, na kona hi ta va na ntirho wo tala lowu nga ta endliwa hi mahelo-vhiki naswona hi ta tlangela nseketelo hinkwawo lowu hi nga ta wu kuma.
30 Ha yini mi nga swi endli lunghiselelo ra ndyangu? U nga ha vutisa ku, “Ku vuriwa yini hi vana va hina?” Hikwalaho ka vuhlayiseki ni swivangelo swin’wana, nawu wa hina i ku va hi tirhisa lava nga na malembe ya 19 hi vukhale ni ku tlula eku akeni hi koxe. Hambi swi ri tano, swirho leswintsongo swa ndyangu swi nga ha tirhisiwa hi tindlela tin’wana. Vana lava nga ni malembe ya le xikarhi ka 12 na 15 hi vukhale va nga pfuna eku lunghiseni ka rivala, loko ntsena va ri na un’wana wa vatswari va vona. Vantshwa lava nga ni malembe ya le xikarhi ka 16 na 18 hi vukhale va amukeriwa ku ta tirha eku lunghiseni ka rivala hambi loko va nga tirhi na vatswari va vona, ntsena loko va tirha ehansi ka un’wana wa valanguteri va ntirho lowu. A hi va pfumeleli vana lava nga ni malembe ya le hansi ka 12 leswaku va tirha eBethele. Kutani, hi khutaza mindyangu leswaku yi endla malunghiselelo ya leswaku vana lavo tano va khathaleriwa ekaya leswaku swi ntshunxa vo tala hi laha swi nga kotekaka ha kona leswaku va kota ku ta eBethele hi Mugqivela wa ku tirha ka vandlha ra n’wina. Vamakwerhu van’wana va endle xikombelo xo tirha haleno hi Mugqivela n’hweti na n’hweti, naswona va swi kotile ku endla ntirho lowu vonakaka tanihi xiavelo xa ntirho wa vona.
31 Hambi swi ri tano, hambi hi tshama ekusuhi ni Bethele kumbe ekule, xi kona lexi hinkwerhu hi nga xi endlaka leswaku hi hlanganyela eku andziseni ka timhaka ta Mfumo.
32 Ku Hakelela Miako Ya Swa Le Tilweni: Vaendzi lava va xiyaka miako ya hina hakanyingi va vutisa: “Xana miako ya Sosayiti yi hakeleriwa njhani?” Kasi, ntirho wo aka eIsrayele a wu hakeleriwa njhani? Nhlamulo hi leswaku: Yi huma eka vanhu lava tolovelekeke lava timbilu ta vona ti va susumetelaka ku seketela vugandzeri bya Yehovha. Ehleketa hi tiko ra Israyele emananga loko ku fanele ku akiwa tabernakele. A ku ri hava na un’we wa vona loyi a a thoriwile. A va nga ri na ndlela yin’wana yo siva xin’wana ni xin’wana lexi va xi nyikeleke eku akiweni ka tabernakele. Kambe, xana a va titwisa ku yini hi muako wolowo? Mhaka ya Bibele eka Eksoda 35:21 yi ri: “Kutani munhu uṅwana ni uṅwana l’a ṭunḍušiweke hi mbilu ya yena, ni hikwav̌o la’v̌a ŝi ranḍeke, v̌a tisa le’ŝi v̌a ŝi nyikaka Yehova, ku ta tira ntiro wa Yindlu ya nhlengeletano.” (Xiitaliki i xerhu.) Ndzimana 22 yi kombisa leswaku va tise swilo swa nsuku ni swa silivhere swa nkoka lowukulu hikuva a va ‘swi endla swi huma embilwini.’ Eku heteleleni va tise ‘swo tala swinene,’ leswi endleke Muxe a lerisa leswaku vanhu va ‘tshikisiwa’ ku nyikela.—Eks. 36:4-7.
33 Endzhakunyana, loko va tshamisekile eTikweni ra Xitshembiso, a ku fanele ku akiwa tempele. Enkarhini wa kona tiko a ri tshamisekile naswona ri fuwile. Xana a va ta titwa njhani enkarhini wolowo mayelana ni ku hoxa xandla emuakweni wolowo wo durha wa tempele? Va kombise moya wo ‘swi rhandza hi mbilu’ lowu va wu kombiseke emananga. Tikronika to Sungula ndzima 29 yi hi byela hi ndlela leyi hosi ni tihosana ti nyikeleke nsuku ni silivhere yo tala swinene ha yona. Vanhu lavan’wana na vona va nyikele hi mbilu leyi tsakeke. Ndzimana 9 yi vula leswaku “tiko ri ṭakela e ku nyika ka v̌ona, hikuv̌a a v̌a humeserile Yehova e mihlengo hi timbilu hikwato ta v̌ona.” Nakambe timbilu ta vona ti va susumetile. A va lava ku seketela vugandzeri bya ntiyiso swi suka embilwini, naswona ku nyika koloko ku va endle va tsaka ngopfu.
34 Moya lowu fanaka wu boxiwe hi Yesu mayelana ni noni leyi yi nyikeleke exibyeni xa munyikelo wa tempele. Hambi leswi munyikelo wa yena a wu ri wutsongo swinene, mbilu ya yena yi n’wi susumetele ku nyikela “hinkwaswo leswi a a ta hanya ha swona.” (Lk. 21:1-4) Yesu u vule leswaku lavan’wana va nyikele leswi va swi pambuleke exumeni xa vona. Eka vona a ku nga ri ku nyikela; a va nga kalanga va titsona nchumu leswaku va ta nyikela. Kambe mbilu ya noni yi yi susumetele ku nyikela hinkwaswo leswi ingi yi ri na swona. Ku phofula ku tinyikela loku heleleke, munyikelo wa yena a wu ri wa nkoka swinene emahlweni ka Yehovha.
35 Ku Nyikela Hi ‘Mbilu Leyi Swi Rhandzaka’ eMinkarhini Ya Manguva Lawa: Loko swi ta etimhakeni to seketela ku andza ka vugandzeri bya ntiyiso namuntlha, vo tala va fana ni Vaisrayele volavo lava timbilu ta vona ti va susumeteke. Va kombisa moya lowu fanaka ni noni leyi ‘humeseke evusiwaneni bya yona.’ Hi swi tiva kahle leswaku vo tala va nyikela swi suka embilwini—ku nga ri ku pambula eku taleriweni ka vona. Eka vo tala, ku nyikela i ku tinyikela hakunene. Hakanyingi va titsona leswi nga swilaveko, ku nga ri leswi va ngo swi lava ntsena, leswaku va nyikela entirhweni wa Yehovha. Hi phofula ku tlangela ka hina minyikelo yo tano leyi humaka embilwini. Loko hi nyikela hi kona hi endlaka gandzelo, loko hi titsona swin’wana, sweswo hi swona swi amukelekaka ngopfu eka Yehovha. Yehovha “[u] rhandza loyi a nyikaka a tsakile.”—2 Kor. 9:6, 7.
36 Ku ve ni swiendlakalo swo tala leswi eka swona vamakwerhu va ‘tsakeleke ku nyika,’ naswona va hlamarisiwe hi leswi va swi fikeleleke hi nkateko wa Yehovha. Hi xikombiso, eku sunguleni ka va-1980 rhavi ra le Spain a ri lava ku kurisa miako ya rona. Ri vutisile loko Huvo leyi Fumaka yi nga va nyika mali leyi lavekaka. Hambi swi ri tano, hikwalaho ka swin’wana leswi a swi lava mali yo tala enkarhini wolowo, mpfuno wo tano a wu nga ri kona eka Sosayiti. Xivutiso a ku ri leswaku: Xana Timbhoni ta le Spain, ni miholo ya tona leyi nga nyawuriki, a ti ta humesa mali leyi ringaneke ya muako wo tano?
37 “Va hlamuseriwe xiyimo,” hi ku vika ka buku leyi nge Timbhoni Ta Yehovha I Vahuweleri Va Mfumo Wa Xikwembu. “Va nyikele swin’wetsin’wetsi, ni swingwavila ni masindza ya vona hi ntsako leswaku swi ta xavisiwa ivi ku kumiwa mali. Loko Mbhoni yin’wana leyi dyuhaleke yi vutisiwile loko entiyisweni yi lava ku nyikela sindza ra yona ra nsuku lowo durha leri yi ri tiseke, yi hlamurile: ‘Makwerhu, ri ta endla leswikulu ngopfu ku hakelela Bethele leyintshwa ku tlula leswi ri nga swi endlaka evokweni ra mina!’ . . . Mimpatswa yi nyikele hi mali leyi a yi yi hlengeletele maendzo. Vana va rhumele mali leyi va tihlengeleteleke yona. Muntshwa loyi a a kunguhate ku xava katara ematshan’weni ya sweswo u nyikele hi mali ya kona emuakweni wa rhavi.”
38 Ina, hi ku tekelela Vaisrayele loko va ri emananga, Timbhoni ta le Spain ti kombise ku hanana ka tona ni langutelo ra ‘mbilu leyi swi rhandzaka.’ Ku nga ri ntsena leswaku va kote ku nyikela hinkwaswo leswi vonakaka leswi a swi laveka, kambe va tlhele va tinyikela hi voxe eku endleni ka ntirho. A va ta hi magidi. Van’wana a va ta nkarhi hinkwawo, van’wana a va tirha hi masiku ya vona yo wisa na hi mahelo-vhiki. Ku tirha kona va tirhile! Hikwalaho ka moya wa vona wo nyikela, hi ‘mbilu leyi swi rhandzaka’ va swi kotile ku heta leswi eku sunguleni swi tikombeke swi ri ntirho lowu nga kotekiki.
39 Hi wona moya lowu ni xiyimo lexi xa mbilu xa vanhu va Yehovha, leswi endlaka Sosayiti yi kota ku hakelela ntirho wo chumayela ni miako ya marhavi leyi akiwaka sweswi. Hikwalaho ke, i swinene eka un’wana ni un’wana wa hina leswaku a xiya langutelo ra yena n’wini ehenhleni ka ku nyikela nkarhi na nkarhi. Hi laha Pawulo a vuleke ha kona eka 2 Vakorinto 9:7, un’wana ni un’wana u fanele a endla xiboho embilwini ya yena hi leswi a nga ta nyikerisa xiswona—a endla tano “ku nga ri hi ku vilela, hikuva Xikwembu xi rhandza loyi a nyikaka a tsakile.” Swa fanerile leswaku hinkwerhu hi tivutisa: Loko ku hakelela ntirho wa Mfumo ku titshege hi moya lowu ndzi nyikelaka ha wona, xana swilaveko hinkwaswo a swi ta fikeleriwa? Xana ndzi endla gandzela ra xiviri? Kumbe, ndzi nyikela switsongo leswi ndzi swi pambuleke exumeni xa mina leswaku ndzi seketela ntirho wa Yehovha? Xana mbilu ya mina yi ndzi susumetela ku nyikela hi laha ku heleleke entirhweni wa Yehovha?
40 Vamakwerhu vo tala va tsakela ku rhumela minyikelo ya vona hi voxe entirhweni wa Mfumo ni wo aka eka Sosayiti hi ku kongoma. Hi yi tlangela swinene minyikelo yoleyo hinkwayo naswona hi tivisa un’wana ni un’wana hi papila. Loko u tsakela ku nyikela hi ndlela leyi, hi kombela u rhumela minyikelo ya wena eka: Watch Tower Society, Private Bag X2067, Krugersdorp, 1740. Van’wana va nga lava ku nghenisa minyikelo ya vona ebokisini leri tsariweke ku “Branch Building Fund” eHolweni ya Mfumo.
41 Hakunene, ku ni tindhawu to tala leti lavaka ku sekeriwa hi mali. Leti ti katsa Holo ya n’wina ya Mfumo, ntirho wa Mfumo wo chumayela emisaveni hinkwayo, kumbexana holo ya nhlengeletano endhawini ya ka n’wina, kun’we ni ku akiwa ka rhavi ra Sosayiti. Leswi swi lava leswaku mi ringanisela kutani mi endla leswi mi kotaka ku swi endla. Hi kombela u tiyiseka leswaku, munyikelo wihi na wihi lowu mbilu ya wena yi ku susumetelaka ku wu humesa, Sosayiti yi tlangela nseketelo wa wena wa nkarhi na nkarhi. Ha swi tiva leswaku vutomi a byi olovi eka vo tala va n’wina. Van’wana va n’wina swa va tikela “ku kuma mali yo tihanyisa” hikwalaho ka ku durha ka swilo ni mintshikilelo ya misava. Hi yona mhaka leyi un’wana ni un’wana a faneleke a endla xiboho embilwini ya yena leswaku u ta nyikela swo tanihi kwihi leswaku a seketela Sosayiti eku khathaleleni ka yona ntirho wa Mfumo. Hambi swi ri tano, hi nga tiyiseka hi rirhandzu ra Yehovha loko hi endla leswi hi nga swi kotaka leswaku hi seketela timhaka ta Mfumo.
42 Xana U Hetelele Rini Ku Endzela eBethele?: Loko u ri karhi u anakanyisisa hi timhaka leti kahle, hi rhandza ku ku rhamba leswaku u ta vona leswi humelelaka eBethele. Mpatswa wun’wana lowu humaka eCape Town wu rungule leswi: “A hi nga wu anakanyanga mpimo ni miako yo taniya ya rhavi. I ndhawu yo chivirikela eka yona ya vamakwerhu hinkwavo va xinuna ni va xisati, ni rirhandzu leri kombisiweke, leri tiyiseke ku khorwiseka ka hina ka leswaku leyi i nhlengeletano ya Yehovha ya ntiyiso.” Mpatswa wun’wana wo huma hi le Natal wu tsale hi ndlela yo tlangela wu ku: “Swi kufumete timbilu ta hina ku va hi tivonele hi hexe ndhawu yo xonga ya vugandzeri leyi hi nga na yona. Hi tsakisiwe ngopfu hi ntirho, kun’we ni switirho swo aka leswi tirhisiweke ku aka Bethele. Entiyisweni, hakunene Yehovha u chulule mikateko ya yena!—Malakiya 3:10.”
43 Kutani ke, ha yini u nga ti u ta tivonela hi wexe leswi swa ha ku engeteriwaka? Ku valanga sweswi ku katsa ni ku endzela laha ku akiwaka kona, loko u yime endhawini yo hlalela, u ta vona ndlela leyi ku aka hi tilt-up ku endliwaka ha kona. Naswona loko u xiya ku ndlandlamuxa lokukulu loku endliwaka, kutani hi kombela u xiya leswaku swoleswo swi hikwalaho ka un’wana ni un’wana wa hina, ‘loyi mbilu ya yena yi n’wi susumeteleke’ ku nyikela entirhweni lowu lowukulu wo aka lowu katekisiwaka hi Yehovha.
44 Hi vutlhari Solomoni u xiyile: “Loko Yehova a nga aki yindlu, la’v̌a yi akaka v̌a tikaratela ŝa hav̌a.” (Ps. 127:1) Ina, handle ka moya ni nkateko wa Yehovha, ntirho wa hina eBethele a wu ta va wa hava. Kutani vamakwerhu, ha mi kombela hi ku titsongahata leswaku mi hambeta mi khongelela nkongomiso wa Yehovha entirhweni hinkwawo wa nkoka. Hinkwaswo leswi mbilu ya n’wina yi mi susumetelaka ku swi endla, mi nga kombisa ku nyikela ka n’wina loku hambetaka eBethele hi swikhongelo swa n’wina leswi sukaka embilwini nkarhi hinkwawo. Onge Yehovha, Xikwembu xa hina a nga katekisa swinene ntirho wo tinyikela wa malandza ya yena hinkwawo lama swi ‘rhandzaka hi mbilu’ leswaku ku dzunisiwa ni ku xiximiwa vito ra yena lerikulu ro hlawuleka!