Hi “Twarisa Rito”

¹ Hi ku ya hi nhlamuselo ya Bibele ya ‘masiku ya makumu,’ vanhu vo tala namuntlha “va tiendla wonge hi loko va ri ni vukhongeri.” (2 Tim. 3:1, 5) Leswi swi vangiwa hileswi varhangeri va vukhongeri va tsandzekeke ku nyika mintlhambi ya vona nkongomiso wa xiviri wa moya. Vafundhisi va Vujagana a va yi seketeli Bibele. Va tsakela ku tekelela tidyondzo ta hava ta vativi va filosofi ni vafundhisi kumbe ku vulavula hi timhaka ta ntshamisano ni ta tipolitiki ematshan’wini yo twarisa Rito ra Xikwembu. Varhangeri vo tala va vukhongeri a va yi tshembi Bibele. Va yi vona yi hundzeriwe hi nkarhi, hikwalaho va kondletela dyondzo ya hundzuluko hi vomu ematshan’wini ya dyondzo ya Bibele malunghana ni Muvumbi la Hlamarisaka. Vafundhisi vo tala a va ri tirhisi vito ra Xikwembu, naswona va pfumelelana na swona leswaku ri susiwa eka vuhundzuluxeri bya Bibele bya manguva lawa.

² Hilaha a swi ri hakona hi varhangeri va vukhongeri esikwini ra Yesu, vafundhisi va namuntlha va chumayela swilo swa hava. (Mt. 15:8, 9) Swi hilaha muprofeta Amosi a vhumbeke hakona. Ku ta va ni “ndlala e misav̌eni, yi nga ri ndlala ya v̌uŝa, ni loko ri ri tora ra mati, kambe yi nga ndlala ya marito ya Šikwembu.” (Am. 8:11) A ku na nchumu lowu vanhu va wu lavaka handle ka swakudya swa moya leswi nga eRitweni ra Xikwembu.

³ Ndlela Yo Enerisa Xilaveko Xa Vanhu Xa Moya: Pawulo u khutaze Timotiya leswaku a namarhela “Matsalwa layo Hlawuleka, lama kotaka ku [n’wi] letela, ma [n’wi] ponisa,” naswona u tlhele a n’wi lerisa hi matimba leswaku a “twarisa Rito,” eka van’wana. (2 Tim. 3:14, 15; 4:2) Tanihi Timbhoni ta Yehovha, hi fanele hi namarhela eka leswi Bibele yi swi dyondzisaka loko hi chumayela, xisweswo hi tekelela Yesu, Xikombiso xa hina, la nga te: “Dyondzo leyi ndzi yi dyondzisaka a hi ya mina, kambe i ya Loyi a ndzi rhumeke.” (Yoh. 7:16) Hi tirhisa Rito ra Xikwembu tanihi xisekelo xa leswi hi swi dyondzisaka hikuva hi xiya leswaku ri ni vutlhari bya Xikwembu, naswona hi lava leswaku vanhu va tiva lomu rungula leri hi va byelaka rona ri humaka kona.—1 Kor. 2:4-7.

⁴ Vanhu va fanele va twa ntiyiso lowu nga eBibeleni ku sungula ku ri kona va nga ta dyondza hi ta Yehovha ni ku pfumela eka yena. Hilaha ku faneleke Pawulo u tsarile: “Va ta pfumerisa ku yini eka loyi va nga twangiki ta yena ke? Va ta ti twisa ku yini, loko va nga ri na mudyondzisi xana?” (Rhom. 10:14) Hi ku twarisa Rito ra Xikwembu, hi pfuna van’wana leswaku va va ni ripfumelo hi ku kuma vutivi lebyi kongomeke. Vutivi byo tano byi nga hundzula vutomi naswona bya byi hundzula byi va lebyinene. Mutsari wa Munghezi Charles Dickens u tsale leswi malunghana ni Bibele: “I buku yo antswa leyi tshameke yi va kona kumbe leyi nga ta tshama yi ri kona emisaveni, hikuva yi ku dyondzisa tidyondzo to antswa leti xivumbiwa xihi na xihi lexi nga munhu lexi ringetaka ku va ni ntiyiso ni ku tshembeka xi nga kongomisiwaka kahle ha tona.”

⁵ Lava nga ni ndlala ya moya ya ntiyiso va kume leswaku yi herisiwa hi matimba ya Rito ra Xikwembu. Le ndzhaku hi 1913, Frederick W. Franz, jaha leri nga xichudeni xa le kholichi, u nyikiwe xibukwana lexi nge Where Are the Dead? Endzhaku ka ku hlaya nhlamulo ya Bibele ya xivutiso lexi, hi ku tlangela lokukulu, u te: “Lowu i ntiyiso.” Timiliyoni ta vanhu lava lavaka ntiyiso ti titwe hi ndlela leyi fanaka. A hi hambeteni hi twarisa Rito hi ku hiseka ni hi ku gingiriteka leswaku hi ta tsakela ku twa van’wana va ku: “Lowu i ntiyiso.”