Nhlangano Wa Valanguteri Va Muganga

Hi February 11, 1997, valanguteri va muganga vo ringana tsevu lava tirhaka ehansi ka rhavi ra Afrika Dzonga va ve ni nhlangano wa vona wa lembe na lembe eBethele leswaku va ta bula hi swilaveko swa nsimu ya hina, ni ku tlhela va vika nhluvuko lowu veke kona elembeni leri nga hundza. Hikwalaho ka bulo leri va veke na rona, hi tsakela ku hlawula swiyenge swinharhu hi ku kongoma ensin’wini ya hina leswi lavaka nyingiso.

1)Ku aka vumoya bya muhuweleri un’wana ni un’wana. Ku ni xilaveko eka munhu un’wana ni un’wana, mindyangu, ni lava rhangelaka leswaku va gingiritekela ku endla dyondzo ya munhu hi xiyexe ni ya ndyangu, ni ku hlaya Rito ra Xikwembu, ku nga Bibele, siku na siku.

2)Ku va kona eminhlanganweni hinkwayo ya ntlhanu ya vandlha nkarhi na nkarhi. Lexi i xiphiqo ngopfu-ngopfu ensin’wini ya lava vulavulaka Xinghezi ni Xibunu.

3)Ku tikarhatela ku hlanganyela hi xitalo evutirhelini, ni ku vika ntirho hi ku hatlisa eku heleni ka n’hweti yin’wana ni yin’wana. Nhlayo ya ntirho wa nsimu emavandlheni yo hlayanyana wu hungutekile. Valanguteri hinkwavo va muganga va vona onge ku cinceriwa ka minhlangano ya Sonto leswaku yi va ni mixo hi swona leswi vangeleke xiphiqo xa ntirho wa nsimu hi Sonto.

Xana wena u yi vonisa ku yini mhaka leyi? Xana u nga kambisisa xiyimo xa wena n’wini kutani u vona laha wena hi wexe, kumbe tanihi ndyangu, mi nga antswisaka kona? Sathana u ringeta hi matimba swinene ku tsanisa vamakwerhu ni ku endla leswaku hi salela endzhaku evutirhelini. Misava yi tlhele yi onha vutomi bya van’wana va vamakwerhu. Hikwalaho ku ni xilaveko xa xihatla eka hina hinkwerhu leswaku hi tshama hi tiyile emoyeni, ni ku tiyisela endleleni leyi yisaka evuton’wini lebyi nga heriki.—Hev. 10:35-39.