Valanguteri Lava Rhangelaka —Mulanguteri La Ungamelaka
1 Ku va mulanguteri evandlheni i vutihlamuleri lebyikulu swinene. (Mint. 20:28; 1 Tim. 3:1) Lexi i xihloko xo sungula eka nxaxamelo wa swihloko leswi nga ta hlamusela mintirho yo hambana-hambana ya vakulu va Vakreste leswaku hinkwerhu ka hina hi ta tlangela ntirho wa nkoka lowu va hi endlelaka wona.
2 Sosayiti yi hlawula mulanguteri la ungamelaka leswaku a tirha nkarhi lowu nga pimiwangiki. Ntirho wakwe lowukulu i ku langutela ni ku kongomisa ntirho wa huvo ya vakulu. (Vutirheli Bya Hina, tl. 41) Xana leswi swi katsa yini?
3 Mulanguteri la ungamelaka u amukela poso ya vandlha ivi a yi hundzisela eka matsalana hi ku hatlisa leswaku a yi hlayisa. Loko a lunghiselela nhlangano wa vakulu, mulanguteri la ungamelaka u kuma swiringanyeto eka vakulu eka timhaka leti lavaka ku kaneriwa ivi a swi hlengeleta eka makanelwa. U tlhela a tirha tanihi mutshama-xitulu enhlanganweni wa vakulu. Loko ku endliwa swiboho, wa tiyiseka leswaku swa landzeriwa. U langutela ku lunghiseleriwa ka tinkulumo ta Nhlangano wa Ntirho ni ta le rivaleni. U nyika mpfumelelo eka switiviso hinkwaswo leswi endliwaka evandlheni, u langutela ku hakeriwa ka switirhisiwa hinkwaswo swa ntolovelo ni ku tiyiseka leswaku ku hlayiwa ka timali ta vandlha endzhaku ka tin’hweti tin’wana ni tin’wana tinharhu ka endliwa.
4 Tanihi mutshama-xitulu, mulanguteri la ungamelaka u kongomisa ntirho wa Komiti ya Ntirho ya Vandlha. Loko xichudeni xa Bibele xi kombela ku va muhuweleri la nga khuvuriwangiki kumbe loko muhuweleri la nga khuvuriwangiki a kombela ku khuvuriwa, mulanguteri la ungamelaka u lunghiselela vakulu leswaku va n’wi endzela. Mulanguteri la ungamelaka u tlhela a rhangela eku lunghiseleleni ka riendzo ra mulanguteri wa xifundzha leswaku vandlha ri ta vuyeriwa hi xitalo eka vhiki leri ro hlawuleka ra ntirho.
5 Mintirho ya mulanguteri la ungamelaka yi tele naswona yi hambana-hambanile. Loko a khathalela vutihlamuleri byakwe “hi ku gingiriteka ka xiviri,” hinkwerhu ka hina hi nga endla xiphemu xa hina hi ku tirhisana ni vakulu. (Rhom. 12:8) Loko hi ‘yingisa’ ni ku “titsongahata” eka lava rhangelaka exikarhi ka hina, va nga endla ntirho wa vona hi mpimo lowukulu ni hi ku tsaka.—Hev. 13:17.