Ku Tsundzuka Rifu Ra Kreste Emisaveni Hinkwayo
1 Yehovha u hi nyike tinyiko to tala. Mpimo wa vunene byakwe ni musa wakwe swi hlamuseriwe kahle tanihi “nyiko ya [yena] ya mahala leyi nga hlamuselekiki.” Ina “musa lowu nga faneriwiki . . . wa Xikwembu” wa hlamarisa lerova ha tsandzeka ku wu hlamusela.—2 Kor. 9:14, 15.
2 Nyiko Ya Yena Leyikulu: Yesu Kreste, Mukutsuri wa vanhu, i nyiko leyikulu ku tlula hinkwato. Eku kombiseni ka yena rirhandzu lerikulu eka vanhu, Yehovha u nyikele N’wana wakwe la rhandzekaka la tswariweke a ri swakwe. (Yoh. 3:16) Mikateko yo tano leyi nga faneriwiki leyi humaka eka Xikwembu yi faneriwa hi ku tsundzukiwa emisaveni hinkwayo. Rini naswona hi ndlela yihi? Emadyambyini ya Ravumune, April 1, 1999, emisaveni hinkwayo Vakreste va ta va va tlangela Xilalelo xa Hosi, va ta endla Xitsundzuxo xa gandzelo lerikulu ku tlula hinkwawo.—1 Kor. 11:20, 23-26.
3 Kreste u hi ferile loko “ha ha ri vadyohi,” naswona hi nga kombisa ku tlangela ka hina ka munhu hi xiyexe hi ku va kona eXitsundzuxweni xa rifu rakwe ni hi ku rhamba van’wana leswaku va va na hina eka xiendlakalo lexi xa risima.—Rhom. 5:8.
4 Xiendlakalo Xa Nkoka Swinene: Ku tlangela rifu ra Kreste ku kandziyisa ngopfu leswaku u namarhele vuhosi bya Xikwembu hi ku hetiseka. Ku tlhela ku hi tsundzuxa leswaku hi nga kuma xiyimo lexinene emahlweni ka Yehovha hi ku kombisa ripfumelo eka gandzelo ra Yesu, xisweswo hi ta tiyisekisiwa malunghana ni ku ponisiwa. (Mint. 4:12) Entiyisweni, lexi i xiendlakalo xa nkoka xa lembe!
5 Rirhandzu ra hina eka vanhu-kulorhi hi ta ri kombisa hi ku va rhamba leswaku va ya tlangela na hina Xilalelo xa Hosi. Mimpfuno ya nkutsulo yi nga ha kumiwa hi vanhu va timiliyoni lava dyondzaka nkoka lowukulu wa wona. (Flp. 3:8) Lava kombisaka ripfumelo eka gandzelo ra Kreste va nga kuma ntshembo lowu tiyeke wa vutomi lebyi nga heriki.—Yoh. 17:3.
6 Nguva ya Xitsundzuxo yi hi nyika minkarhi yo hlawuleka ya ku kombisa ku tlangela ka hina musa lowukulu lowu nga faneriwiki wa Xikwembu. Lowu i nkarhi wa nkoka wa ku hlanganyela hi ku hiseka eku chumayeleni ka mahungu lamanene ya Mfumo wa Xikwembu. Ku ni mikateko leyikulu leyi nga ta kumiwa hi vanhu hinkwavo lava hi xikhongelo va anakanyisisaka hi nyiko ya Yehovha leyi nga hlamuselekiki ivi va lunghiselela ku va kona eku tlangeleni ka Xilalelo xa Hosi xa nan’waka!