Khongelela Mpfuno Wa Yehovha
1 Yesu u byele vadyondzisiwa va yena leswaku i swa nkoka ku kombela ku katekisiwa hi Yehovha evutirhelini bya vona. (Mat. 9:37, 38) Swikhongelo swa hina swa ku dzunisa ni swa ku nkhensa leswi humaka embilwini, kun’we ni swikombelo swa hina leswi hi swi endlaka hi ku phikelela ni hi ku titsongahata, swi kombisa leswaku hi tshembe mpfuno wa Yehovha hi ku helela. (Filp. 4:6, 7) Matsalwa ma hi khutaza leswaku hi endla “swikhongelo swa mixaka hinkwayo ni xikombelo,” naswona leswi swi katsa swikhongelo swa hina mayelana ni vutirheli.—Efe. 6:18.
2 Hi dzunisa Yehovha hi xikhongelo hikwalaho ka timfanelo takwe leti nga riki na ku ringanisiwa ni hikwalaho ka leswi a swi endleke. Hi tlhela hi n’wi dzunisa hikwalaho ka leswi a nga Munyiki wa mahungu lamanene lawa hi ma chumayelaka. U faneriwa hi ku dzunisiwa hikuva hi yena ntsena la endlaka vutirheli bya hina byi humelela.—Ps. 127:1.
3 Swikhongelo swa hina swa ku nkhensa swi phofula ku tlangela ka hina, hi leswi Yehovha a hi nyikeke ku twisisa ku rhandza ka yena ni xikongomelo xakwe. Xana a hi lunghelo ku byela van’wana mintiyiso ya Mfumo? Hi nkhensa Yehovha eka hinkwaswo leswi hi kotaka ku swi endla evutirhelini bya hina.—Ps. 107:8; Efe. 5:20.
4 Hikwalaho i swa nkoka swinene ku kombela mpfuno wa Yehovha leswaku hi kuma vanhu lava nga ta pfumela leswaku hi va fambisela dyondzo ya Bibele, ni ku kombela leswaku a hi pfuna hi fikelela timbilu ta vona hi ntiyiso. Hi ku endla swikombelo swo tano, hi kombisa leswaku i Xikwembu ntsena lexi endlaka ntirho wa hina evutirhelini wu va ni mihandzu.—1 Kor. 3:5-7.
5 Makwerhu un’wana wa xisati a a anakanya leswaku wansati un’wana loyi a hamba a n’wi yisela timagazini a a nga xi hlayi Xihondzo xo Rindza ni Xalamuka! Hikwalaho ka leswi a nga lavi leswaku timagazini leti ta risima ti tlangisiwa, makwerhu loyi wa xisati u kombele Yehovha leswaku loko wansati loyi a nga ti hlayi timagazini leti, a nga pfumeli ku ti teka. Loko makwerhu loyi a tlhelerile hi nkarhi lowu landzeleke, nuna wa nsati loyi u te: “Ndza nkhensa leswi u tisaka timagazini leti nkarhi na nkarhi. Ndza ti hlaya naswona ndza ti tsakela swinene.”
6 Hi ku phikelela ni hi ku titsongahata, hi nga kombela Yehovha leswaku a hi pfuna hi langutana ni ku nga tsakeli ka vanhu, ku hlekuriwa ni ku hlula ku chava vanhu, leswaku hi ta hambeta hi nyikela vumbhoni eka van’wana hi xivindzi. (Mint. 4:31) Loko hi hambeta hi khongela hi “swikhongelo swa mixaka hinkwayo ni xikombelo” naswona hi ya emahlweni hi endla ntirho wo kwetsima hi ku titsongahata, hi nga tiyiseka leswaku Yehovha u ta hi pfuna.—1 Yoh. 3:22.