Ku Tirhisa Swiphephana Leswaku Hi Kuma Vuyelo Lebyinene
1 Nhlengeletano ya Yehovha ya manguva lawa yi tirhise swiphephana hilaha ku humelelaka enkarhini lowu hundzeke. Vito leri nhlangano wa hina wu tsarisiweke ha rona leri nge, Watch Tower Bible and Tract Society, ri kombisa leswaku swiphephana i swa nkoka swinene eku twariseni ka mahungu lamanene. Xana u tirhisa swiphephana hinkwaswo leswaku u kuma vuyelo lebyinene evutirhelini bya wena?
2 Hi fanele hi swi tolovela hinkwaswo. Hi xikombiso, xana u tshame u swi hlaya khwatsi leswaku u twisisa leswi hlamuseriwaka hi swiphephana leswi? Xana u tshame u anakanya hi munhu loyi a nga tsakelaka xiphephana xo karhi? Ku tolovelana kahle ni xiphephana xin’wana ni xin’wana swi ta endla leswaku u nga kanakani ku swi tirhisa entirhweni wa yindlu ni yindlu ni le ka swiyimo swo tala laha u nga nyikelaka kona vumbhoni hi xitshuketa.
3 Ku Swi Tirhisa eVutirhelini Bya Yindlu Ni Yindlu: Mulanguteri un’wana wa xifundzha wa tsala: “Ndzi kuma vuyelo lebyinene hi ku sungula mabulo ya mina yo tala hi xiphephana.” Xana u tshame u ringeta ku tirhisa ndlela yoleyo? Leswi hi nga ni swiphephana swo tala, ku ni swingheniso swo hlaya leswi hi nga swi hlawulaka. Xiphephana xin’wana ni xin’wana xi nga hi pfuna ku sungula dyondzo ya Bibele eka riendzo ro sungula kumbe eka riendzo ro vuyela.
4 Yi kona minkarhi yin’wana leyi hi nga tirhisaka swiphephana ha yona. Loko u vulavurisana ni munhu emutini, a nga ha ku byela leswaku wa ha ku feriwa hi loyi a n’wi rhandzaka kumbe a vula leswaku wa vabyeriwa. Vanhu lava nga emahlomulweni kumbe lava langutanaka ni maxangu hakanyingi va heleriwa hi ntshembo kutani va va ni gome. Swi nga va njhani loko wo va fambisela xiphephana lexi nge Nchavelelo Eka Lava Nga Ni Gome!? Swi nga ha endleka u twa leswaku munhu loyi u vulavulaka na yena wa ha ku dlaya vukati kumbe wa ha ku heleriwa hi ntirho. Tirhisa swivutiso leswi nga eka tluka 2 ra xiphephana lexi nge Tsakela Vutomi Bya Ndyangu: “Ha yini namuntlha mindyangu yi hlaseriwa hi swiphiqo swo tano? Hi nga byi tsakela njhani vutomi bya ndyangu?” Kumbexana, munhu wa kona u tivutisa swivutiso sweswo. Hambiloko a tikomba a nga tsakeli hi nkarhi wolowo, swi nga ha endleka leswaku u ta xi hlaya xiphephana xexo endzhaku ka nkarhi.—Ekl. 11:6.
5 Tirhisa Swiphephana Hi Xitshuketa: Loko hi tshama hi ri ni swiphephana ekusuhi—exikhwameni xa hembe, exikhwameni xa baji, enkwameni wo hakarha kumbe enkwameni lowu hi wu tirhisaka ensin’wini—hi nga swi tirhisa eka swiyimo swo tala swo hambana-hambana. Swi tirhise loko u ri eswitolo, eriendzweni kumbe loko u bula ni maxaka kumbe vaendzi. Hakanyingi hi nga ha kuma nkarhi wutsongo wo byela van’wana rungula ra Mfumo, ku fana ni le ntirhweni kumbe exikolweni. Swiphephana swi hi pfuna leswaku hi kota ku nyikela vumbhoni hi ku komisa. Xiphephana a xi tiki ngopfu leswaku munhu a xi hlaya kambe xi ba nhloko ya mhaka naswona xi kongomile. Xi amukeriwa hi ku olova ku tlula buku kumbe timagazini, hikuva rungula ra xona a ri lehanga ngopfu.
6 Xalamukela minkarhi yo fambisa swiphephana hi xitshuketa exikolweni kumbe entirhweni, eswitolo, etindhawini to chela petirolo ni kun’wana. Makwerhu un’wana wa xisati loko a hlela ku yisa kokwa wakwe eka dokodela, a a nga swi siyi swiphephana. Loko va ri eka dokodela, u pfuxe bulo ni wansati un’wana loyi a a ri kusuhi ni ku veleka. Endzhaku ko komba wansati loyi xiphephana lexi nge Vutomi eMisaveni Leyintshwa Ya Ku Rhula, makwerhu loyi u vutisile: “Xana u nga swi tsakela ku kurisa n’wana wa wena emisaveni yo fana ni leyi kombisiweke laha?” Endzhaku ka bulo rero u ye ekaya ra wansati loyi kutani va ya emahlweni ni bulo. U endle maendzo ya vuyelo yo hlayanyana endzhaku ka sweswo.
7 Tidyondzo Ta Bibele Ti Nga Sunguriwa Hi Swiphephana: Hi ku tirhisa xiphephana, u nga swi kota ku kombisa ndlela leyi dyondzo yi fambisiwaka ha yona. Makwerhu un’wana wa xisati u tshame a swi endla hi ku tirhisa xiphephana lexi nge Vutomi eMisaveni Leyintshwa Ya Ku Rhula. Hi ku tirhisa xifaniso, u vutise n’wini wa muti loko a tshame a anakanya leswaku misava ya hina yi ta kala yi va tano. Endzhaku ka loko n’wini wa muti a angurile, makwerhu loyi u n’wi kombele leswaku a hlaya matsalwa ya 2 Petro 3:13 na Esaya 65:17, lama kombisiweke exiphephanini. Hiloko makwerhu loyi a ku: “Switshembiso leswi a hi norho kumbe ntsheketo, kambe swi vuriwile eRitweni ra Xikwembu, ku nga Bibele.” Kutani u hlele leswaku a yisa bulo emahlweni hi vhiki leri tlhandlamaka. Eka riendzo leri landzelaka, swivutiso swo tala swa wansati loyi swi hlamuriwile kutani a fambiseriwa buku leyi nge U Nga Hanya Hi Masiku eParadeyisini eMisaveni. Ku sunguriwe dyondzo ya Bibele.
8 Xana wa ha ku khuvuriwa kumbe, xana u muhuweleri la nga khuvuriwangiki loyi a tikarhatelaka ku kuma ntokoto evutirhelini bya wena? Loko swi ri tano, u nga ha titshineta eka lava nga ni ntokoto kutani u kombela ku twa swiringanyeto swa vona malunghana ni ku tirhisa swiphephana ensin’wini ya ka n’wina. Hi ni swikombiso swo tala eBibeleni swa vanhu lava khutaziweke ni ku kongomisiwa hi lava wupfeke eripfumelweni.—Mint. 18:24-27; 1 Kor. 4:17.
9 Wena hi wexe kumbe tanihi ndyangu, tinyikeni nkarhi wo anakanya hi ndlela yo fambisa swiphephana leswi swo hambana-hambana. Tshamani ehansi mi titoloveta swona. Xana u nga swi tirhisa njhani swiphephana swin’we ni nkandziyiso lowu fambisiwaka evutirhelini bya nsimu hi n’hweti yo karhi? Xana ku kona laha u nga ta ya kona, laha u nga fambaka ni swiphephana swi nga ri swingani? Xana ku ni munhu loyi u nga ta hlangana na yena vhiki leri, loyi a nga vuyeriwaka eka rungula leri fikeke hi nkarhi ra swiphephana leswi?
10 Ku rhandza Yehovha hi vuenti ni ku rhandza vanhu swi ta hi susumetela ku tikarhatela ku twarisa mahungu lamanene. Ku tshama hi ri karhi hi tirhisa swiphephana swi ta hi pfuna leswaku hi endla tano. Loko hi swi tirhisa hi vutlhari swiphephana eku chumayeleni ka mahungu lamanene ya Mfumo, kunene hi ta kuma vuyelo lebyinene.