Switsundzuxo Malunghana Ni Lunghiselelo Leri Olovisiweke Ra Ku Fambisa Tibuku
1 Ntirho wa hina i ku chumayela mahungu lamanene ya Mfumo ni ku endla vadyondzisiwa. (Mat. 24:14; 28:19, 20) Ha tsaka ku vona ku fambisiwa ka tibuku to tala ngopfu ni timagazini ku sukela loko hi sungule lunghiselelo leri ri endliweke ri olova ro fambisa tibuku. Xisweswo, vanhu vo tala ngopfu va fikeleriwa hi mahungu lamanene. Xana lunghiselelo leri olovisiweke ro fambisa tibuku ri famba njhani evandlheni ra ka n’wina? Hi amukele marito yo tala ya ku tlangela. Vuyelo lebyikulu hi leswaku sweswi vanhu hinkwavo evandlheni va nga kuma kopi ya Xihondzo xo Rindza ni buku ya Daniyele, leswaku va swi tirhisa eminhlanganweni ya vandlha, ku nga khathariseki leswaku va nga swi kota ku humesa munyikelo lowu ringaneke wa minkandziyiso leyi kumbe e-e. Leswi swi endla leswaku hinkwavo evandlheni va swi kota ku endla nhluvuko lowunene wa moya.
2 Vo tala va tivutisa, Xana minyikelo yi famba njhani leswi sweswi se hi fambisaka tibuku ni timagazini handle ko hakerisa vanhu? Mavandlha yo tala ma endla kahle ngopfu, ma rhumela minyikelo yo tlula leyi a ma yi rhumela eku sunguleni. Kambe, leswi se nhlayo ya tibuku leti yaka emavandlheni yi lavaka ku phindheka kambirhi, hi fanele hi rindzela leswaku ku ta minyikelo yo tala ya ntirho wa misava hinkwayo. Kambe a swi si va tano laha eAfrika Dzonga.
3 Leswi swi tlakusa xivutiso lexi nge, I mani la nga ni vutihlamuleri byo humesa mali ya tibuku ni timagazini leti hi ti fambisaka? Loko ku simekiwa lunghiselelo leri ri endliweke ri olova ro fambisa tibuku, Huvo leyi Fumaka yi te: “Malandza ya Yehovha lama tinyiketeleke hi wona vaseketeri-nkulu va [minyikelo].” Yi engeterile: “Hinkwerhu hi fanele hi titwa hi ri ni vutihlamuleri hi leswi hi swi tekaka.” Kutani ke, loko hi teka tibuku ni timagazini, hi fanele hi titwa hi ri ni vutihlamuleri bya ku humesa munyikelo hi wu nghenisa emabokisini lama funghiweke hi marito lama nge, “Minyikelo Ya Ntirho Wa Sosayiti Wa Misava Hinkwayo—Mat. 24:14.” Loko hi nga swi koti ku humesa mali leyi ringaneke ya tibuku ni timagazini leti hi ti tekaka, xana a hi fanelanga hi humesa hilaha hi nga kotaka hakona? Loko hi nga wu tivi kahle ntsengo wa nkandziyiso lowu hi wu tekaka, hi ni lunghelo ro tekelela xikombiso xa hina, Yesu Kreste, hi ku nyikela ngopfu.—Ringanisa Matewu 14:14-21; 1 Petro 2:21.
4 Tlhandlakambirhi, loko hi fambisa minkandziyiso leyi sekeriweke eBibeleni ensin’wini, kutani vanhu va hi vutisa leswaku i mali muni, hi va byela leswaku hi yi fambisa handle ko hakerisa. Hambiswiritano, hi engetela hi ku vula leswaku ntirho wa hina wa misava hinkwayo wu seketeriwa hi minyikelo ya ku tirhandzela nileswaku loko va lava ku endla munyikelo entirhweni wa hina wa misava hinkwayo wa ku chumayela, va nga hoxa munyikelo wa vona eka mvhilopho leyi hi yi tameleke. Hi fanele ku tshama hi ri ni mvhilopho leyi hi yi tirhiselaka xikongomelo lexi. Mali leyi hinkwayo yi fanele yi hoxiwa emabokisini lama funghiweke hi marito lama nge, “Minyikelo Ya Ntirho Wa Sosayiti Wa Misava Hinkwayo—Mat. 24:14.” Minyikelo ya hina swin’we ni leyi hi yi kumaka ensin’wini yi fanele yi pfuna Sosayiti ku ya emahlweni yi kandziyisa tibuku ni timagazini ni ku khathalela ntirho wa ku chumayela wa misava hinkwayo. Vamakwerhu vambirhi lava tinyiketeleke va fanele va pfula mabokisi lawa, va hlaya mali swin’we kutani va tsala rhisiti ya yona, ivi va nyika la tamelaka timali kopi ya rhisiti leyi swin’we ni mali ya kona.
5 Xana hi fanele hi swi languta njhani ku kuma Tibibele leto xonga (deluxe), tivholumo ta Insight, tivholumo ta Xihondzo xo Rindza ni ta Xalamuka! ni tibuku tin’wana to durha? Tivutise, ‘Xana a ndzi ta va ndzi ti tekile tibuku leti to durha emahlweni ka ku va ku simekiwa lunghiselelo leri olovisiweke ro fambisa tibuku? Xana sweswi ndzi kota ku endla munyikelo lowu faneleke wo hlangavetana ni mali yo hakela tibuku leti?’ Hi xikombiso, ematshan’weni yo lava Bibele yo xonga, ha yini u nga eneriseki hi Bibele leyi tolovelekeke? Mindyangu leyi hlayaka Xinghezi naswona yi nga vuyeriwaka hakunene eka tivholumo ta Insight, yi nga ha teka sete yin’we ya tivholumo leti. Swi ta va tano ni le ka swilo swin’wana swo durha ku fana ni tikhasete ni tivhidiyo. Hinkwerhu hi fanele hi tivonela leswaku hi nga teki swilo swo tano ntsena hileswi hi nga ha bohekiki ku swi hakela eka mukhomi wa tibuku. Hi fanele hi byarha vutihlamuleri bya ku hlangavetana ni mali ya swona hi ku ya hi matimba ya hina.
6 Xana hi nga tirhisa yin’wana ya mali leyi nga emabokisini ya minyikelo lama funghiweke leswaku “Minyikelo Ya Ntirho Wa Sosayiti Wa Misava Hinkwayo—Mat. 24:14” ku hakela xikweleti xa Holo ya Mfumo kumbe swixavaxavani swin’wana swa vandlha? Doo, swi ta va swi nga fanelanga. Mali leyi nga emabokisini wolawo a hi ya vandlha kambe i ya Sosayiti, i ya ntirho wa ku chumayela wa misava hinkwayo naswona yi fanele yi rhumeriwa eka Sosayiti eku heleni ka n’hweti yin’wana ni yin’wana. A yi fanelanga yi tirhiseriwa xikongomelo xin’wana. Swilo leswi khumbaka Holo ya Mfumo swi fanele swi hakeriwa hi mali leyi nghenisiwaka ebokisini leri funghiweke leswaku “Minyikelo Ya Vandlha.”
7 Ha tsaka hi lunghiselelo leri ri olovisiweke ra ku fambisa tibuku. Hinkwerhu a hi kombiseni leswaku ha ri tlangela hi ku humesa minyikelo ya tibuku ni timagazini leti hi ti tekaka leswaku hi ti tirhisa ni ku ti fambisa evutirhelini bya nsimu.