Vanhu Van’wana Va Titshege Hi Wena
1 “Tihlo a ri nge byeli voko ri ku: ‘Wena a ndzi ku lavi.’” Loko tihlo a ro vula sweswo, xana i yini lexi a xi ta ri sirhelela loko ri ri ekhombyeni? Hi yona mhaka leyi muapostola Pawulo a tirhiseke miri wa munhu ni swirho swa wona swo hambana-hambana ku kombisa ntiyiso wa leswaku hinkwerhu evandlheni hi titshege hi van’wana. U kale a tsala ni leswaku “swirho swa miri leswi vonakaka onge swi tsanile swa laveka.” Ina, hi titshege hi vanhu van’wana, na vona va titshege ha hina, naswona hi “[khathalelana] hi ndlela leyi fanaka,” hikuva “hi swirho swa van’wana.” (1 Kor. 12:21-27; Efe. 4:25) Anakanya hi tindlela tin’wana leti leswi u swi endlaka swi khumbaka van’wana ha tona.
2 Endyangwini: Nuna na nsati va tiyisana hi ripfumelo, ku tiyimisela ni ku hiseka loku va ku kombisaka, kutani va rhangisa tipakani ta vona ta moya. Hilaha ku fanaka, langutelo ni xikombiso xa vatswari swi nga ri khumba swinene langutelo leri vana va vona va nga na rona hi ku hlanganyela evutirhelini ni le minhlanganweni ya Vukreste.—Yox. 24:15.
3 Evutirhelini: Ku hiseka ka wena loko u chumayela mahungu lamanene ya Mfumo ku khutaza vahuweleri-kuloni leswaku va tirha hi matimba evutirhelini. Xikombiso xa wena xi vula swo tala, ni ndlela leyi hi ku kongoma u pfunaka van’wana ha yona leswaku va hlanganyela evutirhelini. (2 Tes. 3:9) Kunene maphayona ma yi tlangela ndlela yin’wana ni yin’wana leyi u hlanganyelaka na wona ha yona evutirhelini bya wona. I ntiyiso leswaku vanhu lava tsakelaka lava u va kumaka ensin’wini va lava leswaku u tlhelela eka vona leswaku u va pfuna va kuma ndlela leyi yisaka evuton’wini. Kunene a wu lavi ku va khomisa tingana.
4 Evandlheni: Ku va kona ka wena eminhlanganweni ya vandlha ni ku hlanganyela eka yona i xikhutazo lexikulu eka vamakwenu. Loko u nga vi kona, a hi wena ntsena la lahlekeriwaka. Vanhu lavan’wana na vona a va nge vuyeriwi loko u xwa eminhlanganweni. Kunene vakulu va titshege ha wena hilaha na wena u titshegeke ha vona. Langutelo ra wena lerinene ni nseketelo wa wena wa ku tirhandzela, swi tiyisa ntirho wa vona wa ku risa ntlhambi.
5 A hi ‘khutazaneni erirhandzwini ni le mintirhweni leyinene,’ hi marito ni swiendlo. (Hev. 10:24) Yehovha u ta katekisa moya wa hina wa ku seketela van’wana swin’we ni vutshembeki bya hina.