Nyikela Vumbhoni Hi Ku Va Muakelani Lonene

¹ Yesu u vule leswaku “u fanele ku rhandza warikwenu kukota loko u tirhandza.” (Mat. 22:39) Handle ko kanakana, u va ‘endlela leswinene’ vapfumeri-kuloni, kambe, xana u nga ndlandlamuxa rirhandzu ra wena hi ku rhandza ni vaakelani va wena? (Gal. 6:10) U nga swi endla hi tindlela tihi?

² Hi Ku Titivisa: Xana vaakelani va wena va swi tiva leswaku u Mbhoni? Loko va nga swi tivi, ha yini u nga va endzeli loko u ri entirhweni wa nsimu? Vuyelo bya kona byi ta ku hlamarisa! Kumbe, loko ku ri leswaku u ta titwa u ntshunxekile ku nyikela vumbhoni bya xitshuketa, endla tano. Loko u ri ejarateni ra wena, u nga ha va vona va ri eku tirheni ejarateni ra vona kumbe va ri eku tiololeni ka milenge exitarateni. Va pfuxele u ri karhi u n’wayitela. Endla matshalatshala ya ku va byela hi leswi u swi pfumelaka, laha Holo ya Mfumo yi nga kona ni leswaku i yini leswi endliwaka eka yona, naswona va byele hi van’wana lava tshamaka kwala mugangeni lava na vona va vaka kona eholweni. Va rhambele ku ta eminhlanganweni. Tiyimisele ku nyikela vumbhoni bya rixaladza hi mahungu lamanene eka un’wana ni un’wana loyi u n’wi tivaka.—Mint. 10:42; 28:23.

³ Hi Mahanyelo Ya Wena Lamanene: Mahanyelo ya wena lamanene eka vaakelani va wena ma vula swo tala hi wena naswona ma nga pfula ndlela ya ku nyikela vumbhoni. Nakambe ma ‘khavisa dyondzo ya Xikwembu.’ (Tito 2:7, 10) Kombisa leswaku u va tsakela hi xiviri vaakelani va wena. Vana ni xinghana naswona u va la twisisaka. Xixima lunghelo ra vona ra ku lava ku va voxe naswona u nga va beli pongo. Loko un’wana wa vona a vabya, kombisa ku anakanyela u n’wi byela leswaku wa swi tsakela ku n’wi pfuna. Loko ndyangu lowuntshwa wu rhurhele emugangeni wa ka n’wina, wu endzele u wu amukela. Swiendlo sweswo swa musa swi siya vanhu va ri ni vonelo lerinene naswona swi tsakisa Yehovha.—Hev. 13:16.

⁴ Hi Ndlela Leyi Kaya Ra Wena Ri Langutekaka Ha Yona: Ku va muakelani lonene swi katsa ku khathalela kaya ra wena leswaku ri languteka. Kaya ni jarata leri baseke ri tlhela ri koka mahlo ri nyikela vumbhoni hi roxe. Kambe kaya leri thyakeke kumbe leri nga ni swingolongondzwana leswi hangalakeke hinkwako, ri nga endla leswaku rungula ra Mfumo ri soriwa. Xisweswo, i swa nkoka ku hlayisa kaya ra wena, jarata ra wena ni mimovha swi basile naswona swi languteka.

⁵ Ku kombisa leswaku wa khathala hi vanhu lava nga ehandle ka vandlha ra Vukreste, swi kombisa leswaku wa va rhandza vaakelani va wena. Byi ta va byihi vuyelo bya kona? Swi nga endleka leswaku “hikwalaho ka mintirho leyinene ya [wena] leyi va nga timbhoni leti yi voneke hi mahlo,” van’wana va “dzunisa Xikwembu.”—1 Pet. 2:12.