Xiviko Xa Nhluvuko Malunghana Ni Tiholo Ta Mfumo

¹ Mi ta tsakela ku tiva leswaku ku ta fikela sweswi eka lembe leri ra ntirho, se ku hetiwe Tiholo ta Mfumo ta 27. Hikwalaho hi ba mandla hi vuyelela eka Tikomiti hinkwato to Aka ta Xifundzha ni lava va seketeleke tsima leri, hi ntirho lowunene lowu endliwaka. Leswi se ku nga lo sala tin’hweti tinharhu leswaku lembe leri ra ntirho ri hela, hi khutaza hinkwavo lava tirhaka ku aka tiholo leti leswaku va hatla va hetisa to tala hilaha va nga kotaka hakona.

² Ku engetela kwalaho, hi tsakela ku tivisa ni leswaku mavandlha yo tala ma swi kotile ku tsarisa switandi swa Tiholo ta Mfumo hi mavito ya wona hi nawu, nileswaku sweswi hi vulavulaka se ma rhumele tikopi ta maphepha wolawo ya le nawini erhavini. Hi khutaza mavandlha hinkwavo lawa ku ta fikela sweswi ma nga si kumaka switandi kumbe timfanelo ta kona ta le nawini, leswaku ma nga lan’wi kambe ma hambeta ma hisekela ku swi kuma. (Hi kombela leswaku mi landzela endlelo leri nga eka xiengetelo xa Vutirheli Bya Hina Bya Mfumo bya March 1994.) Xilaveko lexikulu lexi nga kona emavandlheni yo tala sweswi i ku khathalela tiholo ta wona hi mfanelo. Tiholo ta Mfumo hinkwato ti fanele ku ya emahlweni ti ri yimela kahle vito ra Yehovha. Loko mi ri ni holo, xana mi hambeta mi lunghisa leswi lavaka ku lunghisiwa lembe ni lembe? Xana vakulu hinkwavo va tolovelanile ni swiletelo leswintshwa leswi kumekaka eka Memorandum on Information Regarding Ownership of Kingdom Halls (T-36) ya January 1, 2001? Xana rungula leri lavekaka eka Annual Congregation Property Documents & Safety Inspection Worksheet (T-34) ri tatiwile?

³ Hi ma bumabumela swinene mavandlha hinkwawo lawa ma lombeke mali erhavini ma tlhela ma yi hakela hi mfanelo. Mavandlha lawa swa ha ma tikelaka ku hakela n’hweti yin’wana ni yin’wana, hi ma khutaza leswaku ma hatlisa ma hakela mali leyi ma ha yi kolotaka. Mali leyi yi tshama yi ri eku tirheni naswona hi lava ku pfuna mavandlha ya 250, lawa vandlha ha rin’we ri nga ni vahuweleri va 30 kumbe ku tlula, lawa ma nga si vaka ni Holo ya Mfumo leswaku na wona ma nantswa ntsako wa ku va ni holo. Hi yona mhaka leyi hi tsakaka swinene hi mavandlha hinkwawo lama heteke ku hakela mali leyi ma yi lombeke.

⁴ Mavandlha lama yimeke kahle hi tlhelo ra timali ma lombe mali yo karhi leswaku ma pfuna mavandlha lama nga ekusuhi na wona ku aka tiholo ta wona. Sweswo na swona swa tlangeriwa swinene.

⁵ Leswi swi tikombaka leswaku Yehovha u chululela mikateko leyi fuweke eka lunghiselelo leri, hi tshemba leswaku loko ku hela malembe ma nga ri mangani lama taka, hi ta va hi hungute nhlayo ya Tiholo ta Mfumo leti faneleke ti akiwa ensin’wini ya ka hina. Hi mi nkhensa hi vuyelela hikwalaho ka nseketelo wa n’wina lowunene.