Xana U Nga Tiendla U Va La Kumekaka?
1 Ku ve ni xiendlakalo xo hlamarisa swinene hi lembe ra 778 B.C.E. Exivonweni, muprofeta Esaya u vone “Yehovha, a tshame exiluvelweni xo tlakuka ni lexi nga ehenhla.” Hiloko Esaya a twa tiserafi ti huwelela ku kwetsima ka Yehovha, ti ku: “Wa kwetsima, wa kwetsima, wa kwetsima Yehovha wa mavuthu.” Xolexo xi fanele xi ve xivono lexi chavisaka! Loko swa ha ri tano, Yehovha u tlakuse xivutiso lexi tlhontlhaka a ku: “Xana ndzi ta rhuma mani, i mani la nga ta hi yela?” A ku vuriwi nchumu hi muxaka wa ntirho lowu a wu fanele wu endliwa kumbe loko munhu la tinyiketelaka ku wu endla a ta hakeriwa hi ndlela yo karhi. Hambiswiritano, handle ko kanakana, Esaya u hlamule a ku: “Hi mina loyi! Ndzi rhume.”—Esa. 6:1, 3, 8.
2 Vanhu va Yehovha va tiviwa hi ku va ni moya lowu wa ku tiyimisela ku endla xin’wana ni xin’wana lexi Yehovha a xi lerisaka. (Ps. 110:3) Sweswi ku karhi ku endliwa xirhambo xo hlawuleka eka lava va nga tiendlaka va va lava kumekaka. Xana u lunghekele ku angula hi moya wa ku tirhandzela, lowu fanaka ni wa Esaya?
3 Ku tshama ku ri ni xilaveko xa vamakwerhu lava nga tirhaka eBethele. Leswi swi lava leswaku va navela swinene ku rhangisa mintirho ya Mfumo ni ku tiyimisela ku endla xin’wana ni xin’wana lexi nga lavekaka leswaku va seketela ntirho wa ku chumayela emisaveni hinkwayo. (Mat. 6:33) Entiyisweni, ku va xirho xa ndyangu wa Bethele swi nyika munhu lunghelo ro hlawuleka ra ku tirhela Yehovha hi moya-xiviri hinkwawo. Hi ndlela yihi?
4 Ntirho Lowu Endliwaka eBethele: Anakanya hi mintirho hinkwayo leyi hambetaka yi endliwa eBethele ya la Afrika Dzonga. Vamakwerhu va xinuna ni va xisati va 580 lava vumbaka ndyangu wa Bethele va ni lunghelo ra ku katseka swinene eku seketeleni ka hlonga ro tshembeka ni ro tlhariha ni Huvo ya rona leyi Fumaka, eku humeseni ka Tibibele ni tibuku ta Bibele leswaku ti ta tirhisiwa edzongeni wa Afrika ni le dyondzweni ya munhu hi yexe. (Mat. 24:45) Hi xikombiso, eka lembe ra ntirho leri hundzeke, hikwalaho ka ku khomisana ka ndyangu wa Bethele ya la Afrika Dzonga, ku humesiwe ku tlhela ku rhumeriwa swibukwana ni tibroxara ta 5 029 280, timagazini ta 22 745 923 ni tikopi ta 5 194 484 ta Vutirheli Bya Hina Bya Mfumo. Ku cincela eka lunghiselelo leri olovisiweke ra ku fambisa tibuku ku endle leswaku ku humesiwa timagazini ni tibuku to tala swinene. Hi xikombiso, sweswi ku kandziyisiwa kwalomu ka timagazini ta 3,5 wa timiliyoni hi n’hweti. Sweswi Ndzawulo ya ku Rhumela Tibuku yi rhumela minkandziyiso leyi tlulaka timiliyoni tinharhu n’hweti yin’wana ni yin’wana emavandlheni ya la Afrika Dzonga ni ya le Malawi, Mozambhiki, Zambia na Zimbabwe lama kumaka mphakelo wa wona wa tibuku erhavini ra hina. Leswi hinkwaswo swi kombisa leswaku ntirho wu ta hambeta wu andza enkarhini lowu taka. Nakambe ku ni mavandlha lama tlulaka 1 500 lama kongomisiwaka hi rhavi ra hina. Ku tlhela ku pfuniwa marhavi ya le Afrika, lama katsekaka eku kunguhatiweni ni le ku akiweni ka makaya lama engetelekeke ya Bethele, Tiholo ta Tinhlengeletano ni Tiholo ta Mfumo ta kwalomu ka 8 000 leti lavekaka sweswi ematikweni ya le Afrika, lama nga evuswetini. Ku laveka madzana ya vatirhi va ku tirhandzela leswaku va ta khathalela ku kandziyisa ni ku rhumela minkandziyiso, ku basisa, ku hlayisa swilo, ku lunghiselela swakudya, ku xava, ku khathalela rihanyo ni mintirho yin’wana ya ntsandza-vahlayi eBethele.
5 Mintirho leyi hinkwawo a hi matlangwana kambe ya enerisa emoyeni. Swi tsakisa ngopfu ku tiva leswaku matimba ni ntamu wa hina hinkwawo hi swi tirhisela ku seketela ntirho wa ku chumayela ni ku dyondzisa. Ntirho wa le Bethele wu hi pfuna ku yi tiva kahle nhlengeletano ya Yehovha. Hi tsundzuxiwa hi xikhutazo xa mupisalema xa leswaku Vaisrayele a va fanele va tolovelana swinene ni ntsindza wa vulawuri bya le tilweni esikwini ra vona.—Ps. 48:12, 13.
6 Mikateko Leyi Tisiwaka Hi Ku Tirha eBethele: Xana lava va tirhaka eBethele va titwisa ku yini hi malunghelo ya vona ya ntirho? Xiya tinhlamuselo leti landzelaka leti humaka eka swirho swa ndyangu wa Bethele leswa ha riki vantshwa ni leswi dyuhaleke. Xirho xin’wana xa ndyangu wa Bethele, lexi tirheke malembe manharhu eBethele xi ri: “Ku va eBethele ku tiyise vuxaka bya mina na Yehovha. Loko ndzi ri karhi ndzi tirha laha niloko ndzi ri karhi ndzi dyondza ndlela leyi Bethele yi tirhaka ha yona, hi kona ndzi dyondzaka swo tala hi vumunhu bya Yehovha. Ntirho wa Bethele wu tlhele wu ndzi pfula mahlo ndzi vona leswaku Yehovha u tirhisa mixaka hinkwayo ya vanhu. Naswona a swi lavi u va la hetisekeke leswaku u amukeleka eka yena.”
7 Makwerhu un’wana la ha riki muntshwa u ri: “Ndzi tsundzuka ndzi anakanya ndzi ku, ‘Mawaku ndlela leyi swi nga ta tsakisa ha yona ku nghena emisaveni leyintshwa kutani ndzi byela vanhu va khale lava tshembekeke leswaku ndzi hete malembe yo tala ndzi tirha eBethele, ku nga ri ku endla mali emisaveni.’”
8 Loko makwerhu la ha riki muntshwa a tsundzuka ndzetelo lowu a wu kumeke u te: “Ku dyondza hi mina n’wini ni hi leswi ndzi fanele ku swi hluvukisa ni ku hlakulela timfanelo teto swi ve nkateko lowukulu. Sweswi ndzi titwa ndzi faneleka ku antswa ku tirhela Yehovha. Ndzi titwa ndzi kota ku lehisa mbilu hilaha ku engetelekeke, ndzi kota ku tikhoma ku antswa naswona ndzi kota ku kombisa rirhandzu hilaha ku engetelekeke.”
9 Loko makwerhu un’wana wa xisati a anakanya mikateko leyi a yi kumeke ku ta fikela sweswi, u ri: “Nongonoko wa swilo swa moya lowu nga kona laha wu ndzi dyondzise leswi engetelekeke hi Yehovha ni hi ndlela leyi ndzi nga n’wi tekelelaka ku antswa ha yona emianakanyweni, emintlhavekweni ni le swiendlweni. Kutani leswi ndzetelo wa kona wu nga heriki, ni mikateko ya kona a yi heli.”
10 Makwerhu la heteke malembe ya 59 evutirhelini bya nkarhi hinkwawo, lawa ya 43 eka wona a ma heteke eBethele u te: “Bethele a yi fani ni yindlu ya tinghwendza hilaha vo tala va ehleketaka hakona. Hi endla swo tala hikwalaho ka xiyimiso xa vutomi bya hina. . . . A ku si tshama ku va ni siku leri ndzi nga ya entirhweni ivi ndzi tisola hi leswi ndzi swi endleke. Ha yini? Hikuva loko hi tinyiketela eka Yehovha hi moya-xiviri hinkwavo, hi enerisiwa hi ku tiva leswaku ‘hi endle leswi a hi fanele hi swi endlile.’”—Luka 17:10.
11 Makwerhu un’wana, la tirheke eBethele malembe ya 62 u te: “Ndzi kholwa hi mbilu hinkwayo leswaku a yi kona ndhawu leyi fanaka na Bethele emisaveni hinkwayo loko hi nga si nghena emisaveni leyi nga Paradeyisi. A ndzi si tshama ndzi tisola nikan’we hi ku va ndzi hlawule ku heta vutomi bya mina hinkwabyo ndzi ri entirhweni wa nkarhi hinkwavo. Ku ve ntsako lowukulu ku tivonela hi ya mina ni ku hlanganyela eku andzeni lokukulu ka nhlengeletano ya Yehovha ya la misaveni! Hi mpfuno wa Yehovha, ndzi tiyimisele ku ya emahlweni ndzi tshama eBethele ni ku tinyiketela hi moya-xiviri hinkwawo eku yiseni ka timhaka ta Mfumo emahlweni.”
12 Swirho leswi swa ndyangu wa Bethele swi hi tsongolele hi ta mikateko yi nga ri yingani leyi u nga yi kumaka loko u tiendla u va la kumekaka leswaku u ta tirha eBethele. Kambe hilaha swi nga ha kona hi lunghelo rin’wana ni rin’wana ra ntirho, u fanele u fikelela ni timfanelo to karhi. Hi swihi swin’wana swa swilaveko swa ku fanelekela ku va xirho xa ndyangu wa Bethele?
13 Swilaveko Swa Ku Fanelekela Ku Tirha eBethele: Swilaveko swa xisekelo swa ku faneleka ku tirha eBethele swi kombisiwe ebokisini leri fambisanaka ni xihloko lexi. Ku engetela kwalaho, i swa nkoka leswaku lava lavaka ku tirha kona, va va va tiyimisele ku tirha hi matimba, va nga vi “lava rhandzaka mintsako.” (2 Tim. 3:4; 1 Kor. 13:11) Swirho swa ndyangu wa Bethele swi fanele ku va vavanuna ni vavasati va moya, lava hlakuleleke mikhuva leyinene ya dyondzo ya munhu hi yexe ni lava leteleke matimba ya vona ya ku twisisa leswaku “va hambanisa leswi lulameke ni leswi hoxeke.” (Hev. 5:14) Ku wupfa ka vona ka Vukreste ku fanele ku voniwe emahanyelweni ya vona hinkwawo, ku katsa ni maambalelo, ku tisasekisa ka vona ni vuyimbeleri lebyi va byi tlangaka ku katsa ni vuhungasi lebyi va byi hlawulaka. Swirho swa ndyangu wa Bethele leswi tinyiketeleke hi mbilu hinkwayo swi tirha kun’wana ni kun’wana laha swi lavekaka kona. Hi ntolovelo swirho leswa ha riki vantshwa swi nyikiwa swiavelo leswi lavaka leswaku swi kulula swi n’watseka, leswi katsaka ku kandziyisa, ku lunghiselela minkandziyiso ni ku yi rhumela, ku lunghisa swilo, ku hlayisa tindlu ti basile, ku basisa, ku hlantswa swiambalo ni ku sweka swakudya. (Swiv. 20:29) Kambe ku hambana ni ntirho wa ku tihanyisa, xiavelo xin’wana ni xin’wana xa enerisa hakunene hikuva i ntirho wo kwetsima lowu dzunisaka Yehovha.—Kol. 3:23.
14 Loko munhu a rhambiwa ku ta tirha eBethele, u languteriwa ku tshama lembe. Sweswo swi n’wi pfumelela leswaku a leteriwa ku va mutirhi la humelelaka. Hi ni ntshembo wa leswaku u ta lava leswaku Bethele yi hundzuka kaya ra yena. Ku rhandza Yehovha hi kona ku susumetelaka swirho swa ndyangu wa Bethele leswaku swi rhangisa ntirho wa Mfumo eka swilaveko swa swona, ku nga mhaka leyi tsakisaka Yehovha.—Mat. 16:24.
15 Lava Lavekaka Sweswi: Hikwalaho ka muxaka wa ntirho lowu endliwaka eBethele, sweswi ku laveka ngopfu vamakwerhu va xinuna lava nga tekangiki. Hambileswi ku nga riki xilaveko, kambe loko ku hlawuriwa ku rhangiwa hi lava nga maphayona ya nkarhi hinkwawo hikuva ana se va le ntirhweni wa nkarhi hinkwawo. Minkarhi yin’wana ku pfuleka mintirho ya vamakwerhu va xisati lava nga tekiwangiki ni mimpatswa leyi tekaneke, lava nga ni malembe yo suka eka 19 ku ya eka 35, lava tivaka mintirho yo karhi leyi lavekaka eBethele. Ku engetela kwalaho, vamakwerhu van’wana va xinuna ni va xisati lava nga ehenhlanyana ka malembe ya 35 hi vukhale, lava tivaka mintirho yo hlawuleka leyi lavekaka eBethele, va khutaziwa ku endla xikombelo xa ku ya eBethele. Ku boxa swikombiso swi nga ri swingani swa lava lavekaka, ku laveka madokodela ya meno, van’watinkota va le nawini, vampfampfarhuti va swiyimo swa miako, vanjhiniyara, vaongori lava tsarisiweke hi nawu, valunghisi va mimovha ni tilori kumbe lava tivaka ku tirha hi swilo swa elektroniki. Hambiswiritano, a hi khutazi munhu leswaku a ya kuma dyondzo yo hlawuleka kumbe ndzetelo wo karhi a anakanye leswaku sweswo swi ta n’wi pfulela tindlela ta ku vitaniwa eBethele. Lava ana se va kumeke vuleteri byo hlawuleka, kumbexana va byi kume va nga si kuma ntiyiso, va nga rhandza ku tsala rungula ro koma malunghana ni ntirho wa vona ivi va ri rhumela swin’we ni xikombelo xa vona xa ku lava ku ta tirha eBethele.
16 Loko wo endla xikombelo kambe u nga vitaniwi ku ta tirha eBethele, u nga heli matimba. Swi nga va swinene ku hambeta u endla xikombelo kan’we lembe rin’wana ni rin’wana. Vamakwerhu van’wana lava tivaka mintirho yo hlawuleka leyi nga lavekaka eBethele, va tiendle va kumeka leswaku va ta tirha hi ku tirhandzela swa nkarhinyana. Va nga ha endla xikombelo xa ku ta tirha eBethele swa nkarhinyana ku ringana vhiki rin’we, mambirhi, manharhu kumbe mune ku ya fika eka tinh’weti tinharhu. Loko u rhandza ku endla tano, hi kombela u tsalela rhavi.
17 Lava va tirhaka eBethele va ni lunghelo ro hlawuleka ra ku tirhela Yehovha ekusuhi swinene ni vamakwavo lava nga Vakreste. Huvo leyi Fumaka ya wu tlangela moya wa ku tinyiketela lowu kombisiwaka hi hinkwavo lava tiendlaka va kumeka leswaku va ta khathalela swilaveko swa vamakwavo emisaveni hinkwayo.—Filp. 2:20-22; 2 Tim. 4:11.
18 Vantshwa—Tilunghiseleleni Ku Tirha eBethele Sweswi: Munhu u sungula ku tilunghiselela ntirho wa le Bethele a ha ri kule swinene ni ku fikelela malembe lama lavekaka ya 19 hi vukhale. Xana vantshwa va nga endla yini ku tilunghiselela ku tirha eBethele? Yesu u te: “I mani eka n’wina loyi loko a lava ku aka xihondzo a nga rhangiki a tshama ehansi a hlayela ntsengo, a vona loko wu ringene ku xi heta?” (Luka 14:28) Tanihi leswi swi nga swa nkoka ku lunghiselela ni ku kunguhata leswaku muako wun’wana ni wun’wana wu ta hela, i swa nkoka swinene leswaku vantshwa va anakanyisisa hi ndlela leyi va kunguhataka vumundzuku bya vona ha yona entirhweni wa Yehovha! Ku fanele ku vekiwa xisekelo lexi tiyeke eku sunguleni ka vutomi bya vona leswaku va ta kota ku fikelela tipakani ta moya. Tanihi muntshwa, xana xisekelo lexi u akaka ehenhla ka xona xi tiye ku fikela kwihi? Loko u rhandza ku tirha eBethele, u ta vuyeriwa hi ku anakanyisisa leswi landzelaka hi vukheta.
19 ‘Lunghiselela Ku Amukela’ Lunghelo Leri Ro Hlawuleka Ra Ntirho: Hilaha swi tsariweke hakona eka Matewu 19:12, Yesu u khutaze vadyondzisiwa va yena ku ‘lunghiselela ku amukela’ ku tshama va nga tekanga. Ha yini? A ku nga ri hikwalaho ka ku vuyeriwa ka munhu hi yexe, kambe a ku ri “hikwalaho ka mfumo wa matilo.” Hilaha ku fanaka Pawulo u khutaze nchumu lowu fanaka wa ku “tirhela Hosi nkarhi hinkwawo [handle ko rivatiwa] hi nchumu.” (1 Kor. 7:32-35) Khombo ra kona, vo tala va hupiwa hi lunghelo leri ra ku tirha eBethele va nga si teka hileswi va kunguhataka ku teka va nga si mila ni meno. Hi lava ku khutaza vamakwerhu va xinuna lava ha riki vantshwa leswaku va tirhisa matimba ya vona evutirhelini bya nkarhi hinkwawo va nga si phasiwa hi vutihlamuleri bya ndyangu. Kutaku loko va endla xiboxo xa ku teka endzhaku ka nkarhi, va ta va vavanuna vo antswa hikwalaho ka ntokoto lowu va wu kumeke evuton’wini ni le vutirhelini bya Vukreste. Endzhaku ko tirha malembe yo hlayanyana eBethele, van’wana va nghenele vukati ivi va ya emahlweni va tirha swin’we va ri mpatswa. Loko va va ni malunghelo yo karhi endzhaku ka nkarhi, yo fana ni ntirho wa ku famba-famba kumbe wa vurhumiwa, kunene a va kali va tisola hi nkarhi lowu va wu vekeleke etlhelo leswaku va tirha eBethele.
20 U Nga Hambukisiwi Hi Ku Hlongorisa Swilo Leswi Vonakaka: Muntshwa un’wana ni un’wana u ta endla kahle loko a tivutisa: ‘Xana pakani ya mina endzhaku ka ku thwasa exikolweni xa le henhla i ku dyondzela ntirho-vutomi lowu ndzi nga ta tirha nkarhi hinkwawo kumbe i ku tirhela Yehovha nkarhi hinkwawo?’ I ntiyiso leswaku ku tirhela Yehovha swi ta lava ku titsona swo karhi. Kambe swi tano ni hi ku dyondzela ntirho-vutomi! Eku heteleleni, hi yihi ndlela leyi nga ta va ni vuyelo bya nkarhi wo leha hakunene? Yesu u nyike nhlamulo leyi nga lo dlaa, erivaleni. Hi ku ya hi Matewu 6:19-21, u te: “Tshikani ku tihlayisela xuma emisaveni, laha nsumba ni nkurhe swi dyaka kona, ni laha makhamba ma tshovaka kona ma yiva. Ku ri na sweswo, tihlayiseleni xuma etilweni, laha nsumba ni nkurhe swi nga dyiki kona, ni laha makhamba ma nga tshoviki kona ma yiva. Hikuva laha xuma xa wena xi nga kona, hi laha ni mbilu ya wena yi nga ta va kona.” Hi khongelela leswaku timbilu ta hina ti nga tshuki ti hi kucetela ku hlongorisa ntirho wa ku tihanyisa emisaveni kumbe swilo leswi vonakaka ematshan’weni ya ku lava ku tirhela Yehovha hi moya-xiviri hinkwawo. Hinkwerhu hi fanele ku xiya leswaku pakani ya risima leyi hi faneleke ku yi fikelela i ku va ni vuxaka lebyinene na Yehovha, leswaku hi ta tsakisa mbilu ya yena. (Swiv. 27:11) Hi ku rhangisa Yehovha evuton’wini bya hina loko ha ha ri vantshwa, hi kombisa leswaku xuma xa hina xi kwihi ni ndlela leyi Mfumo wu nga wa nkoka ha yona eka hina. Tsundzuka, “nkateko wa Yehovha—hi wona lowu fuwisaka, naswona a nga engeteli ku vaviseka eka wona.” (Swiv. 10:22) Vantshwa va ni lunghelo lerinene ra ku kombisa laha timbilu ta vona ti nga kona hi ku nkhensa Yehovha hi nchumu wa risima hikwalaho ka swilo hinkwaswo leswi a va nyikeke swona. Ku tirha eBethele ku nyika hinkwavo lava fikelelaka swilaveko swa kona lunghelo rolero lerinene.
21 Lava Va Tirhaka eBethele Va Fanele Ku Basa eMahanyelweni: Mupisalema u vutise a ku: “Xana jaha ri nga yi tengisisa ku yini ndlela ya rona?” U hlamule a ku: “Hi ku tshama ri rindzile hi ku landza rito ra [Yehovha].” (Ps. 119:9) Sweswo swi ta katsa ku papalata nchumu wun’wana ni wun’wana lowu fambisanaka ni mafambiselo ya swilo ya Sathana lama hombolokeke. Swilo swo naveta rimbewu swa Internet, ku tikhoma ko biha ni vanhu va rimbewu leri hambaneke ni ra wena, vuyimbeleri lebyi thyakeke, vuhungasi lebyi nga ni manyala ni ku nwa byala wa ha ri ntsongo ngopfu, i yin’wana ya mintlhamu leyi Sathana a phasaka vantshwa va hina ha yona leswaku va nga tifikeleli tipakani ta moya. Ku laveka ku tiyimisela ka xiviri leswaku hi lwa ni marhengu ya yena. Tanihi muntshwa, loko u tivona leswaku wa swi endla swin’wana swa swilo leswi, vulavula ni vakulu evandlheni ra ka n’wina kutani u tikulula emikhuveni yoleyo nga si endla xikombelo xa ku ta tirha eBethele. I swa nkoka ku va ni ripfalo leri baseke leswaku hi kota ku tirhela Yehovha hi xitalo.—1 Tim. 1:5.
22 Dyondza Ku Hanyisana Ni Van’wana: Xilaveko xa nkoka leswaku u kota ku tirha eBethele hilaha ku humelelaka i ku dyondza ku hanyisana ni van’wana. Ndyangu wa Bethele eAfrika Dzonga wu vumbiwa hi vamakwerhu va 580 lava humaka emindhavukweni yo hambana-hambana emisaveni. Hambileswi vumunhu lebyo byo hambana-hambana byi engetelaka vuxongi bya Bethele, minkarhi yin’wana byi tlhela byi tisa mintlhontlho. Loko u anakanya ku ta tirha eBethele, swi nga va swinene ku tivutisa: ‘Xana ndzi nyangatseka hi ku olova loko van’wana va bakanya vonelo ra mina? Xana van’wana swa va olovela ku hanyisana na mina?’ Loko swi lava u antswisa timfanelo leti, u nga ha yimayimi, sungula ku ti antswisa sweswi. Loko u endla tano swi ta ku pfuna leswaku u antswisa swinene loko swi ta emhakeni ya ku hanyisana ni ku tirhisana ni swirho swa ndyangu wa Bethele.
23 Tirha hi matimba leswaku u va munhu wa moya, hi ku hlakulela vuxaka lebyikulu na Yehovha. Endla xiyimiso lexinene xa dyondzo ya munhu hi yexe, leyi faneleke yi katsa ku hlaya Bibele siku ni siku. Hisekela ku byela van’wana hi mahungu lamanene. Loko u endla swilo leswi, u ta endla leswaku ku ya emahlweni ka wena ku vonaka. (1 Tim. 4:15) Mawaku vumundzuku lebyinene bya lava va tilunghiselelaka ntirho wa nkarhi hinkwawo sweswi!
24 Vatswari, Letelani Vana Va N’wina: I yini lexi vatswari va nga xi endlaka leswaku va khutaza vana va vona ku hlakulela vutirheli bya nkarhi hinkwawo? Yesu u te: “Un’wana ni un’wana loyi a leteriwaka hi ku hetiseka u ta fana ni mudyondzisi wakwe.” (Luka 6:40) N’wana la leteriweke kahle u ta tekelela timfanelo letinene ta mudyondzisi wa yena la tinyiketeleke. Nsinya lowu wa nawu wu fanele wu endla leswaku vatswari lava nga Vakreste va anakanyisisa ha wona loko va ri karhi va lwela ku letela vana va vona “hi xikongomelo xa ku tinyiketela loku nga ni vukwembu.” (1 Tim. 4:7) Leswi vana va voyameleke eku tekeleleni ka mikhuva ya vatswari va vona loko swi ta etimhakeni ta moya, vatswari va ta endla kahle ku tivutisa: ‘Xana hina vini ha wu tlangela ntirho lowu endliwaka eBethele wa ku yisa swilaveko swa vugandzeri bya Yehovha bya ntiyiso emahlweni? Xana ha yi vona mikateko ya Yehovha hi lunghiselelo ra Bethele? Xana ha kholwa leswaku ku hanyela ku tirhela Yehovha i ntirho wa nkoka lowu vana va hina va nga wu hlawulaka?’ Ku tlangela ka hina ntirho wa Bethele hi mbilu hinkwayo ni leswi endliwaka kona swi ta hi pfuna ku byala moya lowu fanaka wa ku tlangela eka vana va hina.
25 Elkana na Hana a va byi tlangela hi mbilu hinkwayo vugandzeri bya ntiyiso. Va va vekele xikombiso lexinene vatswari lava nga Vakreste namuntlha. Le Israyele wa khale, i vavanuna lava nga Vaisrayele ntsena lava a va boheka ku “humelela emahlweni ka xikandza xa Hosi ya ntiyiso, Yehovha,” kanharhu hi lembe etabernakeleni. Hambiswiritano, Elkana a a famba kwalomu ka tikhilomitara ta 30, laha handle ko kanakana a a famba hi milenge ni ndyangu wa yena hinkwawo “lembe ni lembe” leswaku a ta endla xitlhavelo entsindza lowu wa vugandzeri bya Yehovha. (Eks. 23:17; 1 Sam. 1:3, 4, 9, 19; 2:19) Swi le rivaleni leswaku nhloko leyi ya ndyangu a yi lava leswaku ndyangu wa yona hinkwawo wu hlanganyela na yona eku rhandzeni ka yona swilo swa moya.
26 Hana a a rhandza vugandzeri bya ntiyiso ku fana ni nuna wa yena. A titwa a ri ni ndzhwalo wa ku hlanganyela eku seketeleni ka vugandzeri bya ntiyiso etabernakeleni. Hana u endle xihlambanyo xa leswaku loko Yehovha o n’wi nyika n’wana wa jaha, u ta nyikela ha yena leswaku a tirha etabernakeleni. (1 Sam. 1:11) Nawu wa Muxe a wu nyika wanuna lunghelo ra ku herisa xihlambanyo lexi nga fanelangiki, lexi nsati wa yena a xi endleke. (Tinhl. 30:6-8) Hambiswiritano, handle ko kanakana Elkana u xi amukerile xihlambanyo xa Hana, leswi kombisaka leswaku na yena a a seketela xikombiso xexo xa vugandzeri bya ntiyiso!—1 Sam. 1:22, 23.
27 Xana n’wana wa vona Samuwele u wu tekelerile moya lowunene ni ku tlangela loku kombisiweke hi vatswari va yena? U wu tekelerile hakunene. Loko a ha ri jaha, Samuwele u khathalele mintirho leyi a averiweke yona hi ku tirhandzela ni hi vutshembeki naswona u leteriwe ku khathalela malunghelo lama engetelekeke entirhweni wa Xikwembu. Endzhaku ka loko Samuwele a sungule ku tirha etabernakeleni, Elkana na Hana a va lan’wanga ku kombisa ku tsakela ntirho wa yena. Va hambete va n’wi endzela minkarhi hinkwayo leswaku va ta n’wi khutaza ni ku n’wi seketela loko a ri karhi a ya emahlweni entirhweni wa nkarhi hinkwawo.—1 Sam. 2:18, 19.
28 Mawaku xikombiso lexinene lexi Elkana na Hana va xi vekeleke vatswari lava nga Vakreste namuntlha! Loko vana va hina va twa marito lama humaka embilwini ya ku tlangela lunghelo ra ku tirha eBethele ni ku vona moya wa ku tinyiketela lowu hi wu kombisaka hi ku yisa timhaka ta Mfumo emahlweni, na vona va ta hlakulela ku lava ku tirhela van’wana etimbilwini ta vona. Vatswari vo tala va humelela eku ngheniseni ka moya lowu lowunene eka vana va vona. N’wana un’wana wa malembe ya nkombo u tsale a ku: “Loko ndzi kula ndzi lava ku ya eBethele, naswona ku ni swilo swo hlayanyana leswi ndzi lavaka ku swi endla kona. (1) Ku thayipa timagazini ta Xihondzo xo Rindza ni Xalamuka!, (2) ku tirha endzawulweni ya n’wina ya swifaniso ni (3) ku petsa swiambalo. Ndzi ta endla ntirho wun’wana ni wun’wana lowu nga kona. A swi na mhaka leswaku ndzi ta kuma wa njhani.” Swi tsakisa swonghasi ku vona vana va hina va hlakulela moya wo tano wa ku tinyiketela etimbilwini ta vona!
29 Vantshwa, tsundzukani leswaku “misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.” (1 Yoh. 2:17) Hambetani mi hlakulela tipakani ta moya, ku katsa ni lunghelo ro hlawuleka ra ku tirha eBethele. Vatswari, tekelelani xikombiso xa vanhu vo tshembeka va nkarhi lowu hundzeke, lava khutazeke vana va vona ku hlakulela moya wa ku tinyiketela eka Xikwembu. (2 Pet. 3:11) Onge hinkwerhu hi nga endla leswi hi faneleke ku swi endla leswaku hi pfuna vamakwerhu lava ha riki vantshwa leswaku va tirhela Muvumbi wa hina Lonkulu hi xitalo hilaha va nga kotaka hakona, hikuva sweswo swi ni “xitshembiso xa vutomi bya sweswi ni lebyi nga ta ta.”—1 Tim. 4:8; Ekl. 12:1.
[Bokisi leri nga eka tluka 4]
Swilaveko Swa Xisekelo Swa Ntirho Wa Bethele
● Ku va ni lembe u khuvuriwile
● Ku va munhu wa moya la rhandzaka Yehovha ni nhlengeletano yakwe hi mbilu hinkwayo
● Ku va u hanye kahle emoyeni, emianakanyweni, emintlhavekweni ni le mirini
● Ku va muaka-tiko kumbe u ri ni mpfumelelo wa le nawini wa ku tshama la Afrika Dzonga
● Ku kota ku hlaya, ku tsala ni ku vulavula Xinghezi kahle
● Ku va ni malembe yo sukela eka 19 ku ya eka 35 hi vukhale