Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi June 30, 2003. Mulanguteri wa xikolo u ta fambisa mpfuxeto wa timinete ta 30 lowu seketeriweke eka rungula ra tinkulumo leti nyikeriweke ku sukela eka vhiki ra May 5 ku ya eka June 30, 2003. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. Ha yini ku cinca-cinca rito swi ri swa nkoka loko u nyikela nkulumo, naswona u nga swi endlisa ku yini sweswo? [2, be-TS bokisi eka tl. 111; bokisi eka tl. 112] Ku cinca-cinca rito hi ndlela leyi faneleke swi endla nkulumo yi hanya, yi nyanyula ni ku susumetela ku endla swo karhi, kasi loko rito ri nga cinca-cinci, vayingiseri va nga vona onge xivulavuri a xi khathali hi leswi xi vulavulaka ha swona. Ku cinca-cinca rito hi ndlela leyi faneleke swi lava ku cinca-cinca mpfumawulo wa rito, rivilo ni ntikiso wa rona.
2. Hambiloko xivulavuri xi pfumela leswi xi swi vulaka naswona xi rhandza Yehovha, swi nga tisa ku yini leswaku xi nga hiseki? [5, be-TS tl. 115 tindz. 3-4; tl. 116 ndz. 1] Xivulavuri xi nga pfumala ku hiseka loko xi lunghiselele leswi xi nga ta ya swi vula ntsena kambe xi tsandzeke ku lunghiselela mbilu leswaku nkulumo ya xona yi va engatini. (Ezra 7:10) Nakambe xivulavuri xi fanele xi tiyiseka leswaku leswi xi nga ta swi vula swi ta pfuna vayingiseri va xona.
3. I yini lexi nga pfunaka xivulavuri leswaku xi kombisa musa ni ntlhaveko loko xi nyikela nkulumo, naswona ha yini leswi swi ri swa nkoka? [7, be-TS tl. 119 tindz. 1-4] Musa ni ntlhaveko swi nga fikeleriwa loko xivulavuri xi tsakela ku pfuna vayingiseri. Mpfumawulo wa rito ni ku languteka ka nghohe ya xona swi nga kombisa musa ni ntlhaveko, leswi swi nga swa nkoka loko xi lava ku fikelela timbilu ta vayingiseri.
4. I yini lexi kombisaka ku hiseka ni musa lowu faneleke kun’we ni mintlhaveko yin’wana leyi faneleke yi kombisiwa enkulumeni? [8, be-TS tl. 120 tindz. 2-5] Leswi swi titshege swinene hi mhaka leyi ku vulavuriwaka ha yona. Xana i marito ya vuavanyisi bya vukari kumbe i xikhutazo lexi fambisanaka ni ntwela-vusiwana? Xivulavuri a xi fanelanga xi anakanyisisa hi marito ni tinhlamuselo ta mhaka ntsena, kambe ni hi ntlhaveko lowu fambisanaka ni mhaka ya kona. (Ringanisa Matewu 23 na Genesa 44.)
5. I Ntiyiso kumbe I Mavunwa: Ku tshukatshuka ka miri ni ku languteka ka nghohe i swa nkoka ntsena loko vayingiseri va ku langutile. Hlamusela. [9, be-TS tl. 121 ndz. 3] I Mavunwa. Hambiloko vayingiseri va wena va nga ku langutanga, loko u tshukatshukisa miri naswona nghohe ya wena yi languteka hi mfanelo, rito ra wena ni ndlela leyi u vulavulaka ha yona swi ta kombisa kahle loko mhaka leyi u yi vulaka yi ri ya nkoka.
NKULUMO NO. 1
6. I yini lexi pfuneke Yosiya leswaku a hlawula ndlela leyinene ku nga khathariseki maxangu lawa a a langutane na wona evutsongwanini bya yena? (2 Tikr. 34:1, 2) [2, w01-TS 4/15 tl. 27 tindz. 1-6; tl. 28 ndz. 4] I nsusumeto lowunene wa ku tisola ka kokwa wakwe Manase; ku twa “marito ya nawu”; langutelo ra ku titsongahata; ku xixima vaprofeta va Yehovha ni rungula ra vona; ni ku tiyimisela swinene ku endla ku rhandza ka Xikwembu. (2 Tikr. 33:10-13; 34:19-33)
7. Xana marito ya Swivuriso 9:7, 8a ma vula yini naswona leswi swi nga tirhisiwa njhani ensin’wini? [3, w01-TS 5/15 tl. 29 tindz. 4-5] A hi vutlhari ku ringeta ku dyondzisa ntiyiso wa Rito ra Xikwembu eka munhu loyi a wu hlekulaka kumbe loyi a nga wu rhandziki, xisweswo a delela mudyondzisi wa wona. Loko hi ri ensin’wini hi fanele hi lwela ku fikelela vanhu va timbilu letinene hi mahungu lamanene ya Mfumo ematshan’weni yo kanetana ni vahlekuri.
8. Xana Yehovha a a vula yini loko a byela Vaisrayele a ku, “U nga rivali,” naswona hi nga swi papalata njhani ku rivala? (Det. 4:9; 8:11) [5, be-TS tl. 20 tindz. 1-3] Vaisrayele a va nga fanelanga va khomeka swinene hi timhaka ta vona vini lerova va tsandzeka ku tsundzuka ndlela leyinene leyi Yehovha a va khomeke ha yona. Ku dyondza ni ku hlaya Bibele nkarhi na nkarhi swin’we ni ku hlanganyela hi ku hiseka eminhlanganweni ya vandlha ni le nsin’wini swi nga hi tiyisekisa leswaku Yehovha wa khumbheka swinene hi vutomi bya hina bya siku na siku.
9. Xana marito ya Davhida lama sukaka embilwini lama kumekaka eka Pisalema 32:1, 5 na Pisalema 51:10, 15 ma swi kombisa njhani leswaku munhu a nga fanelanga a titwa a nga ri nchumu loko a tisola endzhaku ko endla xidyoho lexikulu? [7, w01-TS 6/1 tl. 30 tindz. 1-3] Davhida u titwe a ntshunxekile endzhaku ka loko a phofule xidyoho xa yena, a amukela vutihlamuleri hinkwabyo eka swiendlo swa yena naswona a nga tiyimelelanga emahlweni ka Yehovha kumbe a ringeta ku vona van’wana nandzu. U kombise ku tiyimisela ka yena ku ya emahlweni a tirhela Xikwembu ni ku pfuniwa hi Yehovha leswaku a basisa mbilu yakwe ni ku sungula hi vuntshwa.
10. Xana ku nga dyondziwa yini eka swiletelo swa Pawulo leswi boxiweke eka 1 Timotiya 5:3-16 malunghana ni ku khathalela vanhu lava pfumalaka? [8, w01-TS 6/15 tl. 11 ndz. 1] Swiphiqo swa ku pfumala, vandlha ri fanele ri khathala hi tinoni leti kuleke; maxaka ya lava pfumalaka a ma fanele ma va pfuna loko ma swi kota; tinoni a ti fanele ti fikelela swilaveko swo karhi leswaku ti fanelekela ku pfuniwa.
KU HLAYA KA BIBELE KA VHIKI NA VHIKI
11. Yesu a a vulavula ha yini loko a tirhisa marito lama nge ‘ku velekiwa ra vumbirhi’ lama tsariweke eka Yohane 3:3? [1, w95-TS 7/1 matl. 9-10 tindz. 4-5] Yesu a a vulavula hi ku velekiwa hi moya lowo kwetsima. Ku velekiwa loku ko hlawuleka ku endla leswaku vavanuna ni vavasati lava nga hetisekangiki va va ni vuxaka lebyo hlawuleka swinene na Yehovha Xikwembu, va va vana va yena lava nga ni ntshembo wo kuma ndzhaka ya le tilweni.
12. Xana Yesu u tirhise dyondzo ya yena hi ndlela yini naswona hi yihi dyondzo ya nkoka leyi hi nga yi dyondzaka eka leswi? (Yoh. 7:15-18) [2, w96-TS 2/1 matl. 9-10 tindz. 4-7] Dyondzo ya Yesu a yi huma eka Xikwembu naswona u yi tirhisele ku dzunisa Yehovha, ku nga ri ku tidzunisa. Leswi swi hi dyondzisa leswaku dyondzo a yi fanelanga yi tirhiseriwa ku tidzunisa kambe ku dzunisa Yehovha.
13. Ha yini Yohane 7:53–8:11 yi nga katsiwanga ni matsalwa man’wana eka Vuhundzuluxeri Bya Misava Leyintshwa? Xiphemu lexi a xi nghenisiwanga eka vuhundzuluxeri byo tala bya khale. Swi le rivaleni leswaku tindzimana leti a ti weli eka Evhangeli ya Yohane. Ti lo engeteriwa naswona a ti huhuteriwanga. [3, it-2 tl. 94 ndz. 5]
14. Xana Yesu u ‘te hi mukhuva wihi lowu fanaka’ ni lowu a tlhandlukeke ha wona ematilweni? (Mint. 1:11) [6, w90-TS 6/1 tl. 11 ndz. 5] Yesu u voniwe hi vadyondzisiwa va yena ntsena loko a tlhandluka, naswona i Timbhoni ta Yehovha ntsena leti xiyaka ku vuya ni vukona bya yena lebyi nga vonakiki, lebyi sunguleke hi 1914.
15. Ha yini a nga ri kona “ni un’we wa lavan’wana loyi a veke ni xivindzi xo tihlanganisa na [vadyondzisiwa],” hi ku ya hi Mintirho 5:13? Ku paluxiwa ni ku dlayiwa ka Ananiya na Safira hikwalaho ka vukanganyisi ni vuxisi bya vona swi ve xilemukiso lexikulu. Endzhaku ka sweswo, ku hava ni un’we la nga ni miehleketo yo biha la veke ni xivindzi xo tihlanganisi ni vadyondzisiwa. [7, w90-TS 6/1 tl. 14 tindz. 22-3]