Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi December 29, 2003. Mulanguteri wa xikolo u ta fambisa mpfuxeto wa timinete ta 30 lowu seketeriweke eka rungula ra tinkulumo leti nyikeriweke ku sukela eka vhiki ra November 3 ku ya eka December 29, 2003. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. Ha yini swi ri swa nkoka ku tirhisa Bibele evutirhelini bya hina bya nsimu? [1, be-TS tl. 145 ndz. 2, bokisi] Bibele yi ni matimba swinene ya ku kongomisa vanhu lava fanaka ni tinyimpfu, ku tlula marito wahi ni wahi lawa hina hi hexe hi nga ma vulaka. Leswi munhu a swi vonaka eBibeleni hi mahlo ya yena n’wini swi nga dzika swinene embilwini ya yena.
2. Xana mongo wu yi khumba njhani ndlela leyi tsalwa ri nghenisiwaka ha yona? [3, be-TS tl. 149] Wu hi endla hi vona loyi tsalwa leri tshahiweke ri tsariweke hi yena. Hi xikombiso, a hi tipisalema hinkwato leti qambhiweke hi Davhida, naswona Solomoni a nga yi tsalanga hinkwayo buku ya Swivuriso. Mongo wu nga tlhela wu hi pfuna ku vona leswaku a ku vulavuriwa na mani, leswaku a ku vulavuriwa hi yini ni leswaku xiyimo a xi ri njhani hi nkarhi lowu rungula rero ra Bibele ri tsariweke ha wona.
3. Ha yini swi ri swa nkoka ku kandziyisa marito lama faneleke loko hi hlaya ndzimana ya Bibele naswona leswi swi nga endliwa njhani? [5, be-TS tl. 151 ndz. 2, bokisi] Loko ku kandziyisiwa marito lama faneleke, vayingiseri swi ta va olovela ku twisisa mhaka leyi ku vulavuriwaka ha yona. Loko u kambisisa ndzimana tivutise leswi landzelaka: ‘Hi wahi marito lama faneleke ma kandziyisiwa leswaku ku fikeleriwa pakani ya ndzimana leyi hlayiwaka?’
4. Xana hi yi tirhisa njhani ndzayo ya Pawulo ya leswaku hi “ri tamela khwatsi rito ra ntiyiso” loko hi dyondzisa van’wana naswona ha yini leswi swi ri swa nkoka? (2 Tim. 2:15) [7, be-TS tl. 153 ndz. 2, bokisi] Leswaku hi “ri tamela khwatsi rito ra ntiyiso,” hi fanele hi hlamusela matsalwa hi ku pfumelelana ni leswi Bibele hi yoxe yi swi dyondzisaka. Leswi swi lava leswaku hi xiyisisa mongo naswona hi papalata ku hlamusela matsalwa hi ndlela ya hina vini hi ku landza vonelo ra hina kumbe tifilosofi ta misava. Leswi i swa nkoka hikuva ku rhandza ka Xikwembu hi leswaku vanhu va fikelela “vutivi lebyi kongomeke bya ntiyiso.” (1 Tim. 2:3, 4)
5. Xana Pawulo u ‘hlamule njhani hi ku tirhisa Matsalwa’? (Mint. 17:2, 3) [9, be-TS tl. 155 ndz. 5–tl. 156 ndz. 1] Pawulo u vulavule hi ta vutomi ni vutirheli bya Yesu, a kombisa leswaku leswi a swi profetiwile eMatsalweni ya Xiheveru, kutani a gimeta mhaka yakwe hi marito ya matimba. U tshahe matsalwa, a tsavula marito kumbe swiga, kutani a nyikela nhlamuselo ya kona.
NKULUMO NO. 1
6. Loko hi tirhisa xitirhisiwa xa hina lexikulu xo endla ndzavisiso, ku nga Bibele, leswaku hi lunghiselela nkulumo, ha yini swi vuyerisa ku (1) kambisisa mongo wa ndzimana, (2) ku kamba swikombo swa matsalwa (3) ni ku lava tindzimana hi ku tirhisa xikombo xa marito lama nga eBibeleni? [1, be-TS tl. 34 ndz. 3–tl. 35 ndz. 2] (1) Ku kambisisa mongo swi hi pfuna leswaku hi twisisa leswi tindzimana ta Bibele ti vulaka swona naswona ku hi nyika vuxokoxoko lebyi endlaka leswaku nkulumo yi hanya. (2) Swikombo swa matsalwa swi hi nyika rungula leri engetelekeke naswona swi nga ha hlamusela ku hetiseka ka vuprofeta bya Bibele kumbe ntila wa ntwanano wa Nawu; swikombo swin’wana swa matsalwa swi nga ha kombetela eka rungula leri nga ni mhaka leyi fanaka kumbe eka rungula ra matimu ya munhu kumbe leri vulavulaka hi ndhawu. (3) Ku endla ndzavisiso hi ku tirhisa xikombo xa marito lama nga eBibeleni swi nga hi pfuna leswaku hi kuma matsalwa lama fambisanaka ni mhaka leyi hi endlaka vulavisisi ha yona naswona swi nga endla leswaku hi vona vumbhoni bya “ntila” wa ntiyiso lowu andlariweke eRitweni ra Xikwembu. (2 Tim. 1:13)
7. Xana vutshembeki bya ntiyiso byi kombisiwa njhani naswona eka mani? [3, w01-TS 10/1 matl. 22-3] Leswi vutshembeki byi fambisanaka ni tintswalo, munhu loyi a tshembekeke u ni tintswalo eka van’wana, na vona va ni tintswalo eka yena. Loko hi kombisiwa tintswalo, na hina hi fanele hi va ni tintswalo eka van’wana. Tanihi leswi Yehovha a n’wi kombiseke tintswalo, Davhida u susumeteleke ku gandzela ni ku dzunisa Xikwembu. (Ps. 138:2) Ku tshembeka eka Yehovha swi katsa ku tshembeka eRitweni ra yena ni le nhlengeletanweni ya yena. Hi fanele hi tshembeka eka vanghana va hina va vukati, vandyangu lava nga vapfumeri ni le ka vanghana va hina.
8. I yini lexi kombisaka leswaku Yehovha i muhlayisi lonene wa nkarhi? (Dan. 11:35-40; Luka 21:24) [4, si-TS tl. 284 ndz. 1] Loko yi nyika xivono xa “hosi ya le n’walungwini” ni xa “hosi ya le dzongeni,” ntsumi ya Yehovha hi makhamba yo hlayanyana yi tirhise xiga lexi nge “nkarhi lowu vekiweke.” Matsalwa yo tala ma kombisa leswaku Yehovha i muhlayisi wa nkarhi la pakanisaka, la hetisisaka swikongomelo swa yena hi nkarhi wa kona.
9. I yini leswi hi faneleke hi swi tsundzuka loko hi lava ku hlawula tinhla leti hi nga ta ti tirhisa enkulumeni endzhaku ko endla ndzavisiso? [5, be-TS tl. 38] Tirhisa ntsena tinhla leti nga ta hlangana kahle ni nkulumo. Tiyiseka leswaku u tirhisa rungula ra nkarhi wa sweswi leri fambisanaka ni minkandziyiso ya sweswinyana ya Timbhoni ta Yehovha. Vana ni vuxiyaxiya loko u tirhisa rungula leri humaka eka tibuku ta misava, u tsundzuka leswaku Rito ra Xikwembu i ntiyiso ni leswaku Yesu hi yena muhetisisi-nkulu wa xikongomelo xa Xikwembu. (Yoh. 17:17; Kol. 2:3) Hina hi fanele hi lwela ku vona swilo hi ndlela leyi Xikwembu xi swi vonaka ha yona. (Swiv. 2:1-5)
10. Ha yini marito ya Yesu malunghana ni “masiku ya Nowa” ma yelana ni xiyimo xa hina namuntlha? (Mat. 24:37) [7, w01-TS 11/15 tl. 31 tindz. 3-4] Vakreste namuntlha i vachumayeri va leswo lulama, va khutaza vanhu leswaku va hundzuka. (2 Pet. 3:5-9) Nowa u yingise Yehovha hambiloko a kanetiwa ni loko a langutane ni swiphiqo. Yena ni ndyangu wakwe a va nga swi tivi leswaku Xikwembu xi ta yi tisa rini Ndhambi, kambe ripfumelo leri a va ri na rona eritweni ra Xikwembu ri va nyike matimba eka malembe lawa va ma heteke va ri karhi va endla ntirho wa Xikwembu. (Hev. 11:7)
KU HLAYA KA BIBELE KA VHIKI NI VHIKI
11. Xana papila ra Pawulo leri yaka eka Filemoni ri swi kombisa njhani leswaku ntirho wa Mukreste i ku pfuna vanhu leswaku va va Vakreste, ku nga ri ku antswisa vutomi bya vona? (Film. 12) Pawulo u vulavule hi Onesima, mubaleki la nga hlonga, tanihi “n’wana wa mina, loyi ndzi veke tata wakwe” ni “makwerhu la rhandzekaka.” (Film. 10, 16) Hambileswi, Onesima a yingiseke loko Pawulo a chumayela kutani a va Mukreste, Pawulo a nga vulanga leswaku a nga ha vi hlonga kambe u n’wi tlherisele laha hi nawu a a fanele a va kona hi ku ya hi nawu wa Rhoma, lowu a wu pfumelela vanhu leswaku va va ni mahlonga. [1, w98-TS 1/15 matl. 30-1; w62 matl. 653-6]
12. Hi kwihi ku hamba exikarhi ka ‘ku khukhuleka,’ “ku suka” ni ‘ku wa’? (Hev. 2:1; 3:12; 6:6) [2, w99-TS 7/15 tl. 19 ndz. 12; w86-TS 6/1 tl. 14 tindz. 16-17; w81-TS 7/1 tl. 11 ndz. 8] Ku ‘khukhuleka’ u suka entiyisweni swa olova naswona swi nga ha sungula u nga swi xiyi, swi nga ha sungula hi swilo swi nga ri swingani leswi vonakaka, vanghana va misava kumbe ku kanakana timhaka to karhi ta Matsalwa. “Ku suka”entiyisweni swi bihile naswona swi katsa ku tihambanisa, kumbe ku gwineha. ‘Ku wa’ i ku landzula ntiyiso, ku fikela eka yinhla leyi swi nga ha kotekiki ku vuya naswona i Yehovha na Yesu ntsena lava kotaka ku vona leswi.
13. Xana hi nga swi papalata njhani ku hundzula xiga lexi nge “loko Yehovha a swi rhandza,” xi va nchumu lowu nga riki na ntikelo? (Yak. 4:15) [4, cj tl. 171 tindz. 1-2] Hi fanele hi papalata ku tshamela ku tirhisa marito lawa hi xikongomelo xo tsakisa vanhu kumbe ku sasa swiboho leswi hi swi endlaka. Kutani ke, eka xiendlo xin’wana ni xin’wana, xo tanihi ku hetisisa vutihlamuleri bya hina lebyi nga eBibeleni, bya leswaku hi khathalela swilaveko swa mindyangu ya hina, hi faneleke hi tsundzuka ku rhandza ka Xikwembu naswona embilwini ya hina hi tiyimisela ku ku landzela.
14. Xana swi vula yini ku ‘rindzela ni ku hamba hi tsundzuka vukona bya siku ra Yehovha,’ naswona hi nga swi endlisa ku yini sweswo? (2 Pet. 3:12) [5, w97-TS 9/1 matl. 19-20] Swi vula leswaku hi tshama hi xalamukile naswona hi ri langutela hi mahlo-ngati “siku lerikulu ra Xikwembu xa Matimba Hinkwawo” eArmagedoni. (Nhlav. 16:14) Hi nga endla sweswo hi ku tsundzuka “marito lama vuriweke khale hi vaprofeta vo kwetsima” malunghana ni vukona bya Yesu ematimbeni ya Mfumo ni ku avanyisiwa ka vanhu lava nga xi chaviki Xikwembu. Nakambe hi fanele hi tsundzuka “xileriso xa Hosi tlhelo Muponisi” xa ku tshama hi xalamukile. (2 Pet. 3:2; Luka 21:34-36)
15. Hi yihi ndzayo ya nkoka leyi Vakreste va nyikiwaka yona namuntlha leyi kumekaka eka marungula lama yaka eka mavandlha ya nkombo lawa ku vulavuriwaka ha wona eka Nhlavutelo tindzima 2 na 3? (Nhlav. 2:4, 5, 10, 14, 20; 3:3, 10, 11, 17, 19) Leswaku hi hlula tanihi Vakreste, a hi fanelanga hi tshika ndlela leyi hi hisekelaka swilo swa moya ha yona kumbe ku rhandza ntiyiso. Hi fanele hi langutela ku ringiwa swinene naswona hi fanele hi tiyimisela ku tshama hi tshembekile siku ni siku. Hi fanele hi papalata ku tikhoma hi ndlela yo biha hi tlhelo ra rimbewu ni vugwinehi, hi tshama hi xalamukile hi tlhelo ra moya, hi tiyisela naswona hi nga ku pfumeleli ku pfumala ku tsakela kumbe ku rhandza swilo leswi vonakaka ku hi kavanyeta. [7, re-TS tl. 34 tindz. 5-6; tl. 38 ndz. 5; tl. 44 tindz. 10-11; tl. 49 ndz. 7; tl. 56 ndz. 7; tl. 64 ndz. 20; tl. 68 ndz. 8]