Hi Nga Va Pfuna Njhani Vanghana Va Vukati Lava Nga Riki Timbhoni?
1 Malandza yo tala ya Yehovha ma tekane ni vanhu lava nga ni xinghana eka vamakwerhu ni lava rhandzaka vandlha, kambe va papalataka ku va malandza ya Xikwembu. Nuna un’wana u te: “Mhaka ya ku famba hi yindlu na yindlu a ndzi nga lavi no yi twa.” Van’wana swi nga ha endleka va ri ni mikhuva leyi nga fambisaniki ni Matsalwa leyi va lavaka ku rhanga va yi tshika, kumbe va nga ha vona onge va nge swi koti ku fambisana ni xiyimiso xa swa le tilweni ku fana ni vanghana va vona va vukati. Xana hi nga va pfunisa ku yini?
2 Va Kombe Leswaku Wa Va Tsakela: Ku tsakela vanhu van’wana ni ku twa lexi va kokelaka endzhaku swi nga va endla va amukela ntiyiso wa Bibele. (Filp. 2:4) Lava eku sunguleni a va nga ri Timbhoni, hakanyingi va boxa leswaku va khumbiwe hi ndlela leyi Timbhoni tin’wana a ti va tsakela ha yona. Wanuna la boxiweke hala henhla u ri: “José, ku nga nkulu evandlheni, a a tala ku bula na mina. Ndzi ehleketa leswaku i xikhutazo xakwe lexi nga endla leswaku ndzi hetelela ndzi sungule ku dyondzeriwa.” Nuna wa makwerhu un’wana u tsundzuka leswaku vamakwerhu lava n’wi endzeleke a va endla matshalatshala yo vulavula hi swilo leswi n’wi tsakisaka. U te: “Ndzi sungule ku twisisa vukhongeri bya [nsati wa mina] hi ndlela leyi hambaneke ni leyi a ndzi byi twisisa ha yona. Vanghana va yena a va ri vanhu vo tlhariha lava kotaka ku vulavula hi timhaka to hambana-hambana.”—1 Kor. 9:20-23.
3 Pfuna Hi Swiendlo: Vanghana va vukati lava nga riki Timbhoni va nga ha tsakisiwa hi ndlela leyi va pfuniwaka ha yona. (Swiv. 3:27; Gal. 6:10) Loko movha wa nuna un’wana la nga riki Mbhoni wu tshovekile, jaha rin’wana leri nga Mbhoni ri n’wi pfunile. U ri: “Sweswo swi ndzi tsakise ngopfu.” Makwerhu un’wana u hete siku hinkwaro a ri karhi a pfuna nuna wa makwerhu un’wana ku aka rirhangu ra muti wakwe. Loko va ri karhi va tirha ni ku tidyela mabulo, vunghana bya vona byi tiyile. Endzhaku ka mavhiki mambirhi wanuna yoloye u ye eka makwerhu yoloye, a ku: “Se i nkarhi wa leswaku ndzi cinca mahanyelo ya mina. Xana u nga dyondza na mina Bibele?” U endle nhluvuko hi xihatla naswona sweswi se i Mbhoni leyi khuvuriweke.
4 Eka matshalatshala ya hina yo lavisisa vanhu lava fanelekaka ensin’wini, a hi hambeteni hi pfuna ni vanhu lava nga riki vapfumeri, lava tekaneke ni vapfumeri-kulorhi.—1 Tim. 2:1-4.