Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi April 26, 2004. Mulanguteri wa xikolo u ta fambisa mpfuxeto wa timinete ta 30 lowu sekeriweke eka rungula ra tinkulumo leti nyikeriweke ku sukela eka vhiki ra March 1 ku ya eka April 26, 2004. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. Loko hi nyikela nkulumo, ha yini swi antswa ku tirhisa phepha leri nga ni tinhla ta xisekelo ematshan’weni yo hlaya nkulumo leyi tsariweke ehansi? [1, be-TS tl. 166 ndz. 3] Ku tirhisa tinhla ta xisekelo swi endla leswaku swi hi olovela ku vulavula hi ndlela ya ntumbuluko ni ku vulavula leswi humaka embilwini. Loko vayingiseri va hina hi va languta, va ta swi xiya leswaku hi anakanya ha vona naswona nkulumo ya hina hi yi endla yi fambisana ni swiyimo swa vona.
2. Loko hi lunghiselela ku ya ensin’wini, xana hi nga swi kotisa ku yini ku endla tinhla ta xisekelo ta leswi hi nga ta swi vula? [2, be-TS tl. 167 ndz. 3] Anakanya hi nchumu lowu vanhu va ndhawu ya kona va karhatekaka ha wona. Anakanyisisa hi vukheta hi nchumu wo karhi lowu u nga wu vulaka malunghana ni mhaka leyi, katsa tsalwa rin’we kumbe mambirhi. Lunghekela ku kandziyisa leswaku Mfumo wa Yehovha, hi ku tirhisa Yesu Kreste, i hulumendhe leyi nga ta tisa ntshunxeko. Khutaza vayingiseri va wena leswaku va tirhisa leswi ku buriweke ha swona.
3. Hi ku tirhisa tsalwa ra Mintirho 13:16-41 na Mintirho 17:2, 3, hlamusela ndlela leyi Pawulo a swi ‘kombiseke ha kona hilaha ku twisisekaka leswaku Yesu i Kreste.’ (Mint. 9:22) [4, be-TS tl. 170 ndz. 2] Xo sungula, Pawulo u vulavule hi mhaka leyi yena na vona va pfumelelanaka eka yona, ku nga leswaku Vayuda va swi pfumela leswi Matsalwa ya Xiheveru ma swi vulaka malunghana na Mesiya. Endzhaku ka sweswo, eka Matsalwa wolawo, u hlawule swiyenge leswi vulavulaka hi vutomi ni vutirheli bya Mesiya kutani a kombisa leswaku swi pfumelelana njhani ni vutomi bya Yesu. Kutani, Pawulo a ya emahlweni a pfuna vayingiseri va yena leswaku va fikelela makumu lama nga erivaleni ya leswaku Yesu hakunene i Mesiya kumbe Kreste.
4. Hi yihi mimpfuno yin’wana ya ku nyikela nkulumo leyi nga hlayiwiki kunene? [7, be-TS tl. 175 tindz. 1-4] (1) U ta vulavula hi ndlela leyi hanyaka ni leyi tsakisaka eka vayingiseri va wena. (2) U ta va ni nkarhi wa kahle wo languta vayingiseri va wena. (3) Vayingiseri va wena va ta swi vona leswaku u yi tiva kahle mhaka ya wena ni leswaku leswi u swi vulaka u swi tshemba hi mbilu hinkwayo. (4) Nkulumo ya wena yi ta pfumelelana ni swiyimo, yi ta ku pfumelela ku yi cinca laha swi lavekaka. (5) Yi ta endla leswaku u ehleketa, leswi swi ta ku pfuna leswaku u ntshunxeka, u ta kota ku ndlandlamuxa tinhla tin’wana kumbe ku kandziyisa tin’wana.
5. Hi wahi makhombo lama vangiwaka hi ku vulavula hi nga hlayi, naswona i yini lexi xi nga hi pfunaka leswaku hi ma papalata? [8, be-TS tl. 175 ndz. 5–tl. 176 ndz. 3] Xiphiqo xo siyiwa hi nkarhi xi nga papalatiwa hi ku namarhela nkarhi lowu averiweke xiyenge xin’wana ni xin’wana xa nkulumo. Khombo ra ku ntshunxeka ku tlula mpimo ri nga papalatiwa hi ku va ni moya wa ku titsongahata ni ku tlangela lunghelo ro hoxa xandla enongonokweni wo dyondzisa wa Muleteri wa hina Lonkulu. Ku chava ku rivala leswi hi nga ta swi vula ku nga hluriwa hi ku lunghiselela kahle ni ku tiseketela hi moya wa Xikwembu. (Esa. 30:20; Rhom. 12:6-8)
NKULUMO NO. 1
6. Hi ku ya hi rungula ra Genesa 32:24-32, xana mukhalabye Yakobe loyi a a ri ni malembe ya 97 u endle yini leswaku a katekisiwa hi Yehovha, naswona leswi swi hi dyondzisa yini? [3, w02-TS 8/1 matl. 29-31] Yakobe a a tshama a anakanya hi ku rhandza ka Yehovha naswona ndzhaka ya yena a a yi teka yi ri ya risima. U khongele hi mbilu hinkwayo leswaku Xikwembu xi n’wi katekisa, naswona u teke magoza lama pfumelelanaka ni ku rhandza ka Xikwembu. Rungula leri ri hi dyondzisa leswaku hambi ho va ni malembe mangani kumbe hi tirhele Yehovha nkarhi wo tanihi kwihi, hinkwerhu ka hina hi nga vuyeriwa loko ho tekelela Yakobe la endleke matshalatshala lamakulu. Hi nga tshuki hi hela matimba eka nyimpi leyi hi yi lwaka yo tirhela Yehovha hi moya-xiviri hinkwawo.
7. Xana “vuswikoti byo ehleketa” i yini, naswona byi nga hi sirhelela njhani leswaku hi nga wi, hi tivavisa swi nga fanelanga? (Swiv. 1:4) [5, w02-TS 8/15 matl. 21-2] Rito ra Xiheveru leri hundzuluxeriweke va ku “vuswikoti byo anakanya” ri huma eka rito leri vulaka “ku kunguhata kumbe ku endla rhengu.” Xisweswo, vuswikoti byo anakanya byi katsa ku vona swilo ka ha ri emahlweni ivi u balekela swiendlo swo biha ni vuyelo bya swona. Leswi ‘a nga riki kona munhu la nga dyohiki,’ a swi fanelanga swi hi hlamarisa loko makwerhu la nga Mukreste a hi kandziya xikunwana kumbe a hi khunguvanyisa. Loko hi tsundzuka mhaka leyi, hi nga tshama hi swi languterile sweswo naswona hi ta anakanyisisa hi ndlela leyi hi faneleke hi angula ha yona. Sweswo swi ta hi pfuna leswaku hi nga hlundzuki loko munhu a hi pfuka. (1 Tih. 8:46)
8. Xana lava nyikelaka tinkulumo ta le rivaleni va nga endla njhani leswaku Matsalwa ma va xisekelo xa tinkulumo ta vona? [6, be-TS tl. 52 ndz. 6–tl. 53 ndz. 5] Ematshan’weni yo vula tinhla ntsena, xivulavuri xi fanele xi kombisa ndlela leyi ntiyiso lowu wu hlamuseriwaka wu sekeriweke ha yona eMatsalweni. Tindzimana tin’wana ta Bibele ti nga kambisisiwa, ti nga hlamuseriwa hi ku landza mongo, ti endleriwa xifaniso ni ku kombisa ndlela leyi ti tirhaka ha yona. Lava nyikelaka tinkulumo ta le rivaleni va fanele va lwela ku pfuna vayingiseri va vona ku twisisa Bibele ni ku vona leswi va faneleke va swi endla hi ku pfumelelana ni ku rhandza ka Xikwembu.
9. Leswaku xivulavuri xi kota ku endla nkulumo leyi nga ephepheni yi va nhlamuselo leyi twisisekaka ya Matsalwa, i swiboho swihi leswi xi faneleke xi swi endla? [7, be-TS tl. 54 tindz. 2-4] Xivulavuri xi fanele xi boha leswaku xi ta heta nkarhi wo tanihi kwihi ku ndlandlamuxa yinhla ha yin’we. Xi fanele xi kumisisa leswaku i tinhla tihi leti nga ta ri kandziyisa kahle Rito ra Xikwembu, leti nga ta endla vanhu va tlangela Yehovha ni malunghiselelo ya yena, leti nga ta humesa tinhla-nkulu ta nkulumo ni leti nga ta va pfuna swinene vayingiseri.
10. Ha yini Yehovha a nyike Vaisrayele manna vhiki ni vhiki, n’hweti ni n’hweti emananga, naswona hi nga dyondza yini eka leswi? (Det. 8:16) [8, w02-TS 9/1 tl. 30 tindz. 3-4] Hambileswi a va karhele ha yona, swi vonaka onge Yehovha u va nyike yona leswaku a ta va dyondzisa ku titsongahata ni ku titshega ha yena. (Det. 8:3) Na hina mfanelo ya hina ya ku titsongahata yi nga ha ringiwa hi mindzulamiso leyi vaka kona enhlengeletanweni swin’we ni tinhlamuselo ta ntiyiso wa Bibele leti humaka eka Yehovha hi ku tirhisa “hlonga ro tshembeka ni ro tlhariha.” (Mat. 24:45-47)
KU HLAYA KA BIBELE KA VHIKI NI VHIKI
11. Hilaha swi hlamuseriweke ha kona eka Genesa 37:12-17, hi kwihi ku fana loku nga kona exikarhi ka leswi endliweke hi Yosefa ni leswi endliweke hi Yesu? [1, w87-TS 5/1 tl. 12 ndz. 12] Hambileswi Yosefa a a vengiwa hi vamakwavo, a nga hlwelanga ku famba a ya va pfuna. (Gen. 37:5-11) Hilaha ku fanaka Yesu u xi amukele hi mandla mambirhi xiavelo lexi humaka eka Yehovha xo ta laha misaveni, hambileswi a a ta fika a xaniseka.
12. Hilaha swi nga voniwaka ha kona eka rungula leri nga eka Genesa 42:25-35, xana Yosefa u wu kombise njhani twela-vusiwana lowu fanaka ni lowu kombisiweke hi Yesu? [2, w87-TS 5/1 tl. 18 ndz. 10; tl. 19, ndz. 17] Endzhaku ka loko Yosefa a tiyisekile leswaku vamakwavo vakwe va hundzuke hi xiviri, u va kombe musa hi ku tata masaka ya vona hi koroni, a va tlherisela ni mali ya vona a tlhela a va longisa timbuva. Hilaha ku fanaka, namuntlha Yesu u kombisa musa eka “tinyimpfu tin’wana” leti hundzukaka a tlhela a ti khathalela. (Yohane 10:16)
13. Xana malunghiselelo lama endliwaka hi ntlawa wa nandza namuntlha ma yelana njhani ni ya ku hangalasiwa ka koroni esikwini ra Yosefa? (Gen. 47:21-25) Ehansi ka nkongomiso wa Yesu, Yosefa Lonkulu, ntlawa wa nandza namuntlha wu tirhisa tindlela hinkwato ta Matsalwa ku vona leswaku Timbhoni leti ti tinyiketeleke ta Yehovha, kun’we ni vanhu lava tsakelaka, va kuma swakudya swa moya leswi hanyisaka. Ku tlula kwalaho nandza u vumbe mavandlha ivi a ma nyika tibuku ta Bibele leswaku ma ti tirhisa ensin’wini leyi ma averiweke yona. [4, w87-TS 5/1 tl. 15 tindz. 3-4]
14. Loko Yehovha a vula leswaku “ndzi ta tikombisa ndzi ri lexi ndzi nga ta tikombisa ndzi ri xona,” a a paluxa yini malunghana ni vito ra yena? (Eks. 3:14, 15) Yehovha u paluxe leswi vito rakwe ri vulaka swona. Xivulwa lexi xi kombisa leswaku Yehovha u va xin’wana ni xin’wana lexi lavekaka leswaku a hetisisa swikongomelo swakwe. A a ta tikombisa a ri Muhetisisi wa switshembiso hi ndlela leyi vakokwa wa Vaisrayele a va nga yi tivi. (Eks. 6:2, 3) [5, w95-TS 3/1 tl. 10 ndz. 6]
15. I makhombo wahi mambirhi ya ku gungula lawa ma boxiwaka eka Eksoda 16:2, 3? [8, w93-TS 3/15 matl. 20-1] Xo sungula, ku gungula ka tlulela. Xa vumbirhi, munhu la gungulaka u tala ku hundzeleta xiphiqo. Emhakeni leyi, Vaisrayele va vule leswaku a swi ta antswa loko a va ri le Egipta, hikuva kona a va ta dya xinkwa ni nyama yo tala hilaha va rhandzaka ha kona. Va vule leswaku va yisiwe emananga, va yiseriwa ku ya fa hi ndlala.