Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi April 25, 2005. Mulanguteri wa xikolo u ta fambisa mpfuxeto wa timinete ta 30 lowu sekeriweke eka rungula ra tinkulumo leti nyikeriweke ku sukela eka vhiki ra March 7 ku ya eka April 25, 2005. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. Hi nga ri tirhisa njhani rungula leri hi averiweke rona loko hi lunghiselela nkulumo naswona ha yini swi ri swa nkoka? [2, be-TS tl. 234 tindz. 1-3, mabokisi] Hi ku ri tirhisa loko hi lunghiselela nkulumo ya hina ni ku tirhisa matsalwa swin’we ni tinhla-nkulu ta rona. Hi ku endla tano, hi xixima lunghiselelo leri hlonga ro tshembeka ni ro tlhariha ri hi wundlaka ha rona. (Mat. 24:45)
2. Hi fanele hi tirhisa rungula ro tanihi kwihi eka leri hi averiweke rona? [2, be-TS tl. 234 ndz. 4–tl. 235 ndz. 1] Hi fanele hi hlanganisa rungula leri hi nga kotaka ku ri hlamusela hi ndlela leyi twalaka hi nkarhi lowu hi nyikiweke wona, hi dzika eka swiyenge leswi nga ta hi pfumelela leswaku hi fikelela xikongomelo xa nkulumo yoleyo. Hi nga tshuki hi honisa madyondziselo lamanene ni ku ndlandlamuxa tinhla letinene leswaku hi ta nghenisa rungula ro tala.
3. Hi nga swi tirhisa njhani swivutiso leswaku hi kota ku bula ni vanhu ensin’wini? (Mint. 8:30) [3, be-TS tl. 236 ndz. 2-5] Timbhoni to tala ti sungula mabulo ni vanhu hi ku vutisa xivutiso lexi vanhu vo tala va tivutisaka xona, ti ku, “Xana u tshame u tivutisa . . . ?” kumbe “Xana u swi vonisa ku yini . . . ?” Vanhu vo tala va ta hi yingisa loko hi va nyika nkarhi wo vula mavonelo ya vona.
4. Hi nga swi tirhisa njhani swivutiso leswaku hi pfuna swichudeni swa Bibele swi tirhisa ‘matimba ya swona ya ku anakanya?’ (Rhom. 12:1) [5, be-TS tl. 238 ndz. 1] Loko hi hlamusela tinhla ta nkoka, hi nga ha tirhisa swivutiso swa le tlhelo ku pfuna swichudeni leswaku swi nga vuli ntsena tinhlamulo ta swona. Hi nga ha vutisa hi ku: “Xana leswi hi vulavulaka ha swona swi hlangana njhani ni yinhla leyi ha ha ku dyondzaka ha yona? Ha yini swi ri swa nkoka? Xana swi fanele swi byi khumba njhani vutomi bya hina?” Hi ku vutisa swivutiso ku ri ni ku vula mavonelo ya hina, hi pfuna swichudeni leswaku swi tirhisa ‘matimba ya swona ya ku anakanya.’
5. Swi hi pfuna hi yini swivutiso leswi vutisiweke eka Varhoma 8:31, 32 na Esaya 14:27? [7, be-TS tl. 239 tindz. 1-2] Eka tindzimana leti hatimbirhi, vatsari va Bibele lava huhuteriweke va tirhise swivutiso ku kombisa leswaku va khorwisekile. Swivutiso leswi kumekaka eka tindzimana leti swi kombisa leswaku leswi vuriwaka swi nga ka swi nga kanetiwi. Na hina hi nga tirhisa swivutiso swo tano leswaku hi kandziyisa leswi hi swi vulaka.
NKULUMO NO. 1
6. Hi n’wi ‘veka njhani Kreste a va masungulo’ loko hi ri karhi hi endla vanhu vadyondzisiwa? (1 Kor. 3:11) [1, be-TS tl. 278 tindz. 1-2] Leswaku hi ‘veka Kreste a va masungulo,’ hi fanele hi pfuna vanhu va kombisa ripfumelo eka xitlhavelo xa nkutsulo wa Yesu tanihi leswi ku ponisiwa ka vona ku sekeriweke eka xona. Swichudeni swi fanele swi dyondzisiwa ku teka Yesu tanihi xikombiso xa swona ni ku teka Tievhangeli ti ri ndlela leyi swi faneleke swi hanya ha yona. (1 Pet. 2:21) Hi fanele hi khutaza swichudeni swa hina leswaku loko swi fanele swi endla swiboho, swi tivutisa xivutiso lexi nge: ‘Xana Yesu a a ta endla yini eka xiyimo lexi? Xana xiboho xa mina xi ta kombisa leswaku ndza swi tlangela leswi a ndzi endleleke swona?’ (Yoh. 14:15, 21)
7. Leswi Yehovha a nyikeke N’wana wa yena vulawuri hinkwabyo hi 1914, hi va hi vula yini loko hi khongela hi ku, “Mfumo wa wena a wu te”? (Mat. 6:9, 10) [2, be-TS tl. 279 ndz. 4] Loko hi khongela hi ku “Mfumo wa wena a wu te,” hi va hi vula leswaku Mfumo wa Xikwembu wu ta tirha hi ndlela leyi hetisekeke leswaku wu hetisisa vuprofeta byo tanihi bya Daniyele 2:44 na Nhlavutelo 21:2-4. Hi lerisiwe leswaku hi twarisa mikateko leyi Mfumo wa Xikwembu wu nga ta yi tisa ku nga ri khale. (Mat. 24:14)
8. Ha yini Vakreste hinkwavo va fanele va lava ku dyondza ku hlaya naswona Yesu u hi vekele xikombiso hi ndlela yihi emhakeni leyi? [5, w03-TS 3/15 tl. 10 ndz. 5; tl. 12 ndz. 1] Leswi Xikwembu xi nyikeke vagandzeri va xona Rito ra xona leri tsariweke, xi langutele leswaku va ri hlaya hilaha va nga kotaka hakona. Ku hlaya Matsalwa ni minkandziyiso leyi sekeriweke eBibeleni u tlhela u twisisa leswi u swi hlayaka, swi endla leswaku swi olova ku tirhisa ndzayo ya Xikwembu ni ku “ri tamela khwatsi rito ra ntiyiso.” (2 Tim. 2:15) Yesu a a dyondzile hikuva loko a ri ni malembe ya 12 hi vukhale, u swi kotile ku vulavula swilo leswi wupfeke ni vavanuna lava dyondzekeke etempeleni. (Luka 2:46, 47)
9. Xana xikombiso xa Yosiya ni xa Yesu xi nga va pfuna njhani vantshwa leswaku va endla nhluvuko hi tlhelo ra moya? [6, w03-TS 4/1 tl. 8 tindz. 3-4; tl. 10 ndz. 3] Hosi Yosiya lontsongo u lerise leswaku a hlayeriwa Rito ra Xikwembu. Leswi a swi tweke swi n’wi khumbile swinene kutani swi endla leswaku a tirhela Yehovha ni ku endla leswi engetelekeke leswaku vugandzeri lebyi tengeke byi ya emahlweni. (2 Tikr. 34:14-21, 33) Yesu u teke ku tirhela Yehovha ku nga ri pakani ntsena kambe ku ri xiavelo lexi a faneleke a xi hetisisa. U kume ntsako ni ku eneriseka hi ku endla ku rhandza ka Xikwembu. (Yoh. 4:34) Leswaku vantshwa va endla nhluvuko hi tlhelo ra moya, va fanele va hlakulela ku tiva Muvumbi hikuva ku ta va susumeta leswaku va endla nhluvuko hi tlhelo ra moya.
10. Ha yini hi fanele hi tshemba Xikwembu? (Swiv. 3:5, 6) [7, w03-TS 11/1 tl. 4 ndz. 6–tl. 5. ndz. 1] Hi nga tshemba Yehovha Xikwembu hikuva wa kwetsima naswona a nge pfuki a hundzukile kumbe a va ni tihanyi. (Esa. 6:3) Tlhandlakambirhi, nchumu wun’wana ni wun’wana lowu Xikwembu xi wu endlaka, xi wu endla hikwalaho ka rirhandzu. (1 Yoh. 4:8) Ku tlula kwalaho, a ku na un’wana la hi twisisaka ku fana na yena. (Ps. 139:1, 6)
KU HLAYA KA BIBELE KA VHIKI NI VHIKI
11. Ha yini Hana a khongele leswaku Yehovha a “nyika hosi yakwe ntamu,” kasi a ku nga ri na hosi leyi fumaka eIsrayele? (1 Sam. 2:10) Mhaka ya leswaku Vaisrayele va ta fumiwa hi hosi yi profetiwe eNawini wa Muxe. (Det. 17:14-18) Loko Yakobe a ri kusuhi ni ku fa, u profete a ku: “Nhonga ya vuhosi [ku nga xikombiso xa vulawuri] a yi nge hambukisiwi eka Yuda.” (Gen. 49:10) Nakambe, loko Yehovha a vulavula hi Sara, loyi a veke mana wa Vaisrayele, u te: “Tihosi ta matiko ti ta huma eka yena.” (Gen. 17:16) Leswi vulaka leswaku Hana a a khongelela hosi ya le nkarhini lowu taka. [1, w05-TS 3/15 “Rito Ra Yehovha Ra Hanya—Tinhla-nkulu Ta Buku Yo Sungula Ya Samuwele”]
12. Hi nga dyondza yini emhakeni ya leswaku tiko ra Israyele ri hluriwile hambileswi a ku ri ni areka ya ntwanano exikarhi ka rona? (1 Sam. 4:3, 4, 10) Hi dyondza leswaku ku veka ntshembo wa hina eka swilo leswi nga pfuniki nchumu swi nga hi vangela khombo. Hambi ku ri nchumu wo kwetsima ku fana ni “areka ya ntwanano wa Yehovha” a yi swi kotanga ku va xitshungulo lexi sirhelelaka. Hi fanele hi ‘tivonela eka swifaniso.’ (1 Yoh. 5:21) [1, w05-TS 3/15 “Rito Ra Yehovha Ra Hanya—Tinhla-nkulu Ta Buku Yo Sungula Ya Samuwele”; w02-TS 7/1 matl. 6-8]
13. Ha yini 1 Tikronika 2:13-15 yi vula leswaku Davhida a a ri n’wana wa Yese wa vunkombo kasi 1 Samuwele 16:10, 11 yi vula leswaku a a ri wa vunhungu? Matsalwa ma vula leswaku Yese “a a ri ni vana va nhungu.” (1 Sam. 17:12) Swi tikomba onge un’wana wa vana va yena a nga hanyanga nkarhi wo leha kutani u fe a nga si va ni vana. Leswi a a nga ri na vana, a a nga ta swi kota ku kuma ndzhaka ya rixaka hambi ku ri ku tsarisiwa ematin’wini ya xivongo xa rixaka ra Yese. [5, w02-TS 9/15 tl. 31]
14. Hi wihi “moya wo biha” lowu hlaseleke Sawulo? (1 Sam. 16:14) Moya wo biha lowu a wu tsona Sawulo ku rhula a ku ri mboyamelo wo biha lowu a wu ri emianakanyweni ni le mbilwini ya yena—ku nga ku navela ku endla swo biha. Loko Yehovha a susa moya wa yena wo kwetsima eka Sawulo, a a nga ha ri ni lexi n’wi sirheleleke kutani a a lawuriwa hi moya wa yena wo biha. Hi yona mhaka wu vuriwaka “moya wo biha lowu humaka eka Yehovha” hileswi Xikwembu xi pfumeleleke leswaku moya wolowo wu siva moya wa xona wo kwetsima. [5, w05-TS 3/15 “Rito Ra Yehovha Ra Hanya—Tinhla-nkulu Ta Buku Yo Sungula Ya Samuwele”]
15. Xana leswi “Samuwele” a swi vhumbheke hi ku tirhisa mungoma wa le Eni-dori a swi ri ntiyiso? (1 Sam. 28:16-19) Doo! Sawulo u vavisiwile swinene loko va ri karhi va lwa ni Vafilista kambe a nga dlayiwanga, u lo tidlaya. (1 Sam. 31:1-4) Nakambe vana va Sawulo a va fanga na yena hilaha a ku vhumbhiwe hakona, Ixi-boxeti u ponile. [8, w88-TS 1/15 tl. 3 tindz. 3-4]