Mpfuxeto Wa Xikolo Xa Vutirheli Nya Le Tilweni
Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi August 28, 2006. Mulanguteri wa xikolo u ta fambisa mpfuxeto wa timinete ta 30 lowu sekeriweke eka rungula ra tinkulumo leti nyikeriweke ku sukela eka vhiki ra July 3 ku ya eka August 28, 2006. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. Xana ku languta vayingiseri swi hi pfuna njhani leswaku hi va vadyondzisi lavanene? (Mat. 19:25, 26; Mint. 14:9, 10) [July 3, be-TS tl. 124 ndz. 3–tl. 125 ndz. 3] Ku languta vayingiseri hi ndlela leyi faneleke swi komba leswaku ha khathala hi van’wana ni leswaku leswi hi swi vulaka i swa nkoka. Xinghana ni ku n’wayitela ka hina swi nga pfuna vayingiseri leswaku va titwa va ntshunxekile. Ku xiya ndlela leyi lava hi vulavulaka na vona va langutekaka ha yona exikandzeni swi nga hi pfuna ku vona ndlela leyi hi nga langutanaka ha yona ni xiyimo xexo.
2. Ha yini swi ri swa nkoka ku vulavula hi ndlela ya ntumbuluko, naswona i yini lexi nga hi pfunaka leswaku hi vulavula hi ndlela yoleyo loko hi ri ensin’wini? [July 17, be-TS tl. 128 tindz. 1-5, bokisi] Ku vulavula ka hina hi ndlela leyi xiximekaka, kambe yi ri ya ntumbuluko swi endla leswaku van’wana va hi tshemba. Loko hi vonaka hi nga ntshunxekanga loko hi ri karhi hi vulavula, vanhu va ta pfilunganyiwa hi leswi hi swi vulaka. Tinhla tin’wana leti nga hi pfunaka leswaku hi nga chuhi ngopfu ni leswaku hi vulavula hi ndlela ya ntumbuluko loko hi ri ensin’wini, i (1) ku lunghiselela kahle, (2) ku khongela hi mbilu hinkwayo, (3) ku tsundzuka tintswalo ta Yehovha leti a hi kombeke tona hi ku nyika vanhu hinkwavo ntshembo wo kuma vutomi lebyi nga heriki, (4) ku tsundzuka leswaku vanhu va ni mfanelo ya ku tihlawulela naswona va nga ha amukela rungula kumbe va ri ala ni (5) ku tsundzuka leswaku xiavelo xa hina i ku va chumayela ntsena.
3. Ha yini hi fanele hi va lava baseke? [Aug. 7, be-TS tl. 131 tindz. 1-3] Ku basa ka hina swi vangamisa Xikwembu naswona swi endla leswaku hi yi yimela kahle nhlengeletano ya xona. (1 Kor. 10:31) Loko miri ni swiambalo swa hina swi basile, vanhu va ta hi teka hi ri vanhu lava xiximekaka, naswona swi ta va olovela leswaku va hi yingisa.
4. Xana “xichavo ni mianakanyo yo hluteka” swi ma khumba njhani maambalelo ni ku tisasekisa ka hina? (1 Tim. 2:9) [Aug. 14, be-TS tl. 131 ndz. 4–tl. 132 ndz. 1] Munhu loyi a nga ni xichavo u papalata ku khunguvanyisa van’wana. Ku hluteka emianakanyweni swi hi pfuna leswaku hi ringanisela eka ndlela leyi hi tilunghisaka ha yona ni ku papalata ku tisasekisa ku tlula mpimo kumbe switayele leswi hundzeletiweke. Hambiloko hi ri exikolweni, emintirhweni ya hina ya ku tihanyisa kumbe entirhweni wo kwetsima, maambalelo ya hina ma fanele minkarhi hinkwayo ma kombisa leswaku ha yi xixima misinya ya milawu ya Xikwembu.
5. Hi yihi misinya ya milawu ya Bibele leyi hi faneleke hi yi tirhisa leswaku hi tiyiseka leswaku hi papalata ku languteka ku fana ni vanhu lava rhandzaka misava? [Aug. 28, be-TS tl. 133 tindz. 2-3] Yohane wo Sungula 2:15-17 yi hi tsundzuxa leswaku hi nga rhandzi misava kumbe swilo leswi nga emisaveni. Tanihi malandza ya Yehovha, hi papalata switayele leswi kombisaka tindlela leti nga riki ta Vukreste ta mafambiselo ya Sathana. Vaefesa 2:2 yi vulavula hi moya wa ku xandzuka lowu nga kona emafambiselweni lawa yo homboloka. Hakanyingi ku honisa vulawuri swi vonaka hi ririmi ro bola, ku ambala hi ndlela ya vudlakuta ya vanhu va manguva lawa. Ematshan’weni yo tekelela misava, a hi tekeleleni maambalelo ya Vakreste lava wupfeke emoyeni. (1 Tim. 4:12; 1 Pet. 5:2, 3)
NKULUMO NO. 1
6. Hi byihi vuyelo lebyikulu bya ku hlaya? [July 10, be-TS tl. 21 ndz. 3] Ku hlaya ku hi endla hi “kuma vutivi bya Xikwembu.” (Swiv. 2:5) Tindlela to tala leti hi tirhelaka Xikwembu ha tona, ti lava leswaku hi va lava kotaka ku hlaya. Ku humelela ka hina ensin’wini ku khumbiwa ngopfu hi mahlayelo ya hina. Ku lunghiselela mintirho ya moya swi lava leswaku hi va lava tivaka ku hlaya.
7. I yini lexi kombisaka leswaku munhu u tlharihile kumbe i xiphukuphuku? (Swiv. 14:2) [July 24, w04-TS 11/15 tl. 26 ndz. 5] Munhu wo lulama u chava Xikwembu xa ntiyiso naswona “ku chava Yehovha i masungulo ya vutlhari.” (Ps. 111:10) Munhu la tlhariheke hakunene wa swi tiva leswaku i vutihlamuleri byakwe ku “chava Xikwembu xa ntiyiso [ni ku] hlayisa swileriso swa xona.” (Ekl. 12:13) Xiphukuphuku xi landzela ndlela leyi nga fambisaniki ni milawu ya Xikwembu ya ku lulama. Tindlela ta xona ti hombolokile.
8. Ha yini ‘vutivi byi ri nchumu wo olova eka loyi a twisisaka’? (Swiv. 14:6) [July 31, w04-TS 11/15 tl. 28 tindz. 4-5] Ku twisisa i vuswikoti byo hlanganisa timhaka to hambana-hambana kutani u vona ndlela leyi ti hlanganaka ha yona. Ku dyondza ni ku tsundzuka timhaka letintshwa swa olova eka munhu la twisisaka hikuva u vona ndlela leyi timhaka leti letintshwa ti hlanganaka ha yona ni xikongomelo hinkwaxo xa Yehovha hi vanhu swin’we ni misava.
9. Swi vula yini ku dyondza? [Aug. 7, be-TS tl. 27 ndz. 3] Ku dyondza a swi vuli ku hlaya ntsena. Swi katsa ku tirhisa matimba ya mianakanyo ya wena hi vukheta kumbe ku heta nkarhi wo leha u ri karhi u kambisisa mhaka yo karhi. Swi katsa ku kambisisa leswi u swi dyondzaka, u swi pimanisa ni leswi ana se u swi tivaka ni ku xiya swivangelo leswi nyikeriwaka ku seketela leswi vuriwaka.
10. Ku anakanyisisa hi mintirho leyi Yehovha a yi tumbuluxeke swi fanele swi hi pfuna njhani? [Aug. 14, w04-TS 11/15 tl. 8 ndz. 4] Ku anakanyisisa swi nga hi pfuna hi tindlela tinharhu. Swi nga hi (1) tsundzuxa leswaku hi tlangela vutomi bya hina, (2) swi hi susumetela ku ya pfuna van’wana leswaku va dyondza swo karhi hi ntumbuluko swi tlhela (3) swi hi pfuna leswaku hi tiva Muvumbi wa hina naswona hi n’wi tlangela swinene.
KU HLAYA KA BIBELE KA VHIKI NI VHIKI
11. Eminkarhini ya khale, xana Yehovha u ma vule njhani “marito” lama endleke leswaku ku va ni vuthu lerikulu ra “vavasati lava vulaka mahungu lamanene” naswona leswi swi tirha njhani namuntlha? (Ps. 68:11) Yehovha u lerise vavanuna va Israyele ku lwa ni matiko ya valala va Tiko leri Tshembisiweke ni ku va hlula. Loko Vaisrayele va hlula valala va vona, vavasati va le Israyele a va twarisa mahungu lawa lamanene leswaku va tlangela ku hlula ka vona. Namuntlha, vavasati va chumayela mahungu lamanene ya ku hlula ka le tilweni, ko fana ni loko Sathana a cukumeteriwa emisaveni, leswaku ku hetiseka Rito ra Yehovha. Hi ku pfumelelana ni Rito ra Xikwembu, vavasati lava nga Vakreste na vona va tivisa matiko leswaku ku nga ri khale ma ta hluriwa hi Hosi leyi nga Mesiya, ku nga Yesu Kreste. [July 3, w86-TS 10/15 tl. 30]
12. I yini lexi laveke ku tshikisa Asafa ku endla leswi nga swinene, naswona mianakanyo ya yena yi ololoxiwe njhani? (Ps. 73:2, 3, 17) Hambileswi Asafa a a pfumela leswaku Yehovha hi lonene, kambe ku navela rifuwo ra vanhu lavo homboloka swi n’wi endle leswaku a kanakana swilo swa nkoka leswi yisaka evuton’wini lebyinene. (Ps. 73:1, 13) Kambe mianakanyo ya yena yi lulamisiwe hi ku ya “evukwetsimelweni lebyikulu bya Xikwembu” ni ku anakanyisisa hi ku rhula loku nga kona exikarhi ka vagandzeri-kulobye. Namuntlha loko hi khunguvanyisiwa hi ku vona vanhu vo homboloka swi va fambela kahle, hi nga lava tinhlamulo ta swivutiso swa hina hi ku tihlanganisa ni vanhu lava gandzelaka Xikwembu. [July 10, w93-TS 7/15 tl. 28 tindz. 3, 5; tl. 30 ndz. 1]
13. Ha yini manna leyi nyikiweke Vaisrayele a yi vitaniwa “mavele lama humaka etilweni” ni “xinkwa xa lava matimba”? (Ps. 78:24, 25) Manna a yi huma etilweni naswona a yi huma eka Yehovha. (Ps. 105:40) Rito leri nge “lava matimba” ri nga ha va ri kombetela eka tintsumi leti Yehovha a ti tirhiseke ku va nyika manna hi ndlela leyi nga tolovelekangiki. (Ps. 103:20) [July 17, w06-TS 7/15 “Rito Ra Yehovha Ra Hanya−Tinhla-nkulu Ta Buku Ya Vunharhu Ni Ya Vumune Ya Tipisalema”]
14. I yini ‘ndhawu ya le xihundleni ya La nge Henhla-henhla,’ naswona hi nga ‘tshama’ njhani eka yona? (Ps. 91:1, 2) ‘Ndhawu ya le xihundleni’ i ndhawu yo fanekisela leyi sirhelelekeke ni leyi nga riki na khombo hi tlhelo ra moya, ku nga paradeyisi ya moya. Ndhawu leyi ya kwetsima hikuva vanhu lava nga pfumeliki eka Xikwembu a va yi tivi. Hi ‘tshama’ eka La nge Henhla-henhla hi ku titshega hi yena tanihi ‘vutumbelo bya hina ni khokholo ra hina,’ hi ku n’wi dzunisa tanihi Mufumi Lonkulu wa vuako hinkwabyo ni hi ku chumayela mahungu lamanene ya Mfumo. [July 31, w06-TS 7/15 “Rito Ra Yehovha Ra Hanya−Tinhla-nkulu Ta Buku Ya Vunharhu Ni Ya Vumune Ya Tipisalema”]
15. Xana ku fa ka vanhu lavo tshembeka va Yehovha i ka risima ematihlweni yakwe hi ndlela yihi? (Ps. 116:15) Yehovha a nge swi pfumeleli nikatsongo leswaku ku lovisiwa vagandzeri vakwe lava tshembekaka hinkwavo, hikuva ku fa ka vona i ka risima naswona swi nga vula ku lahlekeriwa lokukulu eka yena. (Ps. 116:8) Loko o pfumelela sweswo, a nga sandzisa vito rakwe, tanihi leswi a tivekaka a ri ni matimba hinkwawo ni vuswikoti bya ku ponisa vanhu vakwe lava tshembekaka. Xin’wana hileswaku a nge vi kona munhu la nga ta sala laha misaveni leswaku a sungula misava leyintshwa. [Aug. 28, w06-TS 9/1 “Rito Ra Yehovha Ra Hanya−Tinhla-nkulu Ta Buku Ya Vuntlhanu Ya Tipisalema”]