U Nga Lahli Rirhandzu Leri A Wu Ri Na Rona Eku Sunguleni
1 Yesu la kwetsimisiweke u tsundzuxe vandlha ra lembe-xidzana ro sungula ra le Efesa a ku: “Ndzi ni mhaka na wena, ya leswaku u lahle rirhandzu leri a wu ri na rona eku sunguleni.” (Nhlav. 2:4) Swi vonaka onge Vakreste vo tala a va lahle rirhandzu ra vona ro sungula leri a va rhandza Yehovha ha rona. Loko hi ri karhi hi dyondza ntiyiso, hi ake rirhandzu leri tiyeke ni Xikwembu swin’we ni muakelani, kutani sweswo swi hi susumetela ku hisekela ku byela van’wana hi ta ntshembo wa hina lowuntshwa. I yini lexi nga hi pfunaka leswaku hi nga heleriwi hi rirhandzu leri a hi ri na rona eku sunguleni nileswaku hi nga heleriwi hi matimba yo endla ntirho wo chumayela?
2 Dyondzo Ya Munhu Hi Yexe Ni Ku Va Kona eMinhlanganweni: I yini lexi hi pfuneke leswaku hi hlakulela ku rhandza Xikwembu ni muakelani loko hi sungula ku dyondza ntiyiso? I tidyondzo hinkwato leti hi ti dyondzeke ha Yehovha loko hi ri karhi hi dyondza Matsalwa! (1 Yoh. 4:16, 19) Hikwalaho, leswaku rirhandzu ra hina “ri ya ri andza ngopfu,” hi fanele ku hambeta hi nghenisa vutivi lebyi kongomeke, hi kambisisa “swilo leswi enteke swa Xikwembu.”—Filp. 1:9-11; 1 Kor. 2:10.
3 Ku va ni xiyimiso lexinene xa dyondzo ya munhu hi yexe a hi matlangwana emasikwini lawa yo hetelela, lama nga ni swilo swo tala leswi tshamelaka ku hi vilerisa ni ku hi kavanyeta. (2 Tim. 3:1) Hi fanele hi tivekela nkarhi wo dya swakudya swa moya eka mintirho ya hina ya siku ni siku. Nakambe i swa nkoka ku tshama hi ri kona eminhlanganweni ya vandlha, ngopfu-ngopfu leswi hi ‘vonaka siku ri tshinelaka.’—Hev. 10:24, 25.
4 Ntirho Wa Nsimu: Ku tshama hi khomekile entirhweni wo chumayela swi hi pfuna leswaku rirhandzu leri a hi rhandza Xikwembu ha rona eku sunguleni ri nga holi. Loko hi ri karhi hi chumayela mahungu lamanene, hi tsundzuka switshembiso swa rirhandzu leswi Yehovha a hi tshembiseke swona kutani sweswo swi hi pfuna leswaku hi tshama hi ri ni ntshembo nileswaku rirhandzu ra hina ri nga holi. Leswaku hi kota ku dyondzisa ntiyiso wa Bibele swi lava leswaku hi endla ndzavisiso leswaku hi ta wu twisisa kahle naswona sweswo swi tiyisa ripfumelo ra hina.—1 Tim. 4:15, 16.
5 Yehovha u faneriwa hi ku nyikiwa swilo hinkwaswo ku katsa ni rirhandzu ra hina. (Nhlav. 4:11) U nga ri pfumeleli rirhandzu ra wena ri hola. Tiyisa rirhandzu leri a wu ri na rona eku sunguleni hi ku tiyimisela ku va ni dyondzo ya Bibele ya wena n’wini, hi ku tshama u ri kona eminhlanganweni ni hi ku hisekela ku byela van’wana ntiyiso lowu u wu tekaka wu ri wa risima.—Rhom. 10:10.