Switiviso

◼ Minkandziyiso leyi nga ta fambisiwa hi January: Fambisani broxara leyi nge Tshamani Mi Rindzile! Loko mi nga ri na yona broxara leyi evandlheni, fambisani leyi nge Leswi Xi Swi Languteleke. February: Fambisani buku leyi nge Xihundla Xa Ntsako eNdyangwini. March: Fambisani buku leyi nge Xana Bibele Yi Dyondzisa Yini Hakunene? April: Fambisani timagazini ta Xihondzo xo Rindza ni Xalamuka!

◼ Tanihi leswi March yi nga ni mahelo-vhiki ya ntlhanu, yi ta va n’hweti ya kahle yo nghenela vuphayona bya nkarhinyana.

◼ Ku sukela hi February naswona ku nga si hundza March 2, nkulumo leyintshwa ya mulanguteri wa xifundzha yi ta va ni nhloko-mhaka leyi nge “Xana U Nga Wu Kuma Kwihi Mpfuno Loko U Langutane Ni Maxangu?”

◼ Mavandlha ma fanele ma endla malunghiselelo lamanene yo va kona eka Xitsundzuxo xa nan’waka hi Mugqivela, March 22, endzhaku ka ku pela ka dyambu. Hambiloko nkulumo yo hatla yi sungula, swifanekiselo a swi fanelanga swi fambisiwa loko dyambu ri nga si pela. Kumisisani leswaku dyambu ri pela rini endhawini ya ka n’wina. Hambileswi swi nga swinene leswaku vandlha rin’wana ni rin’wana ri va ni Xitsundzuxo xa rona n’wini, minkarhi yin’wana a swi koteki. Loko Holo ya Mfumo yi tirhisiwa hi mavandlha yo hlayanyana, mavandlha man’wana ma nga ha hirha muako wun’wana leswaku ma ta wu tirhisa madyambu wolawo. Loko swi koteka, hi ringanyeta leswaku vandlha leri landzelaka rin’wana, ri nghena endzhaku ka 40 wa timinete leswaku un’wana ni un’wana a ta vuyeriwa hi xitalo eka siku leri. Nakambe ku fanele ku anakanyiwa hi ku tala ka mimovha ni ndhawu yo paka swin’we ni ku tisiwa ni ku landziwa ka vanhu. Huvo ya vakulu yi fanele yi vona leswaku hi wahi malunghiselelo lama nga ta pfuna vandlha.

◼ Vamatsalana emavandlheni va fanele va tiyiseka leswaku ku na papila ra ku hlawuriwa ka phayona (S-202) ha rin’we ra nkarhi hinkwawo evandlheni. Loko ri nga ri kona va fanele va tsalela rhavi va ri kombela.

◼ Vamakwerhu van’wana lava langutelaka tibuku va vutise leswaku va fanele va yi rhumela rini fomo ya Literature Request Form (S-14) leswaku va hatla va kuma leswi va swi kombeleke loko lori leyi tisaka tibuku yi ta. Hi kombela mi kambela xiyimiso xa ku tisiwa ka tibuku hi lori leyi humaka erhavini. Literature Request Form yi fanele yi siyiwa laha lori yi siyaka kona tibuku ka ha sele siku rin’we lori yi nga si tisa tibuku. Lava langutelaka laha ku siyiwaka kona tibuku va fanele va tiyiseka leswaku ku ni ndhawu leyi lunghiseleriweke ku veka ti-S-14. Muchayeri wa lori u ta teka ti-S-14 kutani loko minkandziyiso leyi mi yi lavaka yi ri kona exitokweni yi ta rhumeriwa loko lori yi tisa tibuku enkarhini lowu taka. Yi ta teka mavhiki ya mune ku ya ka ntlhanu yi nga si vuya. I swa nkoka leswaku nkarhi na nkarhi mi rhumela fomo ya Literature Request Form (S-14) hambiloko mi lava swilo swi nga ri swingani ntsena. Loko mavandlha ma nga swi koti ku yisa Literature Request Form ya wona hi nkarhi, laha ma landzaka kona minkandziyiso, ma fanele ma yi rhumela hi poso leswaku yi fikisana ni lori loko yi fika erhavini. Swikombelo swi tirhiwa swi tlhela swi pakiwa hi ku hatlisa loko lori ya ha ku vuyela erhavini, hambileswi yi nga ta tlhela yi famba endzhaku ka mavhiki yo hlayanyana.

◼ Valanguteri lava ungamelaka va fanele va tiyiseka leswaku mphakelo lowu va wu kumaka wa Vutirheli Bya Hina Bya Mfumo wu ringene vahuweleri hinkwavo va vandlha, nileswaku ku sala tikopi ti nga ri tingani leti engetelekeke. Loko mi kuma tikopi to tala, mi fanele mi ti hunguta, mi tirhisa fomo leyi nge Magazine Request Form (M-202). Loko ti kayivela, mi nga kombela leti engetelekeke, mi tirhisa fomo leyi fanaka. Muhuweleri ha un’we u fanele a kuma kopi ya yena. Nakambe lava vaka kona eka Nhlangano Wa Ntirho naswona va tikarhatela ku fanelekela ku va vahuweleri lava nga khuvuriwangiki, va fanele va kuma kopi na vona. Tiyisekani leswaku mi hlayisa kopi leyi nga ta tshama elayiburari ya Holo ya Mfumo. Vanhu lava susiweke eku hlanganyeleni a va fanelanga va nyikiwa Vutirheli Bya Hina Bya Mfumo.—Vona Bokisi Ra Swivutiso eka Vutirheli Bya Hina Bya Mfumo bya February 1987.

◼ Hi nkhensa tinhlamulo ta xikombelo lexi hi xi endleke xa leswaku mi lavisisa leswaku i vangani lava nga tsakelaka Xihondzo xo Rindza hi maletere lamakulu hi Xibunu, Xisuthu ni hi Xixhosa. Hi kume mpfumelelo wo kandziyisa Xihondzo xo Rindza hi maletere lamakulu hi Xisuthu ni hi Xixhosa, kambe a hi nge xi kandziyisi hi Xibunu hikuva nhlayo ya lava xi lavaka i yitsongo. Hi ta kandziyisa magazini lowu hi ku landza nhlayo leyi hi yi kumeke. Mavandlha lama nga endlangiki xikombelo ma nga rhumela xikombelo xa wona loko ma yi lava. Leswi vulaka leswaku loko vandlha ra n’wina ri vurile leswaku ri ta tsakela ku kuma Xihondzo xo Rindza xa maletere lamakulu, hi rin’wana ra tindzimi leti, ku nga Xisuthu kumbe Xixhosa, xi ta rhumeriwa evandlheni ra n’wina hi ku landza nhlayo leyi mi yi kombeleke.

◼ Leswaku vahlayi va Xivhenda ni va Xikwanyama va nga lahlekeriwi hi swihloko leswi a swi fanele swi katsiwa eka Xihondzo xo Rindza xa December loko ku sungula nkandziyiso wa vandlha, ku ta endliwa broxara leyi nga ta tamela swihloko leswi nga ta dyondziwa eka Dyondzo ya Xihondzo xo Rindza, leyi nga ta humesiwa kan’we ntsena. Broxara leyi yi ta rhumeriwa emavandlheni hinkwawo lama kumaka Vutirheli Bya Hina Bya Mfumo hi Xivhenda. Nakambe ku ta rhumeriwa nhlayo leyi ringaneke ya tibroxara leti emavandlheni hinkwawo lama kumaka Xihondzo xo Rindza hi Xikwanyama.

◼ Ku sukela hi vhiki ra August 4, 2008, hi ta dyondza buku leyi nge Tshama U Ri Karhi U Ehleketa Hi Siku Ra Yehovha eka Dyondzo ya Buku ya Vandlha.