‘Tana U Va Mulandzeri Wa Mina’
1. Eka tin’hweti leti landzelaka, hi rihi lunghelo leri hi nga ta va na rona eka Dyondzo ya Bibele ya Vandlha?
1 Tievhangeli ta mune leti vulavulaka hi vutomi bya Yesu loko a ha ri laha misaveni, ti hi nyika rungula leri engetelekeke malunghana ni N’wana wa Xikwembu. Tanihi leswi Vakreste va faneleke va “landzelerisisa mikondzo yakwe,” hi ta lava ku yi lunghiselela kahle buku leyi nge ‘Tana U Va Mulandzeri Wa Mina,’ hi tlhela hi rhiya ndleve loko hi ri karhi hi dyondza eka Dyondzo ya Bibele ya Vandlha ku sukela hi vhiki ra March 1. (1 Pet. 2:21; Mar. 10:21) Xa nkoka swinene hi ta va ni lunghelo ro kambisisa vutomi bya Yesu lebyi nga ta hi pfuna loko hi ri ensin’wini.
2. Xana xikombiso xa Yesu xo tiyisela xi hi pfuna njhani?
2 Xikombiso Xa Yesu: Xana u tshame u hlamuriwa hi ndlela yo biha loko u ri eku chumayeleni hi yindlu ni yindlu? Loko hi langutana ni nkaneto wo tano, hi fanele hi tsundzuka marito ya Yesu lama nge: “Loko va ndzi xanisile, na n’wina va ta mi xanisa.” (Yoh. 15:20) I ntiyiso leswaku a hi tinhlamulo hinkwato to biha leti taka hi xikongomelo xo hi xanisa. Nilokoswiritano, ntsako lowu Yesu a a ri na wona hi wona wu endleke leswaku a kota ku tiyisela miringo hinkwayo. Na hina hi nga langutela ku tsakeriwa hi Yehovha ni ku kuma hakelo loko hi tshama hi tshembekile. Leswi swi ta hi pfuna leswaku hi nga ‘karhali hi wa mapa eka mimoya-xiviri ya hina.’ (Hev. 12:2, 3; Swiv. 27:11) Loko hi tiyisela ensin’wini, hi nga tlhela hi tiyiseka leswaku Kreste Yesu wa hi seketela.—Mat. 28:20.
3. Xana hi nga yi tekelela njhani ndlela leyi Yesu a a wu teka ha yona ntirho wo chumayela?
3 “Hi Swona Leswi Ndzi Rhumeriweke Swona”: Yesu a a rhangisa ntirho wo chumayela hi Mfumo evuton’wini byakwe. (Luka 4:43) A a tinyiketele hi ku helela entirhweni wo chumayela. A a teka ntirho wo chumayela wu ri wa nkoka naswona minkarhi hinkwayo a a lava tindlela to vulavula hi Mfumo. Tanihi leswi hi nga valandzeri va Yesu, xana ku landzela mikondzo yakwe swi hi susumetela ku endla yini? Loko hi tiendlela mintirho ya hina ya siku ni siku, xana va kona vanhu lava hi nga bulaka na vona hi mahungu lamanene? Onge rirhandzu ra Kreste ri nga hi susumetela ku chumayela mahungu lamanene etindhawini hinkwato hilaha hi nga kotaka hakona!—2 Kor. 5:14.
4. Hi tihi tindlela leti hi nga ti tirhisaka leswaku hi antswisa vutirheli bya hina bya nsimu?
4 “Ku Hava Munhu Un’wana La Tshameke A Vulavula Hi Ndlela Leyi”: Ndlela leyi Yesu a a dyondzisa ha yona a yi hlamarisa vayingiseri vakwe. (Yoh. 7:46; Mat. 7:28, 29) I yini lexi a xi endla leswaku a nga fani ni vadyondzisi lavan’wana? A a rhandza ntiyiso lowu a wu dyondzisa, a a rhandza vanhu lava a va dyondzisa naswona a a tirhisa tindlela to hambana-hambana to dyondzisa. Hi ku tekelela Mudyondzisi Lonkulu, hi nga swi kota ku antswisa ndlela leyi hi dyondzisaka ha yona ensin’wini.—Luka 6:40.
5. Hi yihi pakani leyi hi faneleke hi tivekela yona loko hi dyondza buku leyi nge ‘Tana U Va Mulandzeri Wa Mina’?
5 Leti ko va tin’wana ta tidyondzo ta nkoka leti vulavulaka hi vutomi bya Yesu. Hi tihi tin’wana leti u nga ti dyondzaka? Loko u ri karhi u dyondza hi vutomi bya Yesu eka Dyondzo ya Bibele ya Vandlha, tiyimisele ku “tiva rirhandzu ra Kreste” hi ku tekelela marito ni swiendlo swakwe.—Efe. 3:19.