Tsima Ro Rhambela Vanhu eXitsundzuxweni Ri Ta Sungula Hi March 17
1. Hi rihi tsima leri nga ta sungula hi March 17?
1 Nkhuvo wa Xitsundzuxo lembe ni lembe wu pfuna ku huwelela rifu ra Yesu. (1 Kor. 11:26) Hikokwalaho, hi lava leswaku van’wana va ta hlanganyela na hina ni ku twa hi ta nyiko ya Yehovha ya rirhandzu ya nkutsulo. (Yoh. 3:16) Nan’waka tsima ro rhambela vanhu eXitsundzuxweni ri ta sungula hi Mugqivela wa March 17. Xana u swi langutele hi mahlo-ngati ku hlanganyela hi xitalo ensin’wini?
2. I yini leswi hi nga swi vulaka loko hi fambisa xirhambo?
2 Leswi Hi Nga Swi Vulaka: I swinene ku endla xingheniso xo koma. “Hi nga ha ku: Xewani. Hi tele ku rhamba ndyangu wa wena eka xiendlakalo xo hlawuleka swinene elembeni lexi nga ta khomiwa emisaveni hinkwayo hi April 5. Ku ta nyikeriwa nkulumo ya mahala leyi sekeriweke eBibeleni leyi nga ta hlamusela leswi rifu ra Yesu ri swi hetisiseke ni leswi a swi endlaka sweswi. Xirhambo lexi xi kombisa ndhawu ni nkarhi lowu nhlangano lowu wu nga ta khomiwa ha wona.” Loko hi hlanganyela eka tsima leri hi mahelo-vhiki, hi fanele hi fambisa ni timagazini loko swi koteka.
3. Hi nga va rhamba njhani vanhu vo tala hi laha hi nga kotaka ha kona?
3 Rhamba Hilaha U Nga Kotaka Ha Kona: Pakani ya hina i ku rhamba vanhu vo tala hi laha hi nga kotaka ha kona. Hikwalaho tiyiseka leswaku u rhamba swichudeni swa wena swa Bibele, vanhu lava u endleka maendzo yo vuyela eka vona, maxaka, vatirhi-kulorhi, vadyondzi-kulorhi, vaakelani, ni vanhu va n’wana lava u va toloveleke. Vakulu va le vandlheni ra ka n’wina va ta nyikela nkongomiso malunghana ni ndlela leyi nsimu ya n’wina yi nga ta hlanganisiwa ha yona. Tsima ra lembe ni lembe ro rhambela vanhu eXitsundzuxweni ra vuyerisa. Loko wansati un’wana a nghena eholweni n’wexemu, murindzi u n’wi pfunile leswaku a kuma muhuweleri loyi a n’wi rhambeke. Hambiswiritano, wansati yoloye u vule leswaku a nga tivi munhu kwalaho naswona u kume xirhambo xakwe eka munhu un’wana loyi a famba hi yindlu na yindlu hi mixo wa siku rero.
4. Hi xihi xivangelo lexi nga kona xo hiseka eka tsima leri?
4 Kumbexana munhu un’wana u ta va kona eXitsundzuxweni hikwalaho ka leswi u n’wi siyeleke xirhambo. Ku nga khathariseki leswaku munhu loyi n’wi rhambeke u kona kumbe a nga kona, matshalatshala ya wena ma ta kombisa vumbhoni. Swirhambo leswi u nga ta swi fambisa swi ta nyikela vumbhoni bya leswaku sweswi Yesu i Hosi leyi nga ni matimba. Ku hisekaka wena ku ta vonaka emahlweni ka vanhu hinkwavo—lava nga ensin’wini, vahuweleri-kulobye ngopfu-ngopfu ni le ka Yehovha— leswaku u amukela nyiko ya nkutsulo.—Kol. 3:15.