Sungula Bulo Hi Ndlela Leyi Vuyerisaka
1. Hi nga dyondza yini eka ndlela leyi Vakreste vo sungula a va dyondzisa ha yona?
1 Vakreste vo sungula a va chumayela mahungu lamanene eka vanhu va mindhavuko ni vukhongeri byo hambana-hambana. (Kol. 1:23) Hambileswi rungula leri a va ri chumayela a ri vulavula hi Mfumo wa Xikwembu, ndlela leyi a va chumayela ha yona a yi hambana hi ku ya hi vanhu lava a va va yingisela. Hi xikombiso, loko Petro a vulavule ni Vayuda lava a va ma xixima swinene Matsalwa, u sungule hi ku tshaha marito ya muprofeta Yuwele. (Mint. 2:14-17) Hi hala tlhelo, xiya ndlela leyi Pawulo a burisanake ni Magriki ha yona eka Mintirho 17:22-31. Namuntlha etindhawini tin’wana vanhu va ma xixima Matsalwa naswona handle ko kanakana hi nga va komba leswi Bibele yi swi vulaka loko hi famba hi yindlu ni yindlu. Hambiswiritano, swi nga ha lava hi va ni vuxiya-xiya ngopfu-ngopfu loko hi vulavula ni lava va nga yi tsakeriki Bibele kumbe va vukhongeri byin’wana kumbe lava nga ngheniki Kereke.
2. Hi nga yi tirhisa njhani minkandziyiso ku pfuna lava tsakelaka Bibele ni lava nga yi tsakeriki?
2 Tirhisa Minkandziyiso Hi Ndlela Leyi Vuyerisa: Minkandziyiso leyi fambisiwaka yi ta cinca eka lembe leri ra ntirho endzhaku ka tin’hweti tin’wana ni tin’wana timbirhi naswona yi katsa timagazini, swiphephana ni tibroxara. Hambiloko vanhu va le nsin’wini ya ka hina va nga yi tsakeli Bibele, hi nga ha va komba xihloko xo tsakisa eka minkandziyiso ya hina lexi nga ta va koka rinoko. Swi nga endleka hi nga va hlayeli Bibele kumbe ku va komba leswi yi swi vulaka hi ku kongoma eka riendzo ri sungula kambe loko n’wini wa muti a tsakela hi nga ha tlhelela eka yena hi xikongomelo xo n’wi pfuna leswaku a va ni ripfumelo eka Muvumbi ni le ka Rito rakwe leri huhuteriweke. Tlhandlakambirhi, loko hi chumayela endhawini leyi vanhu va yi tsakelaka Bibele, hi nga ha tirhisa minkandziyiso ni ku sungula bulo hi ndlela leyi vuyerisaka. Kahle-kahle nkarhi wun’wana ni wun’wana hi nga ha fambisa buku leyi nge Leswi Bibele Yi Swi Dyondzisaka kumbe broxara leyi nge Yingisa Xikwembu kumbe leyi nge Yingisa Xikwembu Kutani U Hanya Hilaha Ku Nga Heriki, ku nga khathariseki leswaku i yini leswi fambisiwaka n’hweti yoleyo. Nchumu wa nkoka i ku sungula bulo hi ndlela leyi vuyerisaka.
3. Xana timbilu ta vanhu va le nsin’wini ya ka n’wina ti fana ni misava hi ndlela yihi?
3 Lunghiselela Misava: Mbilu ya munhu yi fana ni misava. (Luka 8:15) Misava yin’wana yi lava ku rimiwa u nga si sungula ku byala mbewu ya ntiyiso wa Bibele leyi nga ta mila timitsu. Vakreste va lembe-xidzana ro sungula a va byala mbewu eka tinxaka hinkwato ta misava naswona leswi swi va tisele ntsako ni ku eneriseka. (Mint. 13:48, 52) Na hina hi nga kuma ntsako lowu fanaka loko hi lwela ku sungula bulo hi ndlela leyi vuyerisaka.