Ku Fambisa Tidyondzo Ta Bibele Leti Endlaka Nhluvuko
1. Hi byihi vutihlamuleri lebyi vahuweleri lava fambisaka tidyondzo ta Bibele va nga na byona?
1 A nga kona munhu loyi a nga tirhelaka Yehovha loko a nga ‘n’wi kokelanga’ eka Yena. (Yoh. 6:44) Hambiswiritano, vahuweleri lava fambisaka tidyondzo ta Bibele va fanele va pfuna vanhu leswaku va tshinela eka Tata wa vona wa le tilweni. (Yak. 4:8) Leswi swi lava leswaku va lunghiselela. Leswaku hi pfuna swichudeni swa hina swi twisisa rungula ra hina swi tlhela swi endla nhluvuko, a hi fanelanga hi hlaya tindzimana ni ku vutisa swivutiso ntsena.
2. I yini leswi xichudeni xa Bibele lexi endlaka nhluvuko xi faneleke xi swi endla?
2 Leswaku vahuweleri va fambisa tidyondzo leti endlaka nhluvuko, va fanele va pfuna swichudeni swa vona (1) ku twisisa leswi Bibele yi swi dyondzisaka, (2) ku amukela leswi Bibele yi swi dyondzisaka ni (3) ku hanya hi leswi Bibele yi swi dyondzisaka. (Yoh. 3:16; 17:3; Yak. 2:26) Swi nga ha teka tin’hweti ku pfuna xichudeni leswaku xi teka magoza lawa. Kambe goza ha rin’we leri xi ri tekaka ri kombisa leswaku vuxaka bya xona na Yehovha bya kula naswona magoza wolawo ma ta endla leswaku xi tinyiketela eka yena.
3. Ha yini vadyondzisi lava nga ni vuswikoti va vutisa swivutiso leswi endlaka leswaku xichudeni xi vula vonelo ra xona?
3 I Yini Leswi Xichudeni Xa Bibele Xi Swi Anakanyaka?: Leswaku hi tiva loko swichudeni swa hina swa Bibele swi twisisa ni loko swi amukela leswi swi swi dyondzaka, hi fanele hi papalata ku vulavula ngopfu kutani hi swi khutaza leswaku swi tiphofula. (Yak. 1:19) Xana xichudeni xa swi twisisa leswi Bibele yi swi vulaka emhakeni leyi mi yi tlhuvutsaka? Xana xi nga yi hlamusela hi marito ya xona? Xi titwa njhani hi leswi xi swi dyondzeke? Xana xa pfumela leswaku leswi Bibele yi swi dyondzisaka swa twisiseka? (1 Tes. 2:13) Xana xa swi twisisa leswaku leswi xi swi dyondzaka swi fanele swi xi pfuna leswaku xi cinca ndlela leyi xi hanyaka ha yona? (Kol. 3:10) Leswaku hi kuma tinhlamulo ta swivutiso sweswo, hi fanele hi xi vutisa hi vutlhari swivutiso leswi nga ta endla leswaku xi vula vonelo ra xona, kutani hi xi yingisela.—Mat. 16:13-16.
4. I yini leswi faneleke swi endliwa loko xichudeni swi xi tikela ku twisisa kumbe ku tirhisa leswi xi dyondzisiwaka swona eBibeleni?
4 Hakanyingi swi teka nkarhi ku tshika mikhuva ni ndlela yo anakanya leyi dzimeke timitsu. (2 Kor. 10:5) Ku vuriwa yini hiloko xichudeni xa hina xi nga swi amukeli kumbe xi nga swi tirhisi leswi xi dyondzisiwaka swona? Hi fanele hi lehisa mbilu leswaku hi xi nyika nkarhi lowu ringaneke wa leswaku Rito ra Xikwembu ni moya lowo kwetsima swi tirha embilwini ya xona. (1 Kor. 3:6, 7; Hev. 4:12) Swa antswa ku hundzela eka dyondzo yin’wana loko xichudeni swi xi tikela ku twisisa kumbe ku tirhisa leswi Bibele yi swi dyondzisaka, ematshan’weni yo xi sindzisa ku pfumela leswi xi swi dyondzaka. Loko hi ya emahlweni hi dyondza na xona Bibele hi nga xi heleli mbilu naswona hi xi kombisa rirhandzu, hi ku famba ka nkarhi xi nga ha susumeteleka ku hundzuka.