Papila Leri Humaka Eka Huvo Leyi Fumaka

“XIKWEMBU i rirhandzu.” (1 Yoh. 4:16) Ina, Yehovha i munhu wa rirhandzu. Swi tsakisa swonghasi ku hanya enkarhini lowu hi vonaka tindlela to tala leti rirhandzu ra Xikwembu ri kombisiwaka ha tona ni vumbhoni bya leswaku xikongomelo xa rirhandzu ra Yehovha xi ya eku hetisekeni ka xona, ku ri hava lexi xi sivelaka!

Tanihi vanhu va Xikwembu, hi ni lunghelo ra ku va timbhoni ta La nge Henhla-henhla. (Esa. 43:10-12) Malunghana ni vanhu vakwe va khale lava a va vitaniwa hi vito rakwe, Yehovha u te: “Hi mhaka ya leswi u nga wa risima ematihlweni ya mina, u tekiwa u ri la xiximekaka, mina ndzi ku rhandzile.” (Esa. 43:4) Marito lawa ma ha tirha ninamuntlha eka Israyele wa moya. Tlhandlakambirhi, Yehovha u rhandza swirho hinkwaswo swa ntshungu lowukulu, leswi nga ni ntshembo wa ku hanya hilaha ku nga heriki emisaveni leyi nga paradeyisi. Anakanya ha swona! Yehovha u ri: “Mina ndzi ku rhandzile.” Loko u te ntsee, xana wa n’wi twa Yehovha a vula tano etindleveni ta wena?

Hambileswi emisaveni leyi hi hanyaka ni vanhu vo tala lava ‘rirhandzu ra vona ri holeke,’ kutani sweswo swi endla leswaku hi titwa hi helanyana matimba, mawaku xikhutazo lexikulu swonghasi lexi humaka eku tiveni ka leswaku nkarhi hinkwawo Yehovha wa hi rhandza! (Mat. 24:12) Tanihi Timbhoni ta Yehovha hi tlhela hi va timbhoni ta rirhandzu rakwe lerikulu, hikuva u hi kombisa rona siku ni siku evuton’wini bya hina. Hikwalaho ka leswi Yehovha a hi rhandzaka, u katekisa ntirho wa ku chumayela mahungu lamanene wa munhu ha un’we ni wa vanhu hinkwavo. Sweswinyana Huvo leyi Fumaka ya ha ku hunguta xilaveko xa tiawara ta maphayona ya nkarhi hinkwawo ti va 70 ni ta maphayona ya nkarhinyana ti va 50. Leswi swi endle leswaku nhlayo ya maphayona yi engeteleka swinene. Eka lembe ra ntirho leri hundzeke, hi xiringaniso, Timbhoni ta 738 343 a ti ri maphayona yo hlawuleka, ya nkarhi hinkwawo kumbe ya nkarhinyana. Loko nhlayo leyi yi hlanganisiwile yi endle leswaku ku va ni ku andza ka tiphesente ta 5,7, ku tlula xiringaniso xa n’wexemu. Hikwalaho ka ku hisekela ku phayona ni hikwalaho ka mikateko ya Yehovha, hi xiringaniso, vhiki na vhiki a ku simekiwa mavandlha lamantshwa ya 45. Mahelo-vhiki man’wana ni man’wana vanhu va khuvuriwa emisaveni hinkwayo. N’wexemu, hi xiringaniso a ku khuvuriwa vanhu va 6 220 vhiki rin’wana ni rin’wana, ku ri xikombiso xa ku tinyiketela ka vona ni ndlela leyi va rhandzaka Yehovha ha yona. Sweswi nhlayo ya lava va chumayelaka mahungu lamanene emisaveni hinkwayo yi fike eka 5 912 492.—Mat. 24:14.

Ku anakanyisisa hi rirhandzu ra Xikwembu swi endla leswaku rirhandzu ra hina eka Yehovha ri kula. Hi nga kombisa leswaku ha n’wi rhandza hi ku hlaya Bibele kumbe hi ku yingisela tikhasete ta Bibele siku rin’wana ni rin’wana. Hi ntolovelo nchumu lowu hi wu rhandzaka hi tinyika nkarhi wa wona. Loko ku ri leswaku ha n’wi rhandza Yehovha, hi ta endla hinkwaswo leswi hi nga swi kotaka leswaku eka xiyimiso xa hina xa siku ni siku, hi kuma nkarhi wa ku hlaya xiphemu xo karhi eBibeleni. Hi nkarhi lowu fanaka, ku anakanyisisa hi leswi hi swi hlayaka swi ta kurisa rirhandzu ra hina eka Yehovha. Rirhandzu ni vutivi lebyi kongomeke swi fanele swi fambisana. I swinene ku va na swona haswimbirhi hi xitalo, hi nga honisi xin’wana xa swona. Vafilipiya 1:9 yi ri: “Leswi ndzi hambetaka ndzi swi khongelela hi leswi, leswaku rirhandzu ra n’wina ri ya ri andza ngopfu hi vutivi lebyi kongomeke ni ku twisisa loku heleleke.”—Vona Pisalema 119:97.

Rirhandzu ra hina a hi ri kombisi Yehovha ntsena, kambe hi ri kombisa ni vamakwerhu hinkwavo emisaveni. Hi ‘rhandza nhlengeletano ya vamakwerhu hinkwayo.’ (1 Pet. 2:17) Vunyingi bya n’wina mi tsakele xinakulobye xa rirhandzu ni vapfhumba lava veke kona emintsombanweni ya misava hinkwayo eku sunguleni ka lembe leri ra ntirho. Van’wana va n’wina mi akiwile hi xinakulobye emintsombanweni ya muganga.

Eka lembe ra ntirho hinkwaro leri hundzeke, makume ya magidi ya vamakwerhu va xanisekile hikwalaho ka tinyimpi ta xin’wana-manana ni timhangu. Ku simekiwe matsima ya ku phalala leswaku ku ta pfuniwa lava pfumalaka. Hakanyingi mpfuno wo tano wu nyikiwe ni vaakelani lava nga riki Timbhoni. Leyi i yin’wana ya tindlela ta ku kombisa rirhandzu eka vanhu va misava. Tanihi Vakreste ‘ha va rhandza varikwerhu.’ (Mat. 22:39) Kambe, hi fanele ku tshama hi ri karhi hi tsundzuka leswaku vutihlamuleri bya hina lebyikulu i ku hlanganyela hi ku hiseka entirhweni wa ku chumayela ni ku dyondzisa, lowu ponisaka—ku nga ntirho lowu nga wa nkoka swinene ku tlula ku nyika swilo leswi vonakaka.—Mat. 28:19, 20.

Leswi hi hanyaka emisaveni leyi madzolonga ni vuhungasi byo biha swi yaka swi andza ni laha ku khutaziwaka ku tikumela rifuwo, hi fanele hi kurisa rirhandzu ra hina eka Yehovha leswaku hi kota ku lwisana ni ku hambukisiwa hi misava leyi. (1 Yoh. 2:15) Lexi nga ta hi pfuna ku endla tano i ku va kona eminhlanganweni nkarhi ni nkarhi. Mupisalema Davhida ‘a a rhandza ku tshama endlwini ya Xikwembu’ naswona a a navela ku dzunisa Yehovha “emintshungwini leyi hlengeletaneke.”—Ps. 26:8, 12.

Ku kurisa rirhandzu ra hina eka Yehovha ku ta hi tiyisa leswaku hi kota ku yima hi tiyile loko hi xanisiwa. Nakambe, ha tiyisiwa hi xitiyisekiso xa leswaku a ku na xivumbiwa ni xin’we lexi nga swi kotaka “ku hi hambanisa ni rirhandzu ra Xikwembu leri nga eka Kreste Yesu Hosi ya hina.”—Rhom. 8:39.

Hi tsakela ku mi tivisa leswaku ku sukela hi October 1999, ku hlawuriwe vamakwerhu va mune lava totiweke leswaku va va swirho swa Huvo leyi Fumaka swin’we na hina. Leswi swi tivisiwe eka nhlangano wa lembe ni lembe. Xiringaniso xa malembe ya vukhale bya vamakwerhu lava ha ku hlawuriwaka i 57, kasi xiringaniso xa malembe ya vona ya ku va entirhweni wa nkarhi hinkwawo i 31. Mavito ya vona i Samuel F. Herd, M. Stephen Lett, Guy H. Pierce na David H. Splane.

Ku nga khathariseki leswaku u dyuharile, wa ha tiyile, u muntshwa kumbe wa ha ri n’wana, tiyiseka leswaku Huvo leyi Fumaka yi ku rhandza swinene.—1 Yoh. 3:23; 2 Yoh 1.

“Onge mi nga engeteleriwa tintswalo ni ku rhula ni rirhandzu,” loko mi ri karhi mi “[tihlayisa] erirhandzwini ra Xikwembu.”—Yudha 2, 21.

Vamakwenu,

Huvo Leyi Fumaka Ya Timbhoni Ta Yehovha