Xiviko Xa Misava Hinkwayo
◼ OCEANIA
Nhlayo ya matiko: 30
Nhlayo ya vaaka-tiko: 33 773 304
Nhlayo ya vahuweleri: 92 691
Nhlayo ya tidyondzo ta Bibele: 44 999
Exitichini xin’wana lexi nga xoxe endhawini ya le makaya le New South Wales, eAustralia, vahuweleri vambirhi va veka tibuku etafuleni nkarhi wun’wana ni wun’wana loko switimela leswi humaka ekule swi ta. Hikwalaho ka leswi switimela leswi—lexi vuriwaka Indian Pacific ni lexi vuriwaka The Ghan—swi fikaka swi yima tiawara timbirhi exitichini lexi, vahuweleri va ve ni mabulo lama tsakisa ni vakhandziyi naswona va fambise tibuku to tala. Entiyisweni loko switimela leswi swi tlhelela lomu swi humaka kona, vahuweleri va kote ku endla “maendzo yo vuyela” eka vakhandziyi vo hlayanyana.
Hi ntolovelo muhlengeleti wa mathikithi exitimeleni lexi vuriwaka The Ghan u tivisa swilo leswi tsakisaka leswi vakhandziyi va nga tsakela ka ku swi vona loko xitimela xa ha yimile eswitichini swo hambana-hambana. Endzhaku ko kuma mpfumelelo eka vahuweleri va Mfumo, sweswi u katsa ni tibuku ta vona eka switiviso swa yena. Ina, hikwalaho ka ku tikarhata ka Timbhoni leti ti nga toxe, vaendzi lava humaka ematlhelweni hinkwawo ya Australia ni le ndzhandzheni wa malwandle va chumayeriwa mahungu lamanene.
Mpatswa lowu nga varhumiwa eKosrae le Micronesia, wu fambise buku leyi nge Vutivi eka mufundhisi wa kereke ya Baptist la nga emalembeni ya va-80 hi vukhale. Buku yoleyo a yi ri hi Xikosrae, ku nga ririmi leri vulavuriwaka hi vanhu lava nhlayo ya vona yi nga ehansi ka 10 000. Mufundhisi u yi tlangerile buku leyi. Loko mpatswa lowu wu tlhelela eka yena, u wu byele leswaku u khutaze swirho swa kereke ya yena leswaku swi amukela minkandziyiso ya hina. Varhumiwa va lave ku tiva leswaku ha yini. U hlamule a ku: “Hikuva kereke ya ka hina a yi na tona tibuku hi ririmi ra ka hina.” Sweswi varhumiwa lava va hambeta va bula ni mufundhisi loyi la dyuhaleke.
Le Marshall Islands, makwerhu wa xisati la nga murhumiwa u komberiwe ku dyondza Rito ra Xikwembu ni makwerhu wa xisati la holeke. Loko a xiya leswaku a nga yi tsakeli dyondzo yoleyo, murhumiwa loyi u vutise makwerhu loyi, a ku: “U titwa njhani loko vanhu va ku byela leswaku va ku rhandza?” U hlamule hi ku hlamala a ku: “A ku na munhu la nga tshama a ndzi byela leswaku wa ndzi rhandza.” Hiloko murhumiwa a tshinela eka yena a n’wi vukarha kutani a ku: “Ndza ku rhandza. Naswona Yehovha wa ku rhandza swinene.” Makwerhu la holeke u sungule ku rila naswona ku sukela hi nkarhi wolowo u ve ni langutelo lerinene ha Yehovha. U sungule ku endla nhluvuko wa moya hi ku tiendlela xiyimiso xo hlaya Bibele siku ni siku, hi ku va kona eminhlanganweni hinkwayo ni hi ku va phayona ra nkarhinyana. Kutani hi January 2002, u endle xikombelo xo va phayona ra nkarhi hinkwawo. Ku sukela hi nkarhi wolowo u ve ni tidyondzo to tala ta Bibele naswona u hete n’hweti a ri karhi a chumayela exihlaleni xin’wana laha ku nga ni xilaveko lexikulu.
Loko murhumiwa un’wana a ri karhi a beriwa hi moya ni vanghana va yena ehlalukweni ra le New Caledonia, u chumayele hi xitshuketa eka nhwanyana un’wana la humaka eFurwa, loyi a a endzele maxaka ya yena eswihlaleni leswi. Nhwanyana loyi a a ri socha naswona u lwile enyimpini ya le Sarajevo. Murhumiwa u vutise nhwanyana loyi loko a nga rhandza ku hanya ni vanhu lava rhandzanaka hakunene. U vule leswaku a nga swi rhandza, kambe u vona onge ku rhula ka xiviri ku nga tisiwa ntsena hi hulumendhe leyi nga ni matimba ni leyi nga ni vuthu leri nga ni vuswikoti.
Kutani murhumiwa u hlamusele leswaku hambileswi vanghana va yena lava nga Timbhoni va humaka eka tinxaka tin’wana, kambe va hlanganisiwa hileswi va nga ni ripfumelo eka Xikwembu ni leswi va xi rhandzaka. Endzhaku ka bulo lerinene, va twanane ku hlangana nakambe leswaku va ta yisa bulo ra vona emahlweni. Nhwanyana lowa socha u hetisise xitshembiso xa yena naswona hi siku rero u sungule ku dyondzeriwa Bibele. Endzhaku ka sweswo u sungule ku va kona eminhlanganweni hinkwayo. U lave ku tiva leswi engetelekeke kutani loko nkarhi wa yena wa ku wisa wu ya eku heleni, a a dyondzeriwa kambirhi hi siku. Kutani endzhaku ko va kona enhlengeletanweni ni ku valanga rhavi ra kwalaho, u tlhelele eFurwa, laha a nga fika a ya emahlweni a endla nhluvuko wa moya.
Jeannie i muhuweleri la ha riki muntshwa la tshamaka ePapua New Guinea. Hakanyingi u famba ni buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka loko a ya exikolweni. Siku rin’wana mudyondzisi wa vona wa Xinghezi u kombele n’wana un’wana ni un’wana etlilasini leswaku a lunghiselela rungula ro koma hi nhloko-mhaka leyi a yi rhandzaka. Jeannie u hlawule nhloko-mhaka ya swidzidzirisi ni byalwa naswona bulo ra yena a ri sekeriwe eka xiyenge 8, ebukwini leyi nge, Swivutiso Leswi Vantshwa Va Swi Vutisaka. Mudyondzisi wa yena u ri tsakele ngopfu rungula ra yena lerova u n’wi byele leswaku loko a swi rhandza, a nga ha “tirhisa nkarhi wa dyondzo ya yena hinkwawo.” Jeannie u endle tano. Mudyondzisi wa yena u n’wi vutisile loko a nga rhandza ku nyikela rungula ra yena etlilasini ya ntlawa wa vukhume hi siku leri tlhandlamaka. Jeannie u pfumerile. Endzhaku ko nyikela rungula rero, mudyondzisi wa yena wa Xinghezi u n’wi byele leswaku loko xikolo xo hlela leswaku madyambu man’wana swichudeni swi ta nyikela marungula, u ta ringeta leswaku na yena va n’wi katsa enongonokweni wolowo. Hikwalaho ko nyikela ka yena marungula kambirhi, Jeannie u kume tioda ta 64 ta buku leyi nge Swivutiso Leswi Vantshwa Va Swi Vutisaka. Ku engetela kwalaho, vanhwanyana vambirhi va kombele tikopi ta broxara leyi nge Leswi Xi Swi Languteleke, naswona Jeannie u kote ku sungula dyondzo ya Bibele na vona.
Hikwalaho ka nyimpi ya rixaka le Solomon Islands, vamakwerhu vo tala va lahlekeriwe hi nhundzu ya vona naswona va le vuswetini lebyikulu. Mpatswa wun’wana lowu yindlu ya wona yi onhiweke wu endle xiboho xo ya chumayela ensin’wini leyi nga aviwangiki hambileswi a wu fanele wu tirhisa swimalana leswi wu nga na swona. Wu pfumele leswaku ku fambiwa hi byatso bya wona kutani wu tiphinile lerova endzhaku wu hlamusele leswaku ntirho wolowo wo chumayela a wu si tshama wu tsakisa ku fana ni hi nkarhi wolowo. Ana se wu hlela ku tlhelela eka lava va kombiseke ku tsakela. Kambe wu ta yi kuma kwihi mali yo tlhelela? Kwalomu ka vhiki endzhaku ka loko wu vuye ensin’wini leyi nga aviwangiki, wanuna un’wana u tile a fika a xava xitandi xa mpatswa lowu lexi wu balekeke wu xi siya hi nkarhi wa nyimpi.
Le xihlaleni xa Santo eVanuatu, hi ntolovelo mintsombano ya muganga yi khomeriwa eHolweni ya Mfumo. Hambiswiritano, hi 2001, holo a yi nga ha swi koti ku rhurhela vahuweleri hinkwavo. Hiloko vamakwerhu va hirha xitediyamu lexitsongo, lexi ku sukela hi nkarhi wolowo a xi tirhiseriwa mintlango ntsena. Hi ku chava leswaku lava teke entsombanweni va nga onha xitediyamu, mufambisi wa xona u xi hirhise hi mali ya le henhla swinene, hambileswi vamakwerhu va n’wi tiyisekiseke leswaku va ta xi basisa va nga si xi tirhisa va tlhela va xi basisa loko va hetile ku xi tirhisa, naswona va ta lunghisa leswi lavaka ku lunghisiwa.
Leswi mufambisi wa xitediyamu a nga ni vhengele endhawini yoleyo, u vone Timbhoni loko ti ri karhi ti xava swilo swo basisa ni ku lunghisa xitediyamu. Sweswo swi endle leswaku a lava ku vona leswi ti nga ta swi endla. Loko a fika exitediyamu, u vone vatirhi va ku tirhandzela lava tlulaka 100, va ri karhi va koropa, va kukula, va penda ni ku lunghisa swihambukelo. U sale a khome wa le hansi. Ku nga ri khale, kun’wana ni kun’wana edorobeni a ku vulavuriwa hi ku basa ka xitediyamu ni ku lunghisiwa ka xona. Loko vamakwerhu va ya hakela mali leyi va xi hirheke ha yona endzhaku ka ntsombano, mufambisi a nga va hakerisanga yona mali leyi a va byeleke yona. U va hungutele yona hi 80 wa tiphesente kutani a va byela leswaku enkarhini lowu taka, Timbhoni ta Yehovha ti nga xi tirhisa mahala xitediyamu lexi! Vahuweleri va 300 va tsakile loko ku ve ni vanhu va 832 entsombanweni ni ku vona vanhu va 13 va khuvuriwa.
◼ ASIYA NI LE MIDDLE EAST
Nhlayo ya matiko: 47
Nhlayo ya vaaki: 3 869 881 970
Nhlayo ya vahuweleri: 561 276
Nhlayo ya tidyondzo ta Bibele: 390 151
Rhavi ra le Indiya ra tsaka ku vika leswaku ku haxiwa ka vhidiyo eka thelevhixini ku endle leswaku ku nyikeriwa vumbhoni lebyinene exiphen’wini lexikulu xa tiko. Xitichi xa Thelevhixini xi twe hi ta vhidiyo leyi nge The Bible—Its Power in Your Life, leyi humesiweke hi Timbhoni ta Yehovha. Hiloko xi tsalela eyindlu-nkulu le New York leswaku xi kuma mpfumelelo wo haxa vhidiyo leyi eka nongonoko lowu nge, Home Shanti (Ku Rhula eKaya). Xi nyikiwe mpfumelelo wolowo naswona rhavi ra le Indiya ri vula leswaku eku sunguleni ka lembe ra 2002, vhidiyo leyi yi “haxiwe eka mindyangu hinkwayo etikweni.”
Le Israel makwerhu wa xisati la tivaka ririmi ra mavoko u hundze Benny na Sharon, endleleni, mpatswa lowu nga twiki etindleveni. Ematshan’weni yo khandziya bazi a muka, u yimile leswaku a ta chumayela mpatswa lowu naswona wu n’wi rhambele ekaya ra wona. Leswi eku sunguleni Benny a a lava ku tiva leswi engetelekeke, u hetelele a tsakele rungula ra Mfumo kutani ku nga ri khale u sungule ku va kona eminhlanganweni ya vandlha. Hambiswiritano, a a nga twi nchumu etindleveni naswona a a nga voni kahle. Hikwalaho a swi tika ku va a ya eminhlanganweni ni ku twisisa loyi a tolokaka hi mavoko. Kambe u endle matshalatshala yo karhi naswona hi nkarhi lowu fanaka u ye emahlweni a pfumelelanisa vutomi ni vumunhu bya yena ni misinya ya milawu ya Bibele.
Hambileswi Benny a a lamarile kambe u endle nhluvuko lowu hlamarisaka. U nyikela tinhlamuselo eminhlanganweni, u nyikela tinkulumo leti hanyaka eXikolweni xa Vutirheli bya le Tilweni—hambileswi a ti nyikelaka hi ririmi ra mavoko ivi un’wana a ti toloka—naswona wa ha ku va muhuweleri la nga khuvuriwangiki. Nsati wa yena Sharon, loyi na yena a nga twiki kahle naswona a nga voniki kahle, u sungule ku dyondza endzhakunyana ka nkarhi naswona u endla nhluvuko lowunene. Swi le rivaleni leswaku Benny na Sharon va byele vo tala lava na vona va nga twiki etindleveni, hi ta ripfumelo ra vona lerintshwa.
Makwerhu wa xisati la vuriwaka Fukue le Japani, u teka vanhu lava a va tivaka hikwalaho ka vana va yena vanharhu, va ri nsimu ya yena yo hlawuleka. Vanhu lava va katsa vaakelani va le kusuhi ni vatswari lava a hlanganaka na vona ekhirexe, exikolweni ni le ka minhlangano ya vatswari va vana va xikolo. Rini na rini loko a ti tivisa, u vula marito yo olova kambe ma huma embilwini, ya leswaku Bibele i mpfuno wa risima eku kuriseni ka vana va yena. Kutani hi vutlhari a bula hi timhaka tin’wana. Kambe hi ku rhanga a kombisa ku va ni xinghana, u kuma swi n’wi olovela ku pfa a nghenisa Bibele loko a ri karhi a bula ni vanhu. Xana vutlhari bya Fukue bya tirha? Ina, phela se u pfune vanhu va 12 leswaku va khuvuriwa naswona va ntlhanu eka vona i maphayona. Fukue u hisekela ku chumayela hi xitshuketa hikuva na yena u kume ntiyiso hi ndlela yoleyo.
Exidorobanini xa le Kazakhstan, ku ni wansati un’wana loyi a a ri ni n’wana lontsongo la vabyeke kutani endzhaku ka nkarhi a fa. N’wana wa yena wa vumbirhi u file na yena loko a ha ku n’wi bebula. Wansati loyi u hetelele a ri exibedlhele hikwalaho ko vabya ni ku tshikileriwa emintlhavekweni. Siku rin’wana nivusiku loko a etlele exibedlhele, u twe muongori a ri karhi a hlevetela. Loko a yingisela kahle, u kume leswaku kahle-kahle muongori loyi, la nga Mbhoni ya Yehovha, u le ku n’wi khongeleleni naswona u boxa vito ra yena exikhongelweni. Hi xa mundzuku wa kona, muongori loyi u chavelele wansati loyi hi ntshembo wa ku pfuka ka vafi. Hi ku hatlisa endzhakunyana ka sweswo, wansati loyi u ntshunxiwile exibedlhele.
Siku rin’wana endzhaku ka malembe ya ntlhanu, wansati loyi u twe maxaka ya yena ma ri karhi ma vulavula ni un’wana, a ma byela marito lama fanaka ni lawa a ma tweke eka muongori luya exibedlhele. Leswi a a khorwisekile leswaku munhu yoloye u fanele a ri Mbhoni ya Yehovha, u titivisile eka yena kutani a kombela ku dyondzeriwa Bibele. Leswi a a tiyimiserile leswaku a nga ha tlangi hi malembe man’wana ya ntlhanu, u dyondze hi ku tiyimisela naswona u endle nhluvuko lowunene wa moya. Ku nga ri khale, u tinyiketele eka Yehovha kutani a khuvuriwa. Anakanya ntsako lowu a veke na wona loko a fika enhlengeletanweni ro sungula kutani a hlangana ni muongori loyi a n’wi chaveleleke emalembeni ya ntlhanu lama hundzeke! U vule a ri karhi a huma mihloti a ku: “A ndzi tshembi leswaku a ndzi ta va ndzi amukele ntiyiso loko a ku nga ri xikhongelo xa wena lexi u xi endleke u ri karhi u hlevetela le xibedlhele. Xi ndzi khumbile swinene.”
Makwerhu wa xisati la tirhaka ni vavasati van’wana va 20 ebanki le Taiwan, u tirhise ndlela leyintshwa leswaku a ringeta ku endla vatirhi-kulobye va tsakela Rito ra Xikwembu. Siku rin’wana hi nkarhi wa ku wisa ninhlikanhi, u va tsalele xirhambo xa leswaku va “hlanganyela ebulweni ra Bibele ra mahala leri nga ta teka timinete ta 30 ku ya eka 45 hi vhiki, hi nkarhi wa ku wisa ka ninhlikanhi.” U vule leswaku bulo ra kona “ri ta pfuna munhu leswaku a kuma vutivi bya xisekelo bya Bibele.” U sayine xirhambo xexo kutani a xi vekela un’wana ni un’wana etafuleni ra yena ehofisini. Hi wona ndzhenga wolowo, vanhu va mune va amukele xirhambo xexo.
Le Thailand wanuna un’wana la vuriwaka Arun u sungule ku tsakela Timbhoni ta Yehovha hikwalaho ka munghana loyi a tirhaka na yena. Arun u te: “Ndzi xiye leswaku ku sukela loko munghana wa mina a sungule ku hlangana ni Timbhoni, u cince mahanyelo ya yena ma va lamanene kutani na mina a ndzi lava ku fana na yena.” Arun a a gembula ni ku tirhisa swidzidzirisi. Hambileswi a ringeteke ku tshika mikhuva leyi yo biha, u tsandzekile. A a tekile naswona nkarhi wun’wana u anakanye leswaku loko o va ni n’wana u ta cinca mahanyelo ya yena. Kambe endzhaku ko kuma n’wana wa nhwanyana, a ku cincanga nchumu. Arun u te: “Nsati wa mina u hetelele a nga ha swi koti ku tiyiselela mahanyelo ya mina kutani u fambile a ndzi siya, n’wana wa hina a a hlayisiwa hi hahani wa yena.”
Hi nkarhi lowu Arun a a ri ni gome, mutirhi-kulobye u n’wi rhambele eHolweni ya Mfumo. Arun u yile hambileswi swo tala leswi a swi vuriwa hi swivulavuri a swi nghena hi ndleve leyi swi huma hi leyin’wana, kambe u tsakele moya lowunene wa xinghana. Endzhaku ka sweswo u sungule ku va kona eminhlanganweni minkarhi hinkwayo naswona u pfumele ku dyondzeriwa Bibele kutani a sungula ku tirhisa leswi a a swi dyondza. Leswi a a tiyimisele ku tlhela a tshama ni nsati wa yena, u yile a ya vulavula na yena hi mhaka leyi kambe a nga swi tshembanga leswaku u cincile hakunene. Arun u te: “Ndzi n’wi chumayerile ndzi tlhela ndzi n’wi rhamba leswaku a ta tiva vanghana va mina lavantshwa, kambe u arile a vula leswaku ndzi le ku xisiweni. Hambiswiritano, ndzi hambete ndzi n’wi endzela ni ku n’wi khutaza. Endzhaku ka kwalomu ka tin’hweti ta ntlhanu, u sungule ku ndzi kholwa naswona u fambe na mina loko ndzi ya eminhlanganweni. Hi ku hatlisa endzhaku ka sweswo, na yena u pfumele ku dyondzeriwa Bibele.”
Sweswi Arun, nsati wakwe ni xinhwanyetana xa vona va tshama swin’we nakambe naswona i ndyangu wun’we lowu tsakeke. Vatswari havumbirhi bya vona va khuvuriwe hi 2001 eka ntsombano wa muganga eBangkok. Ku engetela kwalaho, makwavo wa Arun lontsongo, loyi na yena a a tikhome hi ndlela yo biha, u amukele mahungu lamanene naswona i muhuweleri la nga khuvuriwangiki.
◼ YUROPA
Nhlayo ya matiko: 45
Nhlayo ya vaaka-tiko: 727 550 200
Nhlayo ya vahuweleri: 1 456 309
Nhlayo ya tidyondzo ta Bibele: 647 279
Eva wa le Tiranë, eAlbania, la nga ni malembe ya 25 hi vukhale u lehe tisentimitara ta 113 hikwalaho ka vuvabyi lebyi a velekiweke a ri na byona. Kambe, u tsakela vuphayona bya nkarhinyana hambileswi a langutanaka ni swiphiqo swo fana ni ku hlekiwa hi vanhu hileswi a nga manghimani. Ematshan’weni yo kariha, Eva u kombisa vanhu hinkwavo xichavo naswona wa va xixima kutani minkarhi hinkwayo u tshama a tsakile, ku nga nchumu lowu vanhu lava wupfeke emianakanyweni va wu xiyaka. Un’wana wa vanhu vo tano lava wupfeke emianakanyweni i wansati loyi n’wana wa yena wa nhwanyana, la nga ni malembe ya 26 hi vukhale, a a ri ni ntshikilelo. Wansati loyi u yise n’wana wa yena exibedlhele ni le tikerekeni to hambana-hambana, a ri ni ntshembo wa leswaku u ta tshunguriwa. Hiloko siku rin’wana a vona ndlela leyi Eva a tshamaka a tsakile ha yona kutani a n’wi endzela. Loko Eva a pfula nyangwa wa yindlu ya yena, wansati loyi u n’wi vutisile loko a nga swi kota ku dyondzela n’wana wa yena Bibele. Eva u pfumerile handle ko tipfinyinga. Ku nga ri khale, n’wana yoloye u sungule ku hlakarhela kutani mana wa yena u kombele ku hlanganyela edyondzweni yoleyo. Sweswi loko Eva a ya eminhlanganweni, u va a rhangisane ni manana ni n’wana wa yena naswona havumbirhi bya vona va endla nhluvuko lowunene wa moya.
Muntshwa la vuriwaka Benjamin u kulele endyangwini wa Vakreste eBelgium. Hambiswiritano, loko Benjamin a nghena emalembeni ya yena ya kondlo-a-ndzi-dyi, u sungule ku hanya vutomi bya vukanganyisi. Loko a ri karhi a endla onge u hanya hi misinya ya milawu ya Bibele, u joyine ntlawa wa vantshwa lava nga swindzendzele, lava tirhisaka swidzidzirisi ni ku dzaha fole. Nakambe Benjamin a a yingisela vuyimbeleri lebyi thyakeke. Ku nga ri khale, u sungule ku karhatiwa hi madimona naswona a a titivala hikwalaho ko nwa ku tlula mpimo—nilokoswiritano a nga tshikanga ku tirhisa swidzidzirisi. Ku fike laha a a tshama a thyakile kutani a vabya swinene. Loko se a swi vona leswaku u vabyela ku fa, u swi xiyile leswaku lava a va tivula vanghana va yena a va nga ri na mhaka na yena nikatsongo! Hi kona Benjamin a tshameke ehansi a anakanyisisa hi vutomi bya yena ni laha a nga ta helela kona. Hi vutlhari u endle xiboho xa ku tlhelela eka lava va nga ta n’wi kombisa rirhandzu ra xiviri, ku nga ndyangu wa ka vona na Yehovha.
Hambiswiritano, ku tiyimisela ka Benjamin ku ringiwile ta ha suka. U hlaseriwe ngopfu hi madimona naswona xigangu xa yena xi n’wi kombele leswaku a fularhela Timbhoni. Xi kale xi kombela ni vafundhisi va Khatoliki ni vagwinehi leswaku va ringeta ku n’wi hambukisa. Kambe hi mpfuno wa rirhandzu wa vatswari va yena ni vakulu va vandlha, Benjamin u sungule ku va ni ripfumelo leri tiyeke eka Yehovha, a swi vona leswaku hakunene nawu wa Xikwembu “wu hetisekile, wu vuyisa moya-xiviri.” (Ps. 19:7) Hikwalaho ka sweswo u hetelele a fularhele vutomi lebyi a a byi hanya. Rihanyo ra Benjamin ri ve leri antswaka naswona u kume ntsako wa xiviri.
Loko mpatswa wun’wana lowu hlanganyelaka evandlheni ra Xifurwa le Britain wu ri karhi wu fambisa timagazini exitarateni, wu hlangane ni vavasati vambirhi va le Zimbabwe. Timbhoni leti ti hlamuserile leswaku ti dyondzela vanhu Bibele mahala kutani ti vutisa vavasati lava loko va tiva Xifurwa. Va vule leswaku a va xi tivi kambe va rhandza ku dyondza Rito ra Xikwembu. Havumbirhi bya vona va sungule ku va kona eDyondzweni ya Buku ya Vandlha. Loko dyondzo ya buku yi hela hi siku ro sungula, makwerhu un’wana u va kombe ntokoto wa Nathan Muchinguri wa le Zimbabwe, lowu runguriweke eka tluka 20 ra Buku Ya Lembe Ya 2002. Loko va vona xifaniso xa Makwerhu Muchinguri wa Xinuna ni wa Xisati, eka tluka 21, va huwelerile va hlamarile. A ku ri xifaniso xa vakokwa wa vona! Vavasati lava va hlamusele leswaku le Zimbabwe, a va tshama ekule ni maxaka kutani va hetelele va nga ha ma tivi lomu ma nga kona. A swi kali swi lava ku vuriwa leswaku va kombele ku famba ni Buku Ya Lembe yoleyo. Sweswi vavasati lavambirhi va dyondzeriwa nkarhi hinkwawo, va tiyisiwe hi xikombiso xa vutshembeki xa vakokwa wa vona.
Loko vamakwerhu vambirhi va xisati va ri ensin’wini leyi nga aviwangiki le Riphabliki Ra Czech, va hlangane ni wansati wa malwandla loyi a va amukeleke. Hambiswiritano, ku ni timhaka tin’wana ta Bibele leti a a ri ni mavonelo lawa a ku nga na ri na munhu la nga ta n’wi hundzula eka wona, to kota leswi vuriwaka hi ku va ni “tinyiko ta moya.” (1 Kor. 14:12) Ku tlula kwalaho, a a nga swi lavi ku hlaya Vuhundzuluxeri Bya Misava Leyintshwa Bya Matsalwa Yo Kwetsima, a a rhandza vuhundzuluxeri bya yena lebyi vuriwaka Ecumenical. Endzhaku ko heta awara va nga pfumelelani ha nchumu, vamakwerhu va n’wi lerile kutani va hatlisela ku ya khandziya xitimela lexi mukaka. A va tsake ngopfu leswi bulo ra vona ni wansati yoloye la phikizaka swonghasi ri heleke. Hambiswiritano, un’wana wa vamakwerhu lava u kume leswaku u siye Bibele ni tinotsi ta yena endlwini ya wansati luya kutani sweswo a swi vula leswaku u fanele a tlhelela. Leswi va swi kumeke loko va fika swi va hlamarisile! Wansati loyi u vule leswaku u titwe a lava ku tiva leswi tameriweke hi Bibele ya makwerhu loyi wa xisati kutani u tsakisiwe hi ndlela leyi yi hundzuluxeriweke kahle ha yona, swikombo swa yona ni nxaxamelo wa matsalwa. Hiloko a vutisa loko swi nga koteka leswaku a kuma Vuhundzuluxeri Bya Misava Leyintshwa. Ku tlula kwalaho, u pfumele ku dyondzeriwa Bibele. Ku sukela hi nkarhi wolowo mana wa yena wa hlanganyela edyondzweni yoleyo.
Makwerhu wa xisati wa le Reykjavík, eIceland, u tirha eka Nhlangano wo Endla Ndzavisiso hi Vutomi bya le Lwandle, lowu letelaka vaphasi va tihlampfi. Ku nga ri khale, vanhu va 14 lava humaka ematikweni yo hambana-hambana lama ha hluvukaka va ve kona eka khoso leyi tekaka tin’hweti ta tsevu. Makwerhu loyi u nyike un’wana ni u’wana wa swichudeni leswi kopi ya buku leyi nge, Is There a Creator Who Cares About You? A a ri ni tikopi ta Xichayina, Xinghezi, Xipaniya, Xiputukezi ni Xivietnam. Vanhu lava va 14 va yi amukerile buku leyi. Wanuna ni wansati va le Vietnam va sale va khome wa le hansi loko va vona buku hi ririmi ra rikwavo. Nuna wa kona u te: “A ndzi kholwi! Ndzi hlamarile hakunene. Xana u yi kume njhani?” Un’wana wa le Uganda ana se a a yi toloverile buku leyi kutani u yi bumabumerile eka lavan’wana. Wansati wa le Cuba u lave kopi hikuva n’wana wa yena wa nhwanyana wa malembe ya 13 hi vukhale se a a sungule ku n’wi vutisa swivutiso swo tika malunghana ni vutomi.
Loko vanhu lava teke eku leteriweni va nga si tlhelela ematikweni ya rikwavo, makwerhu loyi wa xisati u va byele leswaku u va vekele minkandziyiso yo karhi (tibuku ta 10 ta Vutivi, timagazini ta 30 ni tibroxara ta 10) ehenhla ka tafula etlilasini, leswaku va ta hlaya loko va ri eka xihaha-mpfhuka, va muka. Hi Musumbhunuku nimixo endzhaku ka loko va fambile u rhange hi ku ya hundza le tafuleni. U te: “A ndzi langutele ku kuma va siye tibuku ta Vutivi ni timagazini, kambe a ku nga salanga nchumu etafuleni!”
Jaha rin’wana leri vuriwaka Arthur le Latvia, a ri nga lavi ku twa nchumu hi Xikwembu. Kambe a swi ri tikela ku pfumela leswaku vanhu va huma eka timfenhe. Hi 1996, Arthur u tlule nawu kutani a pfaleriwa. Loko a ri ekhotsweni u sungule ku anakanyisisa hi vutomi. Loko vatswari va yena va n’wi endzerile va n’wi khutaze ku hlaya Bibele, va ri ni ntshembo wa leswaku yi ta n’wi pfuna. Kutani siku rin’wana hi 1998, loko Arthur a ri karhi a tsala papila, mubohiwa-kulobye u n’wi nyike buku leswaku a tsalela ehenhla ka yona. Buku yoleyo hi leyi nge, U Nga Hanya Hi Masiku aParadeyisini eMisaveni. Hi ku lava ku tiva leswi yi swi tameleke, Arthur u yi pfurile kutani a sungula ku yi hlaya hinkwayo a yi heta hi masiku manharhu. Mubohiwa un’wana a a ri ni buku leyi nge, Vutivi exitokisini xa yena. Loko a vona leswaku Arthur u rhandza Bibele, u n’wi nyike yona. U tlhele a n’wi nyika ni adirese ya Mbhoni yin’wana leyi a yi tivaka.
Arthur u tsalele Mbhoni yoleyo papila kutani endzhaku yi sungule ku n’wi dyondzisa Bibele hi ku tsalelana na yena. Loko a ntshunxiwa ekhotsweni hi April 2000, u hatle a sungula ku ya eminhlanganweni ya vandlha. Kambe ku vuriwa yini hi vatswari va yena, lava n’wi khutazeke ku hlaya Bibele? Swi le rivaleni leswaku Arthur u va byerile hi ta ripfumelo ra yena lerintshwa leri a ri kumeke. Vuyelo byi ve byihi? Na vona va ye emahlweni va dyondza Rito ra Xikwembu. Anakanya ntsako lowu va veke na wona loko hi vunharhu bya vona va khuvuriwa swin’we eka siku ra nhlengeletano yo hlawuleka hi March 2002!
Loko a ha ri jaha, dokodela wa marhambu le Spaniya u dyondzele vufundhisi. Leswi se a a pfilunganyekile, u tshikile endzhaku ka malembe manharhu naswona se a nga ha pfumeli leswaku Xikwembu xi kona. Hambileswi a a nga ti rhandzi Timbhoni ta Yehovha, a a lava ku tiva leswaku swi tisa ku yini leswaku vanhu lava nga “dyondzekangiki” va tiva Matsalwa, kasi yena u hete malembe a dyondzela vufundhisi kambe a nga tivi nchumu. Siku rin’wana vatirhi va le xibedlhele va n’wi khome hi ndlela yo biha kutani sweswo swi endle leswaku a sungula ku lava ku tiva leswi engetelekeke hi Timbhoni. Sweswo swi n’wi tsundzuxe ndlela leyi minkarhi yin’wana Timbhoni ti khomiwaka ha yona. Endzhaku ka xiendlakalo xexo dokodela loyi u amukele dyondzo ya mahala ya Bibele. Ku nga ri khale, u swi tsakerile leswi a a swi dyondza lerova a a dyondzeriwa kanharhu hi vhiki! U sungule ni ku va kona eminhlanganweni hinkwayo naswona u tsarise eXikolweni xa Vutirheli bya le Tilweni. Wa ha ku khuvuriwa ku nga ri khale.
◼ AFRIKA
Nhlayo ya matiko: 56
Nhlayo ya vaaki: 739 543 571
Nhlayo ya vahuweleri: 915 262
Nhlayo ya tidyondzo ta Bibele: 1 550 572
Ku akiwa ka Tiholo ta Mfumo le Benin ku endla leswaku vamakwerhu va va ni moya wa ku hiseka naswona swi nyikela vumbhoni lebyinene. Loko ku nyiketeriwa Holo yin’wana ya Mfumo, xirho xin’wana lexi dumeke xa kereke ya kwalaho xi byele Mbhoni yin’wana ya Yehovha xi ku: “Kereke ya n’wina yi saseke ku tlula tindhawu hinkwato ta vugandzeri endhawini leyi naswona yi ta tshama yi ri tano. Ha yini mina Mukhatoliki la hisekaka ndzi vula tano? Phela, ku nga ri khale, Makhatoliki ya ndhawu ya ka hina ma nyikiwe mali yo ringana 17 000 000 CFA [$23 000 U.S.] leswaku ma hetisa ku aka kereke ya hina, leyi sunguleke ku akiwa hi va-1950. Kambe mufundhisi u teke mali yoleyo a yi tirhisela swin’wana. Makhatoliki man’wana ya le ndhawini yin’wana ya doroba ma hlengelete mali yo ringana 3 000 000 CFA [$4 000 U.S.] leswaku ma ta aka kereke ha yona endhawini yoleyo, kambe na yona yi ‘mile milenge.’ Hi yona mhaka leyi ndzi vulaka leswaku muako lowu wu saseke ku yi tlula hinkwayo edorobeni leri naswona wu ta tshama wu ri tano.”
Ematikweni man’wana, ku rhandza swifaniso swa hava ku endla leswaku vanhu lava ha tsakelaka swi va nonon’hwela ku amukela ntiyiso wa Bibele. Anakanya hi xikombiso xa ndyangu wun’wana wa le Côte d’Ivoire, lowu gandzelaka swifaniso swa wona swa hava siku ni siku. Loko n’wana un’wana wa nhwanyana endyangwini wolowo a amukela ntiyiso wa Bibele kutani a ala ku hlanganyela evugandzerini bya mavunwa, ndyangu wu chavile naswona wu anakanya leswaku u ta weriwa hi khombo. Nilokoswiritano, nhwanyana loyi u yime a tiyile kutani a sungula ku vengiwa lerova a hetelela a fambile ekaya. Hambiswiritano, a nga wu venganga ndyangu wa ka vona kambe u hambete a wu endzela.
Vuyelo bya kona byi ve leswaku kokwa wa yena a sungula ku tsakela Bibele naswona a kombela ntukulu loyi wa yena leswaku a vuya ekaya kutani u vuyile. Kokwana loyi u hambete a endla nhluvuko wa moya naswona u khuvuriwe a ri ni malembe ya 62 hi vukhale. Hi ku tsakisiwa hi leswi kokwana loyi a swi endleke, mana wa nhwanyana loyi u sungule ku dyondzeriwa Rito ra Xikwembu naswona sweswi na yena u chumayela van’wana. Ina, switukulwana swinharhu swi ntshunxiwile evugandzerini bya mavunwa naswona sweswo swi vangiwe hileswi nhwanyana yoloye a tshameke a tshembekile eka Yehovha nileswi a nga tshikangiki ku rhandza vandyangu wa yena.
Le Mozambhiki, vamakwerhu va hambeta va endzela makhotso leswaku va ya fambisa tidyondzo ta Bibele eka vabohiwa. Hi lembe ra 2001, vabohiwa va balekile eka rin’wana ra makhotso lawa. Hambiswiritano, vabohiwa lava a va dyondzeriwa va arile ku baleka. Valawuri lava xiyeke leswi, va bumabumele ntirho lowu Timbhoni ta Yehovha ti wu endlaka. Sweswi valawuri va khutaza vabohiwa hinkwavo leswaku va dyondzeriwa hi vamakwerhu. Vabohiwa vambirhi ana se va hunguteriwe swigwevo swa vona hikwalaho ka leswi va sunguleke ku tikhoma vumunhu. Un’wana wa vona u langutele ku ya eku khuvuriweni eka ntsombano wa muganga lowu landzelaka.
Judith, wa le Namibia, la nga ni 27 wa malembe hi vukhale, u vavisekile eka mhangu ya movha kutani a oma swirho ku suka enhan’wini ku ya emilengeni. U sungule ku teriwa hi mianakanyo ya ku tidlaya, u tivutisile: ‘Ha yini ndzi humeleriwe hi khombo leri?’ Vanhu va tikereke to hambana-hambana va tile va ta n’wi endzela naswona va n’wi khongelela leswaku a kota ku famba nakambe. Loko swikhongelo swa vona swi nga hlamuriwi, va byele Judith leswaku swi nga ha endleka Xikwembu xi n’wi xupula hikwalaho ka swivangelo swo karhi. Sweswo swi endle leswaku Judith a ya a anakanya ngopfu hi ku tidlaya. Kambe u rhange hi ku lava ku tiva leswaku ha yini Xikwembu xi n’wi xupula. Hiloko siku rin’wana a kombela mana wa yena leswaku a rhamba mufundhisi wa kereke ya kwalaho leswaku a va endzela ekaya ka vona. Loko Judith a ha rindze mufundhisi, ku fike Timbhoni ta Yehovha. Judith u pfumerile loko ti kombela ku n’wi fambisela dyondzo ya le kaya ya Bibele, hi buku leyi nge Vutivi, a ri ni ntshembo wa leswaku Bibele yi nga hlamula swivutiso leswi nga n’wi dyisiki byi rhelela. Loko a ri karhi a dyondza ndzima 8, leyi nge “Ha Yini Xikwembu Xi Pfumelela Ku Xaniseka?,” u xiye leswaku khombo leri n’wi weleke a ri vangiwanga hi Xikwembu. U ri: “Anakanya ntshunxeko ni ntsako leswi ndzi veke na swona loko ndzi tiva leswaku swilo swo biha a swi vangiwi hi Yehovha!” Judith u hambete a dyondza kutani a tinyiketela eka Yehovha naswona sweswi u ri langutele hi mahlo-ngati fambiselo lerintshwa laha a nga ta tlhela a hanya kahle emirini.
Hi nkarhi wa ku herisiwa ka rixaka le Rwanda, hi 1994, nhwanyana un’wana la vuriwaka Chantal u balekele etikweni ra le kusuhi ra Burundi. Kwalaho, u kume kopi ya buku leyi nge, U Nga Hanya Hi Masiku aParadeyisini eMisaveni kutani a yi hlaya a yi heta. Loko a tlhelele eRwanda, a nga swi kotanga ku kuma laha Timbhoni ti nga kona hikuva ndyangu wa ka vona a wu tshama endhawini leyi nga ekule swinene. Hambiswiritano, mana wa yena u hlangane ni vahuweleri vambirhi va Mfumo lava a va ri karhi va chumayela emakete. Leswaku va kota ku hlangana na Chantal, va ma tsale ephepheni masiku lawa va hleleke ku ta ha wona emakete kutani va ri nyika mana wa Chantal. Hi siku leri va faneleke va hlangana ha rona, Chantal a a tshama evunghenweni bya makete, a khome phepha rero leswaku mani na mani la hundzaka a ri vona. U tsake ngopfu loko vamakwerhu va n’wi vona kutani va titivisa eka yena! Hi ku vona leswaku u tsakela hi mbilu hinkwayo, va n’wi rhambele eka Xitsundzuxo lexi landzelaka naswona Chantal u tile hambileswi a a fanele a famba masiku mambirhi ku ya fika laha a xi khomeriwe kona!
Ku sukela hi nkarhi wolowo, Chantal u ve kona eminhlanganweni minkarhi hinkwayo hambileswi a fambaka mpfhuka wo leha. Khombo ra kona, ndyangu wa ka vona wu sungule ku n’wi kaneta. Siku rin’wana, un’wana wa vamakwavo u kale a n’wi hlongola ekaya a khome banga! Kambe Chantal a nga helanga matimba. Endzhaku ka lembe, minhlangano yi sungule ku khomeriwa ekusuhi ni le kaya ka vona hambileswi a a ha fanele a famba mpfhuka wa tiawara ta nhungu. Hambiswiritano, enkarhini lowu, Chantal u kote ku fambiseriwa dyondzo ya Bibele ro sungula. Ku nga ri khale, u tinyiketele eka Yehovha naswona sweswi i phayona ra nkarhi hinkwawo. Kambe ku vuriwa yini hi ndyangu wa ka vona? Wu cince mavonelo ya wona hi ku helela. Sweswi makwavo la n’wi hlongoleke ekaya i phayona ra nkarhi hinkwawo, un’wana wa ha ku khuvuriwa naswona mana wa yena i muhuweleri la nga khuvuriwangiki. Ku engetela kwalaho, ku simekiwe ntlawa lowu nga woxe endhawini ya ka vona kutani ndyangu wa ka vona wu famba ntsena timinete ta ntlhanu ku ya eminhlanganweni.
Thembisile i makwerhu wa xisati la hisekaka la tshamaka ekusuhi ni tindlu ta le vuhosini le Swaziland. A a navela ku chumayela vanhu lava tshamaka etindlwini leti ta vuhosi, kambe a swi nga olovi hikwalaho ka ndlela leyi a ti sirheleriwe ha yona. Endzhaku ko khongela hi mhaka leyi, u ve ni xivindzi kutani a ya etindlwini leti ta vuhosi. U chumayele varindzi kutani un’wana wa vona a amukela broxara leyi nge, U Nga Va Munghana Wa Xikwembu! Endzhaku ko n’wi vutisa ni ku n’wi secha, va n’wi pfumelerile leswaku a nghena—sweswo swi n’wi tsakise ngopfu. Thembisile u hlamarisiwe ngopfu hi xinghana xa vanhu lava tshamaka kwalaho. Sweswi u tirha nsimu yoleyo nkarhi hinkwawo naswona u dyondza Bibele ni vanhu vanharhu. Tlhandlakambirhi, sweswi varindzi va n’wi amukela hi mandla mambirhi. Entiyisweni siku rin’wana murindzi u n’wi byerile a ku: “Manana, titwe u ntshunxekile; nghena. U endla ntirho lowunene.”
◼ MATIKO YA AMERIKA
Nhlayo ya matiko: 56
Nhlayo ya vaaki: 807 517 534
Nhlayo ya vahuweleri: 3 023 062
Nhlayo ya tidyondzo ta Bibele: 2 676 288
Edorobeni rin’wana leritsongo ra le Argentina, maphayona mambirhi yo hlawuleka ma vone mpatswa wun’wana wu ri karhi wu susumeta xigolonyana, wu rhwale mbyana leyi vavisekeke. Maphayona ma khandziyise mpatswa lowu ni mbyana ya wona, ma wu yisa exibedlhele xa swiharhi. Mpatswa lowu wu be mandla wu vuyelela, ngopfu-ngopfu hikwalaho ka leswi ku nga riki ni muakelani ni un’we wa wona, la nga tshama a wu pfuna. Maphayona ma xiye leswaku nuna wa kona a a ri muleteri wa dyondzo ya Khatoliki naswona yena ni nsati wa yena a va hlanganyela eka minkhuvo hinkwayo ya kwalaho yo xixima vakwetsimi. Hambileswi a va nghene hi nhloko eKerekeni ya Khatoliki, sweswo a swi va sivelanga ku amukela magazini wa Xihondzo xo Rindza ni wa Xalamuka! Endzhaku ko heta lembe maphayona lawa ma ri karhi ma endzela mpatswa lowu, ma wu rhambele ku ta eXitsundzuxweni. Mpfula yi ne ngopfu hi vusiku byebyo, kambe mpatswa wolowo wu tile naswona wu hlamarisiwe hi ndlela leyi wu amukeriweke hi mandla mambirhi ha yona. Tlhandlakambirhi, wu vule leswaku a ku ri ro sungula wu twisisa leswi Xilalelo xa Hosi xi vulaka swona. Sweswi wu dyondzeriwa Bibele nkarhi ni nkarhi naswona wu va kona eminhlanganweni hinkwayo, wu nga ri na mhaka ni leswaku vaakelani va wona lava nga Makhatoliki va ri yini.
Loko makwerhu wa xisati la nga phayona ni Mbhoni yin’wana va ri karhi va chumayela eBarbados, va fike va hundza kun’wana exitarateni laha wansati a a yime enyangweni wa yindlu ya yena. Va sungule ku n’wi chumayela kambe va hlamarile hikuva a a vonaka onge u rindze munhu un’wana, kutani u te: “Nghenani. Ndza ha landza Bibele ya mina.” Vamakwerhu va nghenile, va tshama na yena ehansi kutani va n’wi kombisa ndlela yo dyondza broxara leyi nge, Leswi Xi Swi Languteleke, va tirhisa dyondzo 1. Endzhaku ka sweswo, wansati yoloye u vutise makwerhu la nga phayona loko ku ri yena loyi a n’wi beleke riqingho mixo wolowo, a n’wi byela leswaku u ta n’wi fambisela dyondzo ya Bibele ya mahala. Makwerhu la nga phayona u te: “Ndzi te a hi mina. Swi le rivaleni leswaku loyi a beke riqingho a nga tanga. Kambe ha tsaka leswi hi fikeke hi 11:30 nimixo, ku nga nkarhi lowu dyondzo a yi ta fambisiwa ha wona.” Wansati loyi u endla nhluvuko lowunene naswona se u va kona eminhlanganweni.
Vanhu lava xavisaka laha ku hundzaka mani na mani va va ndhawu leyinene yo chumayela eka yona. Murhumiwa wa le Bolivia u ri: “Nuna wa mina u fambise xiphephana eka wansati la xaviselaka n’wamapurasi swilo swa yena, swi ri exigolonyanini. A a ri ni xinghana kutani ndzi tlhelerile ndzi ya kombela ku n’wi fambisela dyondzo ya Bibele, hi broxara leyi nge Leswi Xi Swi Languteleke. U vutise a ku: ‘Xana hi ta dyondzela kwala?’ Ndzi te: ‘Ina, hi nga dyondzela kwala. A ndzi na xiphiqo.’ Kutani loko ndzi fika, u ndzi nyika xibencana xa yena ivi hi dyondzela kona ekusuhi ni xigolonyana xa yena. Loko vanhu va ta eku xaveni, wa va xavisela kutani loko a hetile, hi ya emahlweni ni dyondzo.”
Wansati un’wana eCanada u kume kopi ya Vuhundzuluxeri Bya Misava Leyintshwa Bya Matsalwa Yo Kwetsima eka munghana wa yena. U swi tsakele ngopfu ku byi hlaya kutani a lava ku dyondza leswi engetelekeke. Hiloko a ya eka adirese ya Timbhoni ta Yehovha eka Internet (www.watchtower.org), kutani a tsala a kombela ku dyondzeriwa Bibele ni ku kuma kopi ya buku leyi nge Vutivi. Loko vamakwerhu vambirhi va xisati va n’wi endzela va fika va n’wi nyika buku leyi, u yi veke exifuveni kutani a vula leswaku u ta va a yi hlaye hinkwayo loko ri xa! Hi siku leri landzelaka nimadyambu u sungule ku ya eminhlanganweni kutani a swi tekanga nkarhi ku va a titwa a ntshunxekile exikarhi ka vamakwerhu. U hatle a endla nhluvuko wa moya kutani sweswi i muhuweleri la nga khuvuriwangiki naswona u tilunghiselela ku ya eku khuvuriweni ku nga ri khale.
Le Colombia wansati un’wana la vuriwaka Sol a a khomiwe hi vuvabyi lebyi a byi endla leswaku a tshama a etlele. A a nga pfumeli ku vona vanhu van’wana handle ka swirho swa ndyangu wa ka vona. Siku rin’wana, muakelani la nga Mbhoni ya Yehovha, u nyike mana wa Sol kopi ya Xihondzo xo Rindza ni ya Xalamuka! leswaku a ti nyika Sol. Sol u hetelele a pfumerile ku vona muakelani loyi, kutani yena u kombele ku n’wi dyondzela Bibele. Sol u pfumerile kutani endzhaku ka kwalomu ka lembe, u ve kona eXitsundzuxweni. A ku ri ro sungula a huma endlwini endzhaku ka malembe ya nkombo. Endzhaku ka masiku mambirhi, u ye ro sungula enhlengeletanweni. Hambileswi Sol a nga swi kotiki ku tshama, wa hlanganyela entirhweni wa nsimu. Njhani? Vamakwerhu va n’wi susumeta ku suka eka yindlu yin’wana ku ya eka yin’wana, hi mubedo wo hlawuleka lowu va n’wi endleleke wona. Hikwalaho ka xikombiso lexinene ni xikhutazo xa Sol, mana wa yena se u khuvuriwile naswona vamakwavo vambirhi i maphayona.
Mpatswa lowa ha ku hlawuriwaka ku va maphayona yo hlawuleka le Costa Rica wu endzele wansati un’wana ensin’wini leyi wu averiweke yona. Loko wu fika, wu n’wi byele leswaku n’wingi wa yena la nga Mbhoni le United States, u bele rhavi ra kwalaho ra Timbhoni ta Yehovha riqingho, a kombela leswaku ri rhumela munhu a n’wi endzela. Mpatswa lowu nga maphayona wu ri: “Hi hlamarile loko wansati loyi wa malembe ya 65 hi vukhale a sungula ku rila. U vule leswaku a nga kholwi leswaku se hi fikile kasi a hi khale a ha ku vulavula ni n’wingi wa yena kutani a n’wi khutaza leswaku a yingisa leswi Timbhoni ti swi vulaka. A a nga anakanyanga leswaku hi ta hatla hi fika.”
Hi ku ya hi maphayona lawa, a ku ri ro sungula wansati loyi a pfumela ku vulavula ni Timbhoni. A a ri Mukhatoliki la tinyiketeleke naswona emalembeni ya 12 lama hundzeke, u endle ndzavisiso lowu dzikeke hi tidyondzo ta Khatoliki leswaku a ta dyondzisa vanhu van’wana. Maphayona ma tsakele ku hlamula swivutiso swa yena hinkwaswo leswi khumbaka Bibele ni Timbhoni ta Yehovha kutani endzhaku ka sweswo u pfumele ku dyondzeriwa Bibele. Nuna wa yena ni n’wana wa yena wa nhwanyana va lava ku tiva leswi engetelekeke malunghana ni Rito ra Xikwembu.
Xirho xa ndyangu wa Bethele ya le Puerto Rico xi ri: “Ndzi endle malunghiselelo ya ku yisa kopi ya Xalamuka! ya July 8, 2002, eka murhangeri wa xitichi-nkulu xa maphorisa, leyi tlhuvutsaka nhloko-mhaka leyi nge, ‘Ha Yini Hi Lava Maphorisa?’ U swi tsakerile swinene swihloko leswi kutani a bumabumela leswaku ndzi yisa timagazini tin’wana eka meyara wa kwalaho ni le ka switichi swin’wana swa maphorisa endhawini yoleyo. Entiyisweni, phorisa rin’wana ri hlele ku ndzi yisa eswitichini leswin’wana swa maphorisa hi movha wa maphorisa. Ku tlula kwalaho, phorisa leri ri tlhele ri ndzi nyika mpfumelelo wa leswaku ndzi yisa timagazini tin’wana ta nkarhi lowu taka, eka lava va tirhaka ehansi ka nkongomiso wa rona. Ri te: ‘Leswi swi ta endla leswaku maphorisa ma kuma leswi ma faneleke—ku nga mpfuno emianakanyweni ni le moyeni.’” Hi n’hweti yin’we, xirho lexi xa Bethele xi endzele switichi swa nhungu swa maphorisa naswona maphorisa yo tala ma kombele tikopi leti engetelekeke. Eka switichi sweswo hinkwaswo, xi fambise timagazini ta 164 naswona xi engetele vanhu va ntlhanu eka lava xi va tiselaka timagazini nkarhi ni nkarhi.
Le xihlaleni xa Trinidad ni xa Tobago, wansati loyi a heteke malembe ya 25 a ri xirho lexi dumeke xa Kereke ya Nazarene u rhambiwe hi mutirhi-kulobye leswaku a ya yingisela nkulumo ya mulanguteri wa xifundzha kutani u tile. Loko nhlangano wu hela, mulanguteri wa xifundzha u tile eka yena kutani va bula hi leti ni letiya. Leswi swi n’wi hlamarisile hikuva ekerekeni ya ka vona, vanhu va burisana ni lava va nga va rixaka ra ka vona ni va swiyimo leswi fanaka ni swa vona. Entiyisweni, leswi a a tekiwe hi wanuna la nga riki wa rixaka ra ka vona, swirho swa kereke a swi nga n’wi rhandzi. Kutani ndlela leyi a khomiweke ha yona eHolweni ya Mfumo ni xikhutazo lexi a xi kumeke eka mulanguteri wa xifundzha, swi n’wi susumetele leswaku a pfumela ku dyondzeriwa Bibele. Ku nga si hela tin’hweti ta tsevu, u ve muhuweleri la nga khuvuriwangiki naswona a a vika tiawara ta 70 ku ya eka ta 100 ensin’wini, n’hweti yin’wana ni yin’wana. U khuvuriwe eka Ntsombano wa Muganga wa “Vachumayeri Va Mfumo Lava Hisekaka” wa 2002 naswona u langutele ku va phayona ra nkarhi hinkwawo. Nakambe u karhi u pfuna xinhwanyetana xa yena lexi nga ni malembe ya nkombo hi vukhale, lexi sweswi xi nyikelaka tinkulumo eXikolweni xa Vutirheli bya le Tilweni.
Le Uruguay ku te wanuna un’wana ekaya ra Mbhoni a ri karhi a famba hi yindlu ni yindlu, a xavisa masindza ya le nhan’wini, lama nga ni xihambano. Makwerhu loyi wa xisati u tirhise nkarhi lowu ku n’wi hlamusela hi Bibele leswaku ha yini a a nga ta ma xava masindza wolawo. Wanuna loyi a nga xiximanga leswi makwerhu loyi a swi vuleke ntsena kambe u kombise ku tsakela rungula rero ra moya. Entiyisweni u vule leswaku se u ye etikerekeni to hambana-hambana leswaku a ta kuma tinhlamulo ta swivutiso swa yena kambe a nga ti kumanga. U gimete hi ku vula leswaku tikereke ti tilavela mali, a ti na mhaka ni ku pfuna vanhu emoyeni. A nga si famba, makwerhu wa xisati u n’wi rhambele ku ta eHolweni ya Mfumo.
A nga ha tlhelanga a n’wi vona kukondza a n’wi vona endzhaku ka lembe loko a tlhela a ta endlwini ya yena. U hlamarile loko a n’wi byela a ku: “Sweswi a ndzi telanga ku ta ku xavisela nchumu kambe ndzi tele ku ta ku byela leswaku ndzi le ka ndzima 15 ya buku leyi nge Vutivi.” U vule leswaku ndyangu wa yena hinkwawo wa dyondzeriwa naswona wu va kona eminhlanganweni. Loko a lela u te: “Hi ta vonana enhlengeletanweni hi mahelo-vhiki lama taka.”
[Xifaniso lexi nga eka tluka 43]
New Zealand
[Xifaniso lexi nga eka tluka 43]
Tahiti
[Xifaniso lexi nga eka tluka 43]
Papua New Guinea
[Xifaniso lexi nga eka tluka 47]
Thailand
[Xifaniso lexi nga eka tluka 47]
India
[Xifaniso lexi nga eka tluka 47]
Japan
[Xifaniso lexi nga eka tluka 51]
Britain
[Xifaniso lexi nga eka tluka 51]
Albania
[Xifaniso lexi nga eka tluka 51]
Spain
[Xifaniso lexi nga eka tluka 56]
Namibia
[Xifaniso lexi nga eka tluka 56]
Benin
[Xifaniso lexi nga eka tluka 56]
Congo (Kinshasa)
[Xifaniso lexi nga eka tluka 60]
Canada
[Xifaniso lexi nga eka tluka 60]
Tobago
[Xifaniso lexi nga eka tluka 60]
Bolivia