Xiviko Xa Misava Hinkwayo

◼ YUROPA

Nhlayo ya matiko: 46

Nhlayo ya vaaki: 728 162 887

Nhlayo ya vahuweleri: 1 476 554

Nhlayo ya tidyondzo ta Bibele: 697 044

Minkarhi yin’wana swi nga teka nkarhi wo leha leswaku vanhu van’wana va amukela ntiyiso. Hi 1951, Steponas u gweviwe ku tshama ekampeni ya le Kazakhstan hikuva a a khomeriwe tipolitiki. Kwalaho u tirhe na Edvardas, ku nga muntshwa la nga Mbhoni yo hiseka le Lithuania, loyi a a khomeriwe ku kandziyisa magazini wa Xihondzo xo Rindza. Edvardas u byele Steponas ntshembo lowu a nga na wona, lowu sekeriweke eBibeleni kutani a sungula ku khorwiseka leswaku u kume ntiyiso. Hiloko Steponas a ntshunxiwa hi 1955. Loko a lela Edvardas, u te: “Kumbexana hi ta tlhela hi hlangana siku rin’wana.” Hambileswi Steponas a a nga khuvuriwanga, Komiti ya Vuhlayiseki bya Mfumo wa Soviet a yi anakanya leswaku i Mbhoni ya Yehovha. Maphorisa ma seche muti wakwe kutani ma teka maphepha lama a ma ri ni nxaxamelo wa tiadirese ta vamakwerhu. Hikwalaho ka sweswo, a nga ha swi kotanga ku vulavurisana ni vanhu va Xikwembu.

Ku hundze malembe ya 47. Hi nkarhi wolowo, Steponas a a tshama eximutanini xa le n’walungwini wa Lithuania laha a ku nga ri na Timbhoni. Kutani hi ximun’wana xa 2002, u kote ku kuma tibuku tin’wana ivi a rhumela xithikithana erhavini ra Timbhoni ta Yehovha ra le Lithuania a kombela buku leyi nge, Xihundla Xa Ntsako eNdyangwini. Wa hlamusela: “Ndzi rhumele xithikithana, ndzi ri ni ntshembo wa leswaku ndzi ta tlhela ndzi kota ku vulavurisana ni vamakwerhu.” Kutani u endzeriwe hi mpatswa lowu nga maphayona yo hlawuleka ivi wu dyondza na yena Bibele. Ku nga si hela ni lembe, Steponas u khuvuriwile a ri ni malembe ya 80.

Xana u kale a hlangana na Edvardas, loyi kwalomu ka ntlhanu wa makume ya malembe a nga te: “Kumbexana, hi ta tlhela hi hlangana siku rin’wana”? Ina, va hlanganile! Hi siku leri tlhandlameke leri a khuvuriweke ha rona, vanhu lavambirhi, lava sweswi va nga vamakwerhu va moya, va vukarhane va tsakile.

EBritain, Tim na Sam, lava havambirhi va nga ni malembe ya 11 hi vukhale naswona va nga vahuweleri lava nga khuvuriwangiki, a va ri ensin’wini ni mana wa Tim. Swifanyetana leswi a swi lava tibege to hoxa Tibibele na tibuku eka tona, kambe a swi nga ri na mali. Siku rero vamana wa vahuweleri lavambirhi lavantshwa, va khongele hi mhaka leyi, va nga si ya ensin’wini. Endlwini yo hetelela leyi va ngheneke eka yona mixo wolowo, Tim u vulavule ni n’wini wa muti kutani a n’wi hlayela ndzimana ya Bibele. Wansati loyi u n’wi kavanyetile a n’wi vutisa leswaku hi byihi vukhongeri byakwe. Loko Tim a vule leswaku i Mbhoni ya Yehovha, wansati loyi u n’wi holovele a karihile kutani a byela mana wakwe leswaku a nga swi twisisi leswaku ha yini Timbhoni ti tshika vana va tona va fa ematshan’weni yo va pfumelela va pomperiwa ngati.

Hiloko mana wa Tim a byela wansati loyi leswaku a vutisa swifanyetana sweswo leswaku swi titwisa ku yini hi mhaka leyi, hiloko a swi vutisa. Tim u hlamusele leswaku minkarhi hinkwayo u ta hlawula matshungulelo man’wana ematshan’weni yo lwisana ni ripfalo ra yena leri leteriweke hi Bibele. Hiloko Sam a vula leswaku sesi wakwe u tshama a kombela leswaku va n’wi tshungula hi ndlela yin’wana ku ri ni ku n’wi pompela ngati, naswona u hatle a hola ku tlula lava va pomperiweke ngati.

N’wini wa muti u tlhele a vulavula ni mana wa Tim. Lexi a a xi sola sweswi a ku ri mhaka ya ku famba ni vana loko ku chumayeriwa hi yindlu ni yindlu. Swifanyetana leswi swi angule hi ku vula leswaku swa tiphina hi ku chumayela, swi tlhela swi engetela hi ku vula leswaku swi vona ntirho lowu wu antswa ku tlula ku yingayinga eswitarateni ku fana ni tintangha ta swona. Tinhlamulo ta swifanyetana leswi ti tsakise n’wini wa muti kutani a swi kombela leswaku swi yimanyana loko a ha nghena endlwini. Swi hlamarile loko a vuya a tamele tibege tintshwa to saseka leti endliweke hi dzovo, a fika a nyika un’wana ni un’wana bege, leswaku swi ta yi tirhisa ensin’wini! A a ri ni bindzu ro xavisa tibege. Leswi langutelo ra yena a ri cincile, swifanyetana swi hlele ku tlhela swi n’wi endzela. Loko va ri karhi va famba, mana wa n’wini wa muti la nga ni malembe ya 94 hi vukhale, loyi a a yingiserile, u te enyangweni kutani a kombela mana wa Tim leswaku a n’wi endzela laha a tshamaka kona.

Loko vamakwerhu vambirhi va xisati va ri ensin’wini, va vone rungula leri a ri namarhetiwe exitichini xa bazi le Portugal, leri nge: “Ndzi dyondzela ntivo-miehleketo naswona ndzi lunghiselela xitsalwana lexi nga ni nhloko-mhaka leyi vulavulaka hi swiyilayila. Loko u nga swi kota ku ndzi pfuna, ndzi kombela u ndzi hlamula hi E-mail eka adirese leyi landzelaka . . . ” Ndzhenga wolowo vamakwerhu volavo a va fambisa Xihondzo xo Rindza lexi nga ni nhloko-mhaka leyi nge, “Xana Swiyilayila Swi Lawula Vutomi Bya Wena?” Hiloko va kunguhata ku n’wi hlamula hi E-mail kutani va n’wi tivisa leswaku a nga wu kuma magazini lowu.

Endzhaku ka vhiki, wansati luya u va rhumele nhlamulo leyi landzelaka: “Ndzi nkhensa leswi mi ndzi hlamuleke. Ndzi kombela mi ndzi rivalela leswi ndzi hlweleke ku hlamula. Ndzi ta swi tsakela ku amukela magazini lowu mi nga wu vula. Masiku lawa, minkarhi hinkwayo loko Timbhoni ti ta eka mina, ndzi va ndzi tsutsumela entirhweni kumbe ebazini kutani a ndzi swi koti ku vulavurisana na tona. Ndza swi tiva leswaku mi dyondzisa vanhu Bibele naswona na mina ndza swi tsakela ku dyondza.”

Vamakwerhu va te: “Loko hi n’wi endzela ro sungula u hi vutise swivutiso swo tala. Hi n’wi nyike buku leyi nge Vutivi kutani hi hlela ku dyondza na yena Bibele. U tshama a lunghiselele dyondzo ya yena naswona sweswi u va kona eminhlanganweni hinkwayo ya vandlha.”

Loko Lina, la nga muhuweleri edorobeni ra le dzongeni wa Jarimani, a ri karhi a chumayela exitarateni, ku te wansati la vuriwaka Tatjana. Tatjana u n’wi vutise a ku: “Xana wa ha ndzi tsundzuka?” Lina u vule leswaku a nga ha n’wi tsundzuki. Tatjana u ye emahlweni a ku: “Sweswo a swi hlamarisi nikatsongo! Hi hlangane kan’we ntsena, naswona a ku ri emalembeni ya ntlhanu lama hundzeke.” U ye emahlweni a hlamusela: “Hi ximun’wana xa 1998, hi hlangane exitarateni kutani u ndzi nyika broxara leyi nge I Yini Leswi Xikwembu Xi Swi Languteleke Eka Hina? A ndzi ku hlamulanga kahle, kambe musa ni xinghana xa wena swi endle leswaku ndzi lava ku teka broxara ndzi muka na yona ndzi ya yi hlaya. Leswi nga endzeni ka yona swi ndzi khumbile swinene.” Endzhakunyana, Timbhoni timbirhi, leti a ti nga n’wi tivi Lina ti te ekaya ra Tatjana. Hikwalaho ka leswi Tatjana a swi hlayeke eka broxara, u amukele dyondzo ya Bibele. Loko a tlhela a hlangana na Lina hi 2003, se a a ri Mbhoni leyi khuvuriweke. Entiyisweni, yena na Lina a va ri maphayona ya nkarhinyana enh’wetini yoleyo!

Rhavi ra le Rhaxiya ri rhumele makwerhu wa xisati wa le Pskov adirese ya wanuna loyi a a tshama endhawini leyi nga yoxe. Swi teke nkarhi wo leha leswaku a fika endhawini leyi. Loko a hetelele a fikile, u kume leswaku wanuna loyi a a nga swi xiyanga leswaku u kombele ku dyondzeriwa Bibele. Entsongeni lowu a wiselaka eka wona, u te ni magazini lowu endzeni ka wona a a hoxe xithikithana lexi a xi tsemeke eka xin’wana xa swiphephana swa hina. Wanuna yoloye u vule leswaku a anakanya leswaku a ku ri mphikizano wo karhi, kutani u rhumele xithikithana xexo a ri ni ntshembo wo wina xo karhi. Makwerhu wa xisati u angurile: “U wine dyondzo ya mahala ya Bibele!” Wanuna loyi ni ndyangu wakwe va kombise ku tsakela kutani va sungula ku dyondzeriwa Bibele. Va dyondzeriwa kambirhi hi nh’weti, tanihi leswi ndyangu lowu wu tshamaka ekule ni kaya ra makwerhu loyi wa xisati.

◼ OCEANIA

Nhlayo ya matiko: 30

Nhlayo ya vaaki: 34 355 946

Nhlayo ya vahuweleri: 93 718

Nhlayo ya tidyondzo ta Bibele: 47 270

Alyce la nga ni malembe ya 14 hi vukhale, la tshamaka eAustralia, u tirhise tinhloko-mhaka leti nga le ka timagazini ta hina loko a lunghiselela ntirho wakwe wa xikolo. Vhiki rin’wana u tsale xitsalwana lexi nhloko-mhaka ya kona a yi vutisa xivutiso lexi nge, “Xana Hi Byihi Vumundzuku Bya Misava Leyi?” Xitsalwana xa yena a xi hlamusela leswi minkarhi leyi hi hanyaka eka yona yi vulaka swona hi ku ya hi vuprofeta bya Bibele. Mudyondzisi wakwe u n’wi vutise leswaku hi byihi vukhongeri lebyi a nga eka byona. Alyce u hlamusele leswaku a a dyondza Bibele ni Timbhoni ta Yehovha, naswona u nyike mudyondzisi wakwe timagazini tin’wana ta hina leswaku a ya ti hlaya.

Hambileswi mudyondzisi wakwe a tsakeleke swilo leswi hinkwaswo, mudyondzisi un’wana u kucetele mudyondzisi wa Alyce leswaku a tshika ku tihlanganisa ni Timbhoni ta Yehovha. Hambiswiritano, endzhaku ko va mudyondzisi wakwe a hete tin’weti to hlayanyana a ri karhi a xiya mahanyelo lamanene ya Alyce, u lave ku tiva leswi engetelekeke. Hikwalaho ko anakanya leswaku swi nga endleka Alyce a tihlanganise ni mpambukwa lowu nga ni khombo, mudyondzisi wa yena u ye elayiburari ya kwalaho kutani a lomba buku leyi nge, Timbhoni Ta Yehovha I Vahuweleri Va Mfumo Wa Xikwembu. U hlaye buku yoleyo hinkwayo hi vhiki rin’we! Leswi se a a tiyiseka leswaku u kume ntiyiso, u bele mana wa Alyce riqingho leswaku a kombela tibuku leti engetelekeke kutani a sungula ku dyondza Bibele na Timbhoni. Ku nga si hela ni n’hweti se a a va kona eminhlanganweni hinkwayo naswona u pfune nuna wakwe ni mana wakwe leswaku va va kona eminhlanganweni ya Sonto. Na vona va sungule ku dyondzeriwa Bibele naswona va endla nhluvuko lowunene. Ku nga si hela tin’hweti tinharhu, mudyondzisi loyi u ve muhuweleri la nga khuvuriwangiki a tlhela a nyikela nkulumo ro sungula eXikolweni xa Vutirheli Bya le Tilweni. Endzhakunyana ka tin’hweti ti nga ri tingani, Alyce ni mudyondzisi wakwe Linda va khuvuriwe siku rin’we.

Anakanya u tshama exihlaleni lexi ku nga wena ntsena mugandzeri wa Yehovha! Sweswo swi ve tano eka makwerhu wa xisati wa le Marshall Islands, loyi nuna wakwe a kumeke ntirho exihlaleni xa tinkatla xa Mejatto. Vaakelani va yena va n’wi rhambe leswaku a ya na vona ekerekeni ya Protestente, kambe u swi be hi makatla. Ematshan’weni ya sweswo, u tinyiketele ku dyondzisa vana vakwe hi buku leyi nge, Buku Yanga Ya Timhaka Ta Bibele. Naswona u fambe hi yindlu ni yindlu, a bebule n’wana wakwe wa rikotse. Eku heteleleni, van’wana va kombise ku tsakela, kutani sweswi makwerhu loyi a nga Mbhoni a ri swakwe laha a tshamaka kona, u fambisa tidyondzo to hlayanyana ta Bibele hi broxara leyi nge Leswi Xi Swi Languteleke. N’hweti yin’wana ni yin’wana u rhumela xiviko xa ntirho wa nsimu evandlheni leri a a hlanganyela eka rona khale. U teka riendzo ro leha hi xikepe ni vana vakwe leswaku va ya eXitsundzuxweni ni le tinhlengeletanweni leti khomeriwaka exihlaleni xa Ebeye. Swirho swa vandlha ra le Ebeye swi n’wi rhumela mapapila yo n’wi khutaza, swi n’wi rungulela mintokoto ya swona ya le nsin’wini ni swilo leswi swi swi dyondzeke eminhlanganweni ya vandlha. Kasi na swona swi khutaziwa hi xikombiso xa ku tshembeka xa makwerhu loyi wa xisati la nga Mbhoni a ri yexe laha a tshamaka kona.

Swimitana swo tala leswi nga ekule le Papua New Guinea a swi na gezi. Vanhu va kwalaho va tirhisa tijanareta kumbe tibetri loko va tirhisa swilo swa gezi. Leswaku makwerhu wa xisati loyi a ha ku khuvuriwaka a kota ku pfuna lava nga eximutanini xa ka vona leswaku va yi twisisa swinene Bibele, u lave ku va komba tivhidiyo tin’wana leti humesiweke hi Timbhoni ta Yehovha. Endzhaku ka loko a kume mali hi ku xavisa swakudya leswi a swi byaleke, u ye eka wansati la nga n’wa-mabindzu wa le ndhawini ya ka vona loyi a a ri ni thelevhixini, VCR na janareta leswaku a ya vutisa loko swi nga koteka leswaku a swi hirha hi vunharhu bya swona. Makwerhu u hlamusele leswaku u lava ku rhamba vanhu va ximutana hinkwaxo leswaku va ta hlalela tivhidiyo leti sekeriweke eBibeleni leti a nga ni ntshembo wa leswaku ti ta va pfuna hi tlhelo ra moya. Wansati lowa n’wa-mabindzu u hatle a hunguta ntsengo wa mali leyi lavekaka, a vula leswaku na yena u ta swi tsakela ku hlalela tivhidiyo teto. Vanhu vo tala va le ximutanini xexo va tile. Endzhaku ka sweswo, vo tala va vule leswaku a va nga swi tivi leswaku ntirho wa Timbhoni ta Yehovha wu endliwa ni le tindhawini to tala swonghasi. Va tlhele va tsakisiwa hi vamakwerhu va misava hinkwayo lava nga ni vun’we, ku nga nchumu lowu va nga si tshamaka va wu vona etikerekeni ta vona. Vanhu vo tala lava eku sunguleni a va nga swi lavi ku vulavula ni Timbhoni va rhambe makwerhu loyi wa xisati emakaya ya vona, hikuva sweswi va lava ku dyondza swo tala malunghana ni leswi hi swi dyondzisaka.

ESavaii, ku nga xihlala lexikulu xa le Samoa, varhangeri van’wana va tiko va yirise Timbhoni ta Yehovha leswaku ti nga ha chumayeli eswimitanini swa ka vona. Sweswo a swi n’wi chavisanga makwerhu un’wana wa xisati la tshamaka eximutanini xexo, loko a ri karhi a lunghiselela ku lahla n’wana wa yena, u namarhele ntiyiso. Leswi nkosi a wu ta khomeriwa ekaya rakwe, vamakwerhu vo huma eka mavandlha mambirhi ya le xihlaleni va n’wi pfune ku basisa yindlu ni jarata va tlhela va hlela leswaku ku va ni janareta. Vanhu va le ximutanini va wu xiyile mpfuno lowu wa rirhandzu. Ndlela leyi vamakwerhu va hleleke ni ku fambisa xilahlo ha yona a yi hambane hilaha ku heleleke ni ndhavuko wa vanhu va le Samoa.

Endzhaku ka masiku mambirhi ya nkosi, huvo ya ximutana yi hlanganise vanhu hinkwavo va ximutana xexo leswaku ku ta buriwa hi xiendlakalo lexi. Ximutana hinkwaxo xi tsakisiwe hi ndlela leyi Timbhoni ti pfuneke ndyangu lowu feriweke ha yona loko nkosi wu nga si sungula ni loko se wu herile. Tihosi ta ximutana ti khumbiwe hi ndlela leyi nkosi wu fambisiweke ha yona lerova ti twanana ku va ti cinca mukhuva wo fambisa nkosi wu fana ni Faa-Molimau a Ieova (Ndlela leyi Timbhoni ta Yehovha ti Endlaka ha Yona). Endzhaku ka masiku mambirhi, ku ve ni Xitsundzuxo xa rifu ra Kreste eHolweni ya Mfumo leyi swi tekaka kwalomu ka tikhilomitara ti nga ri tingani ku ya kona. Swibebe swinharhu swi rhwale vatswari ni vana eximutanini lexi swi va heleketa kwale. Sweswi vamakwerhu va chumayela hi ku ntshunxeka eximutanini lexi, lexi nga xin’wana xa swimitana leswikulu exihlaleni xexo. Maphayona mambirhi yo hlawuleka ma fambisa tidyondzo ta tsevu ta Bibele kwale. EDyondzweni ya Buku ya Vandlha a ku ti ntsena vanhu lava tsakelaka kambe ku ta ni hosi ya ximutana.

Jaha rin’wana le Fiji a ri tshame ehansi ka murhi ri ri karhi ri anakanya hi ta vutomi ni hi vumundzuku bya rona. Ri vitane munhu un’wana loyi a a hundza hi ndlela leswaku a ta tshama na rona. Nkateko wa kona, munhu yoloye a ku ri makwerhu, hiloko a tirhisa nkarhi wolowo ku ri chumayela. Hambileswi jaha leri ana se a ri xi twile xitshembiso xa Bibele xa misava leyi nga paradeyisi, bulo ra rona ni makwerhu loyi ri ye ri endla leswaku ri tsakela ngopfu. Hiloko ri kunguhata ku tlhelela exihlaleni lexi mana wa rona a a tshama eka xona kutani ri sungula ku dyondza Bibele. Loko ri fika kona, swirho swa ndyangu leswi a swi nga lavi ku twa nchumu hi ripfumelo ra rona lerintshwa, swi onhetele swilo leswi a ri swi byarile. Hiloko hosi ya ximutana xolexo yi ri lerisa leswaku ri rhurha, yi vula leswaku a va nge pfumeli leswaku ku va ni vukhongeri byin’wana handle ka lebyi nga kona exihlaleni. Kutani ri ye eximutanini xin’wana lexitsongo lexi tata wa rona a a tshama eka xona. Kwalaho ri fike ri aka xikepe hi mazenge ya khale, kutani vhiki rin’wana ni rin’wana a ri tluta tikhilomitara to hlayanyana ri tsemakanya magandlati lamakulu leswaku ri ya hlangana ni Timbhoni tin’wana. Swirho swa ndyangu wa rona swi ye emahlweni swi ri kaneta naswona ri boheke ku rhurha ri ya tshama ri ri roxe exihlaleni xin’wana. Eku heteleleni, ri kote ku rhurhela exihlaleni lexikulu lexi nga ekusuhi ni vandlha lerikulu. Sweswi i muhuweleri la nga khuvuriwangiki naswona ri hambeta ri endla nhluvuko hi tlhelo ra moya.

◼ MATIKO YA AMERIKA

Nhlayo ya matiko: 56

Nhlayo ya vaaki: 857 137 983

Nhlayo ya vahuweleri: 3 095 083

Nhlayo ya tidyondzo ta Bibele: 2 898 369

Sonto yin’wana ni mixo hi September 2002, makwerhu wa xisati wa le United States u endle riendzo ro vuyela eka n’wini wa xitolo. Leswi n’wini wa xitolo a a ri karhi a pfuna vaxavi hi nkarhi wolowo, makwerhu u lo tirhendzelekela kwale ndzeni ka xitolo. Hiloko a vona wansati un’wana loyi a ngheneke hi ku hatlisa a fika a xava mala, ku nga vuhlalu bya Mahindu byo fana ni rhosari ya Khatoliki. Mala, yi endliwa hi vuhlalu bya buraweni lebyi huleriwaka ericindheni, yi tirhiseriwa ku phindha-phindha swikhongelo eka swikwembu swo tala swa Mahindu. Wansati yoloye la vitaniwaka Shwe, u vonake a kume mala leyi n’wi tsakisaka, hiloko makwerhu a n’wi tshinelela, kutani a ku: “Ndzi khomele. Ndzi kombela ku vutisa, Xana mala yoleyo yi endliwe hi murhi wa sandalwood?”

Wansati loyi u te: “Ina, yi endliwe hi wona! I khale ndzi ri karhi ndzi khongela eka xikwembu leswaku ndzi kuma mala ya kahle, kutani namuntlha ndzi yi kumile. Twana nun’hwelo wa yona!”

Makwerhu u te: “Kunene yi nun’hwela kahle! Xana u ta khongela xikwembu xihi ha yona?”

Wansati a ku: “Nkarhi wun’wana ndzi ta khongela eka Ganesa kumbe eka Siva kumbe eka Durga. Ndzi ta khongela eka swona hi yona mala leyi.”

Hiloko makwerhu a ku: “I nge ndzi ku vutisa, Xana wa swi tiva leswaku hi xihi xikwembu lexikulu eka swona hinkwaswo”?

Wansati loyi a ku: “Mina swa ndzi pfilunganya. A ndzi swi tivi leswaku hi xihi lexikulu eka swona hinkwaswo.”

Makwerhu a ku: “Na mina a swi ndzi pfilunganya, loko ndza ha ri Muhindu, ndza ha khongela swikwembu sweswo. Kambe sweswi ndza swi tiva leswaku i mani Xikwembu xa matimba hinkwawo. I nge ndzi ku komba. [A hlaya Pisalema 83:18.] Yehovha Xikwembu hi yena wa Matimba Hinkwawo emisaveni hinkwayo. U nkulu ngopfu eka Siva, Ganesa na Durga. Mina ndzi nga ku dyondzisa hi Xikwembu xa matimba hinkwawo, ndzi nga ku hakerisi.”

Wansati loyi a ku: “Xana u vula leswaku u nga ndzi dyondzisa hi Xikwembu xa ntiyiso? Namuntlha swikhongelo swa mina hinkwaswo swi hlamuriwile!”

Makwerhu a ku: “Njhani?”

Wansati loyi a ku: “A ndzi khongela masiku hinkwawo leswaku ndzi kuma mala ya kahle leswaku yi ta ndzi pfuna ku kuma Xikwembu xa ntiyiso. A ndzi khongelela nileswaku ndzi kuma munghana wa ntiyiso loyi a nga ta ndzi pfuna; hikuva a ndzi na munghana. Xana hi wena mani?”

Makwerhu a ku: “Hi mina Mala, ina, ndzi nga va munghana wa wena loyi a nga ta ku kongomisa hi Bibele.”

Wansati loyi a ku: “Ndzi tsake ngopfu leswi Xikwembu xi ndzi nyikeke Mala leyi hanyaka!”

Vavasati volavo va hlele ku dyondza broxara leyi nge Leswi Xi Swi Languteleke. Shwe u va kona eminhlanganweni nkarhi hinkwawo naswona u tivekele pakani ya leswaku a khuvuriwa.

Le Honduras makwerhu wa xisati la nga murhumiwa loyi a a tshwimbirisana na ku dyondza Xipaniya, u nghene emuakweni wa tihofisi a humesa timagazini a nyika muamukeri wa vaendzi. Loko ku rila riqingho ehofisini, makwerhu u ehlekete leswaku muamukeri u n’wi byele leswaku a tshama ehansi, hiloko a titshamela kasi a a nga n’wi twisisanga. Muamukeri a a n’wi byela leswaku a famba. Kasi, wansati loyi a a ri ehofisini leyi nga ekusuhi a a tshama a ri karhi a khongelela ku kuma mpfuno wo tshika ku gangana ni wanuna la nga ni nsati ni mpfuno wa ku dyondza ndlela leyinene yo gandzela Xikwembu. Loko a twa rito ra makwerhu evuamukelweni bya vaendzi, a a tshemba leswaku xikhongelo xa yena xi hlamuriwile. Hambiswiritano, loko a twa muamukeri a n’wi byela leswaku a famba, a a karhatekile leswaku murhumiwa a nga ha famba a nga si vulavula na yena. Kambe, endzhaku ka sweswo murhumiwa u te: “Leswi a ndzi nga n’wi twanga kahle muamukeri, a ndza ha tshame kwalaho loko wansati yoloye a ta hi ku hatlisa a ta vulavula na mina. Havambirhi ha kholwa leswaku lowu a wu ri nkongomiso wa Yehovha.” Emalembeni lama hundzeke, wansati yoloye u tshame a hlaya tibuku ta Timbhoni ta Yehovha kutani sweswi se a a endle xiboho xo kambisisa timhaka ta swa moya. Ku sukela kwalaho u tseme vuxaka bya yena ni wanuna luya la tekeke, kutani sweswi u dyondza Bibele naswona u va kona eminhlanganweni nkarhi hinkwawo.

Makwerhu wa xisati la nga phayona ro hlawuleka le El Salvador a a averiwe evandlheni leri nsimu ya rona a va nga talanga vanhu lava amukelaka ntiyiso. U khongele eka Yehovha leswaku a n’wi pfuna a kuma vanhu lava tsakelaka. Siku rin’wana hi Sonto u hlangane ni jaha rin’wana leri a buleke na rona hi Bibele. Ri teke buku leyi nge Vutivi, ri tlhela ri pfumela nileswaku makwerhu a vuya. Makwerhu u vuyele ko tala kambe a nga ri kumi. A a kuma nsati wa rona, loyi a a nga yi tsakeli ngopfu Bibele. Loko a vuyela ra vuntlhanu, wansati yoloye u n’wi nghenise endlwini, hambileswi a nga te, “ndzi ku nyika timinete ta khume ntsena.” Makwerhu u n’wi vutise loko buku leyi nge Vutivi yi ri kusuhi. U te na yona, hiloko makwerhu a bula hi tinhla ti nga ri tingana ta yona a tlhela a n’wi kombisa ndlela leyi dyondzo ya Bibele yi fambisaka xiswona. Endzhaku ko dyondza na yena tin’hweti tinharhu, wansati yoloye u sungule ku ya eminhlanganweni naswona u tikombe a endla nhluvuko. Xana ku humelele yini hi nuna wakwe? Hi ku famba ka nkarhi, na yena u hlanganyerile edyondzweni. Kutani a sungula ku ya eminhlanganweni ni ndyangu wakwe. Sweswi mpatswa lowu wu lunghiselela ku tsarisa vukati bya wona ximfumo. Ku phikelela ni xikhongelo swi tise vuyelo lebyinene.

Margarita, la tshamaka eMexico, u rungula hi ta vuyelo lebyi a byi kumeke loko a chumayela hi xitshuketa, u ri: “Loko ndzi ri exikolweni xo dyondza ku rhunga, ndzi vulavule ni mudyondzi-kulorhi hi Bibele. U vule leswaku u anakanya leswaku mindyangu ya Timbhoni ta Yehovha yi hanya vutomi byo nandziha, hikuva minkarhi hinkwayo yi tshama yi ri karhi yi n’wayitela naswona yi vonaka yi tsakile. Ndzi vule leswaku leswi a swi vuleke i ntiyiso, naswona ntsako wa xiviri wu kumiwa hi lava tshembaka Yehovha va tlhela va namarhela misinya ya milawu ya Bibele.” Margarita u sungule dyondzo ya Bibele na yena, sweswi u va kona eminhlanganweni nkarhi na nkarhi naswona u endla nhluvuko wa vutivi lebyi a nga na byona bya ntiyiso.

Le Dominican Republic, Ana u siye broxara leyi nge Leswi Xi Swi Languteleke eka wanuna loyi a a tikomba a vilela. Nghamu yakwe a yi ye exibedlhele yi ya endliwa vuhandzuri bya khensa. U vule leswaku nghamu yakwe yi rhandza ku hlaya, kutani u ta yi yisela broxara yoleyo exibedlhele. Endzhakunyana, Ana u hlangane ni nsati wa wanuna yoloye, loyi a nga te: “Ndzi lunghekile leswaku hi sungula ku dyondza.” Hi ku famba ka nkarhi u vule leswaku loko a ri exibedlhele u kombele Xikwembu leswaku xi n’wi pfuna a kuma vukhongeri bya ntiyiso. Hi wona nkarhi wolowo, nuna wakwe u n’wi tisele broxara leyi nge Leswi Xi Swi Languteleke. Loko a yi hlaya, u swi vonile leswaku leyi hi yona ndlela leyi Xikwembu xi hlamulaka xikhongelo xakwe ha yona, hiloko xikan’we-kan’we a tivekela pakani yo va Mbhoni ya Yehovha. Hambileswi a a boheka ku famba tiawara timbirhi ku ya ni ku vuya eminhlanganweni eHolweni ya Mfumo, u endle nhluvuko hi ku hatlisa naswona a swi hlwelanga leswaku a fanelekela ku va muhuweleri. U te: “Sweswi se ndzi nga hetisisa xihlambanyo xa mina eka Xikwembu.” Ku nga si hela tin’hweti ta tsevu, u khuvuriwile entsombanweni wa muganga, naswona u hambeta a tirhela Yehovha hi ntsako.

Muhuweleri wa malembe ya 13 hi vukhale loyi va nge i Martin, u tshama eParaguay, naswona u tsakela ku chumayela hi xitshuketa. Siku rin’wana loko a vuya exikolweni, u vone xiputsanyana epatwini loko a ri karhi a chumayela munhu loyi a a a tifambela endleleni. Martin u xi tekile, a kuma xi ri ni mali. Leswi a ku nga vonaki munhu loyi a a ri eku xi laveni, u lo tihoxela xona exikhwameni. Loko a ri karhi a famba, u tibyele leswi: ‘Mali leyi ndzi nga hakelela tidyondzo ta mina ta tin’hweti tinharhu leti nga hundza ndzi tlhela ndzi pfuna ni vatswari va mina.’ Hi nkarhi wolowo, handle ko swi xiya, u jike hi xitarata lexi masiku a nga fambiki ha xona. Kutani a vona wanuna loyi a swi ri erivaleni leswaku a a lavalava xanchumu. U twe wanuna yoloye a vula leswaku u lahlekele hi 115 000 wa ti-guarani (R126) naswona a a saleriwe hi mali yoleyo ntsena n’hweti yoleyo. Hi ku hatlisa Martin u tsundzuke marito ya nkulu un’wana loyi a a n’wi vutisa swivutiso swa nkhuvulo. Nkulu yoloye u te: “U ta langutana ni miringo tala, ngopfu-ngopfu sweswi u nga ta khuvuriwa.”

Martin na yena a a lava mali hi mahlo-ngati. Phela siku rero loko a ri exikolweni a a nga ri na swo yisa enon’weni, hi nga ha vuli mali yo hakelela tidyondzo ta yena. Nilokoswiritano, leswi a a swi tiva leswaku u endla nchumu lowunene, Martin u vutise wanuna yoloye leswaku u lahlekele hi mali muni. Ntsengo wa mali ya kona a ku ri wona lowu Martin a nga wu thumba. Hiloko Martin a n’wi nyika mali yoleyo ni xiphephana a tlhela a n’wi byela leswaku i Mbhoni ya Yehovha. Leswi wanuna loyi a a nyanyukile, u nkhense Martin a vuyelela a tlhela a n’wi angarha. U nyike Martin adirese yakwe leswaku a ta n’wi endzela. Martin u khuvuriwe swin’we ni vatswari vakwe enhlengeletanweni ya xifundzha ya sweswinyana.

◼ ASIA NA MIDDLE EAST

Nhlayo ya matiko: 47

Nhlayo ya vaaki: 3 931 574 927

Nhlayo ya vahuweleri: 568 370

Nhlayo ya tidyondzo ta Bibele: 417 308

Vuvabyi byi endle leswaku makwerhu wa xisati Kumiko loyi a nga phayona leri tshamaka ekusuhi ni doroba ra Tokyo le Japani, a nga ha swi koti ku famba hi yindlu na yindlu. Xisweswo minkarhi yo tala u chumayela hi ku tsala mapapila. Swirho swa vandlha ra yena swi n’wi nyike tiadirese ta vanhu lava a swi tika ku vulavula na vona hikwalaho ka leswi minkarhi yo tala a va nga ri kona emakaya. U tsaletele mapapila kutani vahuweleri va ma fambisa. Ku hundze lembe ri tlhela ri tlhandlekela ku nga si hlamula ni un’we. Hambiswiritano, u hambete a tsala a nga heli mbilu. Eku heteleleni, endzhaku ko va a tsale mapapila ya kwalomu ka 1 500, u kume poskarata, leyi a yi tsariwe ku: “Ndzi nkhensa papila ra wena. Leswi u nga swi vula, ndza swi tsakela swinene. Hi masiku lama landzelaka u ta kuma ndzi ku rindzile.” U endzele munhu yoloye a ri karhi a khapa-khapa mihloti ya ntsako, naswona va sungule dyondzo ya Bibele hi wona nkarhi wolowo. U ri: “Eku sunguleni, a ndzi chavanyana ku tsala mapapila, kambe sweswi ndza kholwa leswaku loko hi lehisa mbilu hi hlota lava fanaka ni tinyimpfu, kunene Yehovha u ta katekisa matshalatshala ya hina.”

Mixo wun’wana loko makwerhu wa xisati a ri karhi a famba hi yindlu ni yindlu eIndiya, u gongondze emutini wun’wana. Hiloko ku pfula wansati la vonakaka a ri ni gome. Ehansi a ku tshame swihlangi swimbirhi swi ri ni swibye leswi nga riki na nchumu. Makwerhu u n’wi byele rungula leri chavelelaka ra Mfumo wa Xikwembu ni mikateko ya wona, naswona wansati yoloye u rhiye ndleve. Hi nkarhi wolowo, vana lava nga ni ndlala a va ri karhi va rilela mana wa vona leswaku a va phamela. U arile. Makwerhu u vule leswaku u ta n’wi yimela a rhanga hi ku va phamela. Hiloko wansati a ku xibuku, a rila, a ku swakudya swa kona swi ni chefu. A a lava ku va phamela swona loko a twa ku gongondziwa enyangweni. Hikwalaho ka swiphiqo swa ndyangu, ku katsa ni leswi nuna wa yena a a ri xilovekelo, a a endle xiboho xo tidlaya swin’we ni swinhwanyetana swakwe swimbirhi. Loko makwerhu a twa sweswo u halate swakudya sweswo, ivi a tsutsumela exitolo lexi nga ekusuhi a ya xavela ndyangu wolowo swakudya. Va swi sweke swin’we ivi va nyika vana va dya. Rungula ra Mfumo ri n’wi chavelele swinene wansati yoloye. U amukele dyondzo ya Bibele naswona sweswi i Mbhoni leyi khuvuriweke. U ya eminhlanganweni ni vana vakwe vambirhi. Ku nga ri khale, nuna wakwe u sungule ku ya eminhlanganweni naswona u endla nhluvuko lowu tsakisaka.

Vuvabyi bya SARS byi chavise vanhu vo tala le Taiwan. Vaaki va swi hlalele va karhatekile swiviko swa mahungu leswi a swi hlamusela ndlela leyi vuvabyi byebyo byi hlaseleke Hong Kong ha yona. Ku suka kwalaho byi hlasele eTaiwan! Swibedlhele swo tala swi boheke ku amukela ntsena lava nga ni vuvabyi lebyi, naswona vanhu vo tala a va chava ku khomiwa hi byona. Hambiloko hulumendhe yi nga si teka goza, rhavi se a ri pfune mavandlha leswaku ma kuma swipima-mahiselo leswaku ma ta pima mahiselo ya un’wana ni un’wana la taka eminhlanganweni.

Hulumendhe yi kombele leswaku tikereke hinkwato leti tsarisiweke ximfumo ti papalata ku chumayela etindhawini to karhi. Nongonoko wo hlawuleka wa Nhlangano wa Ntirho wu pfune vamakwerhu va vona leswaku va nga chumayela njhani leswaku va papalata swiphiqo. Phayona rin’wana ro hlawuleka ri amukele xiringanyeto xa ku vuyela hambi ku ri eka vanhu lava a va nga tsakeli swinene. Hikwalaho ka sweswo, nhlayo ya tidyondzo ta Bibele leti ri ti fambisaka yi andzile. Sweswi vo tala lava ri dyondzaka na vona va endla nhluvuko lowu tsakisaka. Ri ri: “Hambileswi eku sunguleni xiringanyeto lexi a xi vonaka xi nga ta tirha, vuyelo bya kona byi endle leswaku ndzi tiphina hi ku kuma mihandzu yo tala ensin’wini.”

Loko makwerhu un’wana wa xisati a ri ensin’wini le Cyprus, u kume wansati loyi a nga n’wi byela leswaku wa ha khomekile. Makwerhu u vulavule na yena hi ku komisa a yime hi le fasitereni ra le khixini, a hlaya Pisalema 72:12-14, a vula leswaku u ta tlhela a vuya hi nkarhi wa kahle. Loko a vuyela, u hlamarile ku twa wansati luya a vula leswaku a a n’wi rindzele hi mahlo-ngati. Ha yini? Hikuva u kume tsalwa rero ri n’wi khutaza swinene—u anakanye ha rona siku hinkwaro. Makwerhu u n’wi hlamusele leswaku a nga dyondza na yena Bibele, hiloko a pfumela xikan’we. Sweswi wansati yoloye u phofula ku tlangela ka yena leswi a swi dyondzaka eRitweni ra Xikwembu.

Wanuna loyi va nge i Polo, wa le Cambodia, u sungule ku dyondza ni murhumiwa kutani a endla nhluvuko lowu tsakisaka. A a ta eminhlanganweni hinkwayo ya ntlhanu ePhnom Penh. Kutani muthori wakwe a n’wi byela leswaku a rhurhela ePhnom Penh, edorobeni leri nga ekusuhi ni ndzilakana wa Thailand. A ku na vandlha edorobeni rero, hiloko Polo a nyika la n’wi fambiselaka dyondzo ya Bibele nomboro yakwe ya selfoni, kutani va ya emahlweni va dyondza hi foni ku ringana timinete ta 30 siku rin’wana ni rin’wana hi Ravunharhu ni hi Ravuntlhanu. Nakambe Polo a a lava ku nyikela tinhlamulo eka Dyondzo ya Xihondzo xo Rindza. Leswi vandlha a ri ri ekule ngopfu, a a tsala tinhlamulo takwe timbirhi kumbe tinharhu ta dyondzo ya vhiki leri landzelaka kutani a ti nyika mufambisi wa Dyondzo ya Buku ya Vandlha ra ka vona leswaku a ti hlaya enhlanganweni wa vhiki rero. Ndlela leyi a a hiseka ha yona yi khutaze vahuweleri va le vandlheni rero. U ringete ni ku chumayela lava a hlanganaka na vona. Loko a ri ebazini leri yaka eBattambang niloko a vuya, u chumayele vanhu vo tala a va khutaza nileswaku va va kona eminhlanganweni. Pakani yakwe leyi landzelaka i ku va muhuweleri la nga khuvuriwangiki.

Le Mongolia vamakwerhu vambirhi va xisati va hlangane ni jaha ra malembe ya 30 hi vukhale. Ri va yimisile, kutani ri nghena endlwini ri huma ni tibuku timbirhi, ku nga: Ku Lavisisa Ka Vanhu Xikwembu ni leyi nge Nghwazi Leyi Tshameke Yi Hanya. Ri vule leswaku ri dyondze Bibele ni Timbhoni ta Yehovha loko ri ri ePoland eka malembe ya 12 lama hundzeke. Loko ri tlhelele eMongolia hi 1993, a ra ha yimayimanga ri lo tsala papila ri kombela leswaku Timbhoni ti ri endzela. Kambe enkarhini wolowo a ku nga ri na Timbhoni eMongolia, kutani a ri endzeriwanga hi munhu. Endzhaku ka nkarhi, ri ye eyunivhesiti eIndiya ri ya dyondza kona, laha ri tshameke kona malembe ya ntlhanu. Emalembeni wolawo, ku sukela hi 1994 ku ya eka 1998, a ri hlangananga na Timbhoni ta Yehovha. Hiloko ri tlhelela eMongolia, laha eku heteleleni ri koteke ku vonana ni vamakwerhu. Ri tlhele ri dyondzeriwa Bibele, naswona hi April 2003, ri ve kona enhlanganweni ro sungula. Sweswi ri tiphina hi ku dyondza broxara leyi nge Leswi Xi Swi Languteleke.

Wansati la nga Mubudha eSri Lanka u hlamarise Timbhoni tin’wana timbirhi, loko a ti amukerile endlwini yakwe a ti byela leswaku hi tona nhlamulo ya xikhongelo xakwe! U vule leswaku xinhwanyetana xakwe xa ha ku tihinga hikwalaho ka leswi a nga xi xupula. Muprista wa Mubudha loyi a nga ya eka yena leswaku a ta n’wi chavelela, u n’wi byele leswaku xinhwanyetana xakwe xi ta tlhela xi tswariwa xi vuya xi ta tirihisela eka yena. Wansati loyi a a chuhile. Un’wana wa vanghana vakwe u n’wi byele leswaku Vakreste a va pfumeli emhakeni yo tano. Hiloko wansati loyi a khongela leswaku a hlangana ni Vakreste va ntiyiso, a ri karhi a anakanya leswaku a nga ha hlamuriwa hi ku rhumeriwa Mukhatoliki. Ku ri na sweswo, ku fike Timbhoni ta Yehovha timbirhi ti n’wi chavelela hi ntiyiso wa Bibele. Sweswi u dyondza Bibele hambileswi a kanetiwaka hi muprista wa Mubudha.

Wansati un’wana wa le Kyrgyzstan u hete malembe yo tala a nghena kereke ya Evangelical. Loko a ri karhi a hlaya Bibele, u vone ku hambana ka yona ni leswi a dyondzisiweke swona ekerekeni ya yena. Hi xikombiso, a a nga swi twisisi leswaku ha yini kereke yi dyondzisa leswaku Yesu Kreste i Tatana tlhelo N’wana. Leswi a a swi tiva leswaku n’wana u fanele a va na tatana, u khongele eka Tata wa Yesu Kreste swi suka embilwini a kombela leswaku a N’wi pfuna ku kuma nhlamulo ya swivutiso swakwe swa Bibele. Hi xamundzuku xa kona u endzeriwe hi Timbhoni ta Yehovha timbirhi. Ti n’wi vutise ti ku: “Xana wena u ehleketa yini? I mani loyi Yesu Kreste a dyondziseke vadyondzisiwa va yena leswaku va khongela eka yena, naswona i vito ra mani leri a va khutazeke leswaku va ri kwetsimisa?” U hlamarile loko a tsundzuka leswaku hi swona leswi a swi khongeleleke eka Tata wa Yesu Kreste, eka masiku ma nga ri mangani lama hundzeke, leswaku a n’wi hlamula swivutiso leswi a a tivutisa swona. Endzhaku ka bulo rero, a swi n’wi kanakanisanga leswaku Xikwembu xi hlamule xikhongelo xakwe. Wansati yoloye u pfumele ku hambeta a dyondzeriwa Bibele a tlhela a sungula ku va kona eminhlanganweni ya Timbhoni ta Yehovha. Loko a dyondze leswaku Yehovha i Tata wa Yesu, u sungule ku khongela Yehovha, a n’wi vita hi vito. Sweswi u endla nhluvuko hi tlhelo ra moya, naswona u byela maxaka yakwe hi vutivi lebyi a byi kumeke.

◼ AFRIKA

Nhlayo ya matiko: 56

Nhlayo ya vaaki: 755 145 559

Nhlayo ya vahuweleri: 950 321

Nhlayo ya tidyondzo ta Bibele: 1 666 518

Emabazini yo tala lama fambaka maendzo yo leha le Zambia, vakhandziyi va hungasiwa hi tivhidiyo leti hakanyingi ti kombisaka madzolonga ni ku tikhoma ko biha. Mpatswa wun’wana lowu nga varhumiwa lowu a wu famba hi bazi wu ya edoroba-nkulu, wu vutise loko swi ta koteka ku tlanga vhidiyo leyi nge The Bible—Its Power in Your Life. Muchayeri u pfumerile. Ruth u ri: “Phela, vakhandziyi va yi hlalele hi ku tiyimisela, va ri karhi va yingiserisisa. Loko yi hela hi vulavule na vona, hi va nyika swiphephana ni timagazini. Va swi tsakele ngopfu.” Mpatswa lowu wu vutise muchayeri loko swi nga koteka ku tlhela wu tlanga vhidiyo yoleyo, a wu anakanya leswaku u ta tlhela a yi tlanga enkarhini lowu taka. Hi wona nkarhi wolowo u lo vhela a yi tlherisela laha yi sungulaka kona, kutani a yi tlanga. Richard u ri: “Vakhandziyi va tiphine hi vhidiyo yoleyo ra vumbirhi, naswona hi tsakile leswi hi nga kombela muchayeri leswaku a yi tlanga.”

Miranda, la nga xichudeni lexi nga n’wana wa kondlo-a-ndzi-dyi le Malawi, a a ri karhi a komba mudyondzi-kulobye buku leyi nge Xihundla Xa Ntsako eNdyangwini hi nkarhi wo wisa exikolweni. Mudyondzisi u ri ke ehenhla bulo ra vona kutani a vitanela Miranda ehofisini yakwe. A n’wi vutisa leswaku ha yini a byeletela munghana wakwe leswaku u fanele a tekiwa. Miranda u vule leswaku a nga n’wi byelanga leswaku a tekiwa. Ku ri na sweswo, a a bula na yena hi ndlela leyi buku yoleyo yi yi pfunaka ha yona mindyangu leswaku yi kuma ntsako wa xiviri. Leswi mudyondzisi a a virile, u holovele Miranda a ku: “Wa ha ri ntsongo ngopfu ku va u nga nyika xitsundzuxo etimhakeni ta vukati!”

Leswi mbilu ya Miranda a yi tele, u humile ehofisini ya mudyondzisi a ri karhi a rhurhumela. Endzhaku ka masiku mambirhi mudyondzisi u tlhele a n’wi vitanela ehofisini yakwe. Loko Miranda a rungula leswi humeleleke u ri: “Mudyondzisi wa mina u vule leswaku wa tisola ku va a ndzi holovele a hlundzukile, nakambe u vule leswaku yena ni nghamu yakwe a va tshamela ku tlulana milenge kutani va hetelela va hambanile. U kombele buku leyi ndzi yi kombeke mudyondzi-kulorhi. Ndzi n’wi nyike yona hi ntsako. Endzhaku ka mavhiki mambirhi u n’wi byele leswaku buku yoleyo yi n’wi pfune ngopfu naswona u yi kombe ni nsati wakwe. Yena ni nsati wakwe va hetelele va vuyelanile.”

EAfrika Dzonga mukhalabye la vitaniwaka Eric u dyondze Bibele ni Timbhoni ta Yehovha ku ringana malembe yo tala, kambe ku dzaha a ku n’wi kavanyeta leswaku a nga swi koti ku endla nhluvuko hi tlhelo ra moya. Endzhaku ka loko nsati wakwe a khuvuriwile, na yena u anakanye ku tivekela pakani yoleyo. U teke maphepha lama tsariweke ndzimana ya Tsalwa ra 2 Vakorinto 7:1 hi marito lamakulu, leri nge: “Hikokwalaho, leswi hi nga ni switshembiso leswi, varhandziwa, a hi tibasiseni eka swilo hinkwaswo leswi nyamisaka nyama ni moya, hi hetisekisa vukwetsimi hi ku chava Xikwembu.” Eric u namekete tsalwa rolero laha ri vonakaka kahle etindhawini to hambana-hambana endlwini yakwe. Nkarhi na nkarhi loko a twa a navele fole, a a hlaya tsalwa rolero a tlhela a khongela leswaku Yehovha a n’wi pfuna ku tshika ku dzaha. Hikwalaho ka sweswo, se ku hundze tin’hweti ta khume a nga si dzaha. Sweswi Eric i muhuweleri la nga khuvuriwangiki naswona u kunguhata ku khuvuriwa entsombanweni lowu landzelaka.

Loko murhumiwa wa xisati a ha yimele xikwekwetsu eswihlaleni swa Seychelles, u vone wansati loyi a a titshamele yexe. Hambileswi makwerhu a a lo lakahla, hi ku karhala endzhaku ko chumayela siku hinkwaro, u ye eka wansati yoloye a fika a n’wi nyika xiphephana. U xi tekile, a n’wi byela leswaku yena i Muhindu. Endzhaku ka masiku ma nga ri mangani va tlhele va hlangana exitarateni, kutani makwerhu a hlela leswaku a dyondzeriwa Bibele. Nuna wa wansati loyi, la nga dokodela, a a ri Mukhatoliki, kambe endzhaku ka loko a hete ku hlaya buku leyi nge Ku Lavisisa Ka Vanhu Xikwembu ni leyi nge Vutivi, na yena u pfumele ku dyondzeriwa. Hi madyambu man’wana, mpatswa wu rhambe makwerhu wa xisati ni nuna wakwe eka xiendlakalo xo hlawuleka. Havambirhi va tshivele ndzilo hi swifaniso swa vona swa vukhongeri kutani va sweka swakudya ha wona! A va ha yimayimanga va sungule ku va kona eminhlanganweni ni ku huma nsimu. Loko va ta va va khuvuriwile, havambirhi va teke vuphayona bya nkarhinyana. Leswi xihlala xi nga xitsongo, makwerhu yoloye u tiviwa ngopfu. Loko vanhu va n’wi monya va ri: “Dokodela se u hundzuke muprista.” Sweswi i nandza wa vutirheli, naswona nsati wakwe i phayona ra nkarhi hinkwawo.

Ishmael u dyondze ririmi ra mavoko leswaku a ta pfuna lava nga twiki leswaku va dyondza ntiyiso eZimbabwe. Siku rin’wana loko a ri ebazini u vone wansati la vulavulaka hi mavoko a ri karhi a kombela mali eka lava khandziyeke ebazini. Ishmael u n’wi chumayerile a n’wi byela leswaku va ta tlhela va vonana. Loko a vutisiwa leswaku kereke ya yena yi n’wi dyondzise leswaku i yini lexi vangeke leswaku a fa tindleve, u hlamule a ku: “Va ri i ku rhandza ka Xikwembu.” Ishmael u n’wi hlamusele leswaku a hi ku rhandza ka Xikwembu loko vanhu va fe tindleve kambe sweswo swi vangiwa hi xidyoho lexi hi xi kumeke tanihi ndzhaka swin’we ni ku nga hetiseki. U tlhele a n’wi hlamusela leswaku ku nga ri khale Xikwembu xi ta susa mavabyi hinkwawo. Wansati loyi u hlamule a ku: “Ndzi lava ku tiva leswaku ha yini kereke ya mina yi ndzi dyondzise mavunwa.” Loko Ishmael a tlhela a hlangana na yena ra vunharhu, wansati yoloye u te: “Ku sukela sweswi se ndzi un’wana wa n’wina. A ndza ha lavi ku tlhela ndzi yingisela mavunwa.” Sweswi u dyondzeriwa Bibele nakambe u tshama a ri kona eminhlanganweni, naswona u navela ku fanelekela ku va muhuweleri la nga khuvuriwangiki ku nga ri khale.

Le Ghana ku lwela ku kuma swo tihanyisa ha swona ku endla leswaku vanhu vo tala va sala va ri ni nkarhi wutsongo wa timhaka ta moya. Phayona ra xisati ra nkarhi hinkwawo ri hlangane ni jaha rin’wana loko ri ri entirhweni wa yindlu ni yindlu kutani ri kombela ku bula na rona hi Bibele ku ringana timinete ta ntlhanu ntsena. Jaha leri ri hlamule ri ku: “Ndzi tshama ndzi khomekile siku rin’wana ni rin’wana. Ekaya, ndzo vuyela ku ta lata rivambu hi 8:00 p.m.”

Makwerhu u vutisile: “Xana u nga tirhisa nkarhinyana wa wena wo etlela leswaku u dyondza Bibele?”

U te: “Ntsena loko wo fika endzhaku ka 8:00 p.m.” Hi xamundzuku xa kona, makwerhu ni nuna wakwe va ye endlwini ya jaha rero hi yona awara ya 8:00 p.m. A a ha ku vuya entirhweni. Ku sunguriwe dyondzo ya Bibele na yena, naswona a nga hlwelanga ku sungula ku ya eminhlanganweni. Hi ku famba ka nkarhi u faneleke ku va muhuweleri la nga khuvuriwangiki kutani a hetelela a khuvuriwile. Ku cinca loku a ku endleke evuton’wini byakwe ku n’wi tsakise swinene nsati wakwe lerova na yena a pfumela dyondzo ya Bibele, endzhakunyana u faneleke ku va muhuweleri la nga khuvuriwangiki. Vaakelani ni vanhu vo tala lava a va tiva ndlela leyi khale a a hanya ha yona swi va hlamarisile loko va n’wi vona a ri karhi a chumayela hi yindlu ni yindlu. Vo tala va lave ku tiva lexi koteke ku cinca munhu yoloye loyi a a dume hi vudakwa, ku yiva ni ku tirhisa swidzidzirisi hi ndlela yo biha. Hikwalaho ka sweswo ku ve ni vanhu va 22 edorobeni rero lava kombeleke ku dyondzeriwa Bibele. Eka vona, lava ringanaka 12 va va kona eminhlanganweni ya vandlha nkarhi hinkwawo naswona ku nga ri khale va nga ha faneleka ku va vahuweleri lava nga khuvuriwangiki.

[Xifaniso lexi nga eka tluka 43]

Steponas na Edvardas va le Lithuania

[Xifaniso lexi nga eka tluka 47]

Alyce ni mudyondzisi wakwe Linda va le Australia

[Xifaniso lexi nga eka tluka 51]

Mala wa le United States

[Xifaniso lexi nga eka tluka 56]

Kumiko wa le Japani

[Xifaniso lexi nga eka tluka 61]

Ruth na Richard va le Zambia