Xiviko Xa Misava Hinkwayo

◼ ASIA NA MIDDLE EAST

Nhlayo ya matiko: 47

Nhlayo ya vaaka-tiko: 3 896 182 946

Nhlayo ya vahuweleri: 582 360

Nhlayo ya tidyondzo ta Bibele: 453 069

Kyrgyzstan: Ensin’wini leyi Svetlana la nga phayona ra nkarhinyana a a yi tirha a ku ri ni yindlu yin’wana leyi a a nga kumi munhu eka yona. Siku rin’wana loko a hundza ekusuhi na yona, u vone swi nga pfuni nchumu ku gongondza hikuva ku tshama ku nga ri na munhu. Hambiswiritano, u gongondzile hiloko a hlamala loko nhwanyana un’wana a pfula rivanti. Nhwanyana loyi a a tsakile ku vona Timbhoni ta Yehovha naswona u vule leswaku a a dyondzeriwa Bibele kambe u lahlekelane ni Timbhoni. Svetlana u n’wi vutisile loko a ta swi tsakela ku hamba a tiseriwa timagazini, u pfumerile a tlhela a vula leswaku u ta tsakela ni ku fambiseriwa dyondzo ya Bibele! Va nambe va sungula ku dyondza swin’we na yena kutani sweswi u va kona eminhlanganweni.

Japani: Vamakwerhu vambirhi lava tirhaka nsimu ya mabindzu va nghene ehofisini ya gqweta leri dumeke hi ku pfuna swisiwana. Wansati la tirhaka kwalaho u hatle a va tlherisa a va byela leswaku u khomekile, kambe u ti amukerile timagazini. Loko vamakwerhu lava va ta ravumbirhi, wansati loyi a a ri yexe. Va nga si n’wi pfuxela, u tlatlarhukile a ku: “Ha yini vana va fa kambe va nga ri na xidyoho? Ha yini misava yi ri leswi yi nga xiswona? Ndzi lava tinhlamulo leti nga ta ndzi khorwisa! Hlamulani loko mi ri na yona nhlamulo!” Va hete awara va ri karhi va bula kutani hakatsongo-tsongo wansati loyi a ya a tsaka. U nkhense vamakwerhu lava hileswi va hlamuleke swivutiso va tirhisa Bibele, leswi a a anakanya leswaku a nga kona la nga swi hlamulaka. Loko va famba, u va nyike adirese ya yena ni nomboro ya riqingho kutani a ku: “Hi xitalo ndzi nyika ntsena vanhu lava ndzi va tshembaka, kutani leswi na n’wina ndzi mi tshembaka, ndzi ta mi nyika. Ndzi lava ku tlhela ndzi bula na n’wina. Mhaka leyi hi buleke ha yona i ya nkoka.” U sungule ku dyondzeriwa Bibele.

Nepal: Wansati un’wana u hete malembe a ri karhi a nghena kereke kambe u hetiwe matimba hi makwanga ni timholovo leti nga heriki ta swirho swa kereke. Hambileswi nuna wa yena a a ri mufundhisi, u hlongoriwile ekerekeni hikwalaho ka mholovo leyi pfuxiweke hi mali ya nhlengo. Hiloko a hundzuka xindzendzele kutani a tshika ni ku wundla ndyangu wa yena. Kasi nsati a a lava ntiyiso hi mahlo-ngati kutani a a khongela siku rin’wana ni rin’wana. Leswaku a wundla ndyangu wa yena, u lave ntirho laha ku hlengeletiwaka maphepha lama tirhisiweke. Siku rin’wana loko a ri karhi a hambanisa tibuku ni timagazini ni maphepha-hungu, u kume buku leyi nge Vun’we Eku Gandzeleni Ka Xikwembu Xi Ri Xin’we Xa Ntiyiso. Hiloko a yi fihla eswiambalweni swa yena, a muka na yona. U yi hlaye siku rin’wana ni rin’wana naswona u ye mahlweni a khongela. Siku rin’wana, Bishnu, phayona ro hlawuleka, u gongondze ekaya rakwe. Wansati loyi u swi tsakerile leswi Bishnu a n’wi byeleke swona kutani a n’wi pfulela leswaku a nghena. Wansati loyi u sungule ku swi vona hakatsongo-tsongo leswaku leswi Bishnu a n’wi byelaka swona swa fana ni leswi buku ya yena yi swi vuleke. Kutani a hetelela a kombe Bishnu buku yoleyo naswona u tsakile ku twa leswaku a yi ri buku ya Timbhoni. Sweswi u dyondza Bibele nkarhi hinkwawo naswona u tshama a ri kona eminhlanganweni hinkwayo ni vana va yena.

Sri Lanka: Hambileswi Punchibanda a a nga si va muhuweleri la khuvuriweke, u endle xiboho xo chumayela van’wana mahungu lamanene ya Mfumo. U vulavule ni wanuna un’wana la hanyaka hi ku kombela exitarateni, la n’wi byeleke leswaku sesi wa yena u dlaye hi vuvabyi byo karhi. Va tshame va ya ekerekeni ya Assemblies of God va ri ni ntshembo wa leswaku va ta hanyisiwa hi singita kambe a ku va nga ni nhlanga leyi balekaka ngati. Punchibanda u n’wi byele leswaku Xikwembu a xi tshunguli hi singita enkarhini wa hina, vanhu va ta tshunguriwa mavabyi ya vona eMfun’weni wa Xikwembu. U nyike wanuna loyi timagazini leti vulavulaka hi mhaka leyi. Siku rin’wana u rhambe munhu loyi leswaku a ta eHolweni ya Mfumo. Wanuna loyi la hanyaka hi ku kombela u mukile kutani a byela va ka vona leswaku u rhambiwe eHolweni ya Mfumo, a va komba ni timagazini. Nsati wa yena u n’wi byele leswaku na yena u nyikiwe timagazini naswona u rhambiwe eHolweni ya Mfumo. Ku rhange nuna wa kona a ya eHolweni ya Mfumo. Loko a fika vamakwerhu va n’wi amukele hi mandla mambirhi. Sweswi, yena ni nsati wakwe swin’we ni n’wana wa vona wa jaha ni vambirhi va vanhwanyana, va va kona eminhlanganweni naswona va tiphina hi ku va swin’we ni vanhu va Yehovha.

Lebanon: Phayona ro hlawuleka ra xisati leri hi ndhavuko ri humaka eSwihlaleni swa Philippine, ri ri: “Loko ndzi ri karhi ndzi chumayela exitarateni, ndzi hlangane ni wansati la humaka eSwihlaleni swa Philippine. Ndzi n’wi endzele laha a tirhaka kona kutani ndzi dyondza na yena Bibele. A a ri ni swivutiso swo tala; nkarhi wun’wana a a nga ndzi yimeli ndzi heta ku hlamula xivutiso xa yena ivi a vutisa xin’wana. Hambiswiritano, hi ku famba ka nkarhi u kanetiwe hi vanghana va yena lava a va ri swirho leswi tinyiketeleke etikerekeni ta vona. Khombo ra kona u hele matimba kutani a tshika ku dyondza Bibele, hambileswi ndzi n’wi khutazeke leswaku a nga lan’wi. Nilokoswiritano, ndzi tibyele ndzi ku: ‘Loko a ri nyimpfu siku rin’wana u ta ya mahlweni a dyondza.’ Ku hundze lembe ndzi ri karhi ndzi anakanya hi yena, hiloko ndzi n’wi tsalela papila ndzi n’wi byela leswaku a ndzi n’wi rivalanga nileswaku ndzi nga tsakela ku tlhela ndzi n’wi vona siku rin’wana. U ndzi bele riqingho, hiloko ndzi n’wi endzela. Sweswi a a vonaka a rhandza Bibele ku tlula eku sunguleni. Swilo leswi hi tshameke hi bula hi swona a swi nga si huma embilwini ya yena naswona a a swi rhandza hi mbilu ya yena hinkwayo. U ndzi byele leswaku u ye etikerekeni to tala kambe hinkwato ti dyondzisa mavunwa. Hiloko a sungula ku dyondzeriwa, a endla nhluvuko kutani sweswi u khuvuriwile. N’wana wa yena wa mufana wa malembe ya 12 hi vukhale i muhuweleri la nga khuvuriwangiki.”

Indiya: Makwerhu un’wana wa xisati u ri: “Loko hi ri karhi hi chumayela hi yindlu ni yindlu, hi vone xinhwanyetana xin’wana xi nghena endlwini loko xi hi vona. Hiloko ku huma wanuna un’wana a hi lerisa leswaku hi famba. Loko hi ku ha famba, hi vone xinhwanyetana lexiya xi ri karhi xi vulavula ni wanuna yoloye. Endzhakunyana, loko hi rindze bazi, xinhwanyetana lexiya xi te eka hina hi xikanyakanya, kutani xi ku: “Ndza swi tiva leswaku Yehovha i Xikwembu xa ntiyiso. Ndzi kombela mi ndzi dyondzisa Bibele. Ndzi nghene endlwini leyi ndzi tshamaka eka yona ndzi lava ku mi rhurhela kambe n’wini wa xitandi u arile.’ Hi xi vutisile leswaku xi swi tivisa ku yini leswaku Yehovha i Xikwembu xa ntiyiso. Xi vule leswaku siku rin’wana loko xi ri karhi xi famba hi bazi, xi vone ntshungu wa vanhu lava a va vonaka onge i Vakreste. A ku ri wun’wana wa mintsombano ya muganga. Xi chike ebazini kutani xi va kona masiku ha manharhu ka wona. A xi rindzele leswaku Timbhoni ta Yehovha ti endzela laha xi tshamaka kona. Leswi hi voneke leswaku xa tsakela, hi fambe na xona ekaya ra makwerhu un’wana wa xisati hi fika hi sungula ku dyondza na xona Bibele. Xi sungule ku va kona eminhlanganweni minkarhi hinkwayo naswona xi karhi xi endla nhluvuko lowunene hi tlhelo ra moya.”

◼ AFRIKA

Nhlayo ya matiko: 56

Nhlayo ya vaaka-tiko: 781 767 134

Nhlayo ya vahuweleri: 1 015 718

Nhlayo ya tidyondzo ta Bibele: 1 820 540

Uganda: Lucy i Mbhoni leyi tirhaka ekamareni lerikulu ro hlayisa mirhi. Siku rin’wana yena ni vatirhi-kulobye va vitaniwile va ta hlambanya leswaku a va yi tivi mali leyi lahlekeke, endzhaku ka loko ku kumeke leswaku ku ni mali yo tala leyi nga mila milenge. Loko ku fika nkarhi wa leswaku Lucy a khoma Bibele a hlambanya leswaku a nga na nandzu, u pfule Swivuriso 15:3 kutani a yi hlayela ehenhla a ku: “Mahlo ya Yehovha ma le ndhawini yin’wana ni yin’wana, ma tshama ma langute lavo biha ni lavanene.” Endzhaku ka loko ku te whii, muyivi wa mali leyi u tlakukile a ya eka mufambisi a fika a tivika. Mufambisi u ringanyete leswaku enkarhini lowu taka, hinkwavo va tsundzuka “tsalwa ra Lucy.” Endzhakunyana Lucy u engeteriwe muholo a tlhela a nyikiwa vutihlamuleri byo hlayisa xilotlelo xa kamara ro hlayisela mirhi.

Benin: Josué u hlekuriwa ngopfu exikolweni. Loko o hlamula leswi hoxeke etlilasini, vadyondzi-kulobye van’wana a va n’wi hlekula va ku, “Swi tisa ku yini leswaku u vula nhlamulo leyi hoxeke kasi u muprista wa Yehovha?” Kutani van’wana na vona va tatisa hi ku, “U heta siku hinkwaro a ri karhi a yingayinga ni nkwama wa tibuku.”

Josué u ri, “A ndzi chava ngopfu ku hlangana ni vadyondzi-kulorhi loko ndzi ri ensin’wini hi mahelo-vhiki.” U khongerile hi mhaka leyi a tlhela a vulavula ni nkulu un’wana ha yona, yena a n’wi khutaza leswaku a titiyisa nhlana hi ku ndlandlamuxa nkarhi wa yena ensin’wini naswona a nga chavi ku fambisela vadyondzi-kulobye minkandziyiso. Leswi swi pfune Josué hi tindlela tinharhu. U ri: “Sweswi ndzi tshamela ku teka vuphayona bya nkarhinyana. Vadyondzi-kulorhi vambirhi lava a va tolovele ku ndzi sandza se ndzi dyondza na vona Bibele. Nakambe ndzi antswise ngopfu etidyondzweni ta mina.”

Etiyopiya: Kwalomu ka malembe mambirhi lama hundzeke, Asnakech u thumbe layisense yo chayela kutani loko a kume leswaku n’wini wa yona i mani, ku nga wansati la vuriwaka Elsa, u endle lunghiselelo ro n’wi yisela yona. Elsa u hlamarisiwe hi ku tshembeka ka Asnakech kutani a lava ku n’wi nkhensa hi mali yo karhi. Asnakech u arile kutani a n’wi nyika broxara leyi nge I Yini Leswi Xikwembu Xi Swi Languteleke Eka Hina? Hi xamundzuku xa kona Elsa u sungule ku dyondzeriwa Bibele. U vule leswaku a nga sunguli ku twa vito leri nge Yehovha hikuva tata wa yena la nga mufundhisi u tshama a n’wi byela rona. Endzhaku ka loko ndyangu wa yena hinkwawo wu ye entsombanweni wa muganga, nuna wa yena u sungule ku dyondzeriwa Bibele na yena. Kambe, loko Tata wa Elsa a swi twa, u bave a khalakhasa, a vula leswaku Timbhoni ta Yehovha i swikangalafula. Leswi Elsa a a tiyimisele ku ya emahlweni a dyondza, u hlamule tata wa yena hi ku titsongahata, a n’wi byela leswaku Timbhoni i vanhu lavanene. Sweswo swi hlamarise tata wa yena kutani a teka broxara ya Elsa leyi nge Leswi Xi Swi Languteleke, a nga swi tivi. U yi hlaye ko talanyana kutani a hlamarisiwa hi leswi a swi hlayeke. Endzhaku ka sweswo, loko a hlangana ni vanhu endleleni, a a nga ha va pfuxeli hi ku rhanga a endla mfungho wa Vunharhu-un’we hilaha a a tolovele hakona. Ku nga ri khale, va n’wi vule “mugwinehi” naswona van’wana a va lava ni ku n’wi ba. Hiloko a rhurhela eAddis Ababa, laha a fikeke a sungula ku dyondzeriwa Bibele. Elsa u ve Mbhoni leyi khuvuriweke swin’we ni swirho swin’wana swa nkombo endyangwini wa ka vona. Nuna wa yena ni n’wana wa vona va karhi va endla nhluvuko lowunene.

Côte d’Ivoire: Anderson u siye broxara leyi nge I Yini Leswi Xikwembu Xi Swi Languteleke Eka Hina? eka n’wini wa xitolo loyi a rhandzaka ku hlaya Bibele. Ku nga ri khale va sungule ku dyondza swin’we Bibele. Wanuna loyi u tsakisiwe hi dyondzo leyi nge “Vutomi Bya Ndyangu Lebyi Tsakisaka Xikwembu.” U te: “A ndzi nga swi tivi leswaku ha un’we wa vatekani u ni ntirho lowu a faneleke a wu endla evukatini bya vona. Loko ndzi fika ekaya nivusiku a ndzi nga swi lavi leswaku nsati wa mina a ndzi vutisa leswaku ndzi huma kwihi. A ndzi ku eka yena, ‘Hi mina wanuna laha mutini, ndzi ya kun’wana ni kun’wana laha ndzi lavaka kona; wena u wansati, ntirho wa wena i ku khathalela ndyangu.’ Sweswi loko ndzi huma entirhweni ndzi namba ndzi kongoma ekaya, ndzi fika ndzi pfuna nsati wa mina hi mintirho ya le ndlwini.”

Kenya: Xifanyetana xa malembe ya nkombo lexi nga eka ntanga mbirhi, xi twe leswaku ku ta endza mulanguteri wa xifundzha. Loko ka ha sele vhiki, xi ye eka nhloko ya xikolo xi kombela ku ya eminhlanganweni leyi a yi ta khomiwa hi Ravumbirhi nindzhenga. Nhloko ya xikolo yi xi pfumelerile. Hambiswiritano, hi xamundzuku xa kona xi mukisiwile, xi byeriwa leswaku xi ta ni vatswari va xona swin’we ni muendzi loyi xi vulaka leswaku u va endzerile. Hiloko mulanguteri wa xifundzha a ya exikolweni ni tata wa xifanyetana lexi. Nhloko ya xikolo yi hlamarile ku vona leswaku hakunene muendzi yoloye u tile nileswaku u gonye xitsunga awara hinkwayo leswaku a ta vonana ni nhloko ya xikolo. U amukele minkandziyiso naswona ku sukela siku rero u ve ni vunghana naswona a a ri ni ntirhisano.

Malawi: A ku ri ni wanuna un’wana loyi a a famba hi xikanyakanya kutani a a tala ku karhata makwerhu un’wana loko a ri ensin’wini. Loko a n’wi vona a ri eku chumayeleni, a a chika exikanyakanyeni xa yena a ringeta ku pfuxa mholovo. U kale a ringeta ni ku tekela makwerhu loyi Bibele ya yena. Siku rin’wana loko a ri karhi a hundza hi xikanyakanya xa yena makwerhu a a ri karhi a fambisa dyondzo ya Bibele. U te loko a ku u ringeta ku lunghisa swo karhi eka xikanyakanya xa yena, hiloko voko ra yena ri nghena exikarhi ka vhilwa ra xikanyakanya kutani a vaviseka tintiho. Hambileswi a a twa ku vava ngopfu, a nga kona ni un’we eka vanhu lava a va yime kwalaho la n’wi pfuneke handle ka makwerhu loyi, u n’wi bandhichile a tlhela a n’wi pfuna leswaku a yisiwa exibedlhele. Siku rin’wana makwerhu u endzele wanuna loyi ekaya rakwe. Wanuna loyi a a ri ni tingana hikwalaho ka leswi a tshameke a swi endla eka makwerhu, u vule leswaku a a byeriwe mavunwa hi hina. U te: “N’wina mi gandzela Xikwembu xa ntiyiso. A ndzi nga anakanyi leswaku u nga ndzi pfuna endzhaku ka leswi ndzi ku endleke swona.”

Cameroon: Makwerhu wa xisati la ha riki muntshwa a a tshame exibedlhele ekamareni ro rindza eka rona, leri a ri tele hi vanhu, hiloko ku nghena mukhalabye la vabyaka. Leswi a ku nga ri na xitulu, mukhalabye loyi u boheke ku yima. Makwerhu loyi u ri: “Ndzi n’wi twele vusiwana kutani ndzi n’wi nyika xitulu xa mina a tshama eka xona. Vanhu va hlamarile hikuva sweswo a swi vula leswaku ndzi ta hlwela ku vona dokodela. Hiloko wansati un’wana a ta eka mina a ndzi vutisa leswaku ndzi wa vukhongeri byihi. Ndzi n’wi byele leswaku ndzi Mbhoni ya Yehovha. U ndzi bumabumerile hikuva hi ku ya hi yena a va talanga vantshwa lava nga endlaka hilaha ndzi endleke hakona. Ndzi n’wi nyike xiphephana ndzi tlhela ndzi nyika ni lavan’wana. Ndzi kote ku hlamula swivutiso swo tala leswi va swi vutiseke. Van’wana lava ndzi vulavuleke na vona va cince langutelo leri a va ri na rona hi Timbhoni ta Yehovha kutani va ti pfumelela ti va endzela emakaya ya vona.”

Togo: Loko vamakwerhu van’wana va ri karhi va chumayela ensin’wini leyi nga ekule, va hlangane ni jaha leri tsakeke loko ri va vona. Ri va kombe tibuku timbirhi leti ri kopeke eka tona buku hinkwayo leyi nge U Nga Hanya Hi Masiku aParadeyisini eMisaveni ni xiphemu xa leyi nge “Make Sure of All Things.” Ri vone tibuku leti ekaya ra mufundhisi un’wana loyi ri heteke nkarhi wo karhi ri tshama ekaya ra yena. Mufundhisi loyi a a ri ni tikhabodo timbirhi to hlayisa tibuku, yin’wana a yi ri ya tibuku leti a ti rhandzaka ngopfu kasi leyin’wana a yi ri ya leti nga riki “ta nkoka.” Jaha leri ri vone tibuku teto eka khabodo ya tibuku leti nga riki ta nkoka. Ri hlaye matluka ma nga ri mangani ya yin’wana ya tibuku leti kutani ri yi rhandza. Leswi a swi nga ta koteka leswaku ri yi teka naswona a ri nga tivi leswaku ri nga yi kuma kwihi yin’wana, ri lo yi kopulula kunene. Loko ri sungula ku byela van’wana hi leswi ri swi hlayeke, mana wa rona ni mufundhisi yoloye va sungule ku ri kaneta. Vamakwerhu va ri siyele tibuku naswona va karhi va ri pfuna leswaku ri kula hi tlhelo ra moya.

Afrika Dzonga: Thandi la nga Mbhoni, u komberiwe hi muthori wa yena leswaku a vulavula ni mutirhi-kulobye la vuriwaka Bella, loyi a swi nga n’wi fambeli kahle evukatini. Nuna wa Bella, la nga phorisa, a a n’wi bukutela naswona a a n’wi dyisa mbitsi kutani Bella a a lava ku dlaya vukati. Thandi u n’wi nyike tibuku timbirhi leti nge Xihundla Xa Ntsako eNdyangwini kutani a n’wi khutaza leswaku leyin’wana a yi nyika nuna wa yena. Endzhaku ka vhiki, Thandi u vulavule na Bella kutani a kuma leswaku nuna wa yena u le ku yi hlayeni buku liya a nga n’wi nyika yona nileswaku se va hanyisana hi ku rhula. Endzhaku ka tin’hweti tinharhu, Bella u byele Thandi leswaku Xikwembu xi ponise vukati bya yena hi xikhongelo ni hi buku leyi nge Xihundla Xa Ntsako eNdyangwini. Loko muthori wa Bella a twa hi mhaka leyi, u vule leswaku vatirhi va yena hinkwavo va 2 000 va nyikiwa kopi ya buku leyi. Ku ta fikela sweswi, Thandi se u fambise tibuku ta 96 leti nge Xihundla Xa Ntsako eNdyangwini eka vatirhi-kulobye. Khamphani leyi yi humese munyikelo entirhweni wa misava hinkwayo wa Timbhoni ta Yehovha.

◼ MATIKO YA AMERIKA

Nhlayo ya matiko: 56

Nhlayo ya vaaka-tiko: 879 073 403

Nhlayo ya vahuweleri: 3 199 835

Nhlayo ya tidyondzo ta Bibele: 3 022 276

Venezuela: Ndyangu wa Timbhoni wa ha ku ngheniseriwa riqingho endlwini ya wona. Hambiswiritano, wu sungule ku amukela tinqingho leti lahlekeke ta vanhu lava a va lava ku vulavula ni mungoma wa swilo swa le mpfhukeni, loyi a a ri exitichini xa kwalaho xa thelevhixini hi nkarhi wolowo. Hiloko ndyangu lowu wu endla xiboho xo tirhisa nkarhi lowu hi vutlhari. Wu tirhise buku leyi nge Ku Hlamulana Hi Matsalwa, leswaku wu lunghiselela rungula ro karhi ni tindzimana ta Bibele leti wu nga ta ti hlayela vanhu loko va ba riqingho. Mana wa kona, Graciela u tirhise vutlhari. Siku rin’wana munhu un’wana u be riqingho a ku: “Halo. Xana hi wena xikwembu-kati xa tinyeleti?”

Yena u hlamule a ku: “Xewani. Hi mina Graciela, wena u mani?”

La beke riqingho u hlamule a ku: “Hi mina Carmen.”

Hiloko manana loyi a ku: “Carmen, ha yini u lava ku vulavula ni xikwembu-kati xa tinyeleti? Xana u lava mpfuno kumbe xitsundzuxo?”

Carmen u byele makwerhu leswaku u ni xiphiqo lexi n’wi dyaka. Graciela u n’wi hlamusele hi musa leswaku a nga yi kuma kwihi ndzayo leyinene kutani a hlayela Carmen tindzimana to karhi eBibeleni. Hiloko a n’wi vutisa a ku: “Xana a wu voni swi antswa leswaku hi vulavula ni Muvumbi wa hina loko hi lava nkongomiso lowu tshembekaka sweswi ni le nkarhini lowu taka?” Hiloko Carmen a n’wi byela leswaku kahle-kahle u tshama a dyondza Bibele ni Timbhoni ta Yehovha, kutani va endle malunghiselelo yo yisa dyondzo yoleyo emahlweni. Hikwalaho ka xihoxo xa riqingho rero, swirho swa ndyangu wa Graciela swi vulavule ni vanhu vo tala lava a va lava mpfuno, hakanyingi a swi va chumayela, swi va khutaza ku yingisela Timbhoni loko ti va endzerile ni ku va byela leswaku va ta eminhlanganweni eHolweni ya Mfumo ya le mugangeni wolowo!

Colombia: Hi March 2005, makwerhu wa xisati la tshamaka eCali u yiveriwe movha. Loko wu kumekile endzhaku ka masiku ma nga ri mangani, yena ni nuna wa yena la nga riki Mbhoni va ye kwale movha wu nga kona va fika va yimela maphorisa leswaku ma ta. Leswi maphorisa ma hlweleke, va teke movha va famba. Kambe, leswi movha lowu a wu tirhiseriwe swin’wana swa vugevenga, mpatswa wolowo wu yimisiwe hi maphorisa endleleni kutani wu khomiwa wu ya pfaleriwa. Loko makwerhu wa xisati a nghena ekhotsweni, u sungule ku chumayela kutani ku nga ri khale se a a dyondza Bibele ni vabohiwa vo hlayanyana. Un’wana wa lava a va dyondzeriwa u ntshunxiwile kutani a kombela makwerhu loyi wa xisati leswaku loko a huma ekhotsweni a nga ha dyi nkarhi, a ta va ta ya emahlweni va dyondza. U tlhele a byela wanuna loyi a a tshama na yena leswaku u lava va tekana leswaku a ta tsakisa Xikwembu.

Hambileswi makwerhu loyi wa xisati a a ha ku khongelela leswaku a kota ku kuma nkarhi lowu engetelekeke wo chumayela, a a nga si tshama a anakanya leswaku u ta chumayela ekhotsweni! U byeriwe leswaku u ta hunguteriwa nkarhi wo tshama ekhotsweni, kambe leswi a voneke ndlela leyi Yehovha a n’wi sirheleleke ha yona, nileswi a a enerisekile hi ntirho wa yena wo chumayela, u arile. Yena ni nuna va ntshunxiwe endzhaku ko heta masiku ya 45 ekhotsweni. U vule leswaku ripfumelo ra yena ri tiyisiwile. Loko va ha ri ekhotsweni, nuna wa yena u endzeriwe hi vamakwerhu va tlhela va n’wi pfuna. Endzhaku ko heta malembe ya 20 a nga toviwi helo hi mhaka yo tirhela Xikwembu, u sungule ku va kona eminhlanganweni naswona u vule leswaku u ta swi tsakela ku dyondzeriwa Bibele. Makwerhu loyi wa xisati u hambeta a endzela ekhotsweni leswaku a ya dyondza Bibele ni vabohiwa va xisati. U nkhensa Yehovha swinene leswi a hlamuleke xikhongelo xa yena nileswi a n’wi pfuneke hi tindlela to tala swonghasi!

Brazil: Renildo u fe mahlo naswona emalembeni mambirhi lama hundzeke wa ha ku tshika ku kombela mali eswitolo swa muganga wa ka vona ni le madorobeni ya le kusuhi. Hambileswi a a kombela mali hi xikongomelo xo engetela eka mudende lowu a a wu kuma, u kume mali yo tala lerova a kota ku xava movha ni yindlu leyi nga ni fanichara yo xonga, a tlhela a xava swakudya swo tala leswi swisiwana swa ndhawu yoleyo a swi nga swi koti ku swi xava. Dyondzo ya Bibele ni Timbhoni ta Yehovha yi n’wi pfunile leswaku hakatsongo-tsongo a va ni langutelo ra moya evuton’wini kutani sweswo swi n’wi endle a va ni xivindzi xo teka goza ra nkoka. Endzhaku ko bula ni nsati wa yena ni vana va yena vanharhu hileswi va nga swi endlaka leswaku va kota ku hanya hi mali leyitsongo, Renildo u tshike ku kombela mali eswitolo ni le madorobeni. Ku nga ri khale, yena ni ndyangu wa yena va endle nhluvuko hi tlhelo ra moya kutani va khuvuriwa entsombanweni wa muganga. Sweswi Renildo a nga ha tiviwi hi ku kombela mali kambe u tiviwa hi ku hisekela ku chumayela mahungu lamanene naswona u heta tiawara ta 40 hi n’hweti ensin’wini.

Ecuador: Phayona rin’wana a ri tolovele ku yisa timagazini eka n’wini wa xitolo xin’wana la nga Muchayina. N’wini wa xitolo a a tala ku endzeriwa hi munghana wa yena loyi na yena a a ri ni xitolo. Munghana wa yena u vone timagazini teto kutani a ti hlaya. Leswi a swi hlayeke swi n’wi tsakisile lerova a tsalela rhavi ra le Hong Kong, a kombela timagazini leti engetelekeke, Bibele ni buku leyi nge Tshinela Eka Yehovha. U tlhele a kombela ku dyondzeriwa Bibele. Rhavi ra le Hong Kong ri tsalele ra le Ecuador kutani ku nga ri khale u endzeriwe hi maphayona ma tamele minkandziyiso leyi a yi kombeleke. Ma tlhele ma vuya endzhaku ka mune wa masiku. Xana se a a yi hlayile minkandziyiso yoleyo? U te: “Ndzi sungule ku hlaya ku sukela eka Genesa kutani se ndzi le ka Ezekiyele, kambe ku ni leswi ndzi nga swi twisisiki. Ha yini Yehovha a ri ni musa eka hina vanhu? Leswi swilo hinkwaswo swi nga swa yena, ha yini a tikarhata swonghasi leswaku a hi pfuna? Xana u ta vuyeriwa hi yini?” Va sungule ku dyondza na yena kutani a nga ha yimayimanga, u nambe a sungula ku ya eminhlanganweni. U tshike ku dzaha ni ku ya eka tikhasino. Loko ku fika nkarhi wo ya eminhlanganweni, u pfala xitolo xa yena a ya eminhlanganweni. U ta va muhuweleri la nga khuvuriwangiki ku nga ri khale naswona u dyondzisa vamakwerhu va kwalaho Xichayina hikuva va lava ku pfuna Machayina lama nga le tikweni rero.

Honduras: Le Guatemala hi January 2005, makwerhu wa xisati loyi vito ra yena ku nga Flor, u chumayele mufana wa malembe ya 15 hi xitshuketa, loyi vito ra yena ku nga Sebastián, la tirhaka ku hlekisa vanhu eserekisini. U tsakele leswi va buleke ha swona kambe a a nga ri na nkarhi wo yisa bulo emahlweni. Siku rin’wana u wile a ri ehenhla ka tende lerikulu kutani nenge wa yena wu bhandhichiwa hi semendhe. Leswi a a nga koti ku endla nchumu, a a ri ni nkarhi wo tala wo anakanya hi timhaka ta moya. Flor a a n’wi endzela siku rin’wana ni rin’wana kutani a n’wi hlamula swivutiso swa yena swo tala. Ku nga ri khale, Doris, mana wa Sebastián loyi a fambaka ehenhla ka ntambhu eserekisini, na yena u tsakele rungula ra mfumo, kutani Flor a sungula ku dyondza Bibele na yena. Dalila, loyi a a tlanga trapeze, na Sofía, loyi a a tirha ku cina, va tshame va dyondzeriwa Bibele hi Timbhoni kutani na vona swin’we ni vana va vona a va va kona loko ku dyondziwa. Se a ku dyondziwa ni vanhu va nkombo. Flor u hete tin’hweti timbirhi a ri karhi a dyondza na vona hinkwavo, ka ntlhanu ku ya ka nkombo hi vhiki.

Loko ku fika nkarhi wa leswaku serekisi yi ya eHonduras, Flor u va khutaze leswaku va fika va lava Timbhoni emadorobeni lawa va ma endzelaka leswaku va ta ya emahlweni va dyondza ni ku ya eminhlanganweni. Loko va fika edorobeni ra Copán, va ye emahlweni va dyondza ni maphayona yo hlawuleka lawa a ma averiwe edorobeni rero. Loko va rhurhela edorobeni ra Gracias, phayona rin’wana ro hlawuleka ri yise dyondzo yoleyo emahlweni. Loko ku fika nkarhi wa leswaku va ya edorobeni ra Santa Rosa de Copán, mpatswa wa varhumiwa wu beriwe riqingho, wu byeriwa ku yisa dyondzo yoleyo emahlweni swa mavhiki manharhu.

I dyondzo yo hlawuleka hikuva ku hlangana vanhu va nkombo ku ya ka va khume etendeni lerikulu ra serekisi. Va kombele ku dyondzeriwa kambirhi hi vhiki naswona va lunghiselela kahle, ku katsa ni xinhwanyetana xa malembe ya kaye hi vukhale lexi vuriwaka Julietta, lexi tlangaka trapeze. Loko va te eminhlanganweni, hi xitalo va huma hi ku tsutsuma loko yi hela leswaku va ta fika va cinca swiambalo va lunghekela ku sungula ka serekisi. Va tiyimiserile ku endla matshalatshala wolawo.

◼ OCEANIA

Nhlayo ya matiko: 30

Nhlayo ya vaaka-tiko: 35 237 787

Nhlayo ya vahuweleri: 93 961

Nhlayo ya tidyondzo ta Bibele: 47 864

New Zealand: Loko makwerhu wa xisati la ha riki muntshwa la vuriwaka Cecilia, a ri karhi a hlaya broxara leyi sekeriweke eBibeleni hi nkarhi wo wisa ninhlikanhi, ku fike mutirhi-kulobye a lava ku tiva leswi broxara yoleyo yi swi tameleke. Loko Cecilia a ri karhi a n’wi hlamusela, u tikume se a yingiseriwe hi vanhu va 15, ku katsa ni muthori wa yena, loyi endzhaku a n’wi vitaneleke ehofisini ya yena. U n’wi byele leswaku u tsakisiwe hi leswi a swi tweke. U byele vatirhi leswaku kamara ro dyela ninhlikanhi ri ta tirhiseriwa ku bula hi Bibele a tlhela a engetela nkarhi wa Cecilia wa ku wisa ninhlikanhi wu va awara ematshan’weni ya timinete ta 30 leswaku na yena a ta kuma nkarhi wo dya ni wo bula hi Bibele. Ku hele mune wa mavhiki vanhu lava vaka kona ebulwini leri va ri kwalomu ka kaye ku ya eka 15. Vavasati vambirhi entlaweni lowu se va dyondzeriwa Bibele naswona va endla nhluvuko lowunene nakambe va chumayela swirho swa mindyangu ya vona ni vanghana.

Tuvalu: Peteli, loyi vito ra yena ri vulaka “Bethele,” i xinhwanyetana xa malembe ya 14 hi vukhale lexi nga twiki etindleveni. U ni maxaka lama nga Timbhoni ta Yehovha kutani loko a va endzerile u ye eminhlanganweni kambe leswi a nga twiki etindleveni naswona a nga kotiki ku hlaya a nga vuyeriwanga hi nchumu. Hiloko a tidyondzisa ku twisisa leswi munhu a swi vulaka hi ku n’wi languta nomu. Ku nga ri khale, Dale, makwerhu wa xisati la nga murhumiwa, u sungule ku dyondza na yena hi broxara leyi nge Tsakela Vutomi eMisaveni Hi Masiku! Dale u n’wi dyondzele Bibele hi ku tirhisa swifaniso ni rungula leri fambisanaka na swona a tlhela a n’wi dyondzisa ku hlaya. Lowu a wu ri ntlhontlho lowukulu hikuva Dale a a ha ku fika exihlaleni xexo naswona a a ha dyondza ririmi ra kona, nakambe Peteli a a fanele a pfuniwa ku tiva ndlela leyi a faneleke a famba-fambisa ririmi ra yena ha yona leswaku a ta kota ku vula marito kahle. Peteli i munhu wo tiyimisela naswona wa tikarhata. Ku nga si hela tin’hweti tinharhu se a a tiva ku hlaya. Yena na Dale, va lunghiselela swin’we leswaku loko va ri eminhlanganweni a ta kota ku hlamula. Peteli u lunghiselela kahle a nga si ya eminhlanganweni kutani a hlamula a nga chuhanga nikatsongo. U tshamela hi le mahlweni eHolweni ya Mfumo leswaku a ta kota ku vona nomu wa xivulavuri. Dale u ri: “Yehovha i munghana wa xiviri wa Peteli naswona hakanyingi u xiririka mihloti loko hi vulavula hi nkarhi lowu ‘tindleve ta lava nga twiki ti nga ta pfuriwa.’”—Esa. 35:5.

Samoa: Elena, la nga phayona a a dyondza Bibele ni wansati la nghenaka kereke ya Methodist, loyi yindlu ya yena yi langutaneke ni ya mufundhisi wa yena. A va dyondzela erikupakupeni ra yindlu, laha mufundhisi a a va vona loko va ri karhi va dyondza. Siku rin’wana mufundhisi u tile loko va ri karhi va dyondza. N’wini wa muti u n’wi vutisile leswaku u lava yini. U hlamule a ku, “Ndzi lavana ni xingulubyana xa mina. Hi mpfhuka xi lahleka n’hweti leyi nga hundza.” Hiloko a languta Elena a ku: “Xana wa swi tiva leswaku ha yini xingulubyana xa mina xi balekile?” Leswi Elena a a anakanya leswaku u vulavula hi xingulubyana xa xiviri, u vule leswaku xi balekisiwe hileswi a tshamelaka ku xi nyika swakudya leswi fanaka siku ni siku. Kutani a ringanyeta leswaku a cinca swakudya leswi a xi nyikaka swona. Elena u hlamarile loko mufundhisi a kombetela eka xichudeni xa yena, a ku: “Hi lexi xingulubyana xa mina!” Kutani a ku: “U yive xingulubyana xa mina. U namba u tshika ku dyondza na yena hi nomu lowu.” (Vafundhisi va xiximiwa swinene eswimitanini swa le Samoa.) Wansati loyi u ririle. Elena u ringete ku n’wi chavelela, a n’wi byela leswaku Bibele yi profete leswaku leswi swi ta endleka eka lava va dyondzaka Bibele.

Hiloko a cinca nkarhi ni ndhawu leyi va dyondzelaka eka yona. Elena u ri: “Ematshan’weni yo dyondzela erikupakupeni ra yindlu, hi dyondzele exikamaranini lexi nga le ndzhaku ka yindlu ya wansati loyi. A xi hisa ngopfu kambe hi kote ku ya emahlweni hi dyondza. Ku hele tin’hweti timbirhi hi ri karhi hi dyondzela kwalaho. Hiloko siku rin’wana loko hi heta ku pfula hi xikhongelo, mufundhisi a ku humelelee, hi nga n’wi rindzelanga. A ndzi anakanya leswaku u tele ku ta hi tshikisa ku dyondza, kambe a a nga telanga swona.”

U tshamile a yingisela a tlhela a vutisa swivutiso. Loko hi heta ku dyondza, u byele wansati loyi a ku: “Ndzi lava ku ku byela swin’wana. Tolo nimadyambu hi ye edorobeni, kambe loko hi vuya movha wa hina wu fele ekusuhi ni ximutana xin’wana. Ku fike mpatswa wun’wana lowa ha riki wuntshwa ni jaha rin’wana va hi pfuna ku wu lunghisa, kambe a wu lunghanga hiloko va hi koka va hi yisa ekaya ra vona laha hi nga fika hi siya movha wa hina kona kutani va hi heleketa ekaya. Loko ndzi nghena emovheni wa vona, ndzi vone timagazini ta Xihondzo xo Rindza ni minkandziyiso yin’wana. Hiloko swi ta emianakanyweni ya mina leswaku swi nga endleka va nghena kereke yin’we ni wansati la ku endzelaka.”

Wansati loyi u hlamule a ku: “Kunene u tiyisile. I vana va Elena.” U kombele ndzivalelo kutani a ku: “Hambeta u endla leswi u swi endlaka. Se ndza swi tiva leswaku Timbhoni ta Yehovha i vanhu lavanene naswona va ni rirhandzu. Ndzi rivalele eka leswi ndzi swi vuleke. Lunghiselelo ro fana ni leri ri ta pfuna vanhu va kereke ya mina leswaku va va ni mahanyelo lamanene.” Ku sukela siku rero, a va ha dyondzelanga exikamaranini lexiya xo hisa, kambe va dyondzele erikupakupeni emahlweni ka yindlu, laha ku baka moya wo hola, mufundhisi a va langutile naswona a nga tlhelanga a va kavanyeta.

Saipan: Exihlaleni lexi, ntiyiso wa Mfumo wa Xikwembu wu yi khumbe swinene mbilu ya wansati la vuriwaka Helen. A a dyondzeriwa Bibele hi murhumiwa naswona a a lava ku nkhensa leswi a dyondzisiwaka swona. Siku rin’wana loko va heta ku dyondza, Helen u nyike murhumiwa xinkwamana xo karhi kutani a ku: “Ndzi xisiwana kambe ndzi lava ku nyikela entirhweni wo chumayela.” Exinkwamanini xexo a ku ri ni perela yo xonga ya le xihlaleni xa kwalaho xa Pohnpei. Helen u vule leswaku swi ta antswa loko perela yoleyo yo xavisiwa leswaku mali ya kona yi ta va munyikelo. Perela leyi a yi ri ya risima swinene naswona n’wini wa xitolo xa swin’wetsin’wetsi a swi n’wi karhatanga ku yi xava hi R680. Mali leyi yi tlherisiwe eka Helen leswaku a vona leswaku u ta nyikela hi mali muni, kambe u yi arile, a ku: “Yi hoxeni hinkwayo ebokisini ra munyikelo.” I yini lexi n’wi susumeteleke ku hanana hi ndlela yoleyo? Hilaha Yesu a vuleke hakona eka xifaniso xa yena, Helen u kume perela ya risima, ku nga ntshembo wa Mfumo.—Mat. 13:45, 46.

◼ YUROPA

Nhlayo ya matiko: 46

Nhlayo ya vaaka-tiko: 731 536 437

Nhlayo ya vahuweleri: 1 498 142

Nhlayo ya tidyondzo ta Bibele: 717 797

Belarus: Pavel na Mayya, vatekani lava nga maphayona yo hlawuleka a va ri exikolweni xa maphayona. Hiloko madyambu man’wana va navela ku famba-famba va bela hi moya, va nga kunguhatanga ku ya ensin’wini. Kambe va fambe va tamele xibukwana lexi nge Good News for People of All Nations. Loko va vona vavanuna vambe vambirhi va va chumayerile. Va kume leswaku vavanuna lava va huma ePakistan naswona va vulavula Xiurdu. Hiloko va tsundzuka leswaku va khome xibukwana lexi nge Good News for People of All Nations, kutani va va nyika xona leswaku va tihlayela. Un’wana wa vona u swi tsakerile leswi a swi hlayeke kutani a amukela dyondzo ya Bibele. Vhiki rero u ve kona eminhlanganweni ya vandlha. Ku hlanganyela ka yena ni vanhu va Yehovha ku n’wi khutazile swinene lerova a ku: “Eka malembe manharhu lawa ndzi ma heteke ndzi ri eMinsk, i ro sungula ndzi hlangana ni Vakreste va ntiyiso.” Wanuna loyi wa ha ya emahlweni ni dyondzo ya Bibele.

Britain: Richard i nkulu la nga voniki kutani loko a famba u kongomisiwa hi mbyana leyi leteriweke, leyi vitaniwaka Irvin. Ntirho wa yindlu ni yindlu a wu hlanganisa Irvin nhloko hikuva u dyondzisiwe leswaku u fanele a tsundzuka ndhawu yin’wana ni yin’wana leyi Richard a nga tshama a ya eka yona. Loko Richard a vika mhaka leyi eka vanhu lava n’wi nyikeke mbyana leyi, va n’wi byele leswaku ntirho lowu wa tika, Irvin a nge swi koti ku wu endla. Va ringanyete leswaku Richard a famba na Irvin ensin’wini ya mabindzu, leswaku mbyana leyi yi ta hatla yi tolovela tindhawu leti a nga ta hamba a ya eka tona. Richard a swi n’wi tikela ku chumayela etindhawini ta mabindzu, kambe hi ku pfuniwa hi Irvin u hatle a swi tolovela.

Hungary: Mulanguteri wa xifundzha u te: “Hi May 2004, hi kume wanuna la vitaniwaka Csaba, a a ri karhi a tirha entangeni. U vule leswaku yena i xirho xa huvo ya kereke. Hi bule na yena katsongo kutani hi famba. Endzhaku ka masiku mambirhi hi te ni buku leyi nge Vutivi kutani hi sungula dyondzo ya Bibele na yena. Loko se hi lava ku famba u vule leswaku xitofu xa yena a xi tirhi kahle. Ndzi n’wi byele leswaku ku ni munhu la swi tivaka kahle ku lunghisa switofu naswona ndzi ta teka nomboro ya Csaba ndzi ya n’wi nyika yona. Vamakwerhu va tlhelerile nakambe va lava ku yisa bula emahlweni, hiloko Csaba a va tlherisela buku ya vona, a tshika ku dyondza. Hi ku famba ka nkarhi, makwerhu loyi ndzi n’wi kombeleke leswaku a ya lunghisa xitofu u yile. Makwerhu loyi u hete masiku manharhu a ri karhi a lunghisa xitofu xa Csaba naswona u hete tiawara to tala a ri karhi a n’wi chumayela. Csaba u tlhele a sungula ku dyondza Bibele, nsati wakwe na yena u hlanganyerile edyondzweni yoleyo. Hi May 2005 se a a ri muhuweleri la nga khuvuriwangiki. Loko ndzi endzela vandlha leri, ndzi fambe na yena loko a huma nsimu ro sungula. Xinghana xa vamakwerhu ni ku tiyimisela ka vona ku n’wi pfuna swin’we ni ndlela leyinene leyi Timbhoni ti tikhomaka ha yona, leyi hambaneke swinene ni ya vanhu va kereke yakwe, swi endle leswaku a endla nhluvuko hi tlhelo ra moya.”

Belgium: Makwerhu un’wana a a hamba a endzela wansati un’wana loyi yindlu yakwe yi nga le makumu ka xitarata naswona minkarhi hinkwayo a a vulavula na yena va yime enyangweni. Siku rin’wana loko makwerhu loyi a huma emutini lowu, ku te wanuna un’wana, a ku: “Vanghana va mina va ndzi byele leswaku n’wina Timbhoni ta Yehovha a mi lunghanga. Kambe ndzi mi yimelerile, ndzi va byela leswaku va hemba. Phela, minkarhi yo tala loko ndzi hundza hi ndlela ni mbyana ya mina leswaku yi bela hi moya, a ndzi hamba ndzi tumbela le khonweni ndzi yingisela leswi mi bulaka ha swona ni wansati wa muti lowuya. Minkarhi yo tala a mi vulavula hi ku pfuxiwa ka vafi ni Paradeyisi. Ndza swi navela ku tiva leswi engetelekeke hi mhaka leyi. Nsati wa mina u le xibedlhele, u tshunguriwa timbanga hikuva u tlhaveteriwe ka 17. A ndzi na ku rhula, a ndzi tivi leswaku ndzi nga endla yini.” Wanuna loyi u sungule ku dyondzeriwa Bibele ekaya.

Italy: Siku rin’wana nindzhenga, makwerhu a a ri karhi a vuya hi le ntirhweni. Loko a ri kusuhi ni ku fika laha a tshamaka kona, u hundziwe hi vavanuna vambirhi lava fambaka hi xithuthuthu. Loyi a tshameke endzhaku ka muchayeri u humese xibamu, a kombetela makwerhu loyi a n’wi lerisa leswaku a yimisa movha wakwe, kutani makwerhu a endla tano. Hiloko wanuna la khomeke xibamu a pfula nyangwa wa movha a byela makwerhu leswaku a huma a n’wi nyika ni mali hinkwayo leyi a nga na yona eswikhwameni swakwe. Makwerhu u endle tano. Hiloko wanuna la nga ni xibamu a nghena a tshama exitulwini xa muchayeri a lunghekela ku famba. Kambe, loko a vona Buku Ya Lembe Ya Timbhoni Ta Yehovha emovheni, u vutisile a ku, “Xana u Mbhoni ya Yehovha?”

Makwerhu u hlamurile a ku, “Ina, ha yini u vutisa?” Wanuna loyi a nga hlamulanga, u lo huma emovheni xikan’we-kan’we, a kombela ku rivaleriwa, a byela makwerhu leswaku a tlhelela emovheni wakwe. Hi hala tlhelo, xigevenga lexin’wana a xi ri karhi xi n’wi byela leswaku a n’wi tlherisela ni mali leyi a nga n’wi tekela yona.

Loko wanuna loyi a khomeke xibamu a ri karhi a pfalela makwerhu loyi nyangwa wa movha, u tlhele a ku, “hi kombela u hi rivalela.” Vavanuna lava a va vulanga leswaku i yini lexi va endleke va cinca mianakanyo, kambe ntiyiso hi leswaku a va ti xixima Timbhoni.

Sweden: Hi April 2003 muhuweleri u hlangane ni wanuna un’wana loyi a amukeleke buku leyi nge Vutivi. Wanuna loyi a a ri ni malembe ya kwalomu ka 90 hi vukhale. U tshama a tsendzeleka ni tiko leri a teketela swifaniso swa tikereke to hambana-hambana. Leswi swi endle leswaku a va xirho xa ntlawa lowu xiximekaka eKerekeni ya le Sweden. Muhuweleri u vutise wanuna loyi loko a tshame a ri vona vito ra Xikwembu eka yin’wana ya tikereke leti, hiloko a n’wi komba xifaniso lexi nga ni vito ra Xikwembu eka yin’wana ya tikereke ta le Sweden. Leswi swi endle wanuna loyi a lava ku tiva leswi engetelekeke. U amukele dyondzo ya Bibele naswona a a yi rhandza swinene. U te: “Ku sukela ndza ha ri ntsongo a ndzi hlaya Bibele naswona a ndzi anakanya leswaku ndzi yi twisisa kahle. Kambe leswi ndzi swi tivaka sweswi swi tele ngopfu ku tlula leswi a ndzi swi tiva.” Ku nga ri khale u sungule ku va kona eminhlanganweni eHolweni ya Mfumo. Hi June 2005, loko a ri ni malembe ya 91, u nyikele nkulumo ya yena yo sungula eXikolweni xa Vutirheli bya le Tilweni—yo hlaya Bibele. Sweswi se i muhuweleri la nga khuvuriwangiki naswona u lunghiselela ku ya khuvuriwa. U yingisele Timbhoni ta Yehovha hi 2003 endzhaku ka loko a twe ku vulavuriwa ku biha ha tona eka TV. A a lava ku hi tiva kahle naswona sweswi se wa hi tiva.

[Xifaniso lexi nga eka tluka 43]

Svetlana, eKyrgyzstan

[Xifaniso lexi nga eka tluka 47]

Lucy, eUganda

[Xifaniso lexi nga eka tluka 52]

Graciela, eVenezuela

[Xifaniso lexi nga eka tluka 55]

Renildo ni ndyangu wa yena, eBrazil

[Xifaniso lexi nga eka tluka 57]

Dale na Peteli, eTuvalu

[Xifaniso lexi nga eka tluka 57]

Cecilia, eNew Zealand

[Xifaniso lexi nga eka tluka 58]

Elena, eSamoa

[Xifaniso lexi nga eka tluka 61]

Pavel na Mayya, eBelarus

[Xifaniso lexi nga eka tluka 61]

Richard ni mbyana yakwe Irvin, eBritain